Mpase
16 Tsô m ungwa imo due ken icighanjiir la genger genger kaa a mbatyomov mba utaankaruhar mbara ér: “Za nen za gema nen iyugh i Aôndo i i lu shin agbande a ataankarahar la haa nen shin tar.”
2 Tsô u hiihii la yem za haa iyugh i shin gbande na la shin tar. Maa ior mba ve lu a ikyav i inyamkyume la kua mba ve lu civir eev mbu i̱ la, gba avav a bo, a nyoon tsung.
3 U sha uhar la haa iyugh i shin gbande na la shin zegemnger. Maa a hingir awambe, er ka a orkpen nahan, nahan hanma kwaghuma kpe, akaa a shin zegemnger cii.
4 U sha utar la haa iyugh i shin gbande na la shin uifi kua ihwembe i* mnger. Maa ve hingir awambe. 5 Tsô m ungwa ortyom u a lu a tahav sha mnger la kaa ér: “We u U lu, u ngise kpa u lu la, We u U eren kwagh a ior ou sha mimi la, u ngu u perapera, gadia ka we u ôr ajir ne nahan ye, 6 sha ci u ve haa awambe a uicighanmbaiorov man a uprofeti inya, nahan u na ve awambe wer ve ma; man ka kwagh u a kom sha a ve je la.” 7 Tsô m ungwa atse a nan nagh la kaa ér: “Yehova* Aôndo, we U Hemban Agee Cii, u ôron ajir sha mimi man sha perapera.”
8 U sha unyiin la gema iyugh i shin gbande na la haa sha iyange, nahan i na iyange tahav ér i ta tsung ior ve̱ hughum iyol. 9 Tsô oo ta tsee je ior hughum iyol, kpa ve gema ve laha iti i Aôndo, un u a lu a tahav sha atsan ne la, ve gema ishima sha u vea na un icivir ga.
10 U sha utaan la gema iyugh i shin gbande na la haa sha ikyônough ki torough ki inyamkyume la. Maa tartor u i̱ la wa ime, nahan nyoon ve je ve gba nyiman iniombor ve,* 11 kpa ve laha Aôndo u sha, sha ci u mnyoon ve la, man avav a bo a ve gbe la, ve gema ishima sha u vea undu ityom ve la ga.
12 U sha ataratar la haa iyugh i shin gbande na la sha zegeifi u Yuferati, tsô mngerem nam uma kera, sha u sôron gbenda sha ci u utor mba ve lu vegher u iyange ka i due la.*
13 Tsô m nenge a ujijingi mba hôngorov utar,* ve lu er ka mbaatungwa nahan, u môm due ken zwa u derakon la, ugen due ken zwa u inyamkyume la, ugen la di due ken zwa u profeti u aiegh. 14 Jighilii yô, ka akaaôron a a dugh hen azôv shi a lu eren uivande yô; nga duen zan hen utor mba sha tar cii, sha u kohol ve imôngo sha ci u ityav mbi iyange i vesen i Aôndo U Hemban Agee Cii la.
15 “Nenge! M ngu van er ormbaiv ka nan va nahan. Or u nana lu per shi nana lu a akondo a nan iyol her yô, a saan nan iyol, sha ci u nana zende idyelegh sha u nana ya kunya sha ishigh ki ior ga.”
16 Tsô ve kohol ve imôngo hen ijiir i ka i yila ken zwa Heberu ér Armagedon* la.
17 U sha utaankaruhar la haa iyugh i shin gbande na la sha ahumbe. Maa imo due ken icighanjiir, hen ikyônough ki torough kira genger genger, kaa ér: “Bee ve!” 18 Tsô inyiar swamen kua amo man idyuran, tar tenger wuee man lu sha utaha tsung; er uumace hii u lun sha tar je, tar lu a vande tenger nahan ga. 19 Nahan zegegar la pav ker avegher atar, shi agar a akuraior gba; shi i umbur Zegebabilon sha ishigh ki Aôndo, sha u nan un kôôpu u wain u Aôndo, ka iyugh na je la. 20 Shi hanma icile kar kera, shi iwo kera lu ga. 21 Tsô awombo a vesen osough sha aôndo haa sha ior, hanma iwombo yuhwa kuma er talenti* môm nahan, nahan ior laha Aôndo sha ci u ican i ve ya sha awombo shon la, gadia awombo la vihi akaa je cieryol.