Mateu
4 Tsô jijingi* hemen Yesu yem a na ken taaikyôngo, nahan Diabolo za mee un. 2 Er hôr kwaghyan tugh man atetan zan zan ayange 40 yô, ijen kôr un. 3 Tsô Ormee va, va kaa a na ér: “Aluer u ngu wan u Aôndo yô, kaa awen ne a hingir ikpenberedi.” 4 Kpa a kaa a na ér: “I nger ér: ‘Ka sha beredi tseegh or a lu uma ga, kpa ka sha hanma kwaghôron u a dugh hen Yehova* yô.’”
5 Tsô Diabolo yem a na ken icighangar, za ver un sha tempel sha atô,* 6 maa kaa a na ér: “Aluer u ngu wan u Aôndo yô, tsue gba shin inya, gadia i nger ér: ‘Una ôr mbatyomov nav vea nenge sha a we,’ shi ‘Vea kôr u sha ave a ve je, sha er u kema nguhar ken iwen ga yô.’” 7 Yesu kaa a na ér: “Shi i nger ér: ‘De karen Yehova* Aôndo wou ga.’”
8 Diabolo shi yem a na sha uwo u taven tsung, za tese un ityartor i sha tar cii, kua iengem i i. 9 Tsô a kaa a na ér: “Akaa ne cii me na u, aluer u gure inya kwa môm tseegh u civir mo yô.” 10 Yesu gema kaa a na ér: “Yem kera, Satan! Gadia i nger ér: ‘Ka Yehova* Aôndo wou i gbe u u civir ye, shi ka un tseegh i gbe u u er un tom ye.’” 11 Diabolo maa undu un, tsô mbatyomov gba va wasen un.
12 Zum u Yesu ungwa ér i kôr Yohane yô, a mough a yem ken Galilia. 13 A za mough ken Nasareti, a yem a za tema ken Kapenaum hen kpe zegemnger, hen haregh u Sebulon man u Nafetali, 14 sha u kuren kwaghôron u profeti u Yesaia lu kaa la, ér: 15 “Ne ior i Sebulon man ior i Nafetali, ne mba ne lu hen gbenda u hen zegemnger, Yordan yande la, ken Galilia u atôatyev la! 16 Mba ve tem ken ime la nenge a iwanger i vesen, man mba ve tem hen ijiir i mure u kuugh la kpaa, iwanger mondo sha a ve.” 17 Hii shighe la je, Yesu gba pasen kwagh kaan ér: “Gema nen asema, gadia Tartor u sha zurum.”
18 Er lu zenden karen sha kpe u Zegemnger u Galilia yô, a nenge a iorov uhar mba ve lu anmgbianev yô. Lu Shimon u i yilan ér Peteru la, kua anmgbian na Anderia, ve lu haan kper shin zegemnger, sha ci u ve lu mbakôronishu. 19 Tsô a kaa a ve ér: “Va dondo nen sha a mo, me gema ne, ne hingir mbakôronior.” 20 Fese je ve undu ukper vev, ve dondo un ijime. 21 Karen ngur yemen yô, a nenge a iorov mbagenev uhar mba ve lu anmgbianev yô, lu Yakobu wan u Sebedeu kua anmgbian na Yohane. Ve lu shin tso vea ter ve Sebedeu, ve lu cingen ukper vev. Tsô a yila ve. 22 Fese je ve undu tso la kua ter ve, ve dondo un ijime.
23 Tsô a zende hen haregh u Galilia la cii, lu tesen ken ushinagoge* shi pasen loho u dedoo u Tartor shi been ior hanma inja i uange man hanma inja i mkpeyolga cii. 24 Nahan i ungwa kwagh na ken Shiria cii. Tsô i va un a ior kpishi mba ve lu yan ican a iangev man mbamnyoon atô kposo kposo yô, kua mba azôv lu nzughul a ve, man mbagbankyungu man mbakpenalegh. Nahan a bee ve cii angev. 25 Kwagh ne na yô, ior kpishi ken Galilia man Dekapoli* man Yerusalem kua Yudia man Yordan yande la, due va dondo un ijime.