Aerenakaa

16 Tsô a za nyôr hen Derebe, shi a kar a yem hen Lisetera. Orhenen ugen gema lu her, i yilan un ér Timoteu, ngô na lu kwase u nan jighjigh, u due ken Mbayuda yô, ter na gema lu Orgrika. 2 Anmgbianev mba ken Lisetera man Ikonium yange ve shi wuese un. 3 Tsô Paulu pase er i sar un u Timoteu a̱ yem tom vea na yô, nahan a tôô un a tsôngo, sha ci u Mbayuda mba hen ajiir la, gadia ve cii ve fa er ter na lu Orgrika yô. 4 Er ve lu yemen la, ve lu karen sha agar agar, pasen anmgbianev akaa a mbaapostoli man mbatamen mba ken Yerusalem kaa la, sha er vea eren sha mi vough vough yô. 5 Nahan anmgbianev mba sha atôônanongo la cii za hemen u taver jighjigh ve u nan, shi ingyegh ve lu seer ayange ayange.

6 Heela tseegh ga, ve kar hen Ferijia man hen haregh u Galatia, sha ci u icighan jijingi na ve ian i pasen loho u Aôndo hen tiôntar u Ashia la ga. 7 Shi mba senen mba ve shin Mishia yô, ve nôngo ér vea nyôr ken Bitinia, kpa jijingi u Yesu* na ve ian ga. 8 Nahan ve kar hen haregh u Mishia ve sen shin Teroa. 9 Tsô Paulu nenge a mpase u sha mnenge ugen tugh—Ormasedonia ugen tile lu zamber a na kaan ér: “Per va ken Masedonia keen, va wase se.” 10 Paulu nengen a mpase u sha mnenge ne yô, fese je maa se ker gbenda u yemen ken Masedonia, se kav er i lu Aôndo a tindi se ér se za yôô loho u dedoo hen a ve yô.

11 Nahan se nyôr tso hen Teroa se va jighilii se va ar hen Samoterase. Mba ker ken sev mbugen yô, se va ar hen Neapoli; 12 shi se mough her se yem hen Filipi, gar ugen u lu sha ikyev i Mbaroma yô; lu gar u vesen hen tiôntar u Masedonia la. Se tsa hen gar ne ayange imôngo. 13 Ka lun sha Iyange i Memen yô, se due ken gar se za shin kpeifi, ape se lu henen ser ijiir i eren msen ngi la, maa se za tema se gba lamen a kasev mba ve kohol her yô. 14 Kwase ugen gema lu, u teen akondo a taver ishe* ken gar u Tiatira, shi civir Aôndo yô, i yilan un ér Ledia. Kwase ne kegh ato lu ungwan, nahan Yehova* bugh un ishima wang sha u a ver ishima sha akaa a Paulu lu ôron la. 15 Nahan mba eren un batisema kua mba hen ya na yô, a ôr a vese var var ér: “Aluer ne nenge ner m ngu civir Yehova* sha mimi yô, va lu nen hen ya wam.” Yange soo ér se va keng keng, nahan se va.

16 Sha iyange igen la, er se lu yemen hen ijiir i eren msen la yô, kpankwase ugen u lu a jijingi u tsengan pasen akaa yô, zua a vese. Mbavesen nav zuan a inyaregh kpishi sha ieren na i tsengan pasen akaa* la. 17 Wankwase ne zer dondon Paulu kua se ijime, ôron genger genger ér: “Ior mban ka ikpan i Aôndo U Hemban Cii, man mba pasen ne gbenda u myom.” 18 A zer eren kwagh ne ayange imôngo je. Ken masejime yô, Paulu va vôr a mi, nahan gem yô, a kaa a jijingi la ér: “M ngu kaan a we ken iti i Yesu Kristu mer, due ken a na kera.” Maa a due ken a na kera hen shighe* la je.

19 Kpa mbavesen nav mba va fe ér gbenda ve u zuan a inyaregh la kpum yô, ve kôr Paulu kua Shila ve yem a ve hen mbahemenev, sha tembekasua. 20 Mba za nyer a ve hen mbahemen gar la yô, ve kaa ér: “Ior mban mba van a zayol hen gar wase je gande. Ka Mbayuda, 21 man mba tesen akaa a tindi a ne se ian i ngohol shin eren ga yô, sha ci u se mba Mbaroma.” 22 Tsô ikpelaior la cii num ayôôso a ve, mbahemen gar mbara ande ve akondo iyol kera, maa ve na zwa ér i gbidye ve sha igbou. 23 Mba gbidyen ve coholoo yô, ve za wuhe ve ken purusu shi ve ôr a or u kuran purusu la ér a kura ve tsembelee. 24 Kwagh u ve ôr a na ne na yô, a za kende ve ken purusu shin atô, shi a wa ve angahar ken agbe.*

25 Kpa ka va kom er ken atôutu nahan yô, Paulu man Shila lu eren msen shi wan icam, wuese Aôndo, nahan mbagenev mba i wuhe ve la lu ungwan a ve. 26 Ica i gbe ga yô, tar tenger sha utaha tsung je imaagh ki purusu la cii tenger. Shi ihinda cii bugh ave ave la je, maa ikyangenev mbi hanmô ve cii poso. 27 Or u kuran purusu la nderen nengen ihinda i purusu ngi lu ivegher yô, a tsua sanker ér una wua iyol na, lu henen ér mba i wuhe ve ken purusu la yevese. 28 Kpa Paulu ôr taver taver ér: “De wuan iyol you ga, gadia se cii se mba heen!” 29 Tsô a kaa ér i va un a iwanger, maa a kar ayem a nyôr ker, a za gba inya hen shigh ki Paulu man Shila a ikyarkyase iyol tsung. 30 A due a ve ken won, maa a kaa ér: “Mbavesen av, ka nyi i gbe u me er ve a yimama?” 31 Ve kaa ér: “Na Ter Yesu jighjigh, nahan a yima u kua ya wou cii.” 32 Nahan ve pase un loho u Yehova,* un kua ior mba hen ya na cii. 33 Tsô a due a ve hen tugh mbura je a za ôô ve avav. I kera ngôôr ga je maa i er un batisema a ya na cii. 34 Tsô a va a ve hen ya na, a va na ve kwaghyan, nahan un vea mba hen ya na cii ve ember tsung, er un va hingir u nan Aôndo jighjigh yô.

35 Sev mbu aven yô, mbahemen gar mbara tindi mbakuran ér ve za kaa ér: “Pase ior mbara.” 36 Or u kuran purusu la gema ôr Paulu mkaanem vem mara, ér: “Mbahemen gar tindi ior ér i̱ pase ne. Yô, due ase nen, yem nen bem bem.” 37 Kpa Paulu kaa a mbakuran mbara ér: “Mba a zua se a ibo ga* tsô ve gbidye se ken igbar, man se mba Mbaroma je, shi ve wuhe se ken purusu. Hegen yô, mba pasen se myeree? Kwagh a er nahan mayange ga! Ve̱ va due a vese kera ayol a ve.” 38 Mbakuran mbara za ôr mbahemen gar mbara kwagh ne. Mba ongo er mban ve lu Mbaroma yô, cier ve iyol. 39 Nahan ve va zamber a ve, shi mba duen a ve kera yô, ve kaa a ve ér ve mough hen gar la. 40 Kpa ve due ken purusu la ve kar ve yem hen ya u Ledia; mba za nengen a anmgbianev yô, ve taver ve asema, maa ve kar ve yem.