Aerenakaa

17 Tsô ve mough ve kar hen Amfipoli kua Apolonia ve va hen Tesalonika, ape shinagoge u Mbayuda lu yô. 2 Nahan Paulu nyôr kohol ve ker, er vanden eren nahan; lu wasen ve u kaven akaa a ken Ruamabera sha hanma iyange i memen, zan zan kasua utar. 3 Lu pasen shi tesen ken ruamabera er yange gba u Kristu una ya ican keng shi una nder shin ku yô, kaan ér: “Ka Kristu shon je ne, Yesu u m lu pasen ne kwagh na ne.” 4 Nahan mbagenev ken a ve na jighjigh shi ve var a Paulu man Shila. Shi ikpela i Mbagrika mba civir Aôndo kua kasev mba duen ati mbagenev kpishi kpa er nahan.

5 Kpa Mbayuda gba iyuhwe sha kwagh ne, nahan ve yila mbaaferev mbagenev mba ve lu zenden sha tembekasua garemaa yô va kohol, ve tor ve asema, nahan ve na gar cii hingir ayôôso. Ve za ta num sha ya u Yason, ve lu nôngon ér vea due a Paulu man Shila vea va a ve hen pe ikpelaior i toron asema kohol la. 6 Mba zough a ve ga yô, ve kôr Yason kua anmgbianev mbagenev ve yem a ve hen mbahemenev mba gar la, ve lu ôron genger genger ér: “Ior mba ve lu van a kwaghnzughul* hanma ijiir sha tar la mba heen kpaa, 7 man Yason ngohol ve hen ya na. Ior mban cii ieren ve ngi hendan a atindi a Shisar, mba kaan ér tor ugen ngu, ka Yesu.” 8 Ikpelaior la man mbahemenev mba gar la mba ongo akaa ne yô, cier ve iyol. 9 Tsô Yason kua mbagenev mba ne ve inyaregh kpishi sha u paan ayol a ve yô, ve de ve ve yem.

10 Tugh mbu ilen a ile nahan maa anmgbianev mbara na Paulu man Shila gbenda ér ve yem ken Berea. Mba za sôôn yô, ve kar ve nyôr ken shinagoge u Mbayuda. 11 Mban yô, ve kegh iyol u henen kwagh hemba ior i Tesalonika, sha ci u ve ngohol loho la sha gbashima tsung, ve ver ishima zulee ve lu timen ken Ruamabera ayange ayange sha u vea nenge aluer akaa la aa lu nahan yô. 12 Sha nahan yô, mbagenev kpishi ken a ve na jighjigh, shi kasev mba injaav imôngo mba ve lu Mbagrika yô, kua nomso mbagenev kpa er nahan. 13 Kpa Mbayuda mba ken Tesalonika mba za ongo ér Paulu ngu yôôn loho u Aôndo hen Berea kpaa yô, ve mough ve va her sha u va toron ikpelaior la asema shi tuur ve ér ve er ayôôso. 14 Nahan fese je anmgbianev mbara na Paulu gbenda, a yem shin kpe zegemnger, kpa Shila man Timoteu lu her. 15 Nahan kpa, mba ve lu veren Paulu gbenda la va a na zan zan va ar hen Atene. Tsô Paulu kaa a ve ér ve za ôr Shila man Timoteu ve va fefa ve va kohol un, maa ve mough ve yem.

16 Er Paulu lu keghen ve hen Atene la, a nenge gar la mgbough a ieev,* nahan ishima doo un ker ga. 17 Nahan a gba wasen Mbayuda kua ior mbagenev mba ve civir Aôndo ken shinagoge la u kaven akaa a a lu ôron ve la, kua mba lu zuan a ve sha tembekasua ayange ayange yô. 18 Kpa mbatimen sha mfe u taregh mbagenev ken nongo u Epikuria man u Setoika gba nyiman kwagh a na, mbagen lu pinen ér: “Ka nyi antor-iliam ne a* soo u ôrono?” Mbagenev di lu kaan ér: “Ka inja er ngu or u pasen kwagh u mbaaôndo mba se fe ve ga nahan.” Ve lu ôron nahan sha ci u lu yôôn loho u dedoo u sha kwagh u Yesu man mnder u shin ku. 19 Nahan ve kôr un ve yem a na sha Areopagu,* ve kaa ér: “U fatyô u pasen se kwagh u ityesen i he i u lu tesen ne kpa? 20 Gadia u ngu ôron se akaa agen a se lu a vande ungwan ga yô, nahan se soo u fan inja i akaa shon.” 21 Jighilii yô, ior i Atene kua mba ve due ken ityar igen ve va lu* her la cii yange ve eren ma kwagh ugen môm shighe u ve lu gbilin ga, saa u ôron shi ungwan akaa a he tseegh. 22 Nahan Paulu tile hen atô u Areopagu maa kaa ér:

“Ne ior i Atene, m nenge yô, ken akaa cii, ne cia mbaaôndo hemba er mbagenev ve cie la.* 23 U tesen ikyav yô, er m lu karen kenger akaa a ne civir la zulee yô, m nenge atse agen je kpa i nger sha mi ér, ‘Ka sha Ci u Aôndo u I Fe Un Ga La.’ Nahan yô, kwagh u ne lu civir kpa ne fe un ga la, ka un je m lu pasen ne ye. 24 Aôndo u a gbe tar kua akaa a a lu ken u cii, u a lu Ter u sha man tar la, tem ken utempel mba i maa sha ave ga; 25 shi veren ishima ér uumace ve wase un inja er kwagh ban un ga, sha ci u ka un iyol na a ne ior cii uma man iôôn kua akaa cii ye. 26 Ka ken or môm a er akuraior kposo kposo sha u a lu sha tar cii ye; shi a ver ashighe man akighir sha ajiir a ior vea lu yô, 27 sha er vea ker Aôndo, aluer ka u vea pev vea zua a na mimi yô. Kpa jighilii yô, ngu ica a hanmô wase ga. 28 Gadia ka un a ne se lu uma shi se zenden shi se lu kpaa ye, er ior enev mbagenev mba ngeren akaa je kpa ve kaa nahan, ér ‘Gadia se kpa se mba ônov nav.’

29 “Nahan er se lu ônov mba Aôndo yô, doo u se henen ser Aôndo ngu er zanaria shin azurfa shin iwen, er ma tomaveegh u uumace ve er sha mhen ve nahan ga. 30 Ka mimi, sha ashighe la Aôndo wa aeren a ken mlan la ikyo ga, kpa hegen ngu pasen ior hanma ijiir cii ér ve gema asema. 31 Sha ci u a ver iyange i a we ishima u ôron tar cii ijir sha perapera sha ikyev i or u a tsough yô, shi a tese er i lu kwagh u bunden ga yô, sha u nderen or shon shin ku.”

32 Mba ongo kwagh u mnder u shin ku yô, mbagenev ken a ve gba hunan, mbagen di kaa ér: “Va lam a vese sha ikyaa ne kwagen kpaa.” 33 Paulu maa kar hen a ve kera, 34 kpa ior mbagenev kohol un, ve hingir mbananjighjigh. Ken a ve yô, lu Dainisu, un lu orjir u atejir u Areopagu, kua kwase ugen, i yilan un ér Damari, man mbagenev kpaa.