Luka

13 Hen shighe la, mbagenev mba ve lu her la ôr un kwagh u Mbagalilia mba Pilatu yange wua ve zum u ve lu nan nagh yô. 2 Nahan a gema a kaa a ve ér: “Ne hen ner kwagh u vihin ne yange er Mbagalilia mbara sha ci u asorabo a ve hemba vihin a asorabo a Mbagalilia mbagenev ciili? 3 Ei, de me ôr ne, saa ne gema asema, gayô ne cii ne va tim er ve nahan. 4 Shin iorov 18 mba iyou i taven gôgônan i ken Shiloam gba wua ve la di yô, ne hen ner yange ve er kwaghbo hemba ior mbagenev mba ve lu ken Yerusalem ciili? 5 Ei, de me ôr ne, saa ne gema asema, gayô ne cii ne va tim er ve nahan.”

6 Maa a gba ôron ve injakwagh ne, ér: “Orgen yange môôr kon u tur ken sule na u wain, nahan za va ér una va zôr, kpa zua a ityamegh i môm sha mi ga. 7 Tsô a kaa a or u sôron sule u wain la ér, ‘M môôr kon u tur ne ka anyom atar je ne, kpa m ngu a zua a ityamegh i môm sha mi ga. Nahan gber u kera! A er nan man ua gba yisan di inya heen gbilin nahana?’ 8 A gema a kaa a na ér, ‘Orvesen, de inyom i môm shi i kar, nahan me vughul u itine me ningir me tser, me haa ihyôghonov. 9 Aluer u va ume atam ken hemen yô, doo, kpa ua ume ga yô, gber u kera.’”

10 Hen shighe ne lu tesen ken shinagoge ugen sha Iyange i Memen. 11 Kwase ugen gema lu her u lu a jijingi u bo yô, man jijingi ne na lu uange anyom 18, shi gôvor kpishi je faan ityô u nalegh sha ga kuaa. 12 Yesu nengen a na yô, a kaa a na ér: “Kwase, i bee u angev ou.” 13 A penda kwase la ave iyol, maa her je a nalegh sha, a gba wuese Aôndo. 14 Kpa ishima gema vihi orhemen u shinagoge la sha ci u Yesu bee kwase la angev sha Iyange i Memen yum, nahan a kaa a ikpelaior la ér: “Ayange nga ataratar a i gbe u a er tom yô, nahan vaan nen sha ayange la i va been ne iangev, i de lu sha Iyange i Memen ga.” 15 Nahan kpa Ter kaa a na ér: “Ne wa atseregh, hanmô wen nan saghen bua shin jaki i nan sha Iyange i Memen hen ape i ye kwagh la nan za ne i mngerem gaa? 16 Man gema kwase u a lu wan u Aberaham, u Satan a kange un anyom 18 ne yô, doo u a sagh un ikyangenev mbin sha Iyange i Memen gaa?” 17 Kaan nahan yô, kunya gba kôron mbahendan a na mbara a ayol a ve, kpa ikpelaior la cii gba ember sha ci u akaa a dedoo a a er la cii.

18 Tsô a gba kaan a ve ér: “Tartor u Aôndo ngu er nyi nahana? Man me kar u sha nyi kwagha? 19 Ngu er ka ishange i masetadi i̱ or nan tôô nan lôô ken sule u nan ve, i̱ vese i̱ hingir kon, shi inyon i purugh i va we aya sha agbaa a u nahan.”

20 Shi a kaa ér: “Me kar Tartor u Aôndo sha nyi kwagha? 21 Ngu er kwa u kwase nan tôô nan nungwa sha mwem ma kuman uikyaren mba vesen utar,* ve u ange ma cica cii nahan.”

22 Ngur yemen ken Yerusalem yô, a gba nyôron sha agar a vesen kua agar a kiriki, tesen ior. 23 Tsô orgen pine un ér: “Tere, ka ior kpuaa tseegh a yima ve yee?” A kaa a ve ér: 24 “Nôngo nen tsung nyôr nen hen hunda u hogholoo la, gadia me kaa ne, ior kpishi vea nôngo ér vea nyôr hen u, kpa vea fatyô ga. 25 Aluer orya la va mough senda hunda yô, ne va tile ken won ne gba manden ave sha hunda kaan ner, ‘Tere, bugh se.’ Kpa una kaa a ven ér: ‘M fa ape ne dugh ga.’ 26 Tsô ne gba kaan ner, ‘Yange se yaan kwagh shi se maan kwagh vea we, shi u tesen sha ugodobi asev mba vesen.’ 27 Kpa una kaa a ven ér, ‘M fa ape ne dugh ga. Karem nen sha ishi kera, ne mba eren aferakaa mban cii!’ 28 Zum la ne nenge a Aberaham man Isaka man Yakob kua uprofeti mbagenev cii ken Tartor u Aôndo, kpa ne yô, a kende ne ken won, nahan ne vaa je ne wua anyi.* 29 Shi ior vea due vegher u sha ityoughkitaregh man vegher u shin ityôtar kua vegher u ken imbusutarimese man vegher u ken imbusutariyan vea va ya kwagh sha tebul ken Tartor u Aôndo. 30 Man nenge! Mba hiihii vea hingir mba masetyô, mba masetyô vea hingir mba hiihii.”

31 Hen shighe* la je, Mbafarishi mbagenev va kaa a na ér: “Mough due yem, gadia Herode soo u wuan we.” 32 Kpa a ôr a ve ér: “Za kaa nen icôngo la ner, ‘Nenge! M ngu dughun ujijingi mba bov shi been ior angev nyian man kper, sha iyange i sha utar la yô, me kure tom wam.’ 33 Nahan kpa, gba keng u me za hemen nyian man kper kua due la, sha ci u a fatyô u wuan profeti ape gen ga, saa ken Yerusalem. 34 Yerusalem, Yerusalem, we u ú wuan uprofeti shi u tan mba i tindi ve hen a we awen ne! M nôngo acin imôngo mer me kohol ônov ou, er ngôkyegh ka a kohol ônov nav ken akper a na nahan! Kpa u soo ga. 35 Yô nenge, i undu ne a ya wen ve. Me kaa ne, mayange ne kera nenge a mo ga zan zan ne va kaa ner: ‘Saan un u a ve ken iti i Yehova* la iyol!’”