Titu
2 Kpa we yô, ôron kwagh u a zough sha ityesen i wang* la her. 2 Mba ve lu mbaganden la ve eren kwagh akuma akuma, ve̱ de lu mba wan ahumbe ga, ve̱ eren kwagh sha kwaghfan,* ve̱ lu mba nan jighjigh taveraa shi ve̱ tesen dooshima shi ve̱ waan ishima. 3 Kasev mba ganden kpa ve̱ eren kwagh sha icivir, ve̱ de lu mba vihin ior iti ga, ieren i man msôrom* kpishi la i̱ de ye tor ken a ve ga, ve̱ lu mba tesen kwagh u dedoo, 4 sha er vea fatyô u wan kasev mba kiriki kwagh ér ve̱ soo noov vev shi ônov vev ve̱ doo ve ishima yô; 5 ve̱ eren kwagh sha kwaghfan,* ve̱ lu wang, ve̱ eren ityom i hen ya,* ve̱ lu a inja i dedoo, ve̱ ungwan noov vev, sha er a lam sha loho u Aôndo dang ga yô.
6 Agumaior kpaa, waan ve kwagh wer ve̱ eren kwagh sha kwaghfan.* 7 Eren kwagh u tesen wer u ngu veren ikyav i dedoo sha hanma gbenda cii. Tesen kwagh u wang* a asenge shio, 8 kwaghôron wou a lu u wang* u a fatyô u puun ga yô, sha er mba ve hendan a vese la vea va ahenge, vea zua a kwagh u bo* môm u vea ôr sha a vese ga yô. 9 Mba ve lu ikpan yô, ve̱ wa ayol a ve sha ikyev i mbavesen vev sha hanma kwagh cii, ve̱ keren u eren ishima i mbavesen vev, ve̱ de kenden ve imo ga, 10 ve̱ de iin ve ga, kpa ve̱ tesen sha hanma gbenda cii ér mba a mimi iyol, nahan sha hanma gbenda cii vea na ityesen i Aôndo, Oryiman wase, ia seer doon ior ishima.
11 Gadia erdoo u sha mhôôn u Aôndo la due ken igbar, ngu van a myom sha ci u ior cii. 12 Erdoo ne ka a tese se u vendan hanma kwagh u a lu sha ishima i Aôndo ga yô, kua asaren a taregh, shi a tese se u eren kwagh sha kwaghfan* man u eren perapera man u civir Aôndo ken tar* u se lu ker hegen, 13 se lu keghen akaa a nan se msaanyol a se lu veren ashe a mi ne; kua shighe u iengem i Aôndo u ageegh ia due ken igbar, man i Oryiman wase Yesu Kristu, 14 u a ne iyol na sha u paan se ken hanma inja i tindi u peren cii, shi a wanger nongoior sha ci na iyol na, ve lu kwagh na u ishima ishima, ve lu eren ityom i dedoo sha gbashima la.
15 Za hemen u ôron akaa ne shi wan ior kwagh* shi kôôm ve sha tahav mbu i ne u la cii. Or môm nana̱ de lahan we ga.