Mateu

27 Sev mbu aven yô, upristi mba tamen man mbatamen mba nongoior la tume idyu, gba henen gbenda u vea wua Yesu yô. 2 Nahan ve kange un, ve yem a na ve za na un sha ikyev i gomna Pilatu.

3 Tsô Yuda u tee Yesu la, nengen ér i kure Yesu ijir ér i wua un yô, ishima na un ibo, nahan a za hide a agbenger a azurfa a 30 la, a na upristi mba tamen man mbatamen mbara, 4 a kaa ér: “M er isholibo, sha u nan ne awambe a orshôô.” Kpa ve kaa a na ér: “Ka nyi yase sha kwagh la? Ngula ka kwagh wou!”* 5 Tsô a gema agbenger a azurfa la a tsenda ken tempel, a kar a due a za sende iyol na. 6 Kpa upristi mba tamen kura agbenger a azurfa la, ve kaa ér: “Doo u a haa a ken icighan akwati u inyar ga, sha ci u ka inyaregh ki awambegh.” 7 Mba tumen idyu kera yô, ve gema inyaregh kira ve yam ijiir i ormaantyegh,* ve ver ér i lu ijiir i iin mba van a va. 8 Maa i hingir u yilan ijiir la ér Inya i Awambe zan zan nyian. 9 Nahan kwagh u i ôr sha ikyev i profeti Yeremia la maa kure sha mi, ér: “Ve kura agbenger a azurfa 30 a i lumun u kimbin sha ityough ki or shon yô. Man lu ishe i ônov mba Iserael mbagenev nenge ér a kuma sha mi je la, 10 ve gema a ve yam ijiir i ormaantyegh a mi, vough er Yehova* kaam nahan.”

11 Yesu va til sha ishigh ki gomna yô, gomna pine un ér: “U ngu Tor u Mbayuda?” Yesu gema kaa a na ér: “U kaa vough.” 12 Er upristi mba tamen man mbatamen lu wan un akaa iyol nahan kpa, a bugh zwa sha ma kwagh môm ga. 13 Tsô Pilatu pine un ér: “U ungwa akaa kpishi a ve lu eren shiada sha mi sha a we la kpa?” 14 Kpa a bugh zwa a na sha ma kwagh môm ga, nahan kpiligh gomna iyol kpishi.

15 Hanma shighe u yange a eren iniongo yô, gomna a pase or môm ken mba i wuhe ve ken purusu la; or u ikpelaior i̱ soo la cii. 16 Nahan hen shighe ne yô, i wuhe iferor ugen ken purusu, u i fa un kpishi yô, i yilan un ér Baraba. 17 Nahan mba va kohol imôngo yô, Pilatu pine ve ér: “Ka an ne soo ner m pase nan sha ci wene? Ka Baraba shin ka Yesu u i kaan ér ngu Kristu laa?” 18 Sha ci u Pilatu fa er i lu iyuhwe i ne ve va yer Yesu ijir hen a na yô. 19 Bee kera yô, er tema sha ikyônough nagh ki ôron ijir la, kwase na tindi i va kaa un ér: “Dugh ave ou sha kwagh u orperapera la sha, sha ci u m ya ican nyian sha mnyam ma ma cier mo sha kwagh na la kpishi.” 20 Kpa upristi mba tamen man mbatamen tuur ikpelaior la ken ityô ér ve̱ ôr i pase ve Baraba, kpa Yesu yô, i wua un. 21 Gomna gema kaa a ve ér: “Ken ve mba uhar mban yô, ka an ne soo ner m pase nana?” Ve kaa ér: “Ka Baraba.” 22 Pilatu pine ve ér: “Tsô ka nyi m̱ er a Yesu u i kaan ér ngu Kristu nee?” Ve cii ve kaa ér: “I za mande un sha kon!”* 23 A pine ve ér: “Sha ci u nyi? Ka nyi kwaghbo a ere?” Kpa ve lu hemban ngoron a ngor cii, ér: “I za mande un sha kon!”

24 Pilatu nengen ér un ngu nôngon kpa ka gban sha mi ga, ayôôso nga hemban taver a taver yô, a tôô mngerem a ôô ave na sha ashe a ikpelaior la cii, a kaa ér: “M ngu a ibo sha awambe a or ne ga. Mase shin kwagh wen.” 25 Tsô ior mbara cii gema kaa ér: “Ibo i awambe na i lu sha a vese kua ônov asev.” 26 Tsô a pase Baraba, a gema a na wada i gbidye Yesu, shi a gema un a na ér i za mande un sha kon.

27 Nahan ushoja mba gomna mbara yem a Yesu hen ya u gomna, ve za kohol ikyum i ushoja cii va kase un. 28 Ve ér un akondo, ve tôô ikyondo i cirin i nyian dindee ve haa un iyol, 29 shi ve tume idyer i tor sha usaa ve cir un sha ityou, shi ve wa un aga ken uwegh ku yanegh. Ve gure sha ishigh nagh ve gba nahan un tar kaan ér: “Se mba sughun we, Tor u Mbayuda!” 30 Shi ve ta un azer, maa ve ngohol aga la ve gba gbidyen un sha ityou. 31 Mba nahan un tar kera yô, ve mase saghen un ikyondo i cirin iyol la, ve gema akondo a na a haan iyol la ve haa un iyol, maa ve gba yemen a na vea za mande un sha kon.

32 Er ve lu yemen la, ve zua a orgen u ken Shirene, i yilan un ér Shimon. Ve kighir un ér a tôô kon u za manden Yesu sha mi la.* 33 Tsô ve va nyôr hen ijiir igen, i yilan ér Gologota, inja na yô ér, Ijiir i Igbôndotyou. 34 Maa ve na un wain u i nungwa kwagh u yuan* sha mi yô. Kpa benden sha zwa yô, a venda u man. 35 Mba manden un sha kon kera yô, ve er ishor sha akondo a na a haan iyol la, ve kar a ker ayol a ve, 36 shi ve tema her ve lu kuran un. 37 Shi ve nger ityôkyaa i ve lu wuan un sha mi la, ve mande sha kon la ikyua a ityough nagh. Ve nger sha mi ér: “Ka Yesu, Tor u Mbayuda je ne.”

38 Shi i mande mbaiv uhar ikyua ikyua a na, u môm ken uwegh nagh ku yanegh, ugen ken uwegh nagh ku imesegh. 39 Nahan mbakarengbenda gba lamen sha a na dang dang, jingir ityough 40 kaan ér: “We u u hemben tempel, u hiden u maan ken ayange atar ne, yima ase iyol you! Wea lu wan u Aôndo yô, hungwa ase sha kon* ne!” 41 Upristi mba tamen man mbangerenatindi kua mbatamen mbara kpa gba nahan un tar, kaan ér: 42 “A yima mbagenev; kpa ngu fan ityô u yiman iyol na ga! Ngu Tor u Iserael; yô a̱ hungwa ase sha kon* ne, nahan se na un jighjigh. 43 A suur sha Aôndo, nahan de ase Aôndo a yima un, aluer A soo un yô. Gadia a kaa ér ‘M ngu Wan u Aôndo.’” 44 Mbaiv mba i mande ve sha kon ikyua ikyua a na la kpa, lu lahan un.

45 Tsô ime wa hen tar la cii, hii er ahwa 12 atetan* nahan zan zan va kighir er ahwa atar* atetan nahan. 46 Ka va kom er ahwa atar atetan nahan yô, Yesu ôr kwagh genger genger kaa ér, “Eli, Eli, lama sabatani?” inja na yô ér, “Aôndo wam, Aôndo wam, er nan u undumu?” 47 Mba ve tile her la mba ongo nahan yô, ve gba kaan ér: “Or ne ngu yilan Eliya.” 48 Nahan fese je, orgen ken a ve yevese za tôô soso wa shin wain u angen gema shindi sha aga, za un a mi sha zwa ér a ma. 49 Kpa mbagenev cii gema kaa ér: “De un nen! De se nenge Eliya una va yima un yô.” 50 Kpa Yesu shi ôr kwagh genger genger, maa sule.*

51 Tsô ikyondo i yisan i ken tempel la pav, hii sha tume shin inya, shi tar tenger, avande kpaa pav. 52 Shi iwar bugh, nahan akom a uicighanmbaiorov kpishi mba ve vande kpen kera yô, due sha, 53 (shi shighe u i nder un shin ku la, mbagenev kar hen iwar la nyôr ken icighan gar), nahan ior kpishi nenge a ve.* 54 Kpa zum u orshoja u vesen man mbagenev mba ve lu kuran Yesu a na imôngo la nenge er tar tenger shi akaa ne lu eren yô, cier ve iyol tsung, nahan ve kaa ér: “Sha mimi yô, or ne lu Wan u Aôndo.”

55 Shi kasev kpishi tile ken ica lu kenger. Lu kasev mba yange ve due ken Galilia ve za a Yesu imôngo sha u za nan un iwasen yô. 56 Ken a ve yô, lu Maria Madalina man Maria ngô u Yakobu man Yose, kua ngô u ônov mba Sebedeu.

57 Nahan iyange ngur been yô, ornyar ugen ken Arematia va, i yilan un ér Yosev. Un kpa yange hingir orhenen u Yesu. 58 Or ne va hen Pilatu, va pine ian i tôôn ikyom i Yesu. Tsô Pilatu na zwa ér i na un i. 59 Yosev maa tôô ikyom la, kange ken ikyondo i dedoo, i taver ishe tsung, 60 za ii ken uwar u he, u yange time ken iwen yô. A menger zegeiwen a cir sha zwa u uwar shon, maa a yem. 61 Kpa Maria Madalina man Maria ugen la tema hen kpe u uwar la, lu her.

62 Iyange i Kohol Iyol la i karen yô, upristi mba tamen man Mbafarishi va hen Pilatu kpernan, 63 ve va kaa a na ér: “Orvesen, se umbur, shighe u or u tsughun ior ne lu uma la kaa ér, ‘Ayange a karen atar yô, a nderem shin ku.’ 64 Sha nahan yô, kaa i za kura uwar la zan zan iyange i sha utar la, sha er mbahenen nav ve de za iin un, ve geman ve kaan a ior ér, ‘I nder un shin ku!’ ga yô. Vea er nahan yô, aie u masetyô ne una hemba vihin a u hiihii la.” 65 Pilatu kaa a ve ér: “Mbakuran mban. Yô, za kura nen u er ne fe la cii.” 66 Tsô ve yem ve za cir iwen i sha uwar la gbang gbang shi ve ver mbakuran her.