Luka

20 Sha iyange igen la, lu tesen ior ken tempel shi pasen loho u dedoo, maa upristi mba tamen man mbangerenatindi kua mbavesen za va 2 va pine un ér: “Ka sha tahav mbu nyi u eren akaa nee? Shin ka an nan ne u tahav mbunu?” 3 A kaa a ve ér: “Mo kpa me pine ne mpin, nahan ôrom nen: 4 Ka an yange nan tindi Yohane ér a er ior batisema? Lu Aôndo shin lu ioro?” 5 Tsô ve gba henen ker ayol a ve kaan ér: “Aluer se kaa ser, ‘Lu Aôndo’ yô, una pine se ér, ‘Tsô er nan yange ne na Yohane jighjigh ga?’ 6 Kpa aluer se kaa ser, ‘Lu ior’ yô, ior cii vea ta se awen, sha ci u ve na jighjigh ér Yohane lu profeti.” 7 Nahan ve kaa ér ve fa or u yange nan tindi un ga. 8 Yesu gema kaa a ve ér: “Nahan mo kpa me ôr ne tahav mbu m eren akaa ne a mi la ga.”

9 Tsô a gba ôron ior injakwagh ne, ér: “Orgen er sule u wain, maa gema u wa mbatomov sha ikyev, mough yem zende ken tar u icaa za lu ker gbem. 10 Ka va kom shighe u zôron wain yô, a tindi kpan na ugen hen mbatomov mbara ér ve pande atam a wain ve na un. Kpa mbatomov mbara gbidye un, shi ve zenda un a hide a kwagh ga. 11 Shi a tindi kpan ugen. Ngula kpa ve gbidye un shi ve hee un, shi ve zenda un a hide a kwagh ga. 12 Shi a tindi u sha utar, ngun di ve vihi un iyol, ve kende un ken won. 13 Nahan or u a lu a sule u wain la kaa ken ishima na ér, ‘Ngun nahan me er nena? Me tindi wan wam u ishima ishima. Alaghga vea na un icivir.’ 14 Kpa mbatomov mbara mba nengen a na yô, ve gba henen ker ayol a ve, kaan ér, ‘Ngun ka wan u una va ya dyako je ne. De se wua un nen, sha er dyako la una hingir u wase yô.’ 15 Tsô ve due a na ken sule u wain la, ve za wua un. Nahan or u a lu a sule u wain la una va er a ve nena? 16 Una va wua mbatomov mbara, una gema sule u wain la una na mbagenev.”

Mba ongo nahan yô, ve kaa ér: “Mayange kwagh a de eren nahan ga!” 17 Kpa Yesu gema kenger sha a ve jighilii, maa kaa ér: “Nahan inja i kwagh u i nger ne ér nyi? I nger ér: ‘Iwen i mbamaankwagh ve vende i la, i hingir iwen i hange hange i sha zongough ku iyoughough.’ 18 Hanma or u nan gbe sha iwen ne yô, nana sombo vughô vughô. Man or u iwen ne i gbe sha a nan yô, ia njighe nan a njighe.”

19 Tsô mbangerenatindi man upristi mba tamen gba nôngon ér vea kôr un hen shighe* la je, kpa ve lu cian ior, sha ci u ve kav er i lu ve a lu ôron injakwagh la sha a ve yô. 20 Mba tôvon sha kwagh na zulee yô, ve kimbi ior mbagenev inyaregh ken myer, ér ve za hen a na, ve̱ za er inja er mba mbaperapera nahan, sha u vea nôngo a kôr un a ikyaa zwa, vea gema un vea na sha ikyev i gomoti kua gomna* yô. 21 Ve va pine un mpin, ve kaa ér: “Ortesen, se fa, u ôron mimi shi u tesen kwagh u a lu u vough la, shi u sangen a sange ga, kpa u tesen ior gbenda u Aôndo sha mimi: 22 Nahan, u tan Shisar kpandegh la ka shami* shin ka shami ga?” 23 Kpa a kav ayom a ve la, maa a kaa a ve ér: 24 “Tesem nen denariu* m nenge. Ka ikyav i ityough ki an i̱ lu sha mini? Man iti i i lu sha mi ne ka i ana?” Ve kaa ér: “Ka i Shisar.” 25 Maa a kaa a ve ér: “Nahan yô, na nen Shisar akaa a a lu a Shisar la kpee, shi akaa a a lu a Aôndo yô, na nen Aôndo a kpee je.” 26 Nahan ve kera fatyô u kôron un a ikyaa zwa sha ishigh ki iorough ga, kpa kpiligh ve iyol a mlumun na la, nahan ve huan ving.

27 Kpa mbagenev ken Mbasadushi mba ve kaan ér mnder u shin ku ngu ga la, va pine un ér: 28 “Ortesen, Mose yange nger ér: ‘Aluer anmgbian u or kpe undu kwase, kpa nan undu wan ga yô, anmgbian u nan a tôô kwase u nan undu la, a mar wan a mi, sha ci u anmgbian u nan shon.’ 29 Nomsombaiorov mbagenev utaankaruhar lu anmgbianev. U hiihii la vôso kwase, kpa lu a mar wan ga tsô kpe. 30 U sha uhar la kpa nahan. 31 Shi u sha utar la kpa va tôô un. Ve mba utaankaruhar mbara cii ve er nahan; mô ve kpe undu wan ga. 32 Ken masejime yô, kwase la kpa va kpe. 33 Nahan sha shighe u mnder u shin ku la, una hingir kwase u ana? Gadia hanmô ken ve mba utaankaruhar mbara cii yange nan vôso un.”

34 Yesu kaa a ve ér: “Ônov mba ken kov ne mba eren kasev, shi mba ne ve noov, 35 kpa mba i nenge ve ér ve kuma u va lun uma ken tar u u lu van la, shi i gbe u a va nder ve shin ku la, vea vôso kasev shin a na ve noov ga. 36 Shi vea kera kpe mayange ga, sha ci u mba er mbatyomov mba shaav nahan, shi mba ônov mba Aôndo sha ci u mba va nderen ve shin ku. 37 Kpa sha kwagh u i kaa ér mba va nderen mbakpenev shin ku la yô, Mose je kpa yange nger kwagh sha mi ken takeda na hen ijiir i a ôr kwagh u ageva la, a yila Yehova* ér, ‘Aôndo u Aberaham man Aôndo u Isaka man Aôndo u Yakob.’ 38 Un ka Aôndo u mbakpenev ga, kpa ka u mbaumav, sha ci u hen a na* yô, mba uma her.” 39 Nahan mbagenev ken mbangerenatindi kaa ér: “Ortesen u ôr doo.” 40 Gadia ve kera cihi ve pine un mpin môm ga.

41 A gema a pine ve ér: “Er nan i kaan ér Kristu ka wan u Davidi? 42 Gadia Davidi iyol na ôr ken takeda u Upasalami ér, ‘Yehova* kaa a Terem ér: “Temam ken uwegh ku yanegh, 43 zan zan me kar veren mbahyomov ou ve̱ lu u kpenga* u pendan angahar sha mi.”’* 44 Nahan, aluer Davidi yila un ér Ter yô, a er nan ve una lu wan u Davidi?”

45 Er ior cii kegh ato a na la, a kaa a mbahenen nav ér: 46 “Wa nen ikyo sha kwagh u mbangerenatindi; ka ve soo u huan ugôgômbaakondov zenden a mi, shi ve soo ér i sughun ve sha icivir ken igbar,* shi ve soo u teman sha mkônom ma sha hemen* ken ushinagoge man sha ajiir a hemban doon hen uiniongo, 47 shi ve ngohol uya mba* kasev mba côgholov, shi ve eren mbamsen mba lihen ér ior ve nenge.* Vea ya mtsaha u hemban vihin.”