Mateu
28 Iyange i Memen la karen kera, sev mbu sôôn u aven sha iyange i hiihii ken kasua* yô, Maria Madalina man Maria ugen la va u va nengen uwar la.
2 Tsô nenge! tar tenger sha utaha tsung, sha ci u ortyom u Yehova* sen sha va menger iwen la kera, tema sha i. 3 Mluashe na lu er inyiar nahan, shi akondo a na kungu segh segh er senou nahan. 4 Nahan cier mbakuran mbara iyol, ve gbidye akarkase iyol je ve hingir humee.
5 Kpa ortyom la kaa a kasev mbara ér: “De cie nen ga, sha ci u m fa ka Yesu u i mande un sha kon* la ne lu keren ye. 6 Ngu heen ga, i nder un shin ku, er vande ôron nahan. Va, va nenge nen ape yange i gbir un ne. 7 Yô, za nen fefa za ôr nen mbahenen nav ner i nder un shin ku, man una vande yemen ken Galilia a ven. Ka ker ne za nenge a na ye. Ka kwagh u a lu je m ôr ne la.”
8 Maa ve kar hen uwar la sha fese, cier ve iyol, kpa gema saan ve iyol tsung. Ve gba yevese yemen sha u vea za ôr mbahenen nav kwagh ne, 9 maa Yesu za zua a ve, kaa ér: “M sugh ne!” Tsô ve kporom ve za gure un inya,* ve za ave ve kôr un shin angahar. 10 Yesu maa kaa a ve ér: “De cie nen ga! Za, za ôr nen anmgbianev* av sha er vea za ken Galilia yô. Ka ker vea za nenge a mo ye.”
11 Er ve lu yemen la, mbagenev ken mbakuran mbara nyôr ken gar za ôr upristi mba tamen akaa a a er la cii. 12 Tsô ve kohol vea mbatamen mbara ve er mhen, maa ve na ushoja mbara agbenger a azurfa kpishi, 13 ve kaa ér: “Kaa nen ner, ‘Mbahenen nav va tugh va ii ikyom na zum u se lu yaven yô.’ 14 Man aluer kwagh ne gba gomna ken to kpa, se pase un tsô a kuma un, nahan ishima i de ze ne iyol ga.” 15 Tsô ve ngohol agbenger a azurfa la, ve er kwagh u i kaa ve la, nahan gwa u kwagh ne samber hen Mbayuda cii, zan zan nyian.
16 Mbahenen mba 11 mbara di gema mough yem ken Galilia, hen uwo u Yesu kaa ér vea za zua her la. 17 Mba nengen a na yô, ve gure un inya,* kpa mbagenev ta akperan. 18 Yesu kporom va ôr kwagh a ve, kaa ér: “I nam tahav sha akaa a sha man a shin tar cii. 19 Sha nahan yô, za nen za gema nen ior mba ken akuraior cii ve hingir mbahenen, eren nen ve batisema ken iti i Ter man Wan man icighan jijingi. 20 Shi tesen nen ve u kuran atindi a m we ne la cii. Nenge! Me luun a ven ayange ayange, zan zan shighe u mkur u tar* ne.”