ITYOUGH 44
Hanma Iniongo Cii Doo Aôndo Ishima?
Yehova soo ér i saan se iyol shi ashighe agen, se er iniongo se ember je kpaa. Kpa ka hanma iniongo cii i doo un ishima yee? Se tese ser Yehova doo se ishima sha ikyaa ne nena?
1. Er nan ve uiniongo kpishi ve doo Yehova ga?
Alaghga a kpiligh we iyol u fan er uiniongo kpishi ve zough sha atesen a Bibilo ga, shin i lu ior mba civir Aôndo ga yange ve hii ve yô. Uiniongo mbara cii hii ka ken kwaghaôndo u aiegh. Alaghga ve biishi a kwagh u mbaimegh shin ityesen i or ka nana kpe yô, i lu iyol i kpe, jijingi a due a yem la. Uiniongo mbagen di wa ityô ken akaa a mbatsav a ior ve ne jighjigh a mi yô, shin kwagh u doon ikyôr. (Yesaia 65:11) Yehova ta mbacivir un icin ér: “Pav nen a ve, . . . shi de nen u benden a kwagh u hôngorough.”—2 Mbakorinte 6:17.a
2. Yehova nenge uiniongo mba ka i er sha u nan uumace icivir karen ikyaa inya la nena?
Yehova wa se kwagh ér se wa ikyo sha er se ‘suur sha or’ ga yô. (Ôr Yeremia 17:5.) Uiniongo mbagen ka i er sha u nan mbahemenev shin ushoja icivir. Mbagen di i lu sha ci u akaa a vesen a ken ma tar, er u civir tuta nahan, shin iyange i tar shon hingir sha tseeneke u u la. (1 Yohane 5:21) Mbagen di yô, ka i lu sha ci u mbamzough mbagen shin iniongo i patii. Aluer se na orumace shin ma nongo icivir kar ikyaa inya, hemban je yô, uumace shin iniongo i i samber a akaa a a hendan a awashima u Yehova nahan, a lu un nena?
3. Ka aeren a nyi nahan alaghga aa na uiniongo mbagen vea lu mba dedoo ga?
Bibilo venda kwagh u “man msôrom karen ikyaa inya, [man] uiniongo mba i eren dang her la, [kua u] gban ugesa sha msôrom ma man.” (1 Peteru 4:3) Ior ka vea eren uiniongo mbagen yô, mba ker iyol tsaha ga, ka ve er akaa a dang kpishi. Aluer se soo ser se za hemen u lun azende a Yehova yô, gba u se palegh akaa a hôngorough angara nahan cii.
HEN KWAGH I ZA SHIMI
Hen fa kwagh u u er sha kwagh u uiniongo kua umemyol ve a doo Yehova yô.
4. Palegh uiniongo mba ve lahan Yehova la
Ôr Mbaefese 5:10, maa lam nen sha mbampin mban:
Shighe u se soo u eren ma iniongo yô, ka nyi i gbe u se vande fan cii ve se ere?
Ka uiniongo mba nyi nahan ior ve eren wuee hen ijiir yene?
U nenge wer uiniongo mbara doo Yehova?
Ikyav i tesen yô, i lu nahan u hen sha gbenda u Aôndo a nengen iniongo i ember iyange i mar la vee? Bibilo ôr kwagh u or u civir Yehova môm môm u yange nan ember iyange i mar i nan ga, kpa i gema i ter iorov uhar mba civir Yehova ga, mba yange ve er iniongo i ember mar ve yô. Ôr Genese 40:20-22 man Mateu 14:6-10. Maa lam nen sha mbampin mban:
Ka nyi yange i za hemen hen uiniongo mba ember iyange i mar mba uhar mbara?
Kwagh u avur a Bibilo ne a ôr la wase u u fan er Yehova a nengen kwagh u umbur iyange i mar la nena?
Nahan kpa alaghga u pine wer, ‘Aluer m er iniongo i umbur iyange i mar yam shin m za i orgen gayô ka ma iniongo igen i Bibilo i vende nahan kwagh a gba Yehova sha mi?’ Ôr Ekesodu 32:1-8. Shi, nenge VIDIO i i lu heen ne maa lam nen sha mbampin mba ve dondo ne:
Er nan ve i gbe u se nôngo se fa kwagh u a lu sha ishima i Yehova?
Se er kwagh shon nena?
Aluer ma iniongo i doo Aôndo ishima ga yô, se er nan ve se fa?
Iniongo shon i hendan a akaa a Bibilo i tese yôô? Wea soo u fan yô, tôv fa ape yange i hii yô.
Iniongo shon ka i nan uumace shin mbamzough gayô akaa agen a nan ma tar icivir kpishi? Ka Yehova se hemban nan un icivir yase ye, shi ka un se suur sha a na ser una sôr mbamzeyol mba tar ne ye.
Aeren a ior kua akaa agen a ka a eren iniongo shon ve ior ve eren la, ka a Bibilo i vende yôô? Gba u se lu wang sha aeren a ase.
5. Wase mbagen kpa ve na akaa a u ne jighjigh a mi la icivir
Shighe u ior ve lu kumbur a we ér u er ma iniongo i i doo Yehova ishima ga yô, alaghga a taver we u vendan. Nahan kundu ishima pase er i hii ve u eren iniongo la ga la sha kwaghfan. Wea soo u nengen ikyav er u fatyô u eren kwagh ne yô, nenge VIDIO i i lu heen ne.
Ôr Mateu 7:12, maa lam nen sha mbampin mban:
Sha kwagh u ivur ne i ôr yô, doo u ú kaa a ior mba hen tsombor wou mba ve lu Mbashiada ga la wer ve de eren ma iniongo gaa?
Ka nyi u fatyô u eren sha u tesen tsombor wou wer er u lu eren iniongo a ve ga nahan kpa, ve doo u ishima shi ve gba u kwagh kpishi?
6. Yehova soo ér i saan se iyol
Yehova soo ér se luun imôngo vea mba hen tsombor wase kua azende ase, se yaan kwagh vea ve shi se ember vea ve, sha er a saan se iyol yô. Ôr Orpasenkwagh 8:15, maa lam nen sha mpin ne:
Ivur ne tese ér Yehova soo ér i saan se iyol nena?
Yehova soo ér ior nav ve eren akaa a nan ve msaanyol shi ve zuan imôngo ve ember. Nenge VIDIO i i lu heen ne sha er u nenge ikyav i kwagh ne wang sha mba mkohol mba ityar ityar mba se eren mbara yô.
Ôr Mbagalatia 6:10, maa lam nen sha mbampin mban:
Gba u se eren uiniongo mba ior ve eren wuee la, sha ci u se soo u eren “kwagh u dedoo” a ve?
U er or iyua nena ve a saan we iyolo? Ka u nan or iyua sha ci u ka shighe u iniongo nahan gba u u na kwagh shinii ka u karen a ishima eren or iyua shighe u u soo cii laa?
Mbashiada kpishi ka ve eren mbayev vev iniongo sha ashighe ashighe shi ashighe agen yô, ve yam uiyua ve na ve je kpaa. Aluer u ngu a mbayev yô, ka akaa a doon a nyi nahan u fatyô u eren sha ci ve?
IOR MBAGENEV KA VE KAA ÉR: “Kwagh gba sha kwagh u ape yange ma iniongo hii la ga. Kwagh u vesen yô, ka u lun imôngo vea ior mba hen tsombor kua azende ember.”
We u nenge nena?
KA NYI U HENE?
Yehova soo ér se luun imôngo vea mba hen tsombor wase kua azende ase se ember. Nahan kpa a soo ér se palegh uiniongo mba ve vihi un ishima la.
Mbampin mba umbur kwagh u i hen yô
Ka mbampin mba nyi nahan i doo u se pine sha er se fa aluer ma iniongo doo Yehova ga yôô?
Se er nan ve se wase mba hen tsombor wase kua azende a ase u fan mnenge wase sha kwagh u uiniongo?
Er nan u fe wer Yehova soo ér i saan se iyol shi se eren akaa a nan se msaanyolo?
SEER HENEN KWAGH
Nenge uiniongo mbagen mba Mbakristu ve eren ga yô.
“Er Nan Mbashiada mba Yehova Ve Eren Uiniongo Mbagen Ga?” (Ngeren u sha Intanet)
Nenge atôakyaa anyiin aa ne ve se ne jighjigh ser iniongo i umbur iyange i mar la ka i doon Aôndo ishima ga yô.
“Er Nan Mbashiada mba Yehova Ve Eren Iniongo i Umbur Iyange i Mar Ga?” (Ngeren u sha Intanet)
Nenge er mbayev mba Yehova a doo ve ishima vea na a saan Un iyol shighe u i lu eren uiniôngo mba ve doo Aôndo ga la yô.
Mbakristu umiliôn imôngo mba ye kirimishi ga. Ka ve nenge kwagh u ve tsough u yan kirimishi ga ne nena?
a Nenge Ngeren u Seer Tan Iwanger u sha 5 sha er u fa kwagh u ashighe agen u er shighe u ior ve lu eren ma iniongo yô.