Er I Eren Kwagh ken Tiônnongo Yô

Yehova ka Aôndo u a eren kwagh nzughul nzughul ga yô. (1 Mbakorinte 14:33) Nahan ior nav kpa mba eren kwagh nzughul nzughul ga. Mba eren kwagh ken tiônnongo u Kristu sha inja sha inja nena? Se sue gbenda u tiônnongo a eren kwagh la nena?

1. Ka an nan hemen tiônnongo?

Ka “Kristu a lu ityough ki tiônnongo” ye. (Mbaefese 5:23) Yesu ngu sha, nahan kpa ngu nengen sha hanma kwagh u ior mba Yehova ve eren shin tar cii. Yesu tsua “wanakiriki u jighjigh man u fan kwagh,” ka annongo u mbatamen mba ve vie ken jijingi tsembelee yô. Mba yer ve kpaa ér, Mbahemenev mba Shin Itine. (Ôr Mateu 24:45-47.) Mbahemenev mba Shin Itine mban ka ve tese ior mba Yehova sha tar cii kwagh u vea er yô, er mbaapostoli man mbatamen mba ken Yerusalem kpa eren nahan. (Aerenakaa 15:2) Nahan kpa, ka ve ve lu ityough sha nongo wase ga. Ka ve suur sha Yehova ér a hemen ve, shi ve dondon Mkaanem nam kua hemen u Yesu.

2. Ka unô ve lu mbatamen man ka nyi tom ve erene?

Mbatamen ka nomso mba ve lu Mbakristu mba ve vie ken jijingi yô. Mba tesen ior mba Yehova shi mba wasen ve shi mba taver ve asema ken Bibilo. Mba kimbin ve inyaregh sha tom u ve eren la ga. Kpa mba ‘eren u a ishima i dedoo sha ishigh ki Aôndo; ka sha ci u keren mtsera u sha anyighe ga, kpa ka i maa ve iyol u eren nahan.’ (1 Peteru 5:1, 2) Nomso mba i yer ve ér mbashiren tiônnongo la di mba wasen mbatamen tom, shi shighe ka una karen yô, ve kpa ve kuma u lun mbatamen.

Mbahemenev mba Shin Itine ka ve tsua mbatamen mbagenev ve ver ér ve lu mbatamen mba sôron atôônanongo. Ka ve sôr atôônanongo kposo kposo, ve tesen anmgbianev shi ve taver ve asema. Ka ve nenge sha aeren a Bibilo i tese ér or a lu a mi ve nana kuma u lun ortamen shin orshiren tiônnongo la, nana kuma yô ve ver nan.—1 Timoteu 3:1-10, 12; Titu 1: 5-9.

3. Ka ian i nyi hanma Orshiada u Yehova nan lu a mini?

Hanma or ken tiônnongo nan ngu a ian i ‘wuese iti i TER’ sha u nan mlumun ken mkombo gayô eren asaimenti shin nan kwaghôron shin wan icam shin pasen loho u dedoo er nan fetyô la.—Ôr Pasalmi 148:12, 13.

HEN KWAGH I ZA SHIMI

4. Yesu ka orhemen u eren kwagh kundu kundu

Yesu kaa a vese ér se va hen a na. Ôr Mateu 11:28-30, maa lam nen sha mpin ne:

• Ka nyi orhemen nahan Yesu a lu, man a soo ér se nenge hemen na nena?

VIDIO: Mbatamen Na Iwasen Shighe u Tar Tenger ken Tar u Nepal La (4:56)

Bibilo tese wang er i gbe u mbatamen vea er tom ve yô.

Ôr Yesaia 32:2 man 1 Peteru 5:1-3, maa lam nen sha mbampin mban:

• Er u fe wer mbatamen ka ve nôngon ér vea na mbagenev mmem er Yesu nahan yô, ka u ken ishima nena?

• Ka igbenda igen i nyi nahan mbatamen ve dondon ikyav i Yesu?

5. Mbatamen ka ve ver mbagenev ikyav i dedoo

VIDIO: Mbatamen Lu Nen ken Hemen! (7:39)

Yesu ver mba ve hemen ken tiônnongo la ikyav. Ôr Mateu 23:8-12, maa lam nen sha mpin ne:

• Ka nyi i doo u sha gbenda u Bibilo i pase akaa a i gbe u mbatamen vea eren la, man kwagh u u nengen mbahemenev mbakwaghaôndo ve eren laa?

1. Mbatamen ka ve ya ijende a Yehova kôôsôô shi ve wase tsombor ve u lun a Na kôôsôô

2. Mbatamen mba nengen sha hanma or ken tiônnongo

3. Mbatamen mba gbe uwer u pasen kwagh ga

4. Mbatamen ka mbatesen. Shi ka ve wase u nengen sha Iyou i Tartor shi ve eren ityom igen

6. Se fatyô u eren kwagh ken mzough vea mbatamen

Bibilo pase se ityôkyaa i vesen i i ne ve i gbe u se eren kwagh ken mzough vea mbatamen yô. Ôr Mbaheberu 13:17, maa lam nen sha mbampin mban:

• Er nan ve Bibilo i kaa ér se ungwan imo i mba ve hemen se la, i de lu er i kighir se a kighir ga? Er nan ve u ôr nahana?

Ôr Luka 16:10, maa lam nen sha mpin ne:

• Gba u se ungwan imo i mbatamen kua sha akaa a kiriki je kpaa sha ci u nyi?

KA NYI U HENE?

Ka Yesu a lu orhemen u tiônnongo ye. Se mba eren kwagh ken mzough vea mbatamen mba Yesu a lu eren tom a ve la saan saan sha ci u mba eren kwagh a vese kundu kundu shi ve ver se ikyav i dedoo.

Mbampin mba umbur kwagh u i hen yô

• Ka an nan lu orhemen u tiônnongo?

• Mbatamen ka ve wase mba ken tiônnongo nena?

• Ka ian i nyi hanma or u civir Yehova nan lu a mini?

SEER HENEN KWAGH

Nenge ikyav i i tese ér kwagh u Mbakristu gba Mbahemenev mba Shin Itine man mbatamen ishima nyian kpishi yô.

Er I Taver Anmgbianev Ishima Shighe u I Cir Tom Wase Yô (4:22)

Hen kwagh u tom u mbatamen mba sôron atôônanongo ve eren yô.

Uma u Ortamen u Sôron Atôônanongo u ken Agar (4:51)

Nenge tom u injaa u kasev ve eren ken tiônnongo yô.

“Mbashiada mba Yehova mba a Kasev ken a Ve Mba Ve Lu Mbatesen Yôô?” (Iyoukura, Oktoba 1, 2012)

Nenge er mbatamen ka ve er tom kpoghuloo u taver mba ve civir Yehova a ve la ishima yô.

“Mbatamen mba ken Kristu Ka ‘Mba Eren Tom a Vese Imôngo sha ci u Sé Ember Yô’” (Iyoukura, Janawari 15, 2013)