Aerenakaa

9 Kpa ishima lu vihin Saulu tsung a mbahenen mba Ter, shi lu tan kume ér una tim ve kera, nahan a za hen pristi u vesen 2 a za kaa a na ér a nger uwashika hen ushinagoge mba ken Damaseku, sha u mba un za zough a ve ve lu dondon Gbenda u Ter cii, nomso kua kasev kpaa, una haa ve ahye una va a ve ken Yerusalem.

3 Tsô a mough a yem zan zan a za zurum a Damaseku, ica i gbe ga yô, iwanger due sha aôndo wanger kase un, 4 nahan a gba inya, maa a ungwa i ôr a na ér: “Saulu, Saulu, er nan u tôvon mo a icana?” 5 A pine ér: “Ka we ana, Terem?” A kaa a na ér: “Ka mo Yesu, u u lu tôvon mo a ican ne. 6 Kpa mough sha yem ken gar, tsô a ôr u kwagh u i gbe u u er yô.” 7 Nahan ior mba ve lu zan vea na imôngo la hide tile jikii, ve lu ungwan ikyenge, kpa ve nenge a or ga. 8 Tsô Saulu mough hen inya. Er bugh ashe a na nahan kpa, kera fatyô u nengen a ma kwagh ga. Nahan ve kôr un sha uwe ve va nyôr a na ken Damaseku. 9 Ayange atar cii nenge a ma kwagh ga; ya kwagh ga, shi ma kwagh kpaa ga.

10 Orhenen ugen gema lu ken Damaseku, i yilan un ér Anania. Ter yila un ken mpase u sha mnenge ér: “Anania!” A kaa ér: “Mo ne, Tere.” 11 Maa Ter kaa a na ér: “Mough sha, za sha godobi u i yer ér Jighilii la, za pine i tese u orgen, iti na ér Saulu. Ka or u ken Tarsu, ngu hen ya u Yuda. Gadia nenge! Ngu eren msen, 12 maa a nenge a orgen ken mpase, iti na ér Anania, va nyôr penda un ave iyol sha u a nenge kera yô.” 13 Kpa Anania kaa ér: “Tere, m ungwa kwagh u or ne hen ior kpishi; akaa a vihin a a lu eren uicighanmbaiorov ou ken Yerusalem la cii. 14 Man hegen ne, upristi mba tamen na un ian ér a̱ kôr* hanma or u nan yer sha iti you cii.” 15 Kpa Ter kaa a na ér: “Za! gadia or ne ka ikyagh ki tomov yagh ki m tsough sha u a̱ pase iti yam hen akuraior man hen utor kua ônov mba Iserael yô. 16 Gadia me tese un wang er i gbe u una ya atsan kpishi sha ci u iti yam yô.”

17 Tsô Anania za nyôr hen ya la, penda un ave iyol, kaa ér: “Saulu, anmgbian, Ter Yesu u yange ande hen a we sha gbenda zum u u lu van heen la, tindim hen a we sha er u hide u hii u nengen shi u iv a icighan jijingi yô.” 18 Her ave ave je, ankaam due un ken ashe er ka akembe a ishu nahan, haa inya, maa a hii u nengen kera. Maa a mough sha, i er un batisema. 19 Tsô a ya kwagh, a zua a agee.

A tsa vea mbahenen mba ve lu ken Damaseku la anyangem kpuaa, 20 a kera ngôôr ga maa a hii u pasen kwagh u Yesu ken ushinagoge kaan ér, ngun ka Wan u Aôndo je. 21 Kpa mba ve lu ungwan kwaghôron na la cii kpiligh ve iyol, ve lu pinen ér: “Ka or u a nzughul a mba ken Yerusalem mba ve yilan sha iti shon ne gaa? A va heen ka u va kôron* ve yemen a mi hen upristi mba tamen ga zee?” 22 Kpa Saulu lu zuan a tahav seer a seer, shi Mbayuda mba ve lu ken Damaseku la fatyô u nyiman kwagh a na ga, sha ci u lu ôron kwagh shi tesen akav vough vough ér, ka Kristu je ne.

23 Ayange nga kar kpishi yô, Mbayuda zua zwa ér vea wua un. 24 Nahan kpa Saulu va fa kwaghbo u ve zua zwa u eren un ne. Shi ve lu kuran ihindagar tugh man atetan sha er vea bee a na sha yô. 25 Nahan mbahenen nav tôô un shin ikyese tugh, due a na hen ian i ken kpekpe, ve shiligh a na ken won.

26 Va nyer ken Yerusalem yô, a nôngo ér una kohol mbahenen, kpa ve cii ve lu cian un, sha ci u ve lu a na jighjigh ér ngu orhenen ga. 27 Nahan Banaba va wase un za a na hen mbaapostoli za ôr ve kwagh na vighe vighe, er yange nenge a Ter sha gbenda, shi Ter ôr kwagh a na, man er pase kwagh ken Damaseku ken iti i Yesu gbar gbar yô. 28 Tsô a lu her vea ve, lu zenden ken igbar ken Yerusalem, ôron kwagh ken iti i Ter gbar gbar. 29 Lu ôron kwagh shi nyiman kwagh a Mbayuda mba lamen zwa Grika, kpa ve lu nôngon ér vea bee a na sha. 30 Anmgbianev mba va fe kwagh ne yô, ve sen a na shin Sesaria, ve va ver un gbenda, a yem ken Tarsu.

31 Nahan bem gba ken tiônnongo* jimin cii hen haregh u Yudia man Galilia man Samaria la cii, shi lu taver seer a seer; man er ve lu cian Yehova* shi eren kwagh sha gbenda u tesen ér icighan jijingi na ve msurshima yô, ve lu ngeen seer a seer.

32 Tsô er Peteru lu zenden hen haregh la cii yô, a sen a va hen uicighanmbaiorov mba ve lu hen Lida la kpaa. 33 A va zua a orgen her, i yilan un ér Ania. Or ne yaven a yav inya tseegh sha gambe na, kuma anyom anigheni, sha ci u lu orkpenalegh. 34 Peteru kaa a na ér: “Ania, Yesu Kristu ngu been we angev. Mough sha, sôr gambe wou.” Maa a kighir a mough sha fese. 35 Ior mba ken Lida man mba hen Gburumaa u Sharon cii mba nengen a na yô, ve hide hen Ter.

36 Kwase ugen u lu orhenen yô, lu ken Yopa, i yilan un ér Tabita, inja na yô ér, “Doka.”* Lu a aeren a dedoo kpishi shi naan uiyua kpishi. 37 Kpa sha ayange la, gba angev maa kpe. Nahan ve ôô un iyol ve gbir un ken ruumyou u sha. 38 Lida lu ikyua a Yopa, nahan er mbahenen ungwa ér Peteru ngu ken Lida yô, ve tindi nomsombaiorov uhar hen a na ér ve za kaa un ér: “Wea lumun yô, va hen a vese fese.” 39 Tsô Peteru mough yem vea ve imôngo. Za nyer yô, ve unde a na sha ruumyou u sha; kasev mba côgholov cii va tile sha ishigh nagh, ve lu vaan tesen un uriga kpishi kua akondo a haan iyol a Doka kor shighe u lu uma la. 40 Peteru maa kaa hanma or due ken won, tsô a gure inya, a er msen. Gem ape i gbir ikyom la yô, a kaa ér: “Tabita, mough sha!” Maa a bugh ashe, nengen a Peteru yô, a mough a tema sha. 41 Peteru za uwegh kôr un sha uwe, mough a na sha, maa yila uicighanmbaiorov man kasev mba côgholov tese ve un, er a lu uma yô. 42 I ungwa kwagh ne ken Yopa cii, nahan ior kpishi hingir mba nan Ter jighjigh. 43 Peteru lu ken Yopa her ayange kpishi, hen ya u orgen u eren tom u akôvanyam, i yilan un ér Shimon.