1 Timoteu

3 Kwaghôron ne ka u mimi: Aluer or ngu nôngon sha u nana lu orkuran yô, ka tom u dedoo je u sar nan ye. 2 Sha nahan yô, orkuran nana̱ de lu a iti i bo* ga, aluer ka or u nan er ivaa yô, nana̱ lu a kwase môm, shi nana̱ eren kwagh akuma akuma, nana̱ eren kwagh sha kwaghfan,* nana̱ eren kwagh sha inja sha inja, shi nana̱ lu or u ngohol ior sar sar, shi nana̱ fa ityesen, 3 nana̱ de lu or u hunden msôrom ga, shi nana̱ de lu ipilaor* ga, kpa nana̱ lu inja legh legh, nana̱ de lu or u zôhôn zwa ga, shi nana̱ de lu or u soon inyaregh ga, 4 nana̱ lu or u hemen* ya u nan sha gbenda u dedoo, ônov mba nan ve̱ lu mba ungwan kwagh shi eren kwagh sha inja 5 (gadia aluer or fa u hemen* ya u nan ga nahan, nana nenge sha tiônnongo u Aôndo nena?), 6 nana̱ de lu or u nan sember hingir ornanjighjigh ga, sha er nana va hingir u moron iyol, nahan a ôr nan ijir i Diabolo kpa i ôr un la ga yô. 7 Heela tseegh ga, nana̱ lu or u ior mba ken inya kpa ve eren shiada u dedoo sha kwagh u* nan yô, sha er nana zua a ilyahan* ga, shi nana gba ken kwaghhônon u* Diabolo ga yô.

8 Mbashiren tiônnongo kpaa ve̱ de lu ior mba wan ahumbe ga, ve̱ de lu mba ôron kwagh shi hiden geman zwa* ga, ve̱ de lu ior mba man msôrom* kpishi ga, shi ve̱ de lu mba eren hua sha u keren mtsera sha anyighe ga, 9 ve̱ lu ior mba ve var a icighan kwaghmyer u sha kwagh u jighjigh u nan la gbang, a imoshima i wang yô.

10 Shi i̱ hii karen ve i̱ nenge, aluer ve kuma yô; maa ve̱ er tom u shiren tiônnongo la, aluer i nenge ve a zayol ga yô.

11 Kasev kpa ve̱ de lu mba wan ahumbe ga, ve̱ de lu mba vihin ior iti ga, shi ve̱ eren kwagh akuma akuma, shi ve̱ eren akaa cii sha mimi.

12 Mbashiren tiônnongo mba ve er ivaa yô, ve̱ lu ior mba lun a kwase môm, mba ve hemen ônov vev man uya vev sha gbenda u dedoo yô. 13 Gadia nomso mba ve eren tom sha gbenda u dedoo yô mba zuan a iti i dedoo kua ian i lamen a ishima i gbar gbar sha kwagh u jighjigh u nan u ve lu a mi ken Kristu Yesu la.

14 M ngu ngeren we akaa ne, shin er m lu veren ishima mer ica ia kera gba ga tsô me va hen a we nahan kpaa, 15 sha er aluer mea timbir kpa, u fa er i gbe u ú eren kwagh ken ya u Aôndo yô, ka tiônnongo u Aôndo u uma je la, ka ityôgh man imaagh ki ki sue mimi yô. 16 Sha kpôô yô, icighan kwaghmyer u sha kwagh u civir Aôndo ne kpiligh iyol tsô: ‘Yange i na un shon ne* due ken igbar ken iyol i inyam man awambe, i nenge un ér ngu orperapera ken jijingi, a ande hen mbatyomov, i pase kwagh na hen akuraior agen, i na un jighjigh shin tar, i yem a na sha, za ngu sha ian i icivirigh.’