Ka Nyi Aôndo A We Ishima u Eren sha Ci u Uumacee?

 1. Aôndo wa ishima ér uumace ve er nyi?

AÔNDO ngu a awashima u doon tsung sha ci u uumace. Yange gba Adam, nomsoor u hiihii la vea kwase na Ifa, ver ve ken sule u doon ashe. Awashima na yô, lu u ve mar ônov, shi ve gema tar cii u hingir paradiso, shi ve nengen sha annyamev kpaa.—Genese 1:28; 2:8, 9, 15; nenge Ngeren u Seer Tan Iwanger u sha 6, peeji 208.

 2. (a) Er nan ve se fe ser Aôndo una kure awashima naa? (b) Ka unô Bibilo i kaa ér vea lu uma gbem sha wono?

² U hen wer a tsa nahan se lu ken paradiso sha won je kpa? Yehova kaa a vese ér: “M vande veren ishima sha kwagh, shi Me er un kpaa.” (Yesaia 46:9-11; 55:11) Nahan una kure awashima na kpee, ma kwagh môm una yange un ga. Yehova kaa ér un gba tar sha ityôkyaa je. A “gba u er u̱ lu gbilin dang ga.” (Yesaia 45:18) A soo ér ior ve lu hanma ijiir cii sha tar. Ka unô nahan Yehova a soo ér ve lu sha tar nee, man a soo ér ve lu i kuma shighe nena? Bibilo kaa ér: ‘Mbaperapera [shin mbaungwan imo i Aôndo] vea ya dyako u tar, vea lu ken u gbem.’—Pasalmi 37:29; Mpase 21:3, 4.

 3. Er uumace ve gbe angev shi ve kpen yô, alaghga u pine wer nyi?

³ Kpa nyian ne ior ka ve gba angev shi ve kpe. Sha ajiir agen kpishi, ior mba nôngon num shi wuan ayol a ve. Mimi je ka kwagh u Aôndo yange wa ishima ne ga. Alaghga u pine wer, ka nyi i ne ve kwagh a lu nahana? Ka Bibilo tseegh ia fatyô u pasen se kwagh ne ye.

4, 5. (a) Lu an nan nyôr ken iyô nan lam a Ifa ken sule u Edene? (b) Or u eren kwagh sha mimi nana fatyô u hingir ormbaiv nena?

⁴ Bibilo kaa a vese ér Aôndo ngu a orihyom, mba “yer un er Diabolo man shi Satan.” Satan yange nyôr ken iyô, za ôr kwagh a Ifa ken sule u Eden. (Mpase 12:9; Genese 3:1) Nahan lu inja er ka iyô la i lu lamen a Ifa yô.—Nenge Ngeren u Seer Tan Iwanger u sha 7, peeji 208.

⁵ Aôndo yange gba ortyom ugen ér a lu Satan Diabolo? Ei! Lu ortyom ugen u lu sha, zum u Aôndo lu eren ijiir i doon ashe shin tar sha ci u Adam man Ifa la yange va gema hingir Diabolo ye. (Yobu 38:4, 7) Yange er kwagh ne nena? Fa wer or u mimi kpa nana fatyô u geman hingir ormbaiv. Yange i mar nan je maa nan lu ormbaiv ga. Kpa va hii u saren nan u zuan a kwagh u a lu u nan ga yô. Nahan er nan zer henen sha kwagh shon yô, isharen i bo la lu hemban taver ken a nan. Ian ngi va dugh yô, maa nan ii kwagh shon. Nan eren nahan yô, nan hingir ormbaiv je.—Ôr Yakobu 1:13-15; nenge Ngeren u Seer Tan Iwanger u sha 8, peeji 210.

 6. Ortyom ugen yange gema hingir orihyom u Aôndo nena?

⁶ Lu kwagh u er ortyom la je la. Yehova yange gbe Adam man Ifa yô, kaa a ve ér ve mar ônov ve ‘iv tar.’ (Genese 1:27, 28) Alaghga ortyom la lu henen ér, ior mban cii ma i lu un ma ve lu civir ye, ma i lu Yehova ga! Er zer henen sha kwagh ne yô, isharen i zuan a kwagh u a lu sha ci u Yehova tseegh la lu hemban taver a taver ken a na cii. Ortyom la soo ér uumace ve civir un. Nahan a tsugh Ifa shi a bume un. (Ôr Genese 3:1-5.) Kape ortyom ne yange hingir Satan Diabolo, orihyom u Aôndo je la.

 7. (a) Adam man Ifa yange ve kpe sha ci u nyi? (b) Er nan ve ka se bee iyol shi se kpe?

⁷ Adam man Ifa yange ve hemba Aôndo ato ve ya atam a kon la. (Genese 2:17; 3:6) Lu isholibo je ve er Yehova ye, nahan shighe kar yô, ve kpe vough er Yehova vande ôron nahan. (Genese 3:17-19) Ônov mba Adam man Ifa kpa lu mbaasorabo, nahan ve kpe. (Ôr Mbaromanu 5:12.) Nenge ase ikyav i ia wase se u fan er yange hii ve ônov mba Adam man Ifa kpa ve lu mbaasorabo yô. Tôô ase wer u ngu tan akam a blôôku u a kôngor iyol ga yô. Hanma ikyamegh ki u te a mi cii yô, kia kôngor ga. Adam yange hembe Aôndo ato yô, a hingir orsholibo. Nahan er se lu ônov mba Adam yô, se cii se mba mbaasorabo, er un nahan. Shi er se cii se lu mbaasorabo yô, ka se bee iyol shi se kpe.—Mbaromanu 3:23; nenge Ngeren u Seer Tan Iwanger u sha 9, peeji 210.

8, 9. (a) Ka nyi Satan yange soo ér Adam man Ifa ve na jighjigh a mini? (b) Er nan ve Yehova yange tim mbahembanato mbara her ave ave ga?

⁸ Satan yange hii u hendan kwagh a Yehova shighe u mee Adam man Ifa ve hemba Aôndo ato la. Yange soo ér Adam man Ifa ve na jighjigh ér Yehova ka oraie, shi ka orhemen u bo, u a soo u nan ve kwagh u dedoo ga yô. Satan yange lu kaan ér saa Aôndo una tese uumace kwagh u vea er ga, shi Adam man Ifa mba a ian i eren kwagh u ve nenge i doo ve la cii. Ngun nahan Yehova una er nena? Yange una soo yô, ma tim mbahembanato mbara, nahan ma bee a ihyembeato ve la. Kpa kwagh la ma tese ér Satan ka oraie je he? Ei, ma tese ga.

⁹ Sha nahan yô, Yehova tim mbahembanato mbara her ave ave ga, kpa de ér uumace ve hemen ayol a ve shighe a kar. Kwagh ne yange tese ér Satan ka oraie shi Yehova fa kwagh u a hemba doon sha ci u uumace yô. Se va seer timen sha kwagh ne ken Ityough ki sha 11. Kpa u nenge kwagh u Adam man Ifa yange ve tsua u eren la nena? Yange ve na Satan jighjigh ve gema ve hemba Aôndo ato nahan, lu shamii? Lu Yehova na Adam man Ifa hanma kwagh u ve lu a mi cii ye. Yange na ve uma u vough man ijiir i doon ashe, kua tom u nan ve msaanyol. Kpa Satan yô, ma shighe môm kpa er ve kwagh u dedoo ga. I lu we nahan, yange ma u er nena?

10. Ka ian i vesen i nyi hanmô wase nan lu a mini?

¹⁰ Nyian kpa hanmô wase nan ngu a ian i eren kwagh u nan nenge i doo nan yô, kpa ka kwagh u se tsough u eren la una na se uma shin una na se ga ye. Se fatyô u ungwan imo i Yehova ser ka Tor wase shi tesen ser Satan ka oraie. Shin se fatyô u tsuan ser Satan a lu tor wase. (Pasalmi 73:28; ôr Anzaakaa 27:11.) Ka ior kpuaa tseegh shin tar ne ve ongo imo i Aôndo ye. Jighilii yô, ka Aôndo a lu tor u tar ne ga. Kpa aluer ka Aôndo ga yô, gema ka ana?

11, 12. (a) Kwagh u yange Satan kaa a Yesu ér una na un ityartor i sha won cii la tese se nyi? (b) Ka avur a Bibilo a han a tese ér ka Satan a lu hemen tar nee?

¹¹ Yesu yange fa or u nan lu hemen tar ne la jighilii. Sha shighe ugen la, Satan “tese Un ityartor i sha won cii kua icivir i i.” Satan kaa a na ér: “Akaa ne cii me na U, aluer Wea gure inya, Wea civir mo yô.” (Mateu 4:8, 9; Luka 4:5, 6) Pine ase iyol you wer, ‘ityartor ne ia lu i Satan ga nahan, yange ma kaa ér una na Yesu je he?’ Ei. Ugomoti mba tar ne cii ka mba Satan.

¹² Alaghga u pine wer: ‘Satan ka tor u tar ne nena? Ka Yehova a lu Aôndo u hemban shi a gbe tar cii gaa?’ (Mpase 4:11) Een, ka un, kpa Yesu yila Satan ér “tor u tar ne.” (Yohane 12:31; 14:30; 16:11) Apostoli Paulu kpa yila Satan Diabolo ér, “aôndo u tar u ainge ne.” (2 Mbakorinte 4:3, 4) Shi apostoli Yohane kpa nger ér, “tar cii ngu sha ikyev i Orbo.”—1 Yohane 5:19.

13. Sar se u tar u he u va sha ci u nyi?

¹³ Tar ne ngu vihin gban a gba kera. Hanma ijiir sha tar nyian yô, ityav mbi, kua anyighe man atseregh man ipila. Uumace vea er nan nan kpa vea fatyô u karen a mbamzeyol mban kera ga. Kpa shi cuku tsô Aôndo una tim iferkwagh sha tar ne kera zum u una va a ityav mbi Armagedon la, shi una gema u ua hingir tar u he u perapera.—Mpase 16:14-16; nenge Ngeren u Seer Tan Iwanger u sha 10, peeji 210.

14. Ka an Aôndo a tsough nan ér nana lu Tor u Tartor Na? Bibilo yange tsengaôron kwagh u Yesu ér nyi?

¹⁴ Yehova tsua Yesu Kristu ér a lu Tor u gomoti Na shin Tartor u sha. Bibilo tsengaôron anyom dubu imôngo ken ijime ér Yesu una lu “Wantor u Bem,” shi gomoti na una kar kera mayange ga. (Yesaia 9:6, 7) Yesu yange tese mbahenen nav u eren msen sha kwagh u gomoti ne kaa ér: “Tartor Wou u̱ va, i̱ er ishima You shin tar kpaa vough er i eren i Sha nahan.” (Mateu 6:10) Ken Ityough ki sha 8 la, se va fa er Tartor u Aôndo ua kar a ugomoti mba tar ne cii kera ve, ua kar a hemen tar yô. (Ôr Daniel 2:44.) Hen shighe la, Tartor u Aôndo ua gema tar ua hingir paradiso u doon ashe tsung.—Nenge Ngeren u Seer Tan Iwanger u sha 11, peeji 211.

15. “Tar u he” la ka nyi?

¹⁵ Bibilo kaa ér: “Se mba keghen Usha mba hev je man tar u he u perapera una tema ker yô.” (2 Peteru 3:13; Yesaia 65:17) Ashighe agen Bibilo ka ia ôron kwagh u “tar” yô, i lu ior mba ve lu sha tar la. (Genese 11:1) Sha nahan yô, “tar u he” u perapera la ka ior mba ungwan imo i Aôndo, mba Aôndo a ver ve doo doo yô.

16. Ka iyua i doon i nyi Aôndo una na mba vea lu ken tar u he laa, man ka nyi i gbe u se er keng ve se zua a iyua shono?

¹⁶ Yesu tôndo zwa ér mba vea lu ken tar u he u Aôndo la cii vea zua a iyua i “uma u tsôron.” (Marku 10:30) Ka nyi se er ve se zua a iyua nee? Ôr Yohane 3:16 man 17:3 tsô u zua a mlumun. De se nenge er Bibilo i kaa ér uma una va lu ken paradiso shin tar yô.

17, 18. Er nan ve se fe ser bem una lu hanma ijiir sha tar cii shi kwagh u tan se mciem iyol una kera lu ga?

¹⁷ Iferkwagh, ityav man ipila kua tswam a kera lu ga. Iferor môm kpa nana kera shi sha tar ga. (Pasalmi 37:10, 11) Aôndo una er ‘ityav mbia bee zan zan a ar hen ikighir i tar je.’ (Pasalmi 46:9; Yesaia 2:4) Tar ua iv a ior mba Aôndo a doo ve ishima shi ve soo u civir un yô. Bem una lu sha tar gbem sha won.—Pasalmi 72:7.

¹⁸ Ior mba Yehova vea tema bem bem. Sha ayange a i ngeren Bibilo la, Mbaiserael yange vea ungwa imo i Aôndo yô, a kura ve. (Levitiku 25:18, 19) Ken tar u he la, kwagh u tan se mciem iyol môm kpa una kera lu ga. Se tema bem bem!—Ôr Yesaia 32:18; Mika 4:4.

19. Er nan ve se fe ser kwaghyan una lu kpishi ken tar u he u Aôndo una va a mi laa?

¹⁹ Kwaghyan una lu sha tar kpishi. “Iyiav mbi̱ ngee shin tar sha ityouv mbi iwoov je kpaa, asagher a mbi a̱ hingir war war.” (Pasalmi 72:16) Yehova “Aôndo wase, Una ver se doo doo,” shi ‘inya ia mende iyiav dedoo.’—Pasalmi 67:6.

20. Er nan ve se fe ser tar cii ua va hingir paradiso?

²⁰ Tar cii ua hingir paradiso. Ior vea lu a uya mba doon ashe kua ishule i dedoo. (Ôr Yesaia 65:21-24; Mpase 11:18.) Tar cii ua doo ashe er sule u Eden la lu nahan. Yehova una na se hanma kwagh u kwagh a gbe se a mi cii. Bibilo kaa ér: “U bugh uwegh Ough, U ne hanma kwagh u uma sha isharen na, ka kom un.”—Pasalmi 145:16.

21. Er nan ve se fe ser uumace vea va lu ken bem vea annyameva?

²¹ Uumace man annyamev vea lu ken bem. Annyamev vea kera eren uumace kwagh ga. Shighe la, mbayev mba kiriki vea lu vea annyamev mba ka ve eren tswam ne je kpa, vea kera er ve kwagh ga.—Ôr Yesaia 11:6-9; 65:25.

22. Yesu una va er a mba kwagh a nyoon ve la nena?

²² Kwagh a kera nyoon or ga. Shighe u Yesu lu shin tar la, yange bee ior kpishi angev. (Mateu 9:35; Marku 1:40-42; Yohane 5:5-9) Kpa er Yesu a lu Tor u Tartor u Aôndo hegen yô, ica a gba ga tsô una bee ior cii angev. Ma or a kera kaa ér: “Kwagh nyoon mo, ga.”—Yesaia 33:24; 35:5, 6.

23. Aôndo una va er a mbakpenev nena?

²³ A nder mbakpenev shin ku. Aôndo tôndo zwa ér una va nder ior umiliôn imôngo mba ve kpe la shin ku. “Mbaperapera kua mba ve lu perapera ga vea nder shin ku.”—Ôr Yohane 5:28, 29; Aerenakaa 24:15.

24. U nenge kwagh u va lun uma ken Paradiso shin tar la nena?

²⁴ Gba u hanma wase nana tsua kwagh u nan soo u eren la. Se mba a ian i aluer se soo yô, se tsua u henen kwagh u Yehova shi civir un, shin sea soo ga yô, se tsua u gban eren kwagh u a doo se tsô. Kpa aluer se tsua u civir Yehova yô, se va zua a kwagh u doon tsung ken hemen. Zum u orgen kaa a Yesu ér a umbur un shighe u una kpe yô, Yesu tôndo zwa a na ér: “Ú lu a Mo imôngo ken Paradiso.” (Luka 23:43) De se seer timen sha kwagh u Yesu Kristu, shi se fa er una va kure uityendezwa mba doon tsung mba Aôndo a er la yô.