1 Mbatesalonika

5 Kpa sha kwagh u ashighe man ayange a i ver la yô, anmgbianev, ityôkyaa ngi i ngeren ne ma kwagh ga. 2 Gadia ne ayol a en ne fa dedoo er iyange i Yehova* ia va er ormbaiv ka nan va tugh nahan yô. 3 Shighe u vea kaan ér “Bem gba, zayol kera ngu ga!” la yô, maa fese je mtim una va sha a ve kpoo, er martoghor ka u kôr kwaseuya nahan, vea war mayange ga. 4 Kpa ne yô, anmgbianev, ne mba ken ime ga, nahan iyange la ia va ne aburabur er sev ka mbu av mbaiv shighe u ve ver ishima ga nahan ga, 5 gadia ne cii ne mba ônov mba iwanger man ônov mba atetan. Se mba kwagh u tugh ga, shi se mba kwagh u ime kpaa ga.

6 Nahan se kera za nen hemen u yaven er mbagenev ve lu eren nahan la ga, kpa se lu nen per shi se lu nen tsevaa. 7 Mbayaven ka tugh ka ve yav ye, mbahunden msôrom kpaa, ka tugh ve hunden ye. 8 Kpa se mba se lu ior mba atetan ne yô, se lu nen tsevaa, se haa nen jighjigh u nan man dooshima iyol, er ka rigautya nahan, shi se cir nen idyerutya, ka ishimaverenkeghen i va zuan a myom je la. 9 Gadia Aôndo tsua se ka sha u iyugh na i va sha a vese ga, kpa ka sha u se̱ zua a myom ken Ter wase Yesu Kristu. 10 A kpe sha ci wase, sha er sea lu per shin sea lu yaven* kpa, se̱ lu uma a na imôngo yô. 11 Nahan yô, taver* nen hanmô wen ishima shi wasen* nen hanmô wen, er ne lu vanden eren nahan.

12 Nahan, anmgbianev, se mba kaan a ven ser naan nen mba ve lu eren tom kpoghuloo hen atô wen la icivir, ve mba ve lu hemen ne ken Ter shi ve wan ne kwagh la; 13 shi kwagh ve a̱ gba ne ishima tsung sha dooshima, sha ci u tom u ve eren la. Luun nen ken bem a hanmô wen cii. 14 Kpa, anmgbianev, se mba kaan a ven ser, gema taan nen mba ve lu nzughul kwagh la icin,* lamen nen a mba iyol i kpe ve* la sha gbenda u taver ve ishima, wasen nen mba ve taver ga la, waan nen ishima a ior cii. 15 Ver nen ishima, mô wen nana̱ de eren or ifer sha ifer i nan er nan ga. Kpa keren nen u eren kwagh u dedoo a hanmô wen, man a mbagenev cii.

16 I̱ saan ne iyol hanma shighe cii. 17 Eren nen msen gbem. 18 Sughun nen Aôndo sha hanma kwagh cii. Ka kwagh u Aôndo a soo ér ne eren ken Kristu Yesu je la. 19 De pirin nen usu u jijingi ga.* 20 De lahan nen akaaôron a profeti ga. 21 Tôvon nen akaa cii; kôr nen ave sha kwagh u a lu u dedoo la gbang. 22 Palegh nen hanma inja i ifer cii.

23 Aôndo u bem iyol na a tsegha ne sha hanma gbenda cii. Shi jijingi wen ma a lu vough sha hanma gbenda cii, kua uma wen man iyol yen, ne anmgbianev, sha er ne lu a acôghor iyol sha shighe u Ter Yesu Kristu una lu vea vese imôngo la ga yô. 24 Un u a lu yilan ne la ka u mimi, una er nahan keng a bunde ga.

25 Anmgbianev, eren nen msen sha ci wase her.

26 Sugh nen anmgbianev cii, kuve nen ayol.*

27 M ngu kaan a ven taveraa ken iti i Ter mer, ôr nen washika ne anmgbianev cii ve ungwa.

28 Ter wase Yesu Kristu a̱ za hemen u tesen ne erdoo u sha mhôôn.