Marku

14 Hen shighe ne, mase shin ayange ahar a er Paseka kua Iniongo i Beredi u I We Kwa sha Mi Ga la. Nahan upristi mba tamen man mbangerenatindi lu keren gbenda u vea kôr Yesu sha ayom vea wua un yô. 2 Ve lu kaan ér: “I de lu sha shighe u iniongo ga; alaghga ior vea mough ayôôso a vese.”

3 Nahan er lu ken Betani lu yan kwagh hen ya u Shimon, u yange i bee un imande la, kwase ugen va a mkurem ma human doon ken ikpe i alabasetu,* lu mkurem ma nardu* ma taver ishe tsung, ma i nungwa kwagh môm sha mi ga yô. A va bugh ikpe i alabasetu shon, a gba haan un ma sha ityou. 4 Mbagenev mba nengen nahan yô, ve gba zôhôn kaan ker ayol a ve ér: “Er nan i vihi mkurem ma human doon man nahana? 5 Ma i tee mkurem ma human doon man ma i zough a inyaregh ki hemban udenariu* 300, ma i gem ki ma i ne mbaatsanev!” Ishima vihi ve* a kwase la tsung. 6 Kpa Yesu kaa ér: “De nen kwase ne yôô. Er nan ne ze un iyolo? A erem kwagh u dedoo. 7 Gadia mbaatsanev vea lu vea ven gbem, nahan ne fatyô u eren ve kwagh u dedoo hanma shighe u ne soo cii, kpa mo yô, m ngu lun vea ven gbem ga. 8 A er kwagh u a fetyô yô; a haam mkurem iyol ka sha u tesen kwagh u a va er shighe u a lu iin mo yô. 9 Mimi je me kaa ne, hanma ijiir sha tar i a pase loho u dedoo her cii yô, kwagh u kwase ne a er ne kpa a ôr sha u umbur un.”

10 Tsô Yuda Isekarioti, u lu môm ken Mbapuekaruhar la, za kohol upristi mbatamen sha u una tee ve un yô. 11 Mba ongo nahan yô, doo ve, ve tôndo zwa ér vea na un inyaregh.* Tsô a gba keren ér ian i due una tee un.

12 Nahan ka va nyer sha iyange i hiihii i iniongo i Beredi u I We Kwa sha Mi Ga, sha shighe u i naan nagh ku Paseka la yô, mbahenen nav pine un ér: “Ka han u soo wer se za sôr u ijiir u ya Paseka here?” 13 Maa a tindi mbahenen nav mbagenev uhar, a kaa a ve ér: “Nyôr nen ken gar, nahan orgen u a tee ityegh ki mnger ki inyaa yô, una zua a ven. Dondo un nen ijime, 14 nahan ya u a za nyer her la cii yô, kaa nen a orya la ner, ‘Ortesen ngu pinen ér: “Ruumyou u mbavannya u me ya Paseka vea mbahenen av ker ngu hana?”’ 15 Nahan una tese ne ruumyou u vesen sha kpoyou u sha, u i tar ikyav ker i ver a ver yô. Er nen hanma kwagh her sha ci wase.” 16 Tsô mbahenen mbara yem, mba za nyer ken gar yô, ve nenge hanma kwagh lu er Yesu kaa ve nahan, maa ve wa iyol i Paseka.

17 Ka va hingir aikighe yô, a va vea Mbapuekaruhar mbara. 18 Er ve tema ve kase kwaghyan sha tebul la, Yesu kaa ér: “Mimi je me kaa ne, or môm ken a ven, u nan lu yan kwagh vea mo imôngo yô, nana teem.” 19 Tsô ishima gba ve awambe, ve gba pinen un môm môm ér: “Tere, ka moo?” 20 A gema a kaa a ve ér: “Ka or môm ken Mbapuekaruhar, u a lu civin beredi shin gbande a mo imôngo ne. 21 Wan u or ngu kpen, vough er Ruamabera a kaa nahan. Kpa kwagh a tser or u nan tee Wan u or la! Guda yange ma i mar nan ga.”

22 Er ve lu yan kwagh zan a mi ave la je, a tôô kpenberedi, a er msen, maa a coon a gema a na mbahenen nav, a kaa ér: “Ngohol ya nen; beredi ne tile sha ityough ki iyol yam.” 23 Shi a tôô kôôpu a wain shimi, a er msen,* maa a gema a na ve, nahan ve cii ve ma shimi. 24 A kaa a ve ér: “Wain ne tile sha ityough ki awambe am, a a lu ‘awambe a ikyuryan,’ a i gbe u a haa inya sha ci u ior kpishi la. 25 Mimi je me kaa ne, mayange me kera ma zar u atam a kon u wain ga, zan zan iyange i me ma wain u he a ven imôngo ken Tartor u Aôndo la.” 26 Mba we atsam* mba been yô, ve due ve yem sha Uwo u Olev.

27 Tsô Yesu kaa a ve ér: “Ne cii ne nôngo gbeev, gadia i nger ér: ‘Me ta num sha orkuranilev, nahan iyôngo cii ia sambe.’ 28 Kpa a nderen mo shin ku yô, me vande yemen ken Galilia a ven.” 29 Kpa Peteru kaa a na ér: “Aluer mbagenev cii nôngo gbeev sha kwagh wou kpa, mo yô, mayange me nôngo gbeev ga!” 30 Yesu gema kaa a na ér: “Mimi je me kaa u, nyian, hen tugh mbun je, ikyegh ia lu a tôngo kwa har ga je tsô, u vendam kwa tar.” 31 Kpa lu sendegh a na kaan ér: “Aluer ka u me kpe a we imôngo je kpaa, mayange me venda u ga.” Shi mbagenev mbara cica cii kpa gba ôron nahan.

32 Tsô ve va hen anijiir ugen, i yilan ér Gesemane, maa a kaa a mbahenen nav ér: “Tema nen heen, m za er msen.” 33 Maa a kar a gba yemen vea Peteru man Yakobu kua Yohane, tsô ishima hii u zan un iyol tsung,* a gba zungwen kpishi. 34 A kaa a ve ér: “Ishima vihim je ar ken ku. Tema nen heen kuran nen.” 35 Kporom ken hemen kpuaa yô, a gure a sua ityough inya, a gba eren msen kaan ér a fetyô yô, shighe la ma a kar un. 36 A kaa ér: “Aba,* Tere, akaa cii u fetyô u eren; karem a kôôpu ne sha. Nahan kpa, i de eren sha ishima yam ga, kpa i er sha ishima you.” 37 A hide a va kohol ve ve lu yaven, nahan a kaa a Peteru ér: “Shimon, u ngu yavena? U zua a agee a kuran ihwa i môm tsô kpaa gaa? 38 Kuran nen shi eren nen msen hanma shighe cii, sha er ne gba ken imeen ga yô. Gbashima yô ngu,* kpa iyol gema vôr.” 39 Tsô shi a yem a gba za eren msen, ôron kwagh u a vande ôron la. 40 Shi a za hide a va kohol ve ve lu yaven, gadia ashe yuhwa ve ikyôr, nahan ve fa kwagh u vea ôr a na ga. 41 Shi a hide sha kwa tar a va kaa a ve ér: “Hen shighe ne nahan ne mba yaven shi memen! Kuma nahan! Shighe la kuma ve! Nenge! Mba nan Wan u or sha ikyev i mbaasorabo hegen. 42 Mough se yem nen. Nenge! Or u a teem la ngu ikyua.”

43 Er lu lamen zan a mi ave la je, Yuda, u lu môm ken Mbapuekaruhar mbara va nyôr vea ikpelaior, i̱ lu a usanker man igbough. Lu upristi mba tamen man mbangerenatindi kua mbatamen tindi ve ye. 44 Un u a tee un la vande zuan zwa vea ve sha kwagh u una lu ve ikyav yô, a kaa a ve ér: “Or u me susen nan zwa la yô, ka un je la; kôr un nen yem nen a na, a de osough ga.” 45 Tsô a va jighilii a va kohol un, a kaa ér, “Rabi!” Maa a suse un zwa. 46 Nahan maa ve kôr un ve yem a na. 47 Tsô môm ken mba ve tile her la tsua sanker na gema gber kpan u pristi u vesen, bugh un tough. 48 Kpa Yesu gema kaa a ve ér: “Ne va u va kôron mo a usanker man igbough er ka ormbaiv yôô? 49 Yange m luun vea ven ken tempel ayange ayange m tesen, kpa ne kôrom ga. Kpa ka sha u kuren kwagh u Ruamabera a kaa yô.”

50 Maa ve cii ve yevese ve undu un. 51 Kpa gumor ugen u haa ikyondo iyol i taver ishe, i lun elemeen, kpa gema hua ikyondo i ken atô ga yô, gba van un ijime ikyua ikyua, maa ve gba nôngon ér vea kôr un, 52 kpa a undu ikyondo i taver ishe la, a yevese a ikyondo iyol shio.*

53 Tsô ve yem a Yesu hen pristi u vesen, nahan upristi mba tamen man mbatamen kua mbangerenatindi cii zua her. 54 Kpa Peteru dondo un ijime lu van ken ica, zan zan va ar hen tembeya u pristi u vesen. Maa a kar a za tema vea mbashirentom mba hen ya la, lu ôson usu u u yegh wanger yô. 55 Tsô upristi mba tamen man Sanhederin* cii gba keren atôakyaa a aiegh a vea wa Yesu iyol, sha er vea wua un yô. Kpa ve lu zuan a mi ga. 56 Jighilii yô, ior kpishi lu eren shiada u aiegh sha a na, kpa ushiada vev mbara cii zua ga. 57 Shi mbagenev lu moughon sha eren shiada u aiegh sha a na, kaan ér: 58 “Yange se ungwa or ne kaa ér, ‘Me hembe tempel u i maa sha ave ne, nahan me hide me maa un ken ayange atar, kpa a lu sha ave ga.’” 59 Sha ingin kpa, shiada ve zua ga.

60 Tsô pristi u vesen mough tile hen atô ve pine Yesu kwagh, kaa ér: “U shi bugh zwa sha ma kwagh je gaa? U ungwa shiada u ior mban ve lu eren sha a we la gaa?” 61 Kpa a ungwa ato, a bugh un zwa sha ma kwagh ga. Tsô pristi u vesen shi pine un ér: “U ngu Kristu Wan u Un u a lu Icighan laa?” 62 Yesu maa kaa ér: “Een, m ngu Wan na; man ne va nenge Wan u or una tema ken uwegh ku yanegh ku ageegh, una lu van ken abeen a sha kwavaôndo.” 63 Pristi u vesen la ongo nahan yô, a ande akondo a na, a kaa ér: “Shi ka nyi i̱ gbe se a mbashiada? 64 Ne ungwa er a laha Aôndo yô. Nahan ne nenge nena?” Ve cii ve kaa ér a kuma ku. 65 Tsô mbagenev gba tan un azer iyol, shi ve yisa un ishigh, maa ve gba tan un azu, kaan ér: “Wea lu profeti yô, ôr se or u nan gbidye u la.” Mbawasen tom ken atejir la ta un sambe ken ishi, maa ve yem a na.

66 Nahan er Peteru tema shin inya, ken tembeya la, wankwase ugen u shiren pristi u vesen, za va her. 67 Nengen a Peteru hen ape lu ôson usu la yô, a kenger un ken ishi jighilii, maa a kaa ér: “We kpa yange u zenden vea Yesu, Ornasareti ne.” 68 Kpa a tuna, a kaa ér: “M fa un ga, shi m fa kwagh u u lu ôron la kpaa ga.” Maa a due a yem hen hunda u nyôron* la. 69 Wankwase u shiren tom la za nenge a na her shi gba kaan a mba ve tile her la ér: “Ngun kpa ngu môm ken a ve.” 70 Tsô shi a gba tunan. Shi shighe kar kpuaa yô, mba ve tile her la gba kaan a Peteru ér: “Mimi je u ngu môm ken ve, sha ci u u ngu Orgalilia je ka ilian ga.” 71 Tsô a gba tuhwan* shi bumun kaan ér: “M fa or u ne lu ôron la ga!” 72 Fese nahan ikyegh tôngo sha kwa har, maa Peteru umbur kwagh u Yesu kaa a na ér: “Ikyegh ia lu a tôngo kwa har ga je tsô, u vendam kwa tar” la. Tsô vihi un ken ishima tsung, a gba vaan.