Yakobu

1 Mo Yakobu, kpan u Aôndo man u Ter Yesu Kristu, m ngu ngeren hen uipyaven mba 12 mba ve sambe wue wue la:

M ngu sughun ne!

2 Anmgbianev av, shighe u ne tagher a atsan atô kposo kposo yô, i̱ lu kwagh u saan ne iyol tsung, 3 gadia ne fa er jighjigh u nan wen u i kar un nahan la una na ne lu a ishimawan yô. 4 Kpa ishimawan la i̱ er tom u i̱ vindi vindi, sha er ne lu vough sha hanma gbenda cii, a acôghor iyol shio, kwagh môm una yina ken a ven ga yô.

5 Nahan aluer kwaghfan yina mô wen yô, nana̱ de gbe uwer u sônon Aôndo ga, tsô a na nan, gadia un ka a na ior cii mgbeghaa a u nahan ve tar* shio. 6 Kpa nana̱ sônon sha jighjigh u nan, nana̱ de te akperan mayange ga, gadia or u tan akperan nan ngu er agôndo a zegemnger, a ahumbe a lu daase a mi, a lu kpianger nahan. 7 Jighilii yô, or la nana̱ de veren ishima ér nana zua a ma kwagh hen Yehova* ga; 8 nan ngu or u nan fe kwagh u nana er jighilii ga yô, nan ngu ta ta ta sha igbenda i nan cii.

9 Kpa anmgbian u nan lu a kwagh ave ga yô, nana̱ ember* er i kende a nan sha yô, 10 u nan lu a kwagh ave kpa nana̱ ember er nan nenge ér nan ngu kwagh ga yô, sha ci u nana va kar kera fese er faluwa u ken toho nahan. 11 Gadia er iyange ka i due ve oo u ta, imendenegh ki use, ufaluwa mba imendenegh ki shon ve ndoor ve haa inya, ki kera doo ashe ga nahan, kape ornyar kpa nana use zum u nan lu keren inyaregh ki nan je la.

12 Saan or u nan nyer ken ican* kpa nan taver ishima her la iyol, sha ci u aluer nan gba ga yô, nana va zua a injar i uma, i Yehova* a tende zwa u nan mba ve ze hemen u tesen ér Un doo ve ishima la. 13 Shighe u ican* i tser ma or yô, nana̱ de kaan ér: “Aôndo ngu karen mo” ga. Gadia mba karen Aôndo sha ma kwagh u ifer ga, shi un iyol na karen ma or ga. 14 Kpa hanma or ka i kar* nan sha isharen i nan i i lu urugh nan shi hônon nan* la. 15 Isharen la ka ia jilen iyol* yô, i̱ mar isholibo; isholibo di ka a̱ eren i̱ yô, i̱ va a ku.

16 I de tsughun ne ga, anmgbianev av mba doon mo ishima. 17 Hanma iyua i dedoo man i vough cii ka sha, hen Ter u akaa a sha a nan iwanger la ka i due i sen ye; un kahan kposo shin gem er ka mure nahan* ga. 18 Yange lu awashima na u maren se sha kwaghôron u mimi, sha u se̱ hingir inja er ka iyiav mbi i hii sundan ken akaa a a gbe la yô.

19 Fa nen kwagh ne, anmgbianev av mba doon mo ishima: Hanma or nana̱ lu tsev tsev sha u keghen ato ungwan kwagh, kpa nana̱ gema a ngôôr a kwaghôron, shi nana̱ de nyoon ishima fefa ga, 20 gadia ka ishimanyoon i or i ne or eren kwagh u vough sha ishigh ki Aôndo ga. 21 Sha nahan yô, dugh nen mlu u hôngorough cii man hanma iferkwagh* ken a ven kera, gema ngohol nen mkaanem ma ma a fatyô u yiman ne,* ma i we ken a ven la a ishima i legh legh.

22 Kpa hingir nen mba eren sha mkaanem mara, de lu nen mbaungwan tseegh, geman tsughun ayol a en sha mhen u aiegh ga. 23 Gadia aluer ma or ungwa mkaanem mara kpa nan ngu eren sha mi ga yô, nan ngu er or u nan lu kenger ishigh ki nan* ken jingi nahan. 24 Gadia ka nan kenger iyol i nan, nana̱ karen kera yô, fese je maa nan hungur er mluashe u nan a lu la. 25 Kpa or u nan kenger ken tindi u vough, u ka a pase or nan kera lu uikyangen ga la, shi nan ze hemen u kenger ker yô, ka nan hingir or u ungwan kwagh hungur ga, kpa eren tom sha mi; nahan a saan nan iyol ken kwagh u nan eren la.

26 Aluer or hen ér nan ngu or u civir Aôndo, kpa nan kôron nombor u nan tsaha* ga yô, nan ngu tsughun ishima i nan, shi mcivir u nan la ka gbilinkwagh. 27 Mcivir* u wang, u a lu a acôghor sha ishigh ki Ter wase Aôndo ga yô, ka un ne: ka u nengen sha ancôgholov man kasev mba côgholov ken ican ve, shi lun wang sha u palegh akaa a taregh.