2 Mbakorinte

2 Gadia m soo mer me hide me va hen a ven zunguluu ga, 2 sha ci u aluer m va na ne ure yô, ka an nana gema a na a saan mo iyolo, saa ne mba m er ne ure la tsô gaa? 3 Kwagh u yange m nger ne la, m nger un sha u zum u me va yô, mba ma m ember sha kwagh ve la vea gema a na me ure ga yô, sha ci u m ngu a vangertiôr mer kwagh u a nan mo iember la, ka un a nan ne cii iember shon i môm ye. 4 Gadia shighe u m lu ngeren ne washika la, m lu ken ican tsung, ishima zam iyol shi m lu a mliam ashe kpishi, lu sha u me na ure nen ga, kpa lu sha u fa nen er ne doom ishima tsung yô.

5 Nahan aluer or er kwagh u van a ijungwen yô, ka mo nan nem ijungwen ga, kpa hanma wen ngu zungwen er i vihi nan la—m soo u ôron mer i vihi i gba kera ga. 6 Aluer ior kpishi kôôm imbaor la sha gbenda ne yô, kuma; 7 nahan gema de nen nan kwaghbo u nan la a ishima i môm shi sur nen nan ishima, sha er nana zungwe je a kar ikyaa inya* ga yô. 8 Sha nahan yô, m ngu kaan a ven mer, wase nen nan nana̱ fa er nan doo ne ishima yô. 9 Gadia ka sha ityôkyaa ne kpa yange m nger ne washika ye, lu sha u me fa nea lu ior mba dondon hanma kwagh u i tese ne cii yô. 10 Aluer ne de or nyityô kwaghbo u nan er cii yô, mo kpa m de nan. Jighilii yô, nyityô kwaghbo u m de or cii (mea vande den or ma kwaghbo kera yô), ka sha ci wen, sha ishigh ki Kristu, 11 sha er Satan una tsugh* se ga yô, gadia se lan ayom a na* ga.

12 Nahan zum u m va hen Teroa u va pasen loho u dedoo u sha kwagh u Kristu la, hunda bughum ken Ter, 13 kpa ishima memem ga, sha ci u m lu nengen a anmgbian wam Titu ga. Nahan m kaa a ve mer, saa shighe ugen, maa m mough her m va ken Masedonia.

14 Se wuese Aôndo u a hemen se mba se lu vea Kristu imôngo inja er ka ushoja mba ve za hembe ityav ve lu hiden nahan la; a na ior mba zuan* a mfe na u a lu inja er ka senti u human doon nahan la hanma ijiir cii sha ikyev yase! 15 Gadia Aôndo nenge se mba er senti u human doon u Kristu nahan, hen mba i lu yiman ve la, kua hen mba ve lu zan ken mtim la; 16 hen mba ve lu zan ken mtim la yô, se mba er ka ihuma i kuugh i zan ken ku nahan, kpa hen mba i lu yiman ve la yô, se mba er ihuma i uma i zan ken uma nahan. Nahan ka unô jighilii ve kom u eren akaa nee? 17 Ka se, gadia se mba mba zenden eren kpenga a mkaanem ma Aôndo er ior kpishi ve eren nahan ga, kpa er i lu Aôndo a tindi se yô, se mba ôron kwagh sha mimi a ishima yase i môm, sha ishigh ki Aôndo vea Kristu imôngo.