Mateu

5 Nengen a ikpelaior yô, a unde sha uwo. Za tem inya yô, mbahenen nav va her a na. 2 Tsô a bugh zwa a gba tesen ve kaan ér:

3 “Saan mba i sar ve tsung u fan Aôndo* la iyol, sha ci u Tartor u sha ka u ve.

4 “Saan mba ve lu zungwen la iyol, sha ci u a va sur ve asema.

5 “Saan mba ve lu a ishima i legh legh* la iyol, sha ci u vea ya dyako u tar.

6 “Saan mba ijen kua imura i ker ve sha kwagh u perapera* la iyol, sha ci u vea ide.

7 “Saan mba ve zungwen ior mhôônom la iyol, sha ci u a zungwe ve mhôônom.

8 “Saan mba ve lu a ishima i wang la iyol, sha ci u vea nenge a Aôndo.

9 “Saan mba ve keren bem la iyol, sha ci u a yila ve ér ônov mba Aôndo.

10 “Saan mba i eren ve ican sha ci u kwagh u perapera la iyol, gadia Tartor u sha ka u ve.

11 “I saan ne iyol shighe u ior ve lu heen ne man shighe u ve lu tôvon ne a ican man shighe u ve lu wan ne aie iyol kua shighe u ve lu ôron hanma kwagh u dang sha iyol yen sha ci wam yô. 12 Ember nen shi i saan ne iyol tsung, sha ci u ne va zua a injar i vesen sha. Kape ngise ve tôv uprofeti mba ve lu cii man ne la a ican je la.

13 “Ne mba bar u tar, kpa aluer bar kera nyoho ga yô, a er a mi nena ve una hide a nyohoo? A kera er kwagh môm a mi ga, kpa a haa un kera, ior vea ndyar un angahar.

14 “Ne mba iwanger i tar. Gar u sha igyungu lu myer ga. 15 Mba tsaren imenger mba gem mba we shin ikyese ga, kpa ka i penda sha tebul,* nahan i̱ mondo iwanger sha mba ve lu ken iyou la cii. 16 Yô, ne kpa iwanger yen la i̱ wanger sha ishigh ki iorough, sha er vea nenge ityom yen i dedoo la, nahan vea civir Ter wen u a lu sha la yô.

17 “De henen nen ner m va ka u vihin Atindi shin atesen a uprofeti ga. M va ka u vihin ga, kpa ka u kuren. 18 Mimi je me kaa ne, hemba kan zange u sha man tar ve kar kera, a u ishangebaacaa i môm i hemban ndahar, shin anikyav u sha ishangebaacaa môm ken Atindi a kar kera la, saa akaa a i nger la cii aa kure sha mi. 19 Sha nahan yô, or u nana per tindi môm ken atindi a kiriki la, shi nana tese mbagenev u eren nahan cii, a nenge nan ér nan hemba gban ijime ken Tartor u sha.* Kpa or u nana kuran a, shi nana tesen mbagenev a yô, a nenge nan ér nan hemba ken Tartor u sha.* 20 Me ôr ne, aluer perapera wen hemba u mbangerenatindi* man u Mbafarishi la ga yô, mayange ne nyôr ken Tartor u sha ga.

21 “Ne ungwa i kaa a mbangise mbara ér: ‘Mayange de woo or ga, kpa or u nan woo or yô, a za a nan ken atejir.’ 22 Kpa mo yô, m ngu kaan a ven mer, hanma or u nana nyoon ishima a anmgbian u nan gbem yô, a za a nan ken atejir. Shi aluer or tuhwa anmgbian u nan ityuhwanev mbi vihin tsung* yô, a za a nan ken Atejir u Tamen.* Man shi aluer or kaa a orgen ér, ‘We gbilin-or ne!’ yô, nan kuma u a gbihi nan ken usu u Gehena* la.

23 “Nahan aluer u va a iyua hen atse a nan nagh man her la je u umbur wer anmgbian wou gba iyongo a we yô, 24 undu iyua you la hen atse la, hide yem za vande himen iyongo a anmgbian wou la, cii man u hide u va mase nan iyua you la ye.

25 “Sôr zayol u u lu a mi vea or u nan lu zan u za yilan we ijir la fese, er ne lu yemen sha gbenda la je, gayô or shon nana za gema u nana wa sha ikyev i orjir, orjir la di nana gema u nana na orwasen nan tom ér nana za wuhe u ken purusu. 26 Mimi je m kaan we ne, u due ken purusu la ga zan zan u kimbi inyaregh kira cica cii, u kera shi a kwagh ga.*

27 “Ne ungwa i kaa ér: ‘Mayange de eren idya ga.’ 28 Kpa mo yô, m ngu kaan a ven mer, hanma or u nana kenger kwase je a sar nan u yaven a nan yô, nan er idya a nan ken ishima i nan je ve. 29 Nahan yô, aluer ishe you i ken iyan ngi nan we gbeev mbu nôngon yô, dugh i ta kera. Guda u ilyeghegh you i môm ki saa, a u i kende iyol you jimin cii ken Gehena* la. 30 Shi aluer uwegh ou ku yanegh ku nan we gbeev mbu nôngon yô, tôndo ku ta kera. Guda u ilyeghegh you i môm ki saa, a u i kende iyol you jimin cii ken Gehena* la.

31 “Heela tseegh ga, ne ungwa i kaa ér: ‘Or u nan pav ivaa a kwase u nan cii yô, nana̱ na nan takeda u paven ivaa.’ 32 Kpa mo yô, m ngu kaan a ven mer, hanma or u nana pav ivaa a kwase u nan, man a lu sha ityôkyaa i idya ga yô, nan ngu nan ér kwase la nana er idya. Man or u nan vese kwase u i pav ivaa a nan sha imba gbenda ne cii yô, nan er idya.

33 “Shi ne ungwa i kaa a mbangise mbara ér: ‘Wea bum yô, de bunden u eren kwagh u u bum la ga, kpa kure uiceghzwa mba u er a Yehova* la keng keng je.’ 34 Kpa mo yô, m ngu kaan a ven mer, de bumun nen ga kuaa; sha kpa de bumun nen ga, sha ci u sha ka ikyônough ki torough ki Aôndo. 35 Shi de bumun nen tar ga, sha ci u tar ka kpenga* u pendan angahar u Aôndo. Yerusalem kpa de bumun nen ga, sha ci u ka gar u Tor u hemban. 36 De bumun nen ityough yenegh ga, gadia ne fatyô u geman gwarce môm hingir pupuu shin il ga. 37 Kpa zum u ne kaa ner ‘Een’ yô, i lu een heregh, shi ‘Ei’ wen kpaa, a lu ei heregh. Kwagh u a hembe nahan cii yô, a due hen Iferor.

38 “Ne ungwa i kaa ér: ‘Ishe sha ishe man inyigh sha inyi.’ 39 Kpa mo yô, m ngu kaan a ven mer: De hendan nen a or u nan we ifer ga, kpa aluer or ta u sambe sha wasegh ou ku yanegh yô, gema ku ken imese kpa nana ta. 40 Shi aluer or soo u za yilan we ijir ken koti* sha u ngohol we ikyondo i ken atô yô, de nana ngohol ikyondo you i haan iyol kpaa. 41 Shi aluer or u nan lu sha ma ian i utaha nan kighir we ér u tôô ikyav u za a mi mai* môm yô, za vea nan umai uhar. 42 Aluer or pine u iwasen yô, na nan. Shi aluer or soo ér we u na nan injô* yô, de nyumen nan ga.

43 “Ne ungwa i kaa ér: ‘Or u wan ndor a we nana̱ doo u ishima kpee je, kpa orhyom wou yô, kôr nan ihyom.’ 44 Kpa mo yô, m ngu kaan a ven mer: Mbahyomov enev ve za hemen u doon ne ishima, shi eren nen msen sha ci u mba ve tôvon ne a ican la. 45 Ka nahan man ne tese ner ne mba ônov mba Ter wen u a lu sha la ye. Gadia ka a er iyange i due i ta sha mbaaferev kua ior mba dedoo, shi a na ura u nôô sha mbaperapera man mba ve lu mbaperapera ga la kpaa. 46 Aluer ka mba ne doo ve ishima la tseegh ve doo ne ishima yô, ka nyi injar ne zua a mini? Ka kwagh u mbangoholkpandegh kpa ve eren la gaa? 47 Shi aluer ne mba sughun anmgbianev enev tseegh yô, ka nyi ne er i hemban doon a mbageneve? Ka kwagh u ior mba ken akuraior kpa ve* eren la gaa? 48 Gba hange hange u ne lu vough,* er Ter wen u sha la a lu vough nahan.