Mbagalatia

6 Anmgbianev, aluer or hii u nôngon gbeev yô, er nan lu a kav ga la je, ne mba ne taver ken jijingi la, kôôm nen imbaor la sha ishima i legh legh. Kpa ver nen ishima sha iyol yen, sha er ne kpa ne gba ken imeen ga yô. 2 Za nen hemen u wasen ayol a en ikyav, ka nahan man ne kure kwagh u tindi u Kristu a tese la ye. 3 Gadia aluer or ngu kwagh ga, kpa nan ngu henen ér nan ngu kwagh yô, nan ngu tsughun iyol i nan. 4 Kpa hanma or nana tôv sha aeren a nan, nahan nana lu a ityôkyaa i ember sha kwagh u nan iyol i nan tseegh, a lu sha u tôôn iyol i nan karen sha orgen ga. 5 Gadia hanma or nana tôô ikyav mbi nan.*

6 Heela tseegh ga, hanma or u i tese nan mkaanem mara* cii, nana eren akaa a dedoo a un u a tesen nan akaa shon* la.

7 I de bumen ne ga: Mba nahan Aôndo tar ga. Kwagh u or nan lôô cii, ka un shi nana sunda ye; 8 gadia or u nan lu lôôn a awashima u sha iyol yô, nana sunda kwagh u hôôn ken iyol i nan, kpa or u nan lu lôôn a awashima u ken jijingi yô, nana sunda uma u tsôron ken jijingi. 9 Sha nahan yô, se gba nen uwer u eren kwagh u dedoo ga, gadia shighe a va kuma yô, se sunda, aluer se yina ishima* ga yô. 10 Nahan yô, er se lu a ian* her ne, se eren nen kwagh u dedoo a ior cii, kpa hemban je yô a mba ve ne jighjigh a vese imôngo la.

11 Ne nenge yô, m nger ne washika ne ka sha uwegh agh, sha asangaabaacaa a kehen je.

12 Mba ve soo ér mluashe ve a̱ doo ior la cii, ka ve ve lu keren u kighir ne ér ne tsôngo ye, ka sha u i̱ de u tôvon ve a ican sha kwagh u ku u Kristu kpe sha kon* la tseegh, ve eren nahan ye. 13 Gadia mbara mba i tsôngon ve la je kpa, ve ayol a ve mba kor Atindi ga, kpa ka ve soo ér ne tsôngo sha er vea zua a ityôkyaa i kaan ihyagh sha iyol yen yô. 14 Kpa mo yô, mayange ma m kaa ihyagh ga, saa di sha kwagh u ku u Ter Yesu Kristu kpe sha kon* la tseegh tsô, ka sha a na man m nenge mer i wua tar,* tar kpa u nenge ér i wuam ye. 15 Gadia aluer i tsôngo or shin i tsôngo nan ga kpa, kwagh gba sha kwagh la ga, kwagh u kwagh a gbe sha mi yô, ka or u Aôndo a gbe nan nan lu kwagh u he la. 16 Mbara mba ve zenden sha inja sha inja sha kwaghwan ne la cii, Aôndo a̱ zungwe ve mhôônom shi a̱ na ve bem, ve mba ve lu Iserael u Aôndo la.

17 Hii hegen je, or a̱ de zem iyol ga, gadia m ngu a akav sha iyol yam a tesen ér m ngu kpan u Yesu.

18 Anmgbianev, Ter wase Yesu Kristu a tese ne erdoo na u sha mhôôn sha ci u gbashima u ne tesen la. Amen.