Marku

8 Tsô sha ayange la, ikpelaior igen shi kohol, man ve kera shi a kwagh môm u vea ya ga. Nahan a yila mbahenen nav a kaa a ve ér: 2 “Kunya kôrom a ikpelaior ne, sha ci u mba vea mo ka ayange atar je ne, man mba a kwagh môm u vea ya ga. 3 Aluer m na ve gbenda mer ve yem ken uya vev ijen* yô, vea za gba ijen sha gbenda, man ve mbagenev ajiir a ve gba ica.” 4 Kpa mbahenen nav kaa a na ér: “Man hen ijiir i gar a lu ikyua ga ne nahan, ka han or a zua a beredi a kuma u nan ior mbana?” 5 Ongo nahan yô, a pine ve ér: “Ka ikpenberedi ime ne lu a mini?” Ve kaa ér: “Ka itiankarihiar.” 6 Tsô a kaa ikpelaior la tema inya. Maa a tôô ikpenberedi i itiankarihiar la, a er msen,* maa a coon a gba nan mbahenen nav ér ve na ior, nahan ve gema ve na ikpelaior la. 7 Shi ve lu a ishu i kiriki kpuaa, nahan eren msen* sha i yô, a kaa a ve ér ve na ior i kpaa. 8 Nahan ve ya ve ide, avur neer, ve kohol a iv akese* a vesen ataankarahar. 9 Nomso kuma er 4,000 nahan. Tsô a na ve gbenda ér ve yem.

10 Maa fese je a nyôr tso vea mbahenen nav ve va hen haregh u Damanuta. 11 Tsô Mbafarishi gba va sendegh kwagh a na, kaan ér a̱ er ivande ken iti i Aôndo vea nenge; ve lu karen un. 12 Nahan a toghor iyol, a kaa ér: “Er nan kov ne u zer keren ivande ase? Mimi je me kaa ne, a er kov ne ivande i môm ga.” 13 Maa a undu ve, shi a za nyôr tso, a per yande la.

14 Kpa ve hungur u tôôn beredi, man ve lu a kwaghyan ugen shin tso ga, saa di kpenberedi môm tseegh. 15 Tsô a ta ve icin wang a kaa ér: “Wa nen ikyo sha er a hôngor ne sha kwa u Mbafarishi man sha kwa u Herode ga yô.” 16 Maa ve gba vaan iyol er ve tee beredi ga yô. 17 Ongo nahan yô, a kaa a ve ér: “Er nan ne lu vaan iyol ner ne mba a beredi ga ase? Ne mba a kav kwagh u m soo u ôron ne je gaa? Ne kav ken asema a en gaa? 18 ‘Ne mba a ashe, kpa ne mba nengen gaa? Shi ne mba a ato, kpa ne mba ongo gaa?’ Ne umbur 19 shighe u m coon ikpenberedi itian sha ci u nomso 5,000 la gaa? Yange ne kura avur a neer her iv akese a me?” Ve kaa a na ér: “Puekarahar.” 20 “Man shighe u m coon ikpenberedi itiankarihiar sha ci u nomso 4,000 la, avur neer, ne kohol a iv akese a vesen* a me?” Ve kaa a na ér: “Ataankarahar.” 21 Maa a pine ve ér: “Nahan kpa ne mba a kav je gaa?”

22 Tsô ve va nyôr hen Beteseida. Maa ior va un a orapirashe, ve zamber a na ér a bende or shon ave iyol. 23 Nahan a kôr or la sha uwe a due a na ken akôngo a angar la. Te un azer ken ashe yô, a penda un ave iyol, maa a pine un ér: “U nenge a ma kwagh je he?” 24 Or la kenger kera, maa kaa a na ér: “M nenge a ior mba zenden, kpa mba er ka ikyon nahan.” 25 Tsô shi a penda or shon ave sha ashe, maa a nenge wang. Ashe na bugh, nahan a gba nengen a hanma kwagh tsembelee. 26 Tsô a na un gbenda ér a yem ken ya, shi a kaa a na ér: “De nyer ken gar ga.”

27 Tsô Yesu mough vea mbahenen nav u yemen hen agar a kiriki a ken Sesaria-Filipi, nahan mba ngur yemen sha gbenda yô, a gba pinen mbahenen nav ér: “Ior mba kaan ér m ngu ana?” 28 Ve kaa a na ér: “Ka ve kaa ér u ngu Yohane u Eren Batisema, kpa mbagenev ka ve kaa ér u ngu Eliya, mbagen di ér u ngu môm ken uprofeti mbagenev.” 29 Maa a pine ve ér: “Ne yô, ne mba kaan ner m ngu ana?” Peteru kaa a na ér: “U ngu Kristu.” 30 Maa a ta ve icin gbang gbang ér ve de pasen or môm kwagh na ga. 31 Shi a gba tesen ve, ôron ér gba keng u Wan u or una ya atsan kpishi, shi mbatamen man upristi mba tamen kua mbangerenatindi vea venda un shi a wua un, kpa ayange a karen atar yô, una nder shin ku. 32 Lu ôron kwagh ne ken igbar je. Kpa Peteru ta ibyalegh a na gba za vendan a na. 33 Maa a gema a kenger mbahenen nav, a venda a Peteru, a kaa ér: “Kar hidem ken ijime, Satan! Sha ci u u ngu a mhen u Aôndo ga, kpa ka u ior.”

34 Tsô a yila ikpelaior kua mbahenen nav a kaa a ve ér: “Aluer or soo u dondon mo yô, nana̱ nyiman iyol i nan* nana̱ tôô kon* u nan nana̱ dondo sha a mo gbem. 35 Gadia hanma or u nan keren ér nana war uma u nan yô, una saa nan. Kpa or u uma u nan a saa nan sha ci wam man sha ci u loho u dedoo yô, nana gema a war un. 36 Mimi je, aluer or zua a tar cii kpa uma u nan gema saa nan yô, a lu nan a inja sha nyi? 37 Ka nyi jighilii or a na sha ci u uma u nana? 38 Gadia or u nana cia ashe sha kwagh wam man mkaanem am ken kov u idyaa* man u isholibo ne cii yô, Wan u or kpaa una cia ashe sha kwagh u nan zum u una va ken iengem i Ter na vea uicighanmbatyomov la.”