Mbakolose

4 Ne mba ne lu a ikpan sha ikyev yô, eren nen kwagh a ikpan yen sha mimi man sha inja, fa nen ner ne kpa Orvesen wen ngu sha.

2 Eren nen msen kpoghuloo, lu nen per sha mi a ishughun. 3 Shi eren nen msen sha ci wase kpaa, ner Aôndo a bugh gbenda u pasen loho na, sha er se yôô icighan kwaghmyer u sha kwagh u Kristu, ikyaa i i wuhem ken purusu sha mi la, 4 man sha er me pase un wang er i gbe u ma m pase la yô.

5 Eren nen kwagh a mba ken inya sha kwaghfan, shi eren nen kwagh a shighe wen sha inja.* 6 Kwaghôron wen a luun u doon hanma shighe cii, er i wa un bar nahan, sha er hanma or yô, ne fa er ne ôr kwagh a nan ve a doo yô.

7 Tikiku, anmgbian wam u doon mo ishima man ortom u mimi, u a lu kpan u Ter a mo imôngo la, una ôr ne hanma kwagh wam. 8 M ngu tindin un hen a ven, sha er ne fa er se lu, shi una sur ne asema yô. 9 Ngu van vea Onesimu, anmgbian wam u jighjigh man u doon mo ishima, u a dugh hen a ven yô; vea ôr ne akaa a a lu zan hemen heen cii.

10 Aristareku, u a lu ken purusu a mo imôngo ne, ngu sughun ne, Marku, wan u anmgbian u Banaba kpa ngu sughun ne, (ka un u yange m kaa mer una va hen a ven yô, ngohol nen un la), 11 shi Yesu kpaa, un u i yilan ér Yusetu la. Ve mban cii mba ken mba i tsôngo ve la. Ka ve tseegh ve lu mba eren tom a mo imôngo sha ci u Tartor u Aôndo ye, ve hingir mba nan mo msurshima* kpishi. 12 Epafera, kpan u Kristu Yesu, ngu sughun ne, un kpa ka hen a ven a dugh ye. Ka a zer eren msen sha ci wen kpoghuloo, sha er ken masejime yô, ne via, shi ne lu a jighjigh u nan taveraa sha hanma kwagh u a lu ishima i Aôndo cii yô. 13 Gadia m ngu eren un shiada mer, ngu nôngon kwagh kpoghuloo sha ci wen kua sha ci u mba ken Leodisia man Hirapoli.

14 Luka, ortwer u doon mo ishima, ngu sughun ne, shi Dema kpa ngu sughun ne. 15 Sugh nen anmgbianev mba ken Leodisia sha ci wam, shi sugh nen anmgbian u kwase Nimfa kua tiônnongo u a kohol hen ya na la. 16 Shi zum u a ôr washika ne hen atô wen cii yô, na nen i̱ za ôr un hen tiônnongo u mba ken Leodisia kpaa, shi ne kpa ngohol nen u i tindi a mi hen Leodisia la ôr nen. 17 Shi ôr nen Akipu kwagh ne, ner: “Ver ishima sha tom u yange u ngohol hen Ter la, sha er u er u tsembelee yô.”

18 Mo Paulu, m ngu ngeren ishughun yam sha uwegh agh. Umbur nen er m lu ken purusu yô. Aôndo a̱ za hemen u tesen ne erdoo u sha mhôôn.