Mateu

14 Sha ayange la, Herode u lu ityoor* u Galilia la ungwa ibaver sha kwagh u Yesu. 2 Nahan a kaa a mba eren un tom ér: “Ka Yohane u Eren Batisema i nder un shin ku ve, a lu a tahav mbu eren ityom i kpilighyol ne* ye.” 3 Herode yange kôr Yohane haa un ahye, za wuhe ken purusu sha ikyaa i Herodia. Herodia lu kwase u Filibu, anmgbian u Herode. 4 Ityôkyaa yô, Yohane zer kaan a na ér: “U vôso kwase la ka shami ga.” 5 Nahan Herode soo u wuan Yohane, kpa lu cian ikpelaior, sha ci u ve nenge ér Yohane ka profeti. 6 Kpa zum u i lu eren iniongo i ember iyangemar i Herode yô, wan u Herodia u kwase vine amar hen iniongo la doo Herode tsung. 7 Nahan a tôndo zwa shi a bum ér una na un nyityôkwagh i a sen cii. 8 Tsô ngô u wankwase la za wa un kwagh, nahan wankwase la va ôr a tor ér: “Kaa i va a ityough ki Yohane u Eren Batisema la sha pelengi, i va nam heen.” 9 Kwagh ne doo tor ga, nahan kpa, er vande bumun sha ishigh ki mba ve lu yan kwagh vea na la yô, a tindi ér i va na wankwase la kwagh u a kaa la. 10 Nahan a tindi i za gber Yohane ityough ken purusu, 11 i va a ki sha pelengi i va na wankwase la, a yem a mi a za na ngô na. 12 Tsô mbahenen mba Yohane va tôô ikyom na za ii, maa ve hide ve va ôr Yesu. 13 Yesu ungwan kwagh ne yô, a mough hen ape lu la, a nyôr tso a yem hen ijiir i or lu her ga yô, sha u una za lu her tswen. Kpa ior kpishi mba fe nahan yô, ve due ken agar a ve, ve dondo un ijime angahar.

14 Va duen sha kpetar yô, a nenge a ikpelaior i vesen, tsô kunya kôr un a ve, nahan a bee ior vev mba ve lu uange la cii iangev vev. 15 Kpa ka va hingir aikighe yô, mbahenen nav va kaa a na ér: “Gar ngu ikyua heen ga, man shighe kpa za hegen. Yô na ikpelaior ne gbenda ve yem ken agar ve za yam kwaghyan ve.” 16 Yesu gema kaa a ve ér: “Ve de gbe yemen nahan ga, na nen ve kwagh ve ya.” 17 Kpa ve kaa a na ér: “Se mba a kwagh môm heen ga, saa ikpenberedi itian man ishu ihiar tseegh tsô.” 18 A kaa ér: “Vam nen a mi heen.” 19 Tsô a kaa ikpelaior la shar inya sha toho. A tôô ikpenberedi i itian man ishu i ihiar la, a gema a kenger sha, a er msen,* maa a coon ikpenberedi la a na mbahenen nav, mbahenen mbara di gema na ikpelaior la. 20 Nahan ior cii ya kuma ve, shi ve kohol avur a a neer yô, iv akese 12 poo poo. 21 Ken mba ve ya la, nomso kuma er 5,000 nahan, i wa iyenge i kasev man mbayev ker ga. 22 Tsô a kera ngôôr ga je maa a kaa a mbahenen nav ér ve za nyôr tso ve hemen a na, ve per yande la, un una na ikpelaior la gbenda ve yem.

23 Ne ikpelaior la gbenda i yemen yô, un kar yem sha uwo tswen, u za eren msen. Ime va hii u wan, kpa lu her tswen. 24 Hen shighe ne nahan tso la lu ken mnger ica a kpetar.* Er ve ver ishigh sha ahumbe yô, agôndoamnger lu tan sha tso, nahan ve lu nahan sha ican. 25 Ka va hingir sha use* yô, Yesu lu zenden sha kwavmnger van ape ve lu la. 26 Mbahenen nav mba nengen a na zenden sha zegemnger yô, ishima ta ve kwe, ve gba pinen ér: “Ka mnyamciem shinii?” 27 Kpa fese je Yesu ôr kwagh a ve kaa ér: “Taver nen ishima. Ka mo; de cie nen ga.” 28 Peteru gema kaa a na ér: “Tere, a lu we yô kaam m zende sha kwavmnger m va kohol we.” 29 A kaa ér: “Va!” Tsô Peteru due shin tso gba zenden sha kwavmnger zan ape Yesu lu la. 30 Kpa gem kenger ijeverahumbe la yô, cier un iyol. Nahan hiin u miren yô, a ngor a kaa ér: “Tere, yimam!” 31 Fese je Yesu nalegh uwegh kôr un, a kaa a na ér: “U ta akperan wer nyi? Jighjigh u nan wou vese ga tsôô!” 32 Mba za nyer shin tso yô, ijeverahumbe la maa de. 33 Nahan mba ve lu shin tso la gure un inya* kaa ér: “Mimi je, u ngu wan u Aôndo.” 34 Tsô ve per ve va ken tar u Genesareti.

35 Ior mba hen ijiir la mba kaven un yô, ve tindi i kaa mba hen ningirtar la cii, nahan ior va un a mba ve lu dedoo ga la cii. 36 Ve zamber a na ér ma ve bende a tsumbur u ikyondo i a hee iyol la di tseegh tsô. Nahan mba ve bende a mi la cii angev bee ve vindi vindi.