ITYOUGH 58
Za Hemen u Civir Yehova sha Mimi
Mbakristu mba mimi mba lumun ér or môm shin ma kwagh ugen a yange ve u civir Yehova ga. Se na jighjigh ser we kpa kape i lu u je la. Ka wea civir Yehova sha mimi nahan i doo un kpen kpen. (Ôr 1 Kroniku 28:9.) Ka akaa a nyi nahan alaghga u tagher a mi ve a taver we u civir un sha mimi, man ka nyi ia fatyô u wasen we?
1. Alaghga mbagenev vea na a taver se u civir Yehova sha mimi nena?
Ior mbagen vea nôngo ér vea yange se, se de u civir Yehova. Ka unô vea er imba kwagh la nahana? Mbagen mba ve de u civir Yehova yô, ka ve ôron akaa a aiegh sha nongo na sha ci u ve soo ér se de kera ne Yehova jighjigh ga. Mba yer ve ér mbavendan mimi. Shi mbahemenev mba kwaghaôndo mbagen ka ve wa se mbaaie iyol sha er vea tsugh mbacivir Yehova mbagen ve de u civir un yô. Mayange doo u se za nyôr kwaghnyiman a mba ve hendan a vese la, shin se ôron ityakeda ve shin akaa a ve ngeren sha Intanet gayô zan hen ajiir a ve bugh sha Intanet la shin nengen uvidio vev ga. Yesu yange ôr kwagh u mba ka ve nôngon ér iyol i kpe se, se de u civir Yehova sha mimi la ér: “Kwagh a de gbe ne a ve ga. Ka mbaapirashe mba hemen ior gbenda. Man aluer orapirashe hemen orapirashe ugen gbenda yô, ve cii vea za gba shin ihyungwa.”—Mateu 15:14.
2. Ka akaa a se tsough u eren a nyi nahan alaghga aa na a taver se u civir Yehova sha mimi?
Yehova ka una doo se ishima yô, se palegh hanma kwagh u a gbe a zough a kwaghaôndo u aiegh cii. Gba u tom u se eren shin mbamzough mba se lu ker shin akaa a se eren cii aa biishi a kwaghaôndo u aiegh ga. Yehova kaa a vese ér: “Due nen ken [Zegebabilon] kera, ior av.”—Mpase 18:2, 4.
HEN KWAGH I ZA SHIMI
Hen fa kwagh u u er ve u de wer or môm nana na iyol i kpe u, u de u civir Yehova sha mimi ga yô. Shi nenge er u tese wer u ngu civir Yehova sha mimi sha u duen ken Zegebabilon kera yô.
3. Wa ikyo sha kwagh u mbatesen mbaaiev
Shighe u se ongo ior ve lu ôron akaa dang sha nongo u Yehova yô, ka nyi i doo u se ere? Ôr Anzaakaa 14:15, maa lam nen sha mpin ne:
Er nan ve i doo u se na jighjigh a hanma kwagh u se ongo cii ga?
Ôr 2 Yohane 9-11, maa lam nen sha mbampin mban:
Doo u se eren kwagh a mbavendan mimi nena?
Aluer se mba lamen a mbavendan mimi jighilii ga kpa, se fatyô u asegh sha atesen a ve nena?
U hen wer aluer se mba keghen ato ungwan akaa a dang a ior ve lu ôron sha Yehova man nongo na nahan, a lu un nena?
4. Za hemen u civir Yehova sha mimi shighe u anmgbian nan er isholibo je kpaa
Aluer anmgbian u ken tiônnongo nan er isholibo i vesen man se fa kwagh sha mi nahan, ka nyi i gbe u se ere? Nenge ase kwagh u se fatyô u henen ken Atindi a Aôndo yange wa Mbaiserael ne. Ôr Levitiku 5:1.
Er i pase ken ivur la nahan, shighe u or nan er isholibo i vesen man se fe kwagh sha mi yô, gba u se ôr mbatamen kwagh u se fe la. Nahan kpa, cii man se ôr ve yô, hemba doon u se vande kaan a or u nan er isholibo la ser nana za pase mbatamen isholibo i nan er la. Kpa aluer nan za ôr ga yô, gba u se tese ser Yehova hemba doon se ishima, nahan se za ôr mbatamen kwagh shon. Aluer se er kwagh nahan yô, kwagh la una tese ér mimi je . . .
Yehova Aôndo doo se ishima nena?
or u nan er isholibo la nan doo se ishima nena?
mbagenev ken tiônnongo doo se ishima nena?
Aluer anmgbian nan nyôr ken zayol yô, wase nan!
5. Palegh Zegebabilon
Ôr Luka 4:8 man Mpase 18:4, 5, maa lam nen sha mbampin mban:
Iti yam ngi ken ma nongo u kwaghaôndo u aiegh here?
M ngu ken ma mzough u a biishi a ma nongo u kwaghaôndo ugen yôô?
Tom u m eren la ngu suen kwaghaôndo u aiegh sha ma gbenda?
Akaa agen nga a m eren ken uma wam a a biishi a kwaghaôndo u aiegh a i gbe u me palegh yôô?
Aluer m na ikyar sha ma mpin heen mer een yô, ka nyi i gbe u me ere?
Nyityôkwagh i u lu eren cii, i lu kwagh u una na u lu a imoshima i wang shi una tese ér Yehova doo u ishima sha mimi yô.
Aluer i kaa ér u er iyua i suen ma mzough u kwaghaôndo sha er a wase mbaatsanev nahan u er nena?
IOR MBAGENEV KA VE KAA ÉR: “M soo u fan kwagh u mbavendan mimi ve ôron sha Mbashiada mba Yehova la sha er me paase mimi iyol yô.”
Doo u eren kwagh nahana? Er nan u ôr nahana?
KA NYI U HENE?
Gba u se palegh u lun imôngo a mba ka ve soo ér vea tsume a vese la ve se za hemen u civir Yehova sha mimi ye.
Mbampin mba umbur kwagh u i hen yô
Er nan ve i doo u se ungwan akaa a mbavendan mimi ve ôron la ga?
Aluer anmgbian nan er isholibo i vesen man se fa yô, ka nyi i doo u se ere?
Se dondo kwaghwan u i kaa ér se due ken kwaghaôndo u aiegh kera la nena?
SEER HENEN KWAGH
Hen fa kwagh u u er shighe u mbagenev ve lu ôron akaa a aiegh sha Mbashiada mba Yehova yô.
“U Fa Mimi u Kwagh Shon Kuma U Kpa?” (Iyoukura, Agusutu 2018)
U er nan ve u fa mbamzough shin akaa a ior ve eren u suen Zegebabilon laa?
“Eren Tom Kpoghuloo ken Mkur u ‘Ayange a Masejime’ Ne” (Iyoukura, Oktoba 2019, ikyumhiange 16-18)
Ka nyi mbaahendanev mbagen ve er sha er vea nôngo jighjigh wase a de kera taver ga?
Ôr ngeren u “M Hii u Keren Aôndo Shighe u M Lu Iyev la Je,” nahan nenge er pristi u kwaghaôndo u Shinto yange due ken kwaghaôndo u aiegh kera yô.