Mbaroma

5 Sha nahan yô, hegen u i kaa ér se mba mbaperapera sha jighjigh u nan ne, se lu nen ken bem* vea Aôndo ken Ter wase Yesu Kristu. 2 Ka sha ci u jighjigh u se ne un la kpa gbenda u bugh u Aôndo una tese se erdoo sha mhôôn, er a lu tesen se hegen nahan ye. Nahan yô, se ember nen* er se lu keghen ser Aôndo a ver se sha ian i icivirigh ne. 3 Heela tseegh ga, se ember nen* ken atsan, gadia se fa ican ka i na se lu a ishimawan; 4 ishimawan di i na Aôndo a lumun se, Aôndo una lumun se yô, se lu a ishimaverenkeghen, 5 man ishimaverenkeghen la i ve or ahenge ga. Gadia Aôndo ka a wase se u fan sha icighan jijingi na u ka a na se la, er se doo un ishima tsung yô.

6 Jighilii yô, er se lu ken igbekera her la je, Kristu kpe sha ci u mbaasorabo sha shighe u i ver la. 7 Gadia taver u or nana kpe sha ci u orperapera. Nahan kpa, or u dedoo yô, alaghga or nana lumun u kpen sha ci u nan. 8 Kpa Aôndo tese se dooshima na sha gbenda ne nahan: Er se lu mbaasorabo her la je, Kristu kpe sha ci wase. 9 Man hegen, er i lu sha awambe a na je i kaa ér se mba mbaperapera yô, a yima se sha ikyev na, iyugh i Aôndo ia kera va sha a vese ga. 10 Kpa aluer shighe u se lu mbahyomov mba Aôndo la je kpa i hime se a na sha ku u Wan na yô, hegen u i hime se a na kera ne je yô, a yima se keng, sha ci u ngu uma. 11 Ka nahan tseegh ga, shi se mba ember ken Aôndo sha kwagh u Ter Yesu Kristu, un u a ne i hingir u a hime se a na la.

12 Nahan, er isholibo nyôr shin tar sha or môm, man ku gema va sha ci u isholibo la yô, ku va sha ior cii, sha ci u ve cii ve er isholibo—. 13 Yange isholibo nyôr shin tar je Atindi lu a lu ga. Kpa tindi ka una lu ga yô, mba kaan ér or er isholibo ga. 14 Nahan kpa, hii sha shighe u Adam la zan zan ar sha shighe u Mose la, yange ku tema tor sha ior, kua sha mba ve er imba isholibo i Adam la ga je kpaa. Adam bee un u yange i tôndo zwa ér ngu van la.

15 Kpa iyua shon ngi er isholibo la ga. Aluer ior kpishi kpe sha ci u or môm per tindi yô, erdoo u Aôndo a tese sha mhôôn la man iyua i a ne se sha erdoo u sha mhôôn u or môm la, ka Yesu Kristu je la, i hemba aren a* ior kpishi cii! 16 Shi kwagh u iyua la i ve a mi la ngu kwaghmôm a kwagh u a dugh ken isholibo i or môm la ga. Gadia yange i ôr ijir i isholibo i môm i í er la, i na ibo, kpa iyua i í na zum u i er asorabo kpishi kera la yô, lu ishô. 17 Gadia aluer lu sha isholibo i or môm la ku tema tor yô, erdoo u Aôndo a tese se sha mhôôn kua iyua i a ne sha u se lu mbaperapera la hemba ngeen shi hemba doon cii. Mba ve zough a mtsera ken akaa ne la cii, or môm, ka Yesu Kristu je la, una na vea lu uma, vea tema tor.

18 Sha nahan yô, er lu sha isholibo i môm hingir u ior cii vea kpe yô, ieren i perapera i môm kpa i na i kaa ér ior cii mba mbaperapera, shi ka u vea zua a uma. 19 Gadia er lu sha ihyembeato i or môm la ior kpishi hingir mbaasorabo yô, ieren i ungwan kwagh i or môm la kpa i na ka u ior kpishi vea hingir mbaperapera. 20 Yange i va a Atindi sha er ior vea fa er ve eren asorabo* kpishi yô. Kpa pe isholibo i ngee yô, erdoo u Aôndo a tesen sha mhôôn la ka a hemba ngeen cii. 21 Sha ci u nyi? Er yange isholibo tema tor vea ku yô, erdoo u i tese sha mhôôn la kpa una tema tor sha perapera, sha u ior ve̱ zua a uma sha ikyev i Yesu Kristu Ter wase.