Aerenakaa

8 Saulu kpa i wua Sefanu lu sha ishima na.

Sha iyange la, i mough u tôvon tiônnongo* u ken Yerusalem la a ican kpoghuloo; mbahenen mbagenev cii sambe yem ajiir wue wue hen haregh u Yudia man u Samaria la, mase shin mbaapostoli tseegh her. 2 Kpa nomso mba cian Aôndo tôô Sefanu za ii, shi ve vaa ku na tsung. 3 Nahan kpa, Saulu nyôr u tan num sha tiônnongo la. Lu nyôron sha uya uya, duen a nomso man kasev sha igyosor za nan ér i wuhe ve ken purusu.

4 Nahan kpa, mba ve sambe wue wue la lu za pasen loho u dedoo u mkaanem ma Aôndo sha ajiir kposo kposo ken tar la. 5 Tsô Filibu sen shin gar u Samaria* gba za pasen ve kwagh u Kristu. 6 Ikpelaior cii ver ishima sha kwagh u Filibu lu ôron la, shi ve kegh ato shi ve lu nengen uivande mba lu eren la kpaa. 7 Gadia mbagenev kpishi ken a ve lu a ujijingi mba bov, nahan ujijingi mban lu ngoron genger genger duen ken a ve kera. Heela tseegh ga, mbagenev kpishi mba ve kpe alegh kua mba ve gba awan la cii, i bee ve uzayol mban. 8 Nahan i ember ken gar la kpishi.

9 Nahan hen gar la, orgen lu, i yilan un ér Shimon. Cii man shighe ne yô, un lu or u eren ahir, nahan lu eren akaa a kpiligh ior i Samaria iyol, kaan ér un ngu or u numben a mi ga. 10 Ior mbara cii, mbakiriki kua mbavesen kpaa, lu keghen ato a na, kaan ér: “Or ne ka Agee a Aôndo, a i yer ér Agee a Hemban la.” 11 Nahan ve lu keghen ato a na sha ci u a er ve akaa a kpilighyol sha ahir a na la shighe vese. 12 Kpa er ve na Filibu u lu yôôn loho u dedoo u Tartor u Aôndo man u iti i Yesu Kristu la jighjigh yô, i lu eren nomso kua kasev cii batisema. 13 Shimon iyol na kpa na jighjigh, mba eren un batisema yô, a hingir u lun vea Filibu kôôsôô; lu nengen uivande man ityom i kpilighyol i vesen i lu eren la, nahan kpiligh un iyol.

14 Mbaapostoli mba ken Yerusalem mba va ongo ér i ngohol loho u Aôndo ken Samaria yô, ve tindi Peteru man Yohane hen ve; 15 nahan ve sen ve za er ve msen sha u ve̱ ngohol icighan jijingi yô. 16 Gadia yange i er ve batisema ken iti i Ter Yesu tseegh tsô, icighan jijingi lu a sen sha mô ve ga. 17 Nahan mba pendan ve ave iyol yô, ve gba ngohol icighan jijingi.

18 Er Shimon nenge i lu nan ior icighan jijingi sha ave a mbaapostoli lu pendan ve iyol la yô, a tôndo zwa ér una na ve inyaregh, 19 a kaa ér: “Mo kpa nam nen tahav mbun, sha er hanma or u me penda nan ave iyol cii nana ngohol icighan jijingi yô.” 20 Kpa Peteru kaa a na ér: “Ú tim a azurfa wou imôngo, sha ci u u hen wer u fatyô u zuan a iyua i Aôndo sha inyar. 21 U ngu a ci shin kwar ken kwagh ne ga, gadia ishima you ngi jighilii sha ishigh ki Aôndo ga. 22 Nahan gema ishima de ifer you ne, shi zamber a Yehova,* tsô alaghga una de u kwaghbo u u we ishima u eren la; 23 sha ci u m nenge u yua er megh* nahan, shi ifer kange u.” 24 Shimon gema kaa a ve ér: “Zamber nen a Yehova* sha ci wam, sha er kwagh môm ken akaa a ne ôr ne cii una erem ga yô.”

25 Tsô mba eren shiada kpoghuloo shi mba pasen loho u Yehova* cii yô, ve gba hiden ken Yerusalem. Er ve lu hiden la, ve lu yôôn loho u dedoo ken agar kpishi a Mbasamaria.

26 Nahan kpa, ortyom u Yehova* ôr kwagh a Filibu, kaa ér: “Mough za vegher u ken imbusutariyan, sha gbenda u mough Yerusalem sen shin Gasa la.” (Gbenda ne ka u ken desereti.) 27 Tsô a mough a yem. Ica i gbe ga yô, a nenge a Oretiopia u eren tom ken ya u tor, u lu sha iantom i vesen sha ikyev i Kandesi, torkwase u Mbaetiopia, shi nengen sha akaa a na cii yô. Yange za ken Yerusalem za civir Aôndo 28 lu hiden, tema sha ikyekye na i kpelan, lu ôron ruamabera u profeti Yesaia genger genger. 29 Tsô jijingi kaa a Filibu ér: “Kporom za hen ikyekye i kpelan la.” 30 Filibu ze ikyua yô, a ungwa lu ôron ruamabera u profeti Yesaia la genger genger, nahan a pine un ér: “U kav kwagh u u lu ôron ne je kpa?” 31 A kaa ér: “A er nan ve me kav sha wono? Saa or a wasem.” Tsô a kaa a Filibu ér a unde a tema vea na. 32 Ijiir i a lu ôron ken Ruamabera la, i nger her ér: “I va a na u va sôngon er ka iyôngo nahan; a bugh zwa na ga er waniyôngo u a lu ving sha ishigh ki or u tôndon un aive nahan. 33 Zum u i lu heen un la, i ôr un ijir sha mimi ga. Ka an nana ôr kwagh u kov na vighe vighe? Sha ci u i kar a uma na shin tar kera.”

34 Tsô or u eren tom ken ya u tor la kaa a Filibu ér: “M zamber we, ôrom, ka an profeti ne a lu ôron kwagh u nana? Ka kwagh na iyol naa, shin ka kwagh u orgene?” 35 Filibu maa gba ôron kwagh, a hii sha ivur ruamabera ne je, a ôr un loho u dedoo u sha kwagh u Yesu. 36 Er ve lu yemen sha gbenda la, ve za ar ape mngerem lu yô, maa or u eren tom ken ya u tor la kaa ér: “Nenge! Mngerem man heen ne; shi ka nyi ia yangem u eren batisema?” 37 *—— 38 Tsô or u eren tom ken ya u tor ne na zwa i tile a ikyekye i kpelan la, nahan Filibu hungwa vea na shin mnger za er un batisema. 39 Mba dugh shin mnger kera yô, fese je jijingi u Yehova* hemen Filibu yem a na, or u eren tom hen ya u tor la kera nenge a na ga, kpa a za hemen a zende na saan saan. 40 Nahan kpa, Filibu yem ken Ashedodi, za zende sha agar a hen haregh la cii, yôô loho u dedoo zan zan za nyôr ken Sesaria.