Ityough 22
U Fan Kwaghaôndo u Mimi
1. Ka unô yange ve eren kwaghaôndo u mimi ken derianyom u hiihii laa?
AKPERAN NGA GA sha kwagh u mba yange ve eren kwaghaôndo u mimi ken derianyom u hiihii la. Yange i lu mbadondon Yesu Kristu mbara. Ve cii yange ve lu ken nongo u Kristu môm. Nyian ye? Mba ve lu eren kwaghaôndo u mimi mbara á fa ve nena?
2. Á fa mba eren kwaghaôndo u mimi mbara nena?
2 Yange Yesu pase e̱r se er kwagh ne yô, a kaa er: “Ka sha atam a ve man né fa ve ye. . . . Kape hanma kon u injaa u um atam a injaa je ra; kpa kon u bo yô, ngu um di atam a bo je. . . . Nahan yô, ka sha atam a ve man né fa ve ye.” (Mateu 7:16-20) Ka atam a dedoo a nyi u hen wer mbacivir Aôndo sha mimi ve̱ ume? Kanyi vea lu ôron shi eren hegene?
U TSEGHAN ITI I AÔNDO
3, 4. (a) Kwagh hiihii u pinen ken Iti Msen u Yesu la kanyi? (b) Yange Yesu tsegha iti i Aôndo nena?
3 Mba civir Aôndo sha mimi yô vea er kwagh sha inja vough er Iti Msen u yange Yesu na mbahenen nav la nahan. Ityôkwagh i hiihii i Yesu ôr kwagh shami yô ka i je ne: “Ter wase u Sha, i tsegha iti You.” Ikyenge i Bibilo i genegh i kaa er: “I ver iti you jighjigh.” (Mateu 6:9, Jerusalem Bible) U tseghan shin u̱ veren iti i Aôndo jighjigh la inja na er nena? Yange Yesu eren nena?
4 Yesu yange tese e̱r yange un eren yô zum u a lu sônon Ter na ken msen yô: “M pase iti You hen ior mba U tsough ve shin tar ne, U nem la.” (Yohane 17:6) Een, yange Yesu pase ior iti i Aôndo, i i yer er, Yehova la. Yange gbaan uwer u teren iti la ga. Yange Yesu fa er ka awashima u Ter na u̱ i na iti Na icivir sha won cii. Nahan a tese ikyav sha u yôôn man u tseghan iti la kpaa.—Yohane 12:28; Yesaia 12:4, 5.
5. (a) Nongo u Kristu zua sha iti i Aôndo nena? (b) Aluer gba u se zua aa myom yô kanyi se er keng-e?
5 Bibilo i tese er imaagh ki tiônnongo u Kristu u mimi yô ki zer itine sha iti i Aôndo. Apostoli Peteru yange “pase er Aôndo lu vande sôron atôatyev sha u Una dugh nongo ken a ve sha ci u iti Na yô.” (Aerenakaa 15:14) Nahan ior mba Aôndo mba mimi yô ka keng saa vea tsegha iti na shi vea pase i tar sha won cii. U fan iti la tseegh kpaa, ka hange hange sha u zuan a myom, er Bibilo i kaa nahan: “Gadia ‘hanma or u nan yer sha iti i Yehova yô nana war.’ ”—Mbaromanu 10:13, 14, NW.
6. (a) Iniongo i ukwaghaôndo ngi tseghan iti i Aôndo je kpa? (b) Ior mba eren shiada sha iti i Aôndo mba je kpa?
6 Nahan, nyian, ka unô ve tsegh iti i Aôndo shi ve pasen i tar sha wono? Iniongo i kwaghaôndo yange̱ u teren iti i Yehova la jim jim. Mbagenev je yô ve dugh í kera ken Bibilo i ve eren tom a mi la. Nahan cii kpaa, aluer u ngu ôron kwagh a mba hen ikyasen wou la man u ngu teren Yehova fele fele, yilan iti na yô, u hen wer ka hanma nongoior jim vea kaa er we u kombu a u? Ka kweior môm tseegh ve lu dondon ikyav i Yesu sha kwagh ne ye. Tamenkwagh ken uma ve yô ka u civir Aôndo shi eren shiada sha iti na, vough er yange Yesu eren nahan. Ka nahan ve yer iti i i dugh ken Ruamabera sha iyol ve er “Mbashiada mba Yehova” ye.—Yesaia 43:10-12, NW.
U YÔÔN KWAGH U TARTOR U AÔNDO
7. Yange Yesu tese mdoom ma tartor u Aôndo nena?
7 Ken Iti Msen u yange Yesu na la, shi yange pase mdoom ma tartor u Aôndo. Yange tese ior u eren msen er: “Tartor Wou u̱ va.” (Mateu 6:10) Yange Yesu pase acin imôngo er ka Tartor la tseegh ua fatyô u been a mbamzeiyol mba or-umace ye. Un kua mbaapostoli nav cii yange ve yar tom u pasen ior kwagh u tartor la sha ‘agar agar’ man ‘uya uya’ kpaa. (Luka 8:1; Aerenakaa 5:42; 20:20) Ken tom ve u kwaghpasen man u tesen cii itinekwagh ve yô lu tartor u Aôndo.
8. Yange Yesu tese er mbadondon nav mba mimi vea hemba eren tom u loho u dedoo hen “ayange a masejime” ne nana?
8 Kpa hen ayange ase ne ye? Semakwagh u nongoior u Kristu u Aôndo u mimi u tesen kanyi? Er Yesu lu tsenganôron kwagh u “ayange a masejime” yô, a kaa er: “Man Loho u Dedoo u tartor ne yô, á ôr u á tser tar, sha u u̱ lu mpase hen akuraior cii; ka zum la man mkur una kuma ye.” (Mateu 24:14) Nahan saa ka Tartor la ua lu itine i loho u ior i Aôndo nyian ye.
9. Ka unô ve lu pasen loho u Tartor nyiana?
9 Pine ase iyolyou: Aluer or va hen hunda wou va lam a we nan kaa er ishimaveren i mimi i uumace yô ka tartor u Aôndo, nahan ka hanma nongoior u kaa wer or la nan ngu kereghe? Dugh Mbashiada mba Yehova kera yô ma kweior u kwaghaôndo va hen a we va lam a we sha kwagh u tartor u Aôndo kpa? Man kwagh u a lu yô, ka ior kpeghee tseegh ve fe inja i kwagh ne ye! Mba viing sha kwagh u gomoti u sha ikyev i Aôndo la. Kpa kwagh u gomoti la ka ibaver i i ne tar-tenger yô. Profeti Daniel tsengakaan er tartor ne ‘ua hembe ugomoti mbagenev mban cii kpa u yô ua tema tor sha tar.’—Daniel 2:44.
U NAN MKAANEM MA AÔNDO ICIVIR
10. Yange Yesu tese icivir sha Mkaanem ma Aôndo nena?
10 Shi gbenda u genegh u fan mba ve lu eren kwaghaôndo u mimi yô ka ieren ve sha kwagh u Bibilo. Yange Yesu naan Mkaanem ma Aôndo icivir sha hanma iaven cii. Hanma shighe cii lu má ma luun tahav mbu kwaghôron na ye. (Mateu 4:4, 7, 10; 19:4-6) Shi yange Yesu tese icivir i Bibilo sha u yaren tom sha atesen a i. Yange laha Bibilo shighe môm kpaa ga. Kpa lu puun mba yange ve eren sha ityesen i Bibilo ga shi ve vôron a vôr tahav mbu atesen a i sha atesen a ve la.—Marku 7:9-13.
11. Kanyi ieren ukwaghaôndo ve lu a mi sha Mkaanem ma Aôndo hanma shighee?
11 Uchurch mba Mbakristu mbaaiev ve yar tom sha u dondon ikav i Kristu sha kwagh ne nena? Ve na Bibilo icivir tsembelee kpa? Mbahemenev mba ukwaghaôndo kpishi nyian ve na jighjigh a Bibilo sha kwagh u mgbe u Adam ken isholibo la ga, shin mngerem ma deemee ma sha ayange a Noa la, shin kwagh u Yona man zege ishu la, kua akaa a genegh kpaa. Shi ka ve kaa er yange or gba duen ken kwagh genegh abu tsô, Aôndo yange gba a gba nan ga. U kaan nahan la mba taver ior asema sha u nan Mkaanem ma Aôndo icivir kpa? Mbahemenev mba ukwaghaôndo mbagenev mba nyiman er u za yaven a kasev shin nomso mbagenev ka kwaghbo kpee ga, man shi er u nomsoor yaven a nomsoor shin u lun a ikpila ukase la kpaa ka vough. Ú kaa wer mba taver ior asema sha u ve̱ lumun a hemen u Bibilo kpa? Mba dondon ikyav i Wan u Aôndo kua mbaapostoli nav mbara cuku kpaa ga.—Mateu 15:18, 19; Mbaromanu 1:24-27.
12. (a) Hii nan Aôndo a lumun a mcivir u mbagenev kpishi ga shin er ve lu aa Bibilo je kpaa? (b) Aluer i de mbaerenafer sha apera mba hoghom hoghom ken ma church yô, se kaa ser nyi?
12 Mba zan kwaghaôndo ka ve lu a Bibilo shi ka ve ôr i je, kpa aeren a ve gema tese er mba dondon i ga. Anzaaior la, Bibilo i ôr kwagh ve er: “Ka ve pase er ve fa Aôndo kpa mba gem mba nyiman Un sha aeren a ve la.” (Titu 1:16; 2 Timoteu 3:5) Aluer mba zan kwaghaôndo mba haan ishor, shi mba hundu msôrom shi mba eren aferakaa a genegh, nahan kpa shi mtile ve ngu waeng ken church ve la yô, kwagh ne ngu tesen er nyi? Ka ikyav i tesen er nongo u kwaghaôndo ve la Aôndo lumun a u ga.—1 Mbakorinte 5:11-13.
13. Kanyi i lu i or a yar tom shami taveraa aluer nan fa er atesen a church i nan lu keregh la cii zua sha Bibilo ga yôô?
13 Aluer wea lu vanden henen ken ishima sha ityouv mbi takerada ne mbi mbi kar mbila, shi wea time sha avur a Bibilo a a lu keregh la yô, u zua aa jindikwagh ken atesen a Mkaanem ma Aôndo kera kpaa. Kpa aluer atesen a kwaghaôndo u we u lu keregh la kera zua sha atesen a Mkaanem ma Aôndo ga nahan ka nena? Aluer ka nahan yô u ngu a mzeiyol kehe. Mzeiyol shon yô ka u we tsuan u ngohol mimi u ken Bibilo la shin u vendan sha ci u atesen a Bibilo i lumun aa a ga la. Kwagh u u yar tom shami cii, ka u ú tsough iyolyou, je la. Nahan cii kpaa, kar akaa tsembelee. Ka sha ci u kwagh u ú tsough la una bende a mtile wou hen Aôndo kua ishimaveren you i va lun uma gbem sha won ken paradiso shin tar.
U LUN PALEGHAA A TAR
14. (a) Kanyi ikyav i genegh i lu i fan kwaghaôndo u mimi? (b) Ka sha ci u nyi i doo u mba civir sha mimi vea yar tom sha kwagh nee?
14 Kpa shi ikyav i genegh i fan mba ve lu eren kwaghaôndo u mimi yô, ka er Yesu a kaa nahan la er, ve mba “ior i tar ne ga” la. (Yohane 17:14) Inja na er mbacivir sha mimi mbara ka u vea lu paleghaa a injabo i tar kua aeren a u cii. Yange Yesu Kristu venda u lun tor u pati. (Yohane 6:15) U fatyô u kaven er u lun paleghaa aa tar la i lu kwagh u injaa yô aluer u umbur er Bibilo i kaa er Diabolo Satan ka tor u tar ne yô. (Yohane 12:31; 2 Mbakorinte 4:4) U fatyô u nengen er kwagh ne a lu kwagh u asenge ga yô sha kwaghôron u Bibilo i ze hemen u ôron yô er: “Nahan yô, or u i sar nan ka lun ikar a tar yô, nan hingir orihom u Aôndo je ve.”—Yakobu 4:4.
15. (a) Uchurch mba u fe la mba “ior i tar ne ga” kpa? (b) U fa makwaghaôndo u a yaren tom sha kwagh ne kpa?
15 Akav tese er iniongo i kwaghaôndo i i lu ken ikyasen wou la ngi a kwagh ne ken ishima nahan kpa? Mbahemenev mbara kua alegh aa iniongo la mba “ior i tar ne ga” kpa? Shin ve nyôr iyol ken aeren a tar, er upati kua tarnôngon sha ci u mzehemene? Er ityom i ukwaghaôndo mban i lu myer ga yô, taver u nan ikyar sha mbampin mban ga. Sha gbaa u genegh yô, shi taver ga u timen sha ityom i Mbashiada mba Yehova. Aluer u er nahan yô, u fa er ve lu dondon ikyav i Kristu kua mbadondon un mba tsuaa mbara sha u lun paleghaa a tar ne, man ityom i pati kua ikyo i wan sha kwagh u mbagenev ga, man ijimba, kua igbinda ve i pilagh cii.—1 Yohane 2:15-17.
DOOSHIMA HEN AYOLAVE
16. Ka gbenda u vesen u nyi á fa mbahenen mba Kristu mba mimi mbaraa?
16 Gbenda u genegh u hemban lun u vesen u fan mbahenen mba Kristu mba mimi yô ka sha dooshima u ve lu a mi hen ayolave la. Yesu kaa er: “Ka sha kwagh ne man ior cii vea kav er ne lu mbahenen Av ye, aluer ne doo ayol a en yô.” (Yohane 13:35) Iniongo i kwaghaôndo i we u fe la ngi a dooshima ne kpa? Ikyav i tesen, ken ityar i ve lu ker la ka ia mough sha u nôngon ityav ayolave nahan ka ve er nena?
17. Iniongo i kwaghaôndo kua alegh a i cii mba yaren tom u tesen dooshima hen ayolave la nena?
17 U fa kwagh u ngu a er yô. Zum u mbatarev ka vea kaa imo yô alegh a iniongo i kwaghaôndo kpishi ka i yem ken tangeuitya ve za wua anmgbianev vev mba nan jighjigh mba ve lu ken tar u genegh yô. Kwagh a luun nahan yô, Mbakatoliko ve gba wuan Mbakatoliko, Mbaprotestanti ve gba wuan Mbaprotestanti shi Mbamusulumi di ve gba wuan Mbamusulumi. U hen wer imba ieren la i zua sha Mkaanem ma Aôndo shi tese jijingi u Aôndo je kpa?—1 Yohane 3:10-12.
18. Mbashiada mba Yehova gema yar tom u tesen dooshima hen ayolave nena?
18 Mbashiada mba Yehova mba eren nena sha kwagh u tesen dooshima hen ayolave nee? Vé vé dondo sha ieren i ukwaghaôndo mba tarev la ga. Vé mbá wóó anmgbianev mba nan jighjigh sha tangeuitya ga. Mba aa ibo sha u eren aie kaan er, “Aôndo doom ishima,” kpa geman kôron anmgbian ve u a lu tar u genegh la ihyom, shin u ken zwa u genegh shin ikyurior i genegh tsô kpaa ga. (1 Yohane 4:20, 21) Shi mba tesen dooshima sha igbinda i genegh kpaa. Nena? Sha gbenda u ve eren kwagh a mba ve we ndor a ve la kua iniôngon ve i sha dooshima u wasen mbagenev sha e̱r ve̱ hen kwagh u Aôndo yô.—Mbagalatia 6:10.
KWAGHAÔNDO U MIMI NGU MÔM
19. Ka sha nyi i lu vough kua sha Ruamabera kpaa u kaan er kwaghaôndo u mimi ngu môm tseeghele?
19 Ka vough u kaan er kwaghaôndo u mimi ngu môm tseegh. Kwagh ne lumun a kwaghôron u i kaa la er Aôndo u mimi ka Aôndo, “u nzughul nzughul ga, kpa ka u bem.” (1 Mbakorinte 14:33) Bibilo i kaa er “jighjigh u nan kpa ngu môm” tseegh. (Mbaefese 4:5) Nahan, ka unô, ve lu nongo a mbacivir sha mimi nyiana?
20. (a) Sha er ikyav i tese yô, takerada ne tese er ka unô ve lu mbacivir sha mimi nyiana? (b) Kape u ne jighjigh laa? (c) Gbenda u hemban fan Mbashiada mba Yehova kanyi?
20 Se mba a akperan ga u kaan ser ka Mbashiada mba Yehova. Sha u kwagh ne á kumau yô se mba lôhôn we ser shi seer u fan kwagh ve. Gbenda u hembandoon ú eren kwagh ne yô ka u zan mbamkombo vev mbara ken Iyou i Tartor i Mbashiada mba Yehova la. Er Bibilo i tese er u eren kwaghaôndo u mimi la ngu a na or mkom u vesen hii hegen je shi una bugh gbenda u ember uma u tsôron ken paradiso shin tar kpaa yô, ka kwagh u lun a iwasen hen a we u tôvon shami. (Duteronomi 30:19, 20) Se mba lôhôn we saan saan ser er nahan. Hii nan u tim shami hegen je ga?
[Foto u sha peeji 185]
Aluer ú lam a or sha kwagh u Yehova man tartor na nahan, ior vea kaa er we u ngu ken kwaghaôndo u nyi?
[Ufoto mba sha peeji 186 la]
Aluer or kera yar tom sha Mkaanem ma Aôndo ga nahan kpaa nan na ma icivirii?
[Foto u sha peeji 188, 189 la]
Yange Yesu venda u lun tor u mbapativ
[Foto u sha peeji 190 la]
Mba lôhôn we saan saan er u̱ za mbamkombo mba Mbashiada mba Yehova