Yohane
2 Sha iyange i sha utar la, i lu eren iniongo i ivesegh ken Kana u ken Galilia, nahan ngô u Yesu kpa lu her. 2 Yesu man mbahenen nav kpa i lôhô ve iniongo i ivesegh ne.
3 Wain va yen yô, ngô u Yesu kaa a na ér: “Mba a wain ga.” 4 Kpa Yesu kaa a na ér: “Kwase, ka nyi yase sha kwagh la?* Shighe wam ngu a kuma ga.” 5 Ngô na kaa a mba ve lu karen kwaghyan la ér: “Er nen hanma kwagh u a kaa ne cii.” 6 I gema i ver uzwar mba awenev ataratar mba haan mngerem shimi sha ci u wanger iyol, sha atindi a Mbayuda. Hanma yô kehe kuma u haan uikyaren mba zar kwagh shimi er uhar shin utar nahan.* 7 Tsô Yesu kaa a ve ér: “Iv nen mngerem shin uzwar mbara.” Nahan ve haa mngerem iv shimi poo poo. 8 Maa a kaa a ve ér: “Kese za na nen orhemen u iniongo.” Tsô ve kese ve za na un. 9 Orhemen u iniongo la ma mngerem ma i gema hingir wain la, kpa fa ape i zua a mi ga, (kpa mba karen kwaghyan mba ve kese ma la yô fa), nahan orhemen u iniongo la yila orkwasehe la, 10 a kaa a na ér: “Hanma or ka nan vande nan ior wain u doon, vea maan una kôron ve yô, nan mase van a u a doo i kom ga yô. Kpa we yô, u ver wain u doon her zan zan hegen.” 11 Yesu er ivande na i hiihii ne ken Kana u ken Galilia, nahan ior nenge a tahav nav, shi mbahenen nav na un jighjigh.
12 Kwagh ne karen kera yô, un vea ngô na man anmgbianev nav kua mbahenen nav ve mough ve yem ken Kapenaum, kpa ve tsa ker ayange kpishi ga.
13 Hen shighe ne, iniongo i Paseka u Mbayuda lu zurum, nahan Yesu yem ken Yerusalem. 14 Za nyer ken tempel yô, a nenge ior lu teen ibua man iyôngo man mkungum; mbamusaninyaregh kpa tar akaateman a ve ker, tema. 15 Tsô a tôô kor a tume akpa, a zenda mba ve lu a iyôngo man ibua la cii ken tempel kera, shi a tôô samnyar u mbamusaninyaregh a haa inya, shi a daa utebul vev gba. 16 A kaa a mba ve lu teen mkungum la ér: “Tôô nen akaa ne due nen a mi heen kera! De nen u geman iyou i Terem ner i hingir iyou i eren kasua ker!”* 17 Tsô mbahenen nav umbur kwagh u i nger ér: “Kwagh u iyou you una gbam ishima tsung” la.
18 Nahan Mbayuda gema pine un ér: “Ka ivande i nyi u fatyô u eren sha u tesen se wer u ngu a tahav mbu eren akaa nee?” 19 Yesu kaa a ve ér: “Hembe nen tempel ne haa nen inya, nahan me hide me maa un ken ayange atar.” 20 Tsô Mbayuda pine un ér: “Yange i tôô anyom 46 u maan tempel ne, man wer u maa un ken ayange ataraa?” 21 Kpa tempel u lu ôron la lu iyol na. 22 Gema lu shighe u i va nder Yesu shin ku la, mbahenen nav mase umbur er yange vanden ôron kwagh ne ye, nahan ve na ruamabera jighjigh, kua kwagh u Yesu ôr ne.
23 Nahan kpa, zum u Yesu lu ken Yerusalem hen shighe u iniongo i Paseka la, ior kpishi na un jighjigh sha ci u uivande mba ve nenge lu eren la. 24 Kpa Yesu nenge kwagh ve wanger un ga, sha ci u a fa asema a ve cii, 25 shi lu u una suur sha ma or ér nana pase un mlu u mbagenev kpaa ga, sha ci u a fa kwagh u orumace.