Luka

9 Tsô a yila Mbapuekaruhar mbara va kohol imôngo, maa a na ve tahav kua ian i dughun ujijingi mba bov shi been hanma inja i uange cii. 2 Shi a tindi ve ér ve za pase loho u dedoo u Tartor u Aôndo shi ve bee ior iangev. 3 A kaa a ve ér: “De tôôn nen kwagh môm sha ci u zende ne ga, gbough ga shin ikpa i wan kwaghyan shin beredi shin inyaregh ga; shi de tôôn nen akondo ahar* ga. 4 Kpa hanma ijiir i ne ze cii, nea za nyôr hen ma ya yô, lu nen her zan zan ne kar moughon her. 5 Man hanma gar u ior ve ngohol ne her ga cii, ne moughon her yô, kure nen ihyundu i shin angahar a en, nahan i lu shiada hen a ve.” 6 Tsô ve due ve gba zenden sha agar a kiriki a hen haregh la, pasen loho u dedoo shi been ior iangev hanma ijiir cii.

7 Herode* u lu ityoor* la ungwa hanma kwagh u lu zan hemen yô, nahan lan un ishima kpishi, sha ci u mbagenev lu ôron ér i nder Yohane shin ku, 8 kpa mbagenev lu ôron ér Eliya hide va, mbagenev di lu kaan ér môm ken uprofeti mba ngise mbara nan nder. 9 Herode kaa ér: “Yange m gber Yohane ityough. Nahan, or u m lu ungwan ambaakaa ne sha a nan la ka ana?” Tsô a gba keren ér ma un nenge a na.

10 Mbaapostoli mba hidi yô, ve ôr Yesu akaa a ve za er cii. Maa a mough vea ve, ve yem ve tseegh hen gar ugen, i yilan ér Beteseida. 11 Kpa ikpelaior fe kwagh ne yô, ve dondo un ijime. Nahan a ngohol ve sar sar, a gba lamen a ve sha kwagh u Tartor u Aôndo, shi a bee mbauangev iangev vev. 12 Iyange va ngur miren yô, Mbapuekaruhar mbara va hen a na, ve va kaa a na ér: “Na ikpelaior gbenda, sha er vea yem ken uya man agar a kiriki a hen ningir ne, vea za zua a ijiir vea tsa shi vea yam kwagh u vea ya yô, gadia ijiir i se lu her ne gba ica a gar.” 13 Kpa a gema a kaa a ve ér: “Ne na nen ve kwagh ve ya.” Ve kaa ér: “Se mba a kwagh heen hemba ikpenberedi itian kua ishu ihiar ga, saa se za yam kwaghyan sha ci u ior mban cii di je.” 14 Nomsombaiorov tseegh kuma er 5,000 nahan. Kpa a kaa a mbahenen nav ér: “Kaa nen ve ve̱ tema inya akum akum, hanma ikyum i kuma er iorov 50 nahan.” 15 Tsô ve er nahan, ve ôr ve cii ve tema inya. 16 Tôôn ikpenberedi i itian la man ishu i ihiar la yô, a gema a kenger sha aôndo a er msen.* Maa a coon a gba nan mbahenen nav ér ve za na ikpelaior la. 17 Nahan ior cii ya kuma ve, shi ve kohol avur a a neer yô, iv akese 12.

18 Va ngur eren msen tswen yô, mbahenen va hen a na, nahan a pine ve ér: “Ior mba kaan ér m ngu ana?” 19 Ve kaa ér: “Ka ve kaa ér u ngu Yohane u Eren Batisema, kpa mbagenev ka ve kaa ér u ngu Eliya, mbagen di ér u ngu môm ken uprofeti mba ngise mbara nan nder ye.” 20 Maa a pine ve ér: “Ne yô, ne mba kaan ner m ngu ana?” Peteru kaa ér: “U ngu Kristu, Un u Aôndo a tindi la.” 21 Tsô a ta ve icin gbang gbang ér ve de ôron or môm kwagh ne ga. 22 Kpa a kaa ér: “Gba keng u Wan u or una ya atsan kpishi, shi mbatamen man upristi mba tamen kua mbangerenatindi vea venda un shi a wua un, kpa sha iyange i sha utar la, a nder un shin ku.”

23 Tsô a gba kaan a ior cii ér: “Aluer or soo u dondon mo yô, nana̱ nyiman iyol i nan* nana̱ tôô kon* u nan nana̱ dondon mo ayange ayange. 24 Gadia hanma or u nan keren ér nana war uma u nan yô, una saa nan. Kpa or u uma u nan a saa nan sha ci wam yô, ka nan nana war un ye. 25 Mimi je, aluer or zua a tar cii kpa uma u nan gema saa shin nan tim yô, a lu nan a inja sha nyi? 26 Gadia or u nana cia ashe sha kwagh wam man mkaanem am cii yô, Wan u or una cia ashe sha kwagh u or la, zum u una va ken iengem na man i Ter na kua i uicighanmbatyomov la. 27 Kpa mimi je me kaa ne, mbagenev ken mba ve til heen ne vea nenge a ku ashe ga, zan zan vea vande nengen a Tartor u Aôndo.”

28 Yange ôr akaa ne ayange nga kar er anigheni nahan yô, a mough vea Peteru man Yohane kua Yakobu, ve yem sha uwo u za eren msen. 29 Er lu eren msen la, mlu u ishigh nagh gema, shi akondo a na hingir pupuu segh segh. 30 Yô nenge! iorov uhar gba lamen a na; lu Mose man Eliya. 31 Mluashe ve wanger er ka usu u mondon nahan, ve lu ôron er Yesu una va yem man er i gbe u kwagh ne una er nahan vough ken Yerusalem yô. 32 Hen shighe ne, mnyam kôr Peteru kua mba ve lu a na imôngo la, kpa mnyam ma va wanger ve ashe yô, ve nenge a na ken iengem na, shi ve nenge iorov uhar tile vea na. 33 Iorov mba uhar mban mba ngur undun Yesu yemen yô, Peteru kaa a na ér: “Ortesen, doo kpishi er se lu heen yô. De se tim utenti utar heen, u môm sha ci wou, ugen sha ci u Mose, ugen di sha ci u Eliya.” Peteru lu ôron kwagh ne, kpa fa kwagh u lu ôron la ga. 34 Kpa er lu ôron kwagh ne zan a mi a ve la, ibyeenegh wa, gba cirin ve. Ibyeenegh kira ki cirin ve cii yô, cier ve iyol. 35 Maa imo due ken ibyeenegh kira kaa ér: “Ngun ka Wan wam u m tsough yô. Ungwan nen un.” 36 Imo la ngi er nahan yô, ve nenge a Yesu tswen. Kpa ve lu ving, ve ôr or môm kwagh u ve nenge ne ga, sha ayange la cii.

37 Mba hongo sha uwo yô, kpernan ikpelaior i vesen va kohol un. 38 Tsô orgen ken ikpelaior la kaa ér: “Ortesen, m zamber we, nenge wan wam u nomso ne a lu, man ka cii wan wam je ne. 39 Man nenge jijingi u bo ka a mough un, ica a gbaan ga yô, a gba ngoron, shi ngu a er un a gba ikyungu, a mbua hugh zwa, shi ka i taver u a de un, saa ka a er un a tôndo avav iyol. 40 M zamber a mbahenen ou mer ve zenda un ken a na kera, kpa ve fatyô ga.” 41 Yesu gema kaa ér: “Kpash! Kov u banen a jighjigh man u hemban ato ne. Me lu a ven a kuma nena je man ne lu a jighjigh u nan sha wono? M̱ wa ishima a ven i̱ kuma nan je? Va a wan wou heen.” 42 Kpa wan la ngur van yô, jijingi u bo ne ta un inya sha agee shi na a gba ikyungu. Nahan kpa Yesu yange jijingi u bo la shi zenda un ken wannomso la kera, maa a gema un a na ter na. 43 Nahan kpiligh ve iyol tsung a tahav mbu Aôndo.

Akaa a yange lu eren ne cii nga gbe kpiligh ve cii iyol yô, a kaa a mbahenen nav ér: 44 “Kegh nen ato tsembelee, shi umbur nen mkaanem man, gadia ka u a za zua zwa a na Wan u or sha ikyev i ior, vea wua un.” 45 Kpa ve kav inja i kwagh u lu ôron ne ga. Jighilii yô, i yer ve a mi sha u ve̱ de kaven ga yô, shi cier ve iyol u pinen un kwagh sha kwagh u lu ôron la.

46 Tsô ve gba anyiman sha kwagh u or u nan hembe ken a ve yô. 47 Yesu kaven kwagh u ve lu henen ken asema a ve la yô, a yila wanye u cuku va tile un hen ikyooso. 48 Maa a kaa a ve ér: “Hanma or u nana ngohol wan u cuku ne ken iti yam yô, ka mo je nan ngohol ye; shi hanma or u nana ngohol mo yô, nan ngohol ka mo tseegh ga, nan ngohol Un u a tindim la kpaa. Gadia ka or u nan eren kwagh sha gbenda u tesen ér nan hemba gban ijime ken a ven la nan hembe ye.”

49 Yohane kaa a na ér: “Ortesen, se nenge orgen lu zendan azôv ken ior kera ken iti you, nahan se nôngo ser se yange un, sha ci u ngu or wase ga.” 50 Kpa Yesu kaa a na ér: “De yangen nen un ga, sha ci u or u nan hendan a ven ga yô, nan ngu or wen.”

51 Ayange nga va zurum u a yem a na sha yô, a kange ishima u yemen ken Yerusalem. 52 Nahan a tindi ior nav mbagenev ér ve hemen a na. Tsô ve za nyôr ken gar u kiriki ugen ken Mbasamaria sha u vea za wa ago iyol sha mve na. 53 Kpa za ve yô, i ngohol un her ga, sha ci u a kange ishima u yemen ken Yerusalem. 54 Mbahenen nav, Yakobu man Yohane, mba nengen kwagh ne yô, ve kaa ér: “Tere, u soo wer se yila usu u sen sha aôndo u va hia ve keraa?” 55 Kpa a gema a kenger ve, maa a venda a ve. 56 Tsô ve kar ve yem hen angar ugen.

57 Er ve lu yemen sha gbenda la, orgen kaa a na ér: “Hanma ijiir i u lu zan cii, me dondo u.” 58 Kpa Yesu kaa a na ér: “Atsôngo nga a ubar, shi inyon i purugh kpa ngi a aya, kpa Wan u or yô ngu a ya na u una tsaan her ga.” 59 Maa a kaa a orgen ér: “Dondom.” Or la gema kaa ér: “Tere, nam ian m za vande iin terem man me hide ye.” 60 Kpa Yesu kaa a na ér: “De mbakpenev ve ii mbakpenev vev, kpa we yem za pase kwagh u Tartor u Aôndo hanma ijiir cii.” 61 Orgen shi kaa ér: “Tere, me dondo u, kpa vande nan mo ian m za lôhô mba hen ya wam ayem.” 62 Yesu kaa a na ér: “Hanma or u nan ker ave sha ikyekye i kahan kwagh man nan lu geman ashe ijime yô, nan kuma u nyôron ken Tartor u Aôndo ga.”