2 Mbakorinte

10 Nahan, mo Paulu, m ngu zamber a ven sha ishima i legh legh man sha erdoo u Kristu, mo u mbagenev ken a ven ve kaan ér ka mea lamen a ven ishigh a ishigh yô m lu a tahav ga, kpa mea yemen kera yô, m gema m lam a ven a ashe a cian shio ne. 2 M ngu zamber mer, mba ve henen ér se mba zenden sha iyol la ma ve gem inja, sha er zum u me va yô, a kera gba u me kôôm ve me tsughur ishigh sha, er m ver ishima la ga yô. 3 Gadia er se zenden sha mlu u sha iyol nahan kpa, se mba nôngon ityav sha mlu wase u sha iyol la ga. 4 Gadia ikyav mbi utyaav yasev ka mbi sha iyol ga, kpa ka mbi Aôndo a ne se yô; mbi a tahav mbu vihin akaa a lun er ayou a taver tsung nahan je kpaa. 5 Gadia se mba vihin mbamhen kua hanma kwagh u taven u a hendan a mfe u Aôndo cii, shi se mba kangen hanma mhen,* nôngon ser a ungwan Kristu; 6 shi se wa iyol se mba keghen a kegh u tsahan hanma or u nana za hemen u hemban ato cii, zum u ne tese ner ne mba mbaungwan kwagh ne bee kera yô.

7 Ka er ne nenge kwagh sha ashe la ka ne kure ikyaa sha mi ye. Aluer or nenge iyol i nan ér mimi je nan ngu kwagh u Kristu yô, shi nana̱ gbidye kwar sha kwagh ne: Er nan lu kwagh u Kristu nahan, kape se kpa se lu vough je la. 8 Ter na se tahav ér se taver ne asema, ka sha u se̱ na ne iyolkpen ga, nahan aluer m tsua u kaan ihyagh sha kwagh u tahav mbu shon je kpa, me hee ga. 9 Gadia m soo mer i lu inja er m ngu keren u tan ne mciem iyol sha uwashika av ga. 10 Gadia mba kaan ér: “Uwashika nav ka ve ôr kwagh i yuhwa iyol shi i lu sha utaha, kpa ka una va yô, a lu a tahav ga, kwaghôron na kpa a lu a tahav ga.” 11 Imbaor la nana̱ time sha kwagh u ka se ôr ken uwashika* shighe u se lu a ven ga la, ka un shi se va er* shighe u se va la ye. 12 Gadia se mba we ayol a ase ken mba ve kaan ihyagh la ga, shi se mba karen ayol a ase sha a ve kpaa ga. Kpa ve mba nengen ayol a ve er i doo ve la, shi mba karen ayol a ve sha mbamnenge vev. Ka vea eren nahan yô, ve tesen ér ve mba a mkav ga.

13 Nahan kpa, ka u se kaa ihyagh a kar akighir a i ver se la ga, kpa a lu ken atô u akighir a haregh u Aôndo a ne se* la tseegh, zan zan kua ne je kpaa. 14 Jighilii yô, er yange se va hen a ven nahan kpa, se er kwagh per akighir a i ver se la ga, sha ci u se lu mba hiihii mba pasen loho u dedoo u sha kwagh u Kristu aren a ven. 15 Se mba kaan ihyagh sha ityom i ma orgen kposo nan er, nahan peren akighir a i ver se la ga, kpa se mba a vangertiôr ser, aluer jighjigh u nan wen ngu taver seer a seer yô, kwagh u se er hen haregh wase la una seer. Nahan se zua a ian i hemban eren tom cii, 16 sha er se yôô loho u dedoo ken ityar i i gbe ica a ven la kpaa, shi se kaa ihyagh sha kwagh u i er hen haregh u orgen kposo ga yô. 17 “Kpa aluer or ngu kaan ihyagh yô, nana̱ kaa ihyagh sha kwagh u Yehova.”* 18 Gadia ka or u nan wuese iyol i nan la Yehova* a lumun nan ga, kpa ka or u un a wuese nan la.