Ka An Nan Hembe Gban Kwagh Ken Uma Wouwe?
‘Ka We tseegh U lu Uhembansha sha tar cii ye.’—Ps. 83:18.
1, 2. Er nan ve u fan iti i Yehova tseegh la a kom u nan se myom ga?
ALAGHGA tsô yange u hii nengen a iti i Yehova shighe u i tese u i̱ ken Ekesodu 6:3 la. Adooga yange a kpiligh we iyol u ôron mkaanem man: “M ande hen Aberaham man Isaka man Yakob, Mo Aôndo Uhembanagee, kpa iti Yam i TER (ka Yehova je la) ne yô, ve fa ga.” Hii shighe la je, a shi nan kpa u za hemen u ôron ivur ruamabera ne sha u wasen mbagenev wer ve fa Yehova, Aôndo wase u lun a dooshima la.—Rom. 10:12, 13.
2 Er u fan iti i Yehova la i lu kwagh u hange hange nahan kpa, imba mfe la tseegh kuma ga. Nenge er orpasalmi yange pase mimi ugen, u a lu kwagh u hange hange u nan se myom yô. A kaa ér: ‘Ka We tseegh U lu Uhembansha sha tar cii ye.’ (Ps. 83:18) Sha mimi yô, ka Yehova a lu Or u hemban gban kwagh sha won cii ye. Er a gbe akaa cii yô, ngu a ian i kaan a hanma kwagh u a gbe la cii ér a ungwan imo na. (Mpa. 4:11) Sha nahan yô, ka a inja u se pine ayol a ase ser, ‘Ka an nan hembe gban kwagh ken uma wama?’ Ka hange hange u se time sha mlumun u sha mpin la zulee!
Ikyaa i ken Sule u Eden La
3, 4. Satan yange er nan ve bume Ifa, man lu nyi i due kere?
3 Se fatyô u nengen a mluainja u mpin ne wang ken akaa a yange er ken sule u Eden la. Ken sule la, ortyom u hemban ato, u i va hingir u yilan un ér Satan Diabolo la, mee Ifa, kwase u hiihii la sha u a hemba veren ishima sha asaren a na, nahan a per tindi u Yehova wa sha ityamegh ki kon ugen la. (Gen. 2:17; 2 Kor. 11:3) Yange gba ken imeen ne, nahan a tese icivir sha hemen u Yehova ga. Ifa yange tese ér Yehova hemba gban kwagh ken uma na ga. Kpa Satan yange er nan ve bume Ifa?
4 Satan yange er ayom atô kposo kposo shighe u lu lamen vea Ifa la. (Ôr Genese 3:1-5.) Hiihii yô, Satan ter iti i Yehova ga. A ter ishember i “Aôndo” la tseegh. Kpa orngeren takerada u Genese la yô, a ter iti i Yehova la ken ivur i hiihii i ityough kira je. Kwagh u sha uhar yô, u Satan ma ôr kwagh u “tindi” u Aôndo wa la yô, a pine kwagh u Aôndo “kaa” la tseegh. (Gen. 2:16) Alaghga Satan yange er ayom ne nahan sha u una nôngo or a de nengen ér tindi u Aôndo wa la ngu hange hange keng ga. Kwagh u sha utar yô, shin er lu lamen a Ifa tseegh nahan kpa, a ter ishember i “ne” la. Adooga yange er nahan sha u una nôngo Ifa a tim akende, shi a nenge ér un gba kwagh, inja er un ngu or u lamen sha ci na iyol na kua nom na nahan. Lu nyi i due kere? Ka inja er Ifa yange kar a ishima na lam sha ci na man nom na sha u kaan a iyô la ér: ‘Atam a ikyon i ken sule ne yô, i lumun ér se̱ ya’ nahan.
5. (a) Satan yange na Ifa hingir u henen sha nyi? (b) Er Ifa ya ityamegh ki kon u i ta icin sha mi la yô, lu tesen ér nyi?
5 Shi yange kôr mimi tingir ityough shin inya. Kwaghôron na lu tesen ér Aôndo er kwagh u shami ga, er a wa Adam man Ifa tindi ér ve ‘de ye atam a ma kon u ken sule la ga’ yô. Satan been heela yô, a na Ifa hingir u henen sha mlu na, man er una er ve a hemba kpen un iyol, una “hingir er Aôndo nahan” yô. Shighe kar yô, a na Ifa hingir u henen sha kwagh u kon la man atam a u, kera hen sha kwagh u ikyaryan na vea Un u yange na un hanma kwagh la ga. (Ôr Genese 3:6.) Kpa kwagh er vihi yô, er Ifa ya ityamegh ki kon la yô, lu tesen ér ka Yehova a hembe gban kwagh ken uma na ga.
Ikyaa i sha Ayange a Yobu La
6. Satan yange huna mtil sha mimi u Yobu la nena, man lu ian i eren nyi i na Yobu?
6 Uderimbaanyomov mba kar imôngo yô, orjighjigh Yobu zua a ian i tesen Or u nan hemba gban un kwagh cii yô. Shighe u Yehova pine Satan kwagh u mtil sha mimi u Yobu la, a na Yehova mlumun dang ér: “Ka gbilin Yobu a cie Aôndo yee?” (Ôr Yobu 1:7-10.) Satan yange nyiman ér Yobu ongo imo i Aôndo ga. Kpa, lu awashima u Yobu yange gba ahon sha mi ye. A wa Yobu kwagh iyol ér, ngu civir Yehova sha ci u a doo un ishima ga, kpa ngu civir un sha ci u kwagh u una zua a mi la. Lu u saa Yobu tseegh una fatyô u tesen ér kwagh u i wa un iyol la lu mimi ga ye, nahan i na un ian i eren kwagh ne.
7, 8. Lu atsan a nyi Yobu ya, man a tese nyi sha ishimawan man mtil sha mimi na laa?
7 Yehova yange na Satan ian, nahan a er Yobu atsan ciligh ciligh. (Yobu 1:12-19) Yobu er nena shighe u mlu na kôr gema laa? I kaa a vese ér a “er kwaghbo ga, a na Aôndo ibo er A er kwagh u kpeegh kpaa ga.” (Yobu 1:22) Kpa Satan lu a de ve ga. Shi a ôr kwagh ugen ér: “Kwavyolough sha kwavyolough; mimi je, hanma kwagh u or nan lu a mi cii, nana na sha ci u uma u nan.”a (Yobu 2:4) Satan lu kaan ér aluer Yobu ya ican yô, una kera nenge ér Yehova hemba gban kwagh ken uma na ga.
8 Angev mbu ndôhôrishima yange mbu vihi Yobu kwavyolough cica cii shi kwase na zan un iyol ér a tuhwa Aôndo a kpe kera. Shighe kar yô, akar a Yobu a mimi ga atar, wa un kwagh iyol ér a er kwagh u dang. (Yobu 2:11-13; 8:2-6; 22:2, 3) Nahan kpa, Yobu ta mtil sha mimi na kera ga, shin er a ya ican kpishi nahan kpaa. (Ôr Yobu 2:9, 10.) A tese sha ishimawan man mtil sha mimi na la ér Yehova hemba gban kwagh ken uma na. Shi Yobu tese ér orumace u nan yen ne kpa nana fatyô u kaan Diabolo imo sha akaa a a we nan iyol la, a lu sha gbenda u cuku je kpaa.—Nenge Anzaakaa 27:11.
Imo i Vough i Yesu Kaa La
9. (a) Satan yange nôngo ér una mee Yesu sha isharen i yolough nena? (b) Yesu yange er nena sha imeen shono?
9 Yesu yange er batisema, shighe karen kpuaa yô, Satan nôngo ér una mee un a ker u zendan asaren a iyolough, a de nengen Yehova ér ngu Or u hemban gban kwagh ga. Diabolo yange mee Yesu sha igbenda itiar. Hiihii yô, á nôngo ér una kende isharen i yolough ken Yesu, a mee un ér a gema awen a hingir bredi. (Mat. 4:2, 3) Yesu yange tsa ijen ayange 40 sember been, nahan ijen kôr un kpishi. Nahan, Diabolo wa un kwagh ér a er tom a tahav nav mbu eren ivande la sha tindi ga, sha u been ijen i̱ i̱ lu kôron un la. Tsô Yesu er nena? Yesu er kwagh er Ifa nahan ga, a hemba veren ishima sha Mkaanem ma Yehova, nahan a palegh imeen la fese je.—Ôr Mateu 4:4.
10. Satan yange kaa a Yesu ér a tsue sha ityough ki tempel a gba shin inya sha ci u nyi?
10 Shi Satan nôngo ér una mee Yesu a er kwagh u tesen ér a hemba soon iyol na. A kaa a Yesu ér a tsue sha ityough ki tempel a va gba shin inya. (Mat. 4:5, 6) Awashima u Satan lu nyi? Satan kaa ér aluer Yesu tsue gba shin inya, kpa vihi iyol ga yô, a tese ér ngu “Wan u Aôndo.” Sha mimi yô, Diabolo soo ér kwagh a hemba gban Yesu sha mnenge u ior lu a mi sha a na la, je yô, a̱ er kwagh u sha ihyagh. Satan fa ér ihyagh ia na yô, or nana lumun u eren kwagh u iyolvihin i lu ker yô, sha er nana ya kunya sha ashe a mbagenev ga yô. Satan yange ôr ivur ruamabera igen gema na mpase ugen kposo sha mi, kpa Yesu tese ér un kav Mkaanem ma Aôndo vindi vindi. (Ôr Mateu 4:7.) Er Yesu venda imeen i Satan la yô, shi a tese ér Yehova hemba gban kwagh ken uma na.
11. Yesu yange venda ityartor i sha won cii i Diabolo na un la sha ci u nyi?
11 Sha kwa u masetyô u Satan mee Yesu sha afatyô na cii la, a na un ityartor i sha won cii. (Mat. 4:8, 9) Yesu venda ityartor i í na un la inyigh i môm. A fa ér aluer un lumun ityartor la yô, a tese ér un venda hemen u Yehova, ka ian i Aôndo a lu a mi i lun Uhembansha je la. (Ôr Mateu 4:10.) Hanma kwa cii, Yesu kaa Satan imo sha u ôron un avur a ruamabera a a lu a iti i Yehova ker yô.
12. Er zulum u Yesu una kure tom na shin tar ne la, gba u una tsua u eren nyi kwagh i lun icana, man se hen nyi sha gbenda u a tsua kwagh shon laa?
12 Er zulum u Yesu una kure tom na shin tar ne la, gba u Yesu una tsua u eren kwagh u lu ican kpishi yô. Shighe u lu pasen kwagh la cii, a tese ér un kegh iyol i nan nagh sha uma na. (Mat. 20:17-19, 28; Luka 12:50; Yoh. 16:28) Nahan kpa, Yesu shi fa ér a wa un aie iyol shi a ôr un ijir sha mimi ga, sha atindi a Mbayuda shi a wua un er or u tuhwan Aôndo nahan. Imba ku i gba u Yesu una kpe ne za un iyol kpishi. A er msen ér: “Terem, aluer a fatyô yô, iyongo ne ma i karem kera.” Kpa a za hemen a kaa ér: “Nahan kpaa i̱ de eren sha ishima Yam ga, i̱ er sha ishima You.” (Mat. 26:39) Sha mimi yô, mtil u Yesu tile sha mimi zan zan ku na la tese a akperan shio ér Yehova hemba gban kwagh ken uma na!
Imo i Se Kaa sha Ikyaa la Yô
13. Ka akaa a nyi se hila hen sha ikyav i Ifa man i Yobu kua i Yesu Kristu laa?
13 Kanyi se hila hene? Kwagh u Ifa la tese se ér mba ve de asaren a ve a hembe ve shin vanger a hagher ve ker la, mba tesen ér Yehova hemba gban kwagh ken uma ve ga. Kpa se gema se hen kwagh sha mtil u Yobu tile sha mimi la ser, uumace mba ve lu vough ga ne je kpa vea fatyô u wan ishima shi tilen sha mimi ken atsan, nahan tesen ér Yehova hemba gban ve kwagh, shin vea fa er i hii ve ve lu yan atsan shon ga je kpaa. (Yak. 5:11) U masen yô, ikyav i Yesu la tese se ér gba u se kegh iyol u lumun iheen, se hemba veren ishima sha mnenge u mbagenev ve lu a mi sha mlu wase la ga. (Heb. 12:2) Kpa se fatyô u dondon akaa a se hen ne nena?
14, 15. Kwagh u Yesu er shighe u i mee un la kaha a kwagh u Ifa er la nena, man se fatyô u dondon Yesu nena? (Pase kwagh u foto u sha a lu sha peeji 18 la a lu tesen yô)
14 Mayange ameen a de ne u hungur Yehova ga. Ifa yange hemba veren ishima sha imeen i í lu un sha ishi la. A nenge er ityamegh ki kon la “doo u yan, man shi er u doo ashe kpaa, man u lu kwagh u saren sha u nan or kwaghfan yô.” (Gen. 3:6) Kwagh u Ifa tagher a imeen ve er la kaha kposo a kwagh u Yesu er shighe u tagher a imeen acin atar la kpishi je. Hanma kwa u Satan a mee un cii yô, yange deen ér imeen la i na una hungur a kwagh u una due ken ieren na la ga. Lu suur sha Mkaanem ma Aôndo shi teren iti i Yehova kpaa.
15 Ka a mee se ér se er kwagh u vihin Yehova nahan, se hemba veren ishima sha nyi? Aluer se hemba veren ishima sha imeen la yô, isharen i bo la ia hemba taver ken avese. (Yak. 1:14, 15) Gba u se dugh isharen la ken a vese kera fese, aluer ieren yase la ngi inja er se mba tôndon a tôndo ma ilyeegh ki sha iyol yase tan kera je kpaa. (Mat. 5:29, 30) Gba u se hemba veren ishima sha kwagh u una due ken ieren yase la, se hemba veren ishima sha gbenda u ieren shon ia bende a ikyar i se ye a Yehova la, er Yesu kpa er nahan. Gba u se umbur kwagh u Bibilo i i lu Mkaanem nam i̱ er la. Ka sha gbenda ne tseegh se fatyô u tesen ser Yehova hemba gban kwagh ken uma wase cii ye.
16-18. (a) Kanyi alaghga ia na se ure? (b) Kanyi ia wase se u wan ishima a mbamlu mba nan se icana?
16 Mayange de de wer atsan a ou a na u hingir iyongo a Yehova ga. (Anz. 19:3) Er se lu hemban zulum a mkur u botar ne yô, ior mba Yehova kpishi mba tagher a atsan man uaahe kpishi. Se ver ishima ser i kura se sha ivande hen shighe ne ga. Nahan cii kpa, alaghga se ure kpishi shighe u or u doon se ishima nan kpe shin se tagher a mbamtaver yô.
17 Yobu yange fa er hii ve Yehova na ian ér akaa agen a er ga, nahan alaghga ashighe agen se fa er i hii ve akaabo a eren ga. Alaghga se ungwa kwagh u anmgbianev mba jighjigh, mba yange tar tenger wua ve yô, er mba ken tar u Haiti la nahan, shin ma aahe ugen. Shin alaghga se fa ma anmgbian u tilen sha mimi ugen u i er kwagh a nan sha ipila shin nan kpe ku u aikyôr u vihin tsung yô. Shin alaghga se ayol a ase se hingir u nyôron ken mbamlu mbagenev mba taver tsung, gayô se nenge ser i er kwagh a vese sha mimi ga. Ican i se lu ker la ia na yô, alaghga se kaa ser: ‘Ku, Yehova. Er nan u de wer imba kwagh ne i tsereme? M er nyi i bo?’ (Hab. 1:2, 3) Sha ashighe la nahan, kanyi ia wase se u wan ishima?
18 Gba u se wa ikyo sha er se gba henen ser ambaakaa la nga tesen ér Yehova gema ijime a vese ga yô. Yesu yange pase kwagh ne wang shighe u ôr kwagh ter uaahe uhar mba sha ayange a na la. (Ôr Luka 13:1-5.) Ka se nyôr ken atsan kpishi sha ci u “shighe man aikyôr.” (Orpa. 9:11) A lu nyi je i ne ve se lu yan ican kpa, se fatyô u wan ishima, aluer se ver ishima sha “Aôndo u A lu a ishimasurun cii” la yô. Una na se tahav mbu zan hemen u civir un sha jighjigh.—2 Kor. 1:3-6.
19, 20. Lu nyi i wase Yesu ve wa ishima a mbamlu mba van un a iheene, man kanyi ia wase se ve se kpa se er nahana?
19 Mayange se de ser iyolgengese shin mciem ma cian kunya ma hingir se kwagh u vesen ga. Yesu yange hide a iyol ijime, nahan kwagh la wase un, a “gema iyol Na hingir gbilin er A tôô mlu u ortom” la. (Fil. 2:5-8) Yange fatyô u wan ishima a mbamlu mba van un a iheen sha ci u a suur sha Yehova. (1 Pet. 2:23, 24) Sha nahan yô, a ker u eren ishima i Yehova hiihii, shi kwagh ne na yô, i kende a na sha kpishi. (Fil. 2:9) Yesu yange wa mbahenen nav kwagh ér ve kpa ve er nahan.—Mat. 23:11, 12; Luka 9:26.
20 Ashighe agen, ameen a karen jighjigh wase agen aa fatyô u nan se kunya. Nahan cii kpa, gba u se lu a vangertiôr er Paulu nahan. Yange kaa ér: “Ka sha ci u kwagh ne man m lu yan atsan ne nahan ye, kpa kunya kôrom sha mi ga. Gadia m fa Un u m na Un jighjigh la man m fa dedoo mer Una fatyô u kuran kwagh u i wem sha ikyev la zan zan iyange la.”—2 Tim. 1:12.
21. Er tar ne u lu a ieren i or soon iyol i nan tseegh nahan kpa, kanyi u kange ishima wer u ere?
21 Bibilo tsengaôron ér sha shighe wase ne ior vea hingir “mbawan ayol a ve ikyo tseegh.” (2 Tim. 3:2) Nahan kera kpiligh se iyol er kov u hegen ne u lu a ior mba kwagh ve a hembe gban ve ishima la ga. Mayange se de ser ieren i or soon iyol i nan tseegh ne i hôngor se ga! Aluer se tagher a imeen shin atsan ta sha a vese shin se tagher a akaa a van se a iheen kpa, hanmô wase cii nana̱ kange ishima nana̱ tese sha mimi ér ka Yehova a hembe gban kwagh ken uma u nan ye!
[Ngeren u shin kpe]
a Mbafantakerada mba timen sha akaa a ken Bibilo mbagenev nenge ér alaghga ishember i “kwavyolough sha kwavyolough” la ngi tesen ér Yobu una fatyô u den ér guda kwavyolough man uma u mbayev kua ilev nav a saa ishe, nahan kwavyolough na shin uma na a gema a war. Mbagenev di hen ér ishember la ngi tesen ér or a fatyô u lumun ér kwavyolough u nan u pande u saa ishe, aluer ka u kwagh la una war uma u nan yô. Ikyav i tesen yô, aluer i ker or iju sha ityou yô, nana fatyô u yisan iju la sha uwegh ku nan, nahan kwavyolough ua saa nan, kpa nana gema a war uma u nan. A lu nyi je injakwagh ne lu ôron kpa, yange i tese wang ér Yobu una lumun u den hanma kwagh cii ér a saa ishe, aluer ka u una war uma na yô.
Se Hen Nyi sha . . .
• gbenda u Satan tsugh Ifa laa?
• kwagh u Yobu er sha atsan a á tser un laa?
• kwagh u hemba lun Yesu kwagh u vesen laa?
[Foto u sha peeji 17]
Ifa yange hemba veren ishima sha ikyaryan na vea Yehova ga
[Foto u sha peeji 18]
Yesu yange venda ameen a Satan, gema ver ishima sha u eren ishima i Yehova
[Ufoto u sha peeji 20]
U pasen kwagh sha utenti shighe u tar tenger ken tar u Haiti la
Se fatyô u veren ishima sha “Aôndo u A lu a ishimasurun cii” la ken ashighe a ican