Mpase

1 Mpase u Yesu Kristu;* mpase ne due hen Aôndo sha u Yesu a̱ tese ikpan na akaa a ica ia gba ga tsô aa er yô. Nahan un gema tindi ortyom na va tese kpan na Yohane akaa shon sha akav, 2 un di a er shiada sha kwagh u Aôndo yange ôr, kua sha kwagh u shiada u Yesu Kristu yange er, man jighilii yô, sha akaa a yange nenge la cica cii. 3 Saan or u nan ôron mkaanem man genger genger la iyol, kua mba ve lu ungwan kwaghôron u profeti ne shi ve lu eren sha kwagh u i nger ker la kpaa, gadia shighe u i ver la zurum.

4 Mo Yohane, m ngu ngeren hen atôônanongo* a ataankarahar a a lu hen tiôntar u Ashia la:

“Un u a lu, u ngise lu, shi a lu van la,” a̱ tese ne erdoo u sha mhôôn shi a̱ na ne bem, shi ujijingi utaankaruhar mba ve lu sha ikyônough nagh ki torough la kpaa ve er nahan, 5 kua Yesu Kristu, u a lu “Orshiada u jighjigh,” shi a lu “waniunda sha kwagh u mnder u shin ku,”* kua “Orhemen u utor mba shin tar” la.

Un u se doo un ishima shi a paa se sha awambe a na se kera lu sha ikyev i asorabo a ase ga la— 6 shi a er se se hingir tartor man upristi sha ci u Aôndo man Ter na la—icivir i lu i na kua agee gbem sha won. Amen.

7 Nenge! Ngu van ken abeen, nahan hanma ishe ia nenge a na, kua mba yange ve kuma un iwange la kpaa; shi akuraior a sha tar cii aa zungwe sha kwagh na je, aa kera saan ga. I̱ lu nahan. Amen.

8 Yehova* Aôndo kaa ér: “M ngu Alefa man Omega,* Mo u m lu, u ngise m lu, shi m lu van la, m ngu U Hemban Agee Cii.”

9 Mo Yohane, anmgbian wen, u m lu yan ican shi wan ishima er ne nahan, shi m lu a kwar ken tartor a ven imôngo, ken mzough vea Yesu ne, yange m lu ken icile i i yer ér Patemo la, sha ci u m lu ôron kwagh u Aôndo shi eren shiada sha kwagh u Yesu. 10 Yange jijingi erem m lu ken iyange i Ter, tsô m ungwa imo ken ijime yam taver taver, er ka imo i busa nahan, 11 i lu kaan ér: “Nger kwagh u u nenge a mi la ken ihyurenruamabera tindi a mi hen atôônanongo a ataankarahar ne: hen tiônnongo u ken Efese man u ken Semuna man u ken Pegamu man u ken Tiatira man u ken Sadisu man u ken Filadefia kua u ken Leodisia.”

12 Tsô m gema sha u me nenge or u nan lamen a mo la, m gem yô, m nenge a udaarmbaamenger utaankaruhar mba i er sha zanaria yô, 13 shi or lu hen atô u udaarmbaamenger mbara er ka wan u or nahan, nan haa ikyondo i elemeen iyol sen tume shin inya, shi nan tsule tsar u zanaria sha vanger. 14 Shi ityough ki or shon man ice na kungu er ka ikyondo i sha aive a pupuu nahan, man er senou nahan, shi ashe a na lu er nomborusu yô, 15 shi ikpande-angahar a na lu er togula u wang u i we ken atse, a lu mondon nahan, shi ikyenge na lu er ihyuran i ukungwambamngerev nahan. 16 Shi lu a asan ataankarahar ken uwegh nagh ku yanegh, shi gôgô sanker u esen akur ahar lu ken zwa na, lihe due ken won; ishigh nagh lu er iyange ka ia nyande ve i lu nahan. 17 M nengen a na yô, m gba hen angahar a na er m kpe nahan.

Tsô a penda uwegh nagh ku yanegh sha a mo, a kaa ér: “De cie ga. M ngu u Hiihii man u Masetyô, 18 shi m ngu u uma, yange m kpe, kpa nenge! m ngu lun uma zan zan gbem sha won, shi m ngu a akii a bughun hunda u ku man u Uwar.* 19 Nahan nger akaa a u nenge la, man akaa a a lu la, kua akaa a aa er zum u akaa ne aa kar kera yô. 20 Kpa asan a ataankarahar a u nenge a mi ken uwegh agh ku yanegh kua udaarmbaamenger mba utaankaruhar mba sha zanaria la ka icighan kwaghmyer: Asan a ataankarahar la tile sha ityough ki mbatyomov mba atôônanongo a ataankarahar la, udaarmbaamenger mba utaankaruhar mbara di tile sha ityough ki atôônanongo a ataankarahar la.