Aerenakaa

24 Ayange nga kar ataan yô, pristi u vesen, Anania, sen shin Sesaria vea mbatamen mbagenev kua orfanatindi* ugen, i yilan ér Tertulu, ve va ôr gomna zayol u ve lu a mi vea Paulu la. 2 Mba yer Tertulu ér a lam yô, a gba nan Paulu ibo, kaan ér:

“Er u ne bem a lu hen atô wase kpishi shi ieren you i tsengan nengen a kwagh la i ve a mzehemen hen tar ne yô, 3 se mba wuese kwagh ne hanma shighe man hanma ijiir cii, shi se mba sughun we kpishi, Orcivirigh Feliku. 4 Kpa me kera timbir we ashe ga, wea lumun yô, kegh ato a vese kpuaa, de vihin ishima ga. 5 Se nenge or ne ka bo-or.* Ngu tuur Mbayuda cii, hanma ijiir sha tar, ér ve hendan a gomoti; ka un je a lu hemen annongo u Mbanasareti la ye. 6 Shi a nôngo u hôngor a tempel kpaa, nahan se kôr un. 7 *—— 8 U tôv un iyol you tsô u nenge a akaa a se lu nan un ibo sha mi ne cii.”

9 Ôron nahan yô, Mbayuda kpa ta ikyaa a na, ve gba kaan ér akaa a a ôr la ka mimi. 10 Gomna kpegher ityough ér Paulu a ôr kwagh yô, a kaa ér:

“Er m fe dedoo mer u ngu orjir u ikyurior ne anyom imôngo yô, doom u pasen er m lu a ishô yô. 11 We iyol you kpa u fatyô u tôvon fan kwagh ne dedoo; yange m za ken Yerusalem sha u za civir Aôndo, ka a hemba ayange 12 ga, 12 maa ve za zua a mo ken tempel, m lu nyiman kwagh a or ga, shi m lu toron ikpelaior asema ken ushinagoge, shin ma ijiir i môm ken gar kpaa ga. 13 Shi hegen kpa vea fatyô u tesen mimi u akaa a ve lu nan mo ibo sha mi la ga. 14 Kpa sha kwagh u gbenda u Ter u ve yer ér annongo la yô, m lumun sha ishigh you; ka sha gbenda ne m lu eren Aôndo u uter av icighantom ye, sha ci u m na akaa a i tese ken Atindi man a i nger ken Uprofeti la cii jighjigh. 15 Shi m ngu a ishimaverenkeghen mer, Aôndo ngu va nderen mbaperapera man mbaperapera ga kpaa shin ku, man ka kwagh u ior mban kpa ve lu veren ishima keghen yô. 16 Sha ityôkyaa ne yô, hanma shighe ka m nôngon tsung mer me za hemen u lun a imoshima i wang* sha ishigh ki Aôndo kua ior. 17 Nahan anyom nga kar kpishi yô, m va sha u me va na nongoior wam uiyua mba i tindi a mi sha ci ve yô, shi me na iniav. 18 M ngur eren akaa ne yô, ve va zua a mo ken tempel, kpa shighe ne m wanger iyol yam kera. M lu a ikpelaior ga, shi m lu eren ma kwagh u van a ayôôso kpaa ga. Kpa Mbayuda mbagenev lu her, mba ve due ken tiôntar u Ashia yô. 19 Luun er mimi je ve zuam a ibo sha ma kwagh yô, ve kpa ma ve ve sha ishigh you, ma ve va ôr kwagh u m er shami ga la. 20 Gayô ior mba ve lu heen ne ayol a ve ve̱ pase kwaghbo u yange ve zuam a mi shighe u m tile sha ishigh ki Sanhederin la, 21 saa di kwagh môm u yange m ôr genger genger zum u m tile hen atô ve ne tseegh, mer: ‘Ka sha kwagh u mnder u shin ku i lu ôron mo ijir nyian sha ishigh yenegh ye!’”

22 Nahan kpa, er Feliku fa akaa kpishi sha kwagh u Gbenda u Ter ne yô, a na ve gbenda ér ve̱ yem, a kaa ér: “Lisia, kurutya u kweshojaa la una sen a va tsô me er kwagh sha ikyaa yen ne.” 23 Tsô a na orshoja u vesen ugen wada ér a̱ wa Paulu ken purusu, kpa a̱ na un ian i eren akaa agen, shi a̱ de ior nav ve wasen un sha mbamgbe nav.

24 Ayange nga kar yô, Feliku va vea kwase na Durusila, Wanmbayuda. A tindi i va a Paulu, nahan a kegh ato a na er lu pasen kwagh u a lu u nan Kristu Yesu jighjigh la. 25 Kpa Paulu ngur lamen sha kwagh u perapera man iyolkôrontsaha kua ijirôron i i lu van la yô, cier Feliku iyol, a kaa a na ér: “Hila yem tsô, me tindi a va a we kwagen kpaa, shighe u ian a duem yô.” 26 Kpa shi lu veren ishima ér Paulu a na un inyaregh. Nahan lu tindin i lu van a na fele fele shi lu lamen vea na. 27 Kpa anyom nga kar ahar yô, i ver Porshiu Fesetu sha ian i Feliku la; man er Feliku lu keren u doon ityough a Mbayuda yô, a de Paulu lu ken purusu her.