Yohane

13 Er iniongo i Paseka lu a kuma ga la je, Yesu fa er shighe a kom u una undu tar ne, una yem hen Ter na yô. Shi er mbadondon un mba ve lu shin tar ne la doo un ishima yô, ve doo un ishima zan zan ar ken mkur je. 2 Shighe u i lu yan kwaghyan u aikighe zan a mi ave la, Diabolo vande wan mhen ken ishima i Yuda Isekarioti, wan u Shimon, ér a tee un. 3 Yesu fa er Ter a gem akaa cii a we un sha ikyev, man er un dugh hen Aôndo, shi un lu yemen hen Aôndo yô, 4 nahan a mough hen kwaghyan u aikighe la, a ér akondo a a haa iyol la, maa a tôô taor a zer ken iwenge. 5 Maa a haa mngerem shin gbande a gba ôôn mbahenen angahar shi uman ve angahar sha taor u a zer ken iwenge la. 6 Ve hen Shimon Peteru yô, Peteru pine un ér: “Tere, wer u ôôm angaharaa?” 7 Yesu gema kaa a na ér: “U kav kwagh u m lu eren ne hegen ga, kpa u va kav ken hemen.” 8 Peteru kaa a na ér: “Mayange je u ôôm angahar ga.” Yesu gema kaa a na ér: “Aluer m ôô u ga yô, u zua a kwar vea mo imôngo ga.” 9 Shimon Peteru maa kaa a na ér: “Tere, yô de ôôn mo angahar tseegh ga, ôôm ave kua ityough kpaa.” 10 Yesu gema kaa a na ér: “Or u nan vande ôôn iyol yô, gba u a ôô nan angahar tseegh, sha ci u iyol i nan cii ngi wang. Man ne mba wang, kpa ka ne cii ga.” 11 Yange fa or u nana va tee un yô. Ka nahan ve kaa ér: “Ka ne cii ne lu wang ga” ye.

12 Nahan ôôn ve angahar shi hiden haan akondo na iyol yô, a hide a za tema hen tebul, maa a kaa a ve ér: “Ne kav inja i kwagh u m er a ven ne kpa? 13 Ne mba yerem ner ‘Ortesen’ man ‘Ter,’ man ka shami je, sha ci u ka or u m lu je la. 14 Nahan aluer mo u m lu Ter man Ortesen ne m ôô ne angahar yô, ne kpa ôôn nen mbagenev angahar.* 15 Gadia m ver ne ikyav, mer er m er a ven nahan, ne kpa eren nen nahan vough. 16 Mimi mimi je* me kaa ne, kpan hembe orvesen u nan ga, shi or u i tindi a tindi nan yô, nan hembe or u nan tindi nan la ga. 17 Aluer ne fa akaa ne shi ne mba eren a yô, a saan ne iyol. 18 Ka ne cii m lu ôron ga; m fa mba m tsough yô. Kpa kwagh ne er sha u kuren kwagh u ruamabera a kaa ne, ér: ‘Or u a ye beredi a mo imôngo la hingir orihyom wam.’* 19 M ngu ôron a ven mer kwagh ne una er, sha er zum u ne va nenge una erem yô, ne na jighjigh er m lu un shon yô. 20 Mimi mimi je me kaa ne, or u nan ngohol or u m tindi cii yô, mo kpa nan ngohol, man or u nan ngohol mo yô, nan ngohol Un u a tindim la kpaa.”

21 Yesu ôron akaa ne cii yô, ishima gba zan un iyol tsung, tsô a er shiada a kaa ér: “Mimi mimi je me kaa ne, or môm ken a ven nana teem.” 22 Tsô mbahenen gba kenger ayol a ve, ve lu fan or u lu ôron kwagh u nan la ga. 23 Ugen ken mbahenen mbara, u doo Yesu ishima la, tema dondo vea* Yesu. 24 Nahan Shimon Peteru kende ityough sha, kaa a ngula ér: “Kaa se or u a lu ôron kwagh u nan la.” 25 Un ne maa hide yier Yesu sha vanger, pine un ér: “Tere, ka ana?” 26 Yesu kaa ér: “Ka or u me civ ivurugh ki beredi me na nan la.” Nahan civin beredi la yô, a gema a na Yuda wan u Shimon Isekarioti. 27 Yuda ngohol ivurugh ki beredi kira kera yô, Satan maa nyôr ken a na. Nahan Yesu kaa a na ér: “Kwagh u u lu eren la, er un fefa.” 28 Nahan kpa, or môm ken mba ve lu vea na hen tebul la fa er hii ve ôr kwagh ne a na ga. 29 Mbagenev je yô lu henen ér, er lu Yuda lu a akwati u inyar yô, Yesu lu kaan a na ér, “Yam akaa a i gbe u se er iniongo a mi la,” shin lu kaan ér, a na mbaatsanev kwagh. 30 Nahan ngohol ivurugh ki beredi kira yô, a kar fele a due; man lu tugh.

31 Nahan dugh yô, Yesu kaa ér: “I ver Wan u or sha ian i icivirigh hegen, shi Aôndo kpa zua a icivir sha kwagh na. 32 Aôndo iyol na una ver un sha ian i icivirigh, man una ver un sha ian i civirigh fefa je. 33 Mbayev mba kiriki, me mase lun vea ven sha anshighe kpuaa tsô. Ne va kerem; kpa er m ôr a Mbayuda mer, ‘Ape me yem la, ne fatyô u van her ga’ nahan, ne kpa m ngu ôron kwagh ne a ven hegen. 34 M ngu wan ne tindi u he, mer doo nen ayol a en; er ne doom ishima nahan, kape ne kpa doo nen ayol a en vough je la. 35 Ka sha kwagh ne man ior cii vea fa er ne lu mbahenen av ye, aluer ne doo ayol a en yô.”

36 Shimon Peteru pine un ér: “Tere, ka han u lu yemene?” Yesu kaa ér: “Ape m lu yemen la, u fatyô u dondon mo hegen ga, kpa u va dondo ken hemen.” 37 Peteru gema kaa a na ér: “Tere, er nan ve i lu u me fatyô u dondon we hegen ga? Aluer ka uma wam je kpa me na sha ci wou.” 38 Yesu gema kaa ér: “U na uma wou sha ci wamaa? Mimi mimi je me kaa u, ikyegh ia lu a tôngo ga je tsô, u vendam kwa tar.”