Marku

1 Loho u dedoo u sha kwagh u Yesu Kristu, Wan u Aôndo, hii nahan: 2 Ka vough er profeti Yesaia yange nger nahan, ér: “(Nenge! M ngu tindin ortyom wam una lu zan we sha hemen.* Una sôr u gbenda.) 3 Or ngu yôôn ken taaikyôngo ér: ‘Sôr nen gbenda u Yehova!* Kôôm nen igbenda na i lu jighilii.’” 4 Yohane u Eren Batisema lu ken taaikyôngo, lu pasen er i gbe u ior vea er batisema sha u tesen ikyav ér ve gema ishima, sha u i de ve asorabo a ve yô. 5 Tsô ior mba hen haregh u Yudia kua mba ken Yerusalem cii lu duen zan hen a na, nahan lu eren ve batisema* shin Ifi u Yordan, ve lu pasen asorabo a ve ken igbar. 6 Yohane yange huan akondo a sha aive a rakumi, shi a tsule kwange u ikyôv ken iwenge, shi yaan ikyomon* man iyough i ken toho. 7 Lu pasen kwagh kaan ér: “Orgen ngu van mo ken ijime u a hembem tahav yô. M kuma u ngurum saghen un ikyor i akôvough* ga. 8 M er ne batisema sha mnger, kpa un yô, una er ne batisema sha icighan jijingi.”

9 Sha ayange la, Yesu mough ken Nasareti u Galilia va, nahan Yohane er un batisema shin Ifi u Yordan. 10 Yesu dugh shin mnger kera yô, fese je a nenge i bugh sha, jijingi lu senen sha a na er ikyungugh nahan. 11 Maa imo due sha aôndo kaa ér: “U ngu Wan wam u ishima ishima. Doom a we.”

12 Tsô fese je, jijingi* hemen un yem a na ken taaikyôngo. 13 A za lu ken taaikyôngo ayange 40, Satan lu meen un. Lu ker vea inyamtoho imôngo, kpa mbatyomov lu nan un iwasen.

14 Zum u i kôr Yohane i wuhe yô, Yesu yem ken Galilia, lu za pasen loho u dedoo u Aôndo 15 kaan ér: “Shighe u i ver la kuma; Tartor u Aôndo zurum. Gema nen asema, na nen loho u dedoo jighjigh.”

16 Er lu zenden karen sha kpe u Zegemnger u Galilia yô, a nenge a Shimon vea anmgbian na Anderia, ve lu haan ukper vev shin zegemnger, sha ci u ve lu mbakôronishu. 17 Yesu maa kaa a ve ér: “Va dondo nen sha a mo, me gema ne, ne hingir mbakôronior.” 18 Tsô fese je ve undu ukper vev, ve dondo un ijime. 19 Karen yemen ken hemen daalaa yô, a nenge a ônov mba Sebedeu mba nomso uhar, lu Yakobu vea anmgbian na Yohane, ve lu shin tso ve, ve lu cingen ukper vev. 20 Nahan fese je maa a yila ve. Maa ve undu ter ve Sebedeu shin tso vea mba i tôô ve tom sha tôndo yô, ve va dondo sha a na. 21 Tsô ve yem ken Kapenaum.

Iyange i Memen hiin a hii nahan maa, a za nyôr ken shinagoge a gba tesen. 22 Nahan kpiligh ve iyol a gbenda u lu tesen ve la, sha ci u lu tesen ve er ka or u i ne nan tahav mbu tesen yô, lu er mbangerenatindi nahan ga. 23 Hen zum la, orgen lu ken shinagoge ve, u lu a jijingi u bo* yô. Tsô a gba ngoron kaan ér: 24 “Ka nyi i zough se a we, Yesu Ornasareti? U va u va timin see? M fa u dedoo, u ngu Icighan u Aôndo!” 25 Kpa Yesu venda a jijingi u bo la, kaa ér: “Cir zwa, shi due ken a na kera!” 26 Tsô jijingi u bo la er or la gba ikyungu, shi jijingi shon ngor taver taver, maa a due ken or la kera. 27 Nahan cier ior cii iyol, ve gba lamen sha kwagh shon kaan ér: “Ka nyi ne? Ka ityesen i he! Ngu a tahav mbu zendan ujijingi mba bov je kpaa, shi mba ungwan un.” 28 Nahan gwa na samber fese ar hanma ijiir cii hen haregh u Galilia la.

29 Tsô ve mough hen shinagoge ve yem hen ya u Shimon man Anderia, ve lu vea Yakobu man Yohane. 30 Zum la, ngôkem u Shimon gba fiva,* lu hen inya. Tsô fese je ve ôr Yesu kwagh na. 31 Nahan a za hen ape lu la, a za kôr un sha uwe a mough a na sha, fiva maa bee un. Tsô a gba eren ve kwaghyan.

32 Ka va hingir aikighe, iyange ngur miren yô, ior gba van un a mba ve lu dedoo ga man mba azôv lu nzughul a ve cii. 33 Nahan ior mba ken gar la cii va kohol sha hunda. 34 Tsô a bee ior kpishi mba ve lu a iangev atô kposo kposo la cii iangev vev, shi a zenda azôv kpishi ken ior kera, kpa mayange lumun ér azôv la a lam ga, sha ci u a fa er a lu Kristu* yô.

35 Sev mbu ngur aven yô, a mough pepe pepe, er lu a wanger ga la je, a due a yem hen ijiir i or môm lu her ga yô, a gba za eren msen. 36 Kpa Shimon kua mbagenev mba ve lu a na imôngo la lu keren un. 37 Mba za zough a na yô, ve kaa a na ér: “Hanma or ngu keren we.” 38 Kpa a kaa a ve ér: “Se yem nen hen ijiir igen, ken agar a a lu ikyua heen ne, sha er ker kpa me za pase ior loho u dedoo yô, sha ci u ka kwagh u m ve je la.” 39 Tsô a yem a gba za pasen ve loho u dedoo ken ushinagoge vev ken Galilia cii, shi lu zendan azôv ken ior kera kpaa.

40 Tsô orimande kpa za va hen a na, va zamber un je gure anu inya, kaa ér: “Wea lumun yô, u fatyô u wanger mo.” 41 Nahan kunya kôr un, maa a za uwegh a bende un iyol, a kaa a na ér: “M lumun! I wanger we.” 42 Fese je maa imande na bee, a hingir wang. 43 Tsô a ta un icin gbang gbang, maa a kera ngôôr ga je a na un gbenda ér a yem. 44 A kaa a na ér: “Nenge, de ôron or môm kwagh sha mi ga, kpa za tese pristi iyol you, shi na nagh sha akaa a Mose yange kaa la, sha ci u í wanger we, nahan i lu ve shiada.” 45 Kpa or la yemen yô, a gba za samber a kwagh ne, nahan ior kpishi ungwa. Kwagh ne na yô, Yesu kera fatyô u nyôron ken gar môm ga, a lu ken won sha ajiir a ior lu ga yô. Kpa ior lu duen hanma vegher cii van hen a na.