Luka

14 Shighe ugen la, lu za yan kwagh hen ya u orgen u lu môm ken mbahemenev mba Mbafarishi yô, sha Iyange i Memen, nahan ve haa ashe sha a na. 2 Tsô orgen u ingyôgh* kôr un yô, lu un sha hemen. 3 Nahan Yesu pine mba fan Atindi tsema tsema kua Mbafarishi ér: “Atindi na ian ér i bee or angev sha Iyange i Memenee? Shin a na ga?” 4 Kpa ve ungwa ato. Maa a kôr or la sha uwe, a bee un angev, shi a na un gbenda ér a yem. 5 A gema a pine ve ér: “Ka an ken a ven wan u nan shin bua u nan una gba shin ijôr sha Iyange i Memen ve, nana kôr un fese nana due a na ga?” 6 Kpa ve fatyô u nan un mlumun ga.

7 Er nenge mba i lôhô ve iwer la lu teman sha ajiir a a hembe lun a icivirigh la yô, a wa ve kwagh,* a kaa ér: 8 “Aluer or lôhô u iniongo i ivesegh yô, de za tem hen ijiir i i hembe lun i icivirigh la ga. Alaghga i lôhô orgen u nan hembe lun sha ian i civirigh a we yô. 9 Nahan or u a lehe ne la una za va una va kaa a we ér, ‘De or ne a tema heen.’ Nahan u kar a ihyeen iyol, u za tema hen ijiir i i hembe gban ijime yô. 10 Kpa zum u i lôhô u iniongo yô, za tema hen ijiir i i hembe gban ijime la, nahan or u a lehe u iniongo la una vaan yô, una kaa ér, ‘Or wam, za tema hen ijiir i hemban doon la.’ Nahan u lu a icivir sha ishigh ki mba i lehe ve la cii. 11 Hanma or u nan kenden a iyol sha yô, a hide a nan ijime, kpa or u nan hiden a iyol ijime yô, a kende a nan sha.”

12 A gema a kaa a or u lôhô un iniongo la ér: “Zum u u lu eren iniongo atetan shin aikighe yô, de lehe azende ou shin anmgbianev ou shin ior ou shin mbanyarev mba ve we ndor a we la ga. Aluer u er nahan yô, ve kpa vea lôhô u, nahan a hingir injar you. 13 Kpa zum u u lu eren iniongo yô, lôhô mbaatsanev man mbasombon man mbaawanev kua mbaapirashe; 14 nahan a saan we iyol sha ci u mba a kwagh u vea kimbi u ga. Gadia a va kimbi u shighe u a nder mbaperapera shin ku la.”

15 Orgen ken mba ve va iniongo la, ongo akaa ne yô, a kaa ér: “Saan or u nan ye kwaghyan* ken Tartor u Aôndo la iyol.”

16 Yesu gema kaa a na ér: “Orgen lu eren zegeiniongo aikighe, nahan a lôhô ior kpishi. 17 Shighe u yan iniongo aikighe la va kom yô, a tindi kpan na ér a za kaa mba i lôhô ve la ér, ‘Va ase nen, gadia i er hanma kwagh cii i ver a ver.’ 18 Kpa ve cii ve gba nan atôakyaa a kôron ave. U hiihii la kaa ér, ‘M yam sule, nahan gba u me za nenge u; yam anyi, me fatyô u van ga.’ 19 Shi ugen la kaa ér, ‘M yam ibua pue* i kahan kwagh, nahan gba u me za kar i iyol; yam anyi, me fatyô u van ga.’ 20 Shi ugen di kaa ér, ‘M sember eren ivese, sha ityôkyaa ne yô, me fatyô u van ga.’ 21 Kpan la maa hide va pase orvesen na akaa ne. Tsô ishima vihi orya la, a kaa a kpan na ér, ‘Due fefa za sha ugodobi mba vesen man ahia a ken gar, za vam a mbaatsanev man mbasombon man mbaapirashe kua mbaawanev.’ 22 Shighe kar yô, kpan la va kaa ér, ‘Orvesen, m er kwagh u u kaa la, kpa shi ian shi her.’ 23 Nahan orvesen la kaa a kpan la ér, ‘Due za sha akômaigbenda kua anigbendav mba kiriki za taver ior asema ve va, sha er ya wam una iv a ior yô. 24 Gadia me kaa ne, mba yange m lôhô ve iniongo la cii, mô ve môm nana bende kwaghyan wam ken zwa ga.’”

25 Hen shighe ne, ikpelaior lu yemen vea na kpishi, nahan a gema a kaa a ve ér: 26 “Aluer or va her a mo man nan kôr ter u nan ihyom ga,* kua ngô u nan man kwase u nan man mbayev mba nan man anmgbianev mba nan mba nomso man mba kasev kpaa ga, shi iyol i nan je kpa nan kôr i ihyom ga yô, nana fatyô u lun orhenen wam ga. 27 Or u nana tôô kon* u nan, nana dondom ga yô, nana fatyô u lun orhenen wam ga. 28 U tesen ikyav yô, ka an ken a ven nana soo u maan iyou i taven gôgônan ve nana vande teman gbidyen kwar fan aluer nan ngu a kwagh kuma u maan i been cii ve nana hii u maan ga ase? 29 Aluer nan er nahan ga yô, nana wa i ityô, kpa nana fatyô u maan i been ga, nahan ior mba karen gbenda vea gba sen nan 30 kaan ér: ‘Or ne hii u maan, kpa a fatyô u been ga.’ 31 Shin ka tor u han nana zaan u za tan ityav sha tor ugen ve, nana tema nana vande keren kwaghwan sha u nana fa aluer ka u nana za a ushoja 10,000 kpa nana hemba tor ugen u a lu van a ushoja 20,000 u va nôngon ityav a nan la ga ase? 32 Aluer nan fa ér mimi je ka u nana fatyô ga yô, er tor la a lu a zurum ga la je, nana tindi mbatomov mba nan ér ve za ker bem. 33 Nahan ne kpa fa nen dedoo ner, aluer mô wen nan undu akaa a nan cii ga yô, nana fatyô u lun orhenen wam ga.

34 “Bar doo, er ne fe nahan. Kpa aluer bar kera nyoho ga yô, ka nyi a haa sha mi ve una hide a nyohoo? 35 Una kera doo inya ga, shin una doo iyiav kpaa ga. Nahan ior vea haa un kera. Or u nan lu a ato a ungwan yô, nana̱ ungwa.”