U Umbur Yehova Yan Wan Na

TÔÔ wer or na ú zege iyua i kpilighyol. Nahan ú er nena?—Ú suu nan kwa môm tsô maa ú hungur a kwagh u nan kuaa laa? Shin ú zer umbur or shon kua kwagh u nan er a we laa?—

Yehova Aôndo na se iyua i kpilighyol. Á tindi Wan na ér a̱ va shin tar ne a̱ va kpe sha ci wase. Ú fa ityôkyaa i i ne ve yange gba u Yesu una kpe sha ci wase kpa?— Kwagh ne ka kwagh u vesen tsung, u i gbe u se fa yô.

Er se vande henen ken Ityough ki sha 23 kira nahan, yange Adam peren tindi u vough u Aôndo la yô, lu isholibo je er la. Nahan se ya dyako u isholibo hen Adam, u á lu Ter u hanmô wase cii la. Nahan ú hen wer kanyi kwagh a gbe se a mini?— Se fatyô u ôron sha injakwagh ser, kwagh gba se a ter u he, u yange lu shin tar ne kpa er isholibo ga yô. Tsô ú hen wer ka an nana fatyô u lun ter wase shono?— Ka Yesu.

Yehova yange tindi Yesu shin tar ér a̱ va hingir ter wase, i̱ de kera lu Adam ga. Bibilo kaa ér: “Or u hiihii la, Adam, hingir or u uma. Adam u masetyô la hingir jijingi u nan a na uma.” Adam u hiihii la lu ana?— Kape i lu je la, yange lu or u Aôndo er sha vuulevu u hen inya la. Adam u sha uhar la di ka ana?— ka Yesu. Bibilo kaa ér: ‘Or u hiihii la [Adam] ka u shin tar, ka shin inya je i dugh nan ye, Or u sha uhar la [Yesu] yô, ka Sha A dugh ye.’—1 Mbakorinte 15:45, 47; Genese 2:7.

Er Aôndo yange musan uma u Yesu sha, gema va wa ken iyav mbu Maria yô, Yesu ya dyako u isholibo hen Adam ga. Ka nahan ve Yesu lu a isholibo ga ye. (Luka 1:30-35) Shi ka nahan kpa shighe u i mar Yesu la, ortyom ugen kaa a mbakuranilev ér: “I mar ne Oryiman ken gar u Davidi nyian” ye. (Luka 2:11) Kpa cii man wanikyundan Yesu a̱ hingir Oryiman wase yô, yange gba u una vande eren nyi?— Gba u una vese, una wa ikyondo di er Adam kpa lu or u wan ikyondo nahan. Ka hen zum la Yesu una hingir ‘Adam u sha uhar’ ye.

Shi Oryiman wase Yesu una hingir se “Ter u tsôron” kpaa. Kape i yer un ken Bibilo je la. (Yesaia 9:6, 7) Sha kpôô yô, Yesu u a lu vough la una fatyô u hingir ter wase, una kar a tile sha ityough ki Adam u yange er isholibo, maa hingir or u yinan la. Ka nahan ve se fatyô u lun a ‘Adam u sha uhar,’ una lu ter wase ye. Shi Yesu iyol na ngu Wan u Yehova Aôndo.

Aluer se hen kwagh u Yesu se fa yô, se fatyô u ngohol un ser ngu Oryiman wase. Ú umbur kwagh u i gbe u a yima se sha ikyev na kpa?—Een, ka sha ikyev i isholibo man dyako u kuu u se ye hen Adam la. Uma u vough u Yesu yange vese wa ikyondo ve, gema un na naagh a mi sha ci wase la, mba yer ér ipaa. Yehova yange na ipaa ne sha er a de se asorabo ase yô.—Mateu 20:28; Mbaromanu 5:8; 6:23.

Sha kpôô yô, se soo ser se hungur a kwagh u Aôndo man Wan na ve er sha ci wase ne ga, shin se soo ser se hunguru?—Yesu tese mbadondon nav gbenda u injaa u ua wase se u umbur kwagh u yange er ne yô. De se ôr kwagh sha mi.

Tôô wer ú ngu sha kparyou u sha u iyou igen ken Yerusalem. Tugh ile. Yesu man mbaapostoli nav tema kase tebur. Aci a iyôngo i mgbaghen nga sha tebur la, kua ikpen bredi man wain u nyian kpaa. Mba yan kwaghyan u icivirigh. Ú fa ityôkyaa kpa?—

Kwaghyan ne ka u umbur ve kwagh u Yehova ngise er tsuaa tsuaa anyom kar deri imôngo, shighe u ior nav, Mbaiserael lu ikpan ken Igipiti la. Yehova kaa a ior nav sha shighe la ér: ‘Hanma ya yô a̱ sôngo waniyôngo a̱ har awambe na sha ikpande i ambusu a ihinda i nan.’ Shi á kaa a ve ér: ‘Nyôr nen ken ayou a en, ya nen waniyôngo la ker.’

Mbaiserael er nahan vough. Hen tugh mbura je ortyom u Aôndo kar ken tar u Igipiti cii. Ortyom la wua ônov mbaiundav ken uyaav kpishi. Kpa iyou i ortyom la una nenge a awambe a waniyôngo sha kpandehunda yô, a aver iyou la, a kar. Ken uyaav mbara cii, wanye kpe ga. Kwagh u ortyom er la cier Farao, tor u Igipiti iyol kpishi. Nahan Farao kaa a Mbaiserael ér: ‘M pase ne ve, yem nen ase. Due nen ken Igipiti kera!’ Tsô, ve kange ikyav vev sha urakumi man sha ujaki vev, ve kôr gbenda yemen.

Yehova soo ér ior nav ve̱ hungur myem u yange un yima ve la ga. Nahan a kaa a ve ér: ‘Hanma inyom yô yaan nen kwaghyan ne kwa môm, er ne ye hen tugh mbun nahan.’ Ve yila kwaghyan u icivirigh la ér Paseka. Hen tugh mbura ortyom u Aôndo ‘aver kar’ ayou a i shighe awambe sha mi la.—Ekesodu 12:1-13, 24-27, 31.

Lu kwagh ne Yesu man mbaapostoli nav ve lu henen sha mi zum u ve lu yan kwaghyan u Paseka la ye. Mba been yô, Yesu er kwagh ugen u vesen. Kpa, cii man á er kwagh ne yô, i zenda Yuda, apostoli u banen a jighjigh u nan la due kera. Yesu maa tôô kpen bredi ken bredi u yange neer her la, er msen sha mi, maa coon kar mbahenen nav. Á kaa a ve ér: “Ngohol nen, ya nen.” Shi á kaa a ve ér: ‘Bredi ne tile sha iyol yam i me na sha ci wen shighe u me kpe yô.’

Yesu shi tôô iyongo i̱ wain u nyian. Shi er msen, gema na mbahenen nav, kaa a ve ér: “Ne cii ma nen shimi.” Á shi á kaa a ve ér: ‘Wain ne tile sha ityough ki awambe am. Shi ciôn tsô me har awambe am inya sha u yiman ne sha asorabo a en. Eren nen kwagh ne sha u umbur mo.’—Mateu 26:26-28; 1 Mbakorinte 11:23-26.

Ú umbur er Yesu kaa a mbahenen nav ér ve̱ eren kwagh ne sha u umbur un kpa?— Lu u vea kera yaan kwaghyan u Paseka la ga. Kpa kwa môm ken hanma inyom yô, vea gema a yaan kwaghyan u icivirigh ne sha u umbur ku u Yesu. Mba yer kwaghyan ne ér Kwaghyan u Ter u Aikighe. Se mba hembe yilan un ainge ser iniongo i Umbur ku u Ter. Sha ci u nyi?— Sha ci u ka i̱ umbur se kwagh u Yesu man Ter na Yehova Aôndo ve er sha ci wase la.

Bredi la una na se hen sha kwagh u iyol i Yesu la. Yange lumun u geman iyol la nan naagh a mi sha u se̱ zua a uma u tsôron yô. Man wain u nyian la di ye?— Wain la di una umbur se er awambe a Yesu a lu kwagh u injaa tsung yô. Awambe la hemba ngan a inja a awambe a waniyôngo u yange i er Paseka a mi ken Igipiti la ica je. Ú fa ityôkyaa kpa?— Bibilo kaa ér awambe a Yesu la aa na a fatyô u den se asorabo. Man a kar a asorabo ase kera cii yô, se kera gbaan angev ga, se beeyol kpaa ga, shi kpen kpaa se kpe ga. Shighe u se ze iniongo i Umbur ku u Ter la yô, doo u se hen sha kwagh ne.

Ka u hanmaor nana ya bredi la shi nana ma wain sha iniongo i Umbur ku u Ter laa?— Yesu kaa a mba ve ye bredi shon shi ve me wain la ér: ‘Ne lu a ci ken Tartor wam shi né tema sha mkônom ma torom vea mo sha kpaa.’ (Luka 22:19, 20, 30) Kwagh ne tese ér vea za lu utor sha vea Yesu imôngo. Nahan ka mba ve lu a ishimaverenkeghen i hemen sha vea Yesu imôngo la tseegh i gbe u vea ya bredi la shi vea ma wain la ye.

Nahan kpa, mba ve ye bredi la ga, shi ve me wain la ga kpaa gba u vea zaan iniongo i Umbur ku u Ter la. Ú fa ityôkyaa kpa?— Ityôkyaa yô, Yesu yange na uma na sha ci wase kpaa. Nahan aluer se za iniongo i Umbur ku u Ter la yô, se lu tesen sér kwagh la hungur se ga. Se umbur iyua i kpilighyol i Aôndo a ne se la.