Mbatamen—Tese Nen Mbagenev u Tôôn Ikyav

KEN atôônanongo a Mbashiada mba Yehova sha tar cii, hingir torough torough u zuan a ior mba vea fatyô u eren tom u orkuran yô. Atôakaa nga atar á a ne ve kwagh ne a lu nahan yô.

Hiihii yô, Yehova ngu ivin ityendezwa i̱ a er wener una ‘gema u hemban ndahar a̱ hingir ikurior i ageegh’ la. (Yesaia 60:22) Ken anyom atar a a sember karen ne, i er mbahenen mbahev batisema je zulum er miliôn môm nahan, ve hingir Mbashiada mba Yehova, sha mhôônom ma zungwen ma Yehova. Kwagh gba sha ior mba ve kom u vea wa ikyo sha mba i sember eren ve batisema mban sha u vea vese vea hingir Mbakristu mba vian yô.—Mbaheberu 6:1.

Kwagh u sha uhar yô, mbagen mba ve er tom u mbatamen upuembaanyomov imôngo pande ikyav mbi ve tee ken tiônnongo la sha ci u iyolbeen shin angev.

Kwagh u sha utar yô, mbatamen mba ken Kristu kpishi mba ve lu a ishimatseen ne mba eren tom a Kômatii mba Wasen sha Kwagh u Iyouci man Kômatii mba Nengen sha Tom Kwaghmaan hen Haregh shin Kômatii mba Iyou i Mkohol. Ashighe agen yô hingir kpee u vea pande ityom igen i ve eren ken tiônnongo ve la vea na mbagenev, sha er ikyav a yuhwa ve aza gande ga yô.

A kure gbayol u a hingir torough torough u ma i̱ zough a ior mba ve kom tsema tsema ne nena? Kwagh u vesen yô ka ityesen. Bibilo wa mbakuran mba ken Kristu kwagh ér ve̱ tese “ior mba ve lu jighjigh mba vea kuma u tesen mbagen kpaa yô.” (2 Timoteu 2:2) Sha kwagh u takerada u pasen asemberakaa ugen u er yô, ishember i pasen ieren i̱ i kaa ér “u tesen” ne, inja na yô ka “u ôron or kwagh shin eren kwagh sha ishigh ki nan, sha er nana fa kwagh shon, shi nana kôr cio u eren un yô.” De se nenge nen er mbatamen vea fatyô u tesen mbagenev mba ve kom yô.

Dondo Nen Ikyav i Yehova La

Sha mimi yô, er Yesu Kristu yange kuma sha tom na la shi er ú tsembelee nahan, ka kwagh u kpilighyol ga! Ka Yehova Aôndo iyol na yange tese un ye. Ka nyi man nyi yange i̱ na ve ityesen ne za voughloo? Yesu yange ter atôakaa atar, e̱r i nger ken Yohane 5:20 nahan, ér: “Wan [1] doo Ter ishima, shi [2] tesen Un akaa a A eren iyol Na la cii; man [3] ityom i i hembe ingin je kpaa Una tese Un.” (Ka se se nger i yier ye.) U henen sha atôakaa ne seer seer la, una na se mkav sha kwagh u ityesen.

Ver ishima wer Yesu hii kaan wener: “Wan doo Ter ishima.” (Ka se se nger i yier ye.) Hii sha ayange a igbetar la je, mlu u kangenaa ngu hen atô u Yehova man Wan na. Anzaakaa 8:30 ta iwanger sha mlu ve ne, ér: “Shighe la, [mo Yesu] m lu vea Na [Yehova Aôndo], er or u fan tom nahan, hanma iyange m lu saan saan gbem, m lu ember sha ishigh Nagh gbem.” (Ka se se nger i yier ye.) Yesu yange lu a akpelan ken ishima mayange ga, a fa dedoo ér “saan” Yehova iyol a na. Shi Yesu yange yer iember i yange zua a mi sha u eren tom vea Ter na imôngo la kpaa ga. Mbatamen mba ken Kristu ka vea lu vea mba ve lu tesen ve mbara doo doo shi vea lamen a ve gbar gbar nahan, ka i doo kpishi!

Yesu shi ter ityôkyaa i sha uhar ér, Ter “tesen Un akaa a A eren iyol Na la cii.” (Ka se se nger i iyier ye.) Mkaanem man ma pase kwagh u i nger ken Anzaakaa 8:30 la vough, ér Yesu “lu vea” Yehova zum u lu gban sha man tar la. (Genese 1:26) Mbatamen vea fatyô u dondon ikyav i doon tsung ne sha u eren tom vea udiakon imôngo, shi tesen ve u eren ityom i í ne ve la sha inja kpaa. Nahan kpa, ka mba i sember veren ve diakon la tseegh i gbe u a za hemen u tesen ve ga. Gema anmgbianev mba jighjigh mba ve zer keren ér ma ve lu mbakuran, i kom anyom imôngo hegen, kpa i lu a̱ wa ve tom shon sha ikyev ga ne di ye? (1Timoteu 3:1) Mbatamen ve̱ wa ambaaior ne kwagh jighilii sha er vea fa ian i í gbe u vea nyôôso yô.

Ikyav i tesen yô, alaghga diakon nana gbaan inya sha tom u i ne nan la ga, shi nana zaan pe i gbe u a kumba la faa hanma shighe cii, shi nana waan ikyo sha ityom i í ne nan la kpaa. Shi alaghga nana fa ityesen kpaa. Alaghga nana lu eren ityom i injaa ken tiônnongo sha igbenda kpishi je. Nahan cii kpa, alaghga nana kera kav er nan eren a mba ve lu Mbakristu a nan imôngo mbara nyang nahan ga. Doo u mbatamen vea lu a “ishima i legh legh i i lu a kwaghfan la.” (Yakobu 3: 13) A lu kwagh u dedoo kpishi aluer ortamen nan lam a diakon la, nan pase nan kwagh u a shi la vough vough, shi nana̱ tese nan akav jighilii, shi nan due a mbamhen mba diakon la nana dondo ve nana zua a zakera gaa? Aluer ortamen la nan kundu ishima nan ‘wa bar sha kwaghwan’ u nan la yô, or u i we nan kwagh la kpa a taver u nana̱ hure kera. (Mbakolose 4:6) Sha mimi yô, diakon la nana lu heghem ortamen la tom aluer nan ngohol kwagh u i we nan cii sar sar man a ishima i gbar gbar kpaa yô.—Pasalmi 141:5.

Ken atôônanongo agenegh yô, mbatamen mba zan hemen u tesen udiakon ityesen i injaa her. U tesen ikyav yô, ka vea zaan u za sôron mbauange shin mba beenyol yô, ve za vea udiakon mba ve vie mbara imôngo. Nahan udiakon mban kpa ve seer zuan a mfe ken tom u kuran ilev ne. Sha mimi yô, akaa nga kpishi a diakon nana fatyô u eren sha u vesen ken jijingi yô—Nenge ken akwati u a lu shin heen, u a lu a itinekwagh ér, “Kwagh u Udiakon Vea Fatyô u Eren La.”

Kwagh u sha utar u yange na ve ityesen i Yehova yange tese Yesu la i lu a inja yum yô, ka sha ci u Yehova yange tese un kua mzehemen u ken hemen la kpa sha mi. Yesu yange ôr kwagh u Ter na kaa wener ngura una tese Wan “ityom i i hembe ingin kpaa.” (Ka se se nger i yier ye.) Mfe u yange Yesu zua a mi zum u a lu shin tar ne la yange wase un u maan aeren a aa wase un ken ityom na i ken hemen yô. (Mbaheberu 4:15; 5:8, 9) U tesen ikyav yô, ica a gba ga tsô Yesu una ngohol zege tom—u nderen ior ubiliôn imôngo mba ve lu kpenev hegen la, shi ôron ve ijir kpaa!—Yohane 5:21, 22.

Nyian kpa, zum u mbatamen ve lu tesen udiakon yô, ve̱ lu a ugbayol mba vea va ken hemen la ken ishima. Shin er alaghga a lu inja er mbatamen man udiakon ban mba vea nenge sha ugbayol mba ve lu hegen ne ga nahan kpa, shi kwagh a lu nahan zum u i tím tiônnongo u he kpa? Man zum u i tím atôônanongo a he imôngo di ye? Ken anyom atar a a sember karen ne atôônanongo a he yange hemba 6, 000 sha tar cii. Nenge imba er kwagh a gbe sha mbatamen man udiakon kpishi mba vea nenge sha atôônanongo a he ne sha wono!

Mbatamen, ne mba kaven Yehova sha u maan mlu u kangenaa vea ior mba ne lu tesen ve la kpa? Ne mba tesen ve er vea er tom ve kpa? Ne mba umbur ugbayol vev mba vea va va ken hemen la kpa? Aluer ne dondo gbenda u Yehova yange tese Yesu la yô, ior kpishi vea zua a mtsera.

De Cian u Nan Mbagenev Ityom Ga

Alaghga a taver mbatamen mba fan tom tsema tsema mba ve zer eren ityom i vesen kpishi i hoghol ve yô u wan mbagenev tom sha ikyev. Alaghga yange ve vande wan mbagenev ityom sha ikyev, kpa gba sha mi ga. Sha nahan yô, alaghga vea lu kaan ken ishima ve ér, ‘aluer ú soo wer i̱ er tom sha inja yô, guda er ú iyol you.’ Kpa imba ieren ne i̱ zua sha ishima i Yehova u ior mba mfe a yen ve mbara ve̱ ngohol ityesen hen mba ve hembe lun a mfe la, er i nger ken Ruamabera nahan kpa?—2 Timoteu 2:2.

Yange vihi Paulu kpishi zum u Yohane Marku u lu môm ken mba ve lu zenden sha vea na imôngo la, za undu tom na ken Pamfilia hide yem ken ya yô. (Aerenakaa 15:38, 39) Nahan cii kpa, Paulu de̱ ér mgbejime la a̱ va un a iyolkpen, una de u tesen mbagenev ga. Yange tôô gumor ugen, anmgbian Timoteu, tese un u eren tom mishen.a (Aerenakaa 16:1-3) Mbamishen mban mba za nyer ken gar u Berea yô, ve tagher a bo tôvacan u cieryol je yô, gande u Paulu una za hemen u lun ker. Tsô a undu tiônnongo u he la sha ikyev i Shila, anmgbian u vian tsema tsema u anyom na za naleghaa yô, man sha ikyev i Timoteu kpaa. ( Aerenakaa 17:13-15) Timoteu yange una hen kwagh sha ikyev i Shila kpishi je ka u henen a hen ga. Ken masejime, shighe u Timoteu kuma u seer nengen sha ityom igenegh kpaa yô, Paulu tindi un ken Tesalonika sha u a̱ za taver tiônnongo u ker la yô.—1 Mbatesalonika 3; 1-3.

Mlu u Paulu vea Timoteu yange lu u sha tom shon ga, shin lu u ndôhôr keghelee kpaa ga, shi lu u kemen iyol lun paleghaa kpaa je ga. Yange ve lu kangenaa, doo doo. Yange Paulu ngur ngeren washika u tindin a mi ken tiônnongo u ken Korinte la yô, a ôr kwagh u Timoteu shon u lu a awashima u tindin un ker la wener ka “wan wam u doon mo ishima man u jighjigh ken Ter kpaa.” A seer wener: “[Timoteu] una umbur ne igbenda i m lu zan sha mi ken Kristu Yesu la.” (1Mbakorinte 4:17) Timoteu yange dondo ityesen i yange zua a mi hen Paulu la, nahan a kuma u eren ityom na cii. Agumaior kpishi hingir udiakon mba fan tom tsema tsema, shin mbatamen, shin mbatamen mba zenden sha je kpaa, sha ci u mtsera u yange ve zua a mi ken ityesen i ve ngohol hen mbatamen mba agumaior ne doo ve ishima tsung, di er Timoteu yange doo Paulu ishima nahan yô.

Mbatamen, Tese Nen Mbagenev!

Kwaghôron u Profeti u ken Yesaia 60:22 la ngu ivin nyian je akperan nga ga. Yehova ngu geman ‘u hemban ndahar la hingir ikurior i ageegh.’ Aluer ka u ikurior la ia za hemen u lun i̱ “ageegh” yô, saa á sôr ve a ver vea lu gungur môm. Mbatamen, er nan ne ker igbenda i ne fatyô u seer tesen ior mba ve tsegha ayol man ve kom u ngohol í la ga? Ver ishima wer hanma diakon yô, nan fa ape i gbe u nana nyôôso iyol ve nana zua a zakera yô. Ne anmgbianev mba nomso mba ne er batisema mbara kpaa, aluer mba nan ne ityesen yô, de tee nen í wer wer ga. Yar nen tom a hanma ian i í due cii sha u seer mfetom wen man mkav wen kpaa. Yehova una na iveren sha imba iwasen i nan mbagen sha dooshima ne kpee je.—Yesaia 61:5.

[Footnote]

[Box on page 16]

Kwagh u Udiakon Vea Fatyô u Eren La

Er i doo u mbatamen vea na udiakon ityesen nahan kpa, akaa nga kpishi a udiakon vea fatyô u eren sha u seer zakera ve u ken jijingi yô.

—Udiakon ve̱ lu a ishimaveren shi ve wan ikyo sha ityom i í we ve sha ikyev la. Shi ve̱ maa ieren i henen kwagh dedoo la kpaa. Sha jighilii yô, mzehemen har sha kwaghhenen man myar u yaren tom sha kwagh u or nan hen la.

—Zum u diakon nan we ago u nan kwaghôron ken mkombo u Mbakristu yô, nana̱ de ngôôr u pinen ortamen u nan vie tsembelee sha u fan er nana na kwaghôron shon ga.

—Shi diakon la nana fatyô u ôron ma ortamen ér nana̱ wase nan u nengen er nana na kwaghôron u ken Bibilo la, nahan nana̱ wa nan kwagh sha er nana fa a seer yô.

Udiakon ve̱ ker kwaghwan hen mbatamen shi ve ngohol kwaghwan shi ve yaren tom sha mi kpaa. Aluer mba eren nahan yô, “ior cii vea nenge” mzehemen ve.—1 Timoteu 4:15.