Mbamaren, Ne Soo Ner Ônov Enev Ve Gande Ve Hingir Unô Ioro?

“Ikaior kua mbayevkasev . . . ve̱ wuese iti i TER.”—PASALMI 148:12, 13.

 1. Ka ishimanyian i nyi mbamaren ve lun a mi sha kwagh u ônov veve?

KA HANMA ormaren je ishima i nyian nan sha kwagh u mlu u ônov mba nan ga sha wono? Shighe u wanye nan lu ken uya la je ishima ka i hii u zan mbamaren iyol sha kwagh u nan, ka a va mar nan kpa ishima i zaan ve iyol her sha kwagh u mkpeyol u nan. Ve henen ér nana lu nana lu gbong gbong je kpa? Nana vese tsembelee jee? Ka nana nguren vesen je kpa, ishima i de nyian ve sha kwagh u nan ga. Kera cii je, ka kwagh u dedoo tseegh mbamaren ve keren sha ci u ônov vev ye.—1 Samuel 1:11, 27, 28; Pasalmi 127:3–5.

 2. Er nan ve mbamaren kpishi ve nenge kwagh sha ci u ônov vev ayange ne sha er zum u vea gande ior yô i kpe ve iyoloo?

² Kpa taver kpishi u mbamaren ve na mbayev vev kwagh u hemban doon ken tar u ainge ne. Mbamaren kpishi tagher a mbamzeyol er ityav mbi nôngon man ayôôso a patii man m-ban u inyar man mnyoon man ishimayinan nahan, kua akaa agenegh kpaa. Sha kpôô yô, mbamaren mba soon ér ônov vev ve ya ican imba ne ga. Ashighe agen, mbamaren mba ve lu ken ityar i lun a inyaregh ka ve nenge mzehemen u ônov mba azende a ve man mba anmgbianev vev sha ityom i ve eren la man sha akaa agen kpaa. Ka vea nengen nahan yô, ishima i nyima ve ker ve gba nôngon kwagh sha ci u ônov vev sha er ve kpa vea gande a lu a kwagh ave, shi a kpe ve iyol yô.—Orpasenkwagh 3:13.

Tsua Uma u Dedoo

 3. Mbakristu tsua nyi kwagha?

³ Er Mbakristu ve lu mbadondon Yesu Kristu yô, ve tsegha uuma vev sha ci u Yehova a mkighir shio. Mba eren kwagh u ngise Yesu ôr la, ér: “Aluer anti or a sar nan pe van a Mo ityô yô, nana̱ nyiman iyol i nan, nana̱ tôô [kon u mtsaha; NW ] u nan ayange ayange, nana̱ dondo sha a Mo.” (Luka 9:23; 14:27) Sha mimi yô, or u nan lu Orkristu di tsô yô, gba u nana tange iyol i nan ga. Kpa, u ngu wer nana gema i a gbihi ken ibanave kua ican i yan ga. Uma u Orkristu ka u msaanyol man u nan mkom, ka uma u dedoo. Ityôkyaa yô, ka uma u nan a na mbagenev kwagh, man er ngise Yesu ôr nahan, “u nan a na kwagh hembe saan iyol a u ngohol a ngohol kwagh.”—Aerenakaa 20:35.

 4. Yesu yange wa mbadondon un kwagh ér ve ker nyi?

⁴ Ican yange i er ior mba sha shighe u Yesu la kpen kpen. Dugh ican i keren kwaghyan kera yô, ve lu sha ikyev i hemen u Mbaroma ú sha mkighir la, shi mbahemenev vev mba kwaghaôndo tôô ve ikyav mbi yuhwan sha atindi a ve wa ve kpishi la. (Mateu 23:2–4) Nahan kpa, ior kpishi mba ve ungwa kwaghôron u Yesu yô, de akaa a ve a eren kua ityom ve je kpaa, ve hingir mbahenen nav. (Mateu 4:18–22; 9:9; Mbakolose 4:14) Mbahenen mban yange ve er kwagh u kper kwagh a tser ve vea vaa afanyô shinii? Nenge kwagh u Yesu kaa a ve ne, a kaa ér: “Hanmô u nan undu uya shin anmgbianev mba nomso, shin mba kasev, shin ter, shin ngô, shin ônov, shin ishule sha ci u iti Yam yô, nana shi á zua a mi kwa akunduatar shi nana zua a uma u tsôron kpaa.” (Mateu 19:29) Yesu lu taver mbadondon un ishima ér, Ter ve u sha fa mbamgbe vev. Nahan a wa ve kwagh ér: “Vande keren nen tartor Na man perapera Na, man akaa ne cii á seer ne a ye.”—Mateu 6:31–33.

 5. Ishima ngi mbamaren mbagen ker sha kwagh u mkaanem ma Yesu yange kaa ér Aôndo una nenge sha mbatomov nav la nena?

⁵ Sha ayange a ase ne kpa kwagh kaha kposo ga. Yehova fa mbamgbe asev, nahan mba Tartor u lu ve kwagh u hiihii cii, hemban je yô mbaeren tom u pasen kwagh hanma shighe la fa ér ve kpa Yehova una nenge sha ve. (Malaki 3:6, 16; 1 Peteru 5:7) Kpa, asema nga mbamaren mbagenev ker ahar sha kwagh ne. Ka ve pe ônov vev ma ve ze hemen ken tom u Yehova, vea fetyô je yô ma ve nyer tom u pasen kwagh hanma shighe la. Kpa, er tar u taver, tom kpa u lu ican u zuan a mi ainge yô, ve hen ér hemba doon u ônov vev vea vande zuan a mfe-takerada u dedoo cii man kwagh ugen ye, sha er vea fatyô u eren tom u dedoo shin vea lu a kwagh u una wase ve u zuan a tom hanma shighe cii yô. Nahan alaghga mbamaren mban vea hen ér doo u ônov vev vea za imakeranta i vesen keng.

Ago a Wan Iyol sha ci u Kper

 6. I yar tom a ishember i “makeranta u vesen” la ken ngeren ne nena?

⁶ Gbenda u ior ve henen makeranta kaha ken ityar kposo kposo. U tesen ikyav yô, imakeranta i gomoti ngi ken tar u Najeria i mbayev ka ve za anyom 12, ve zua a mfe u injaa yô. Vea been yô, mba ve soo u zan yunivasiti yô ve za, ve hen kwagh anyom anyiin shin i hemba nahan, maa ve zua a digirii u hiihii. Mbagenev di shi ka ve za hemen a kwaghhenen, ve hen twer sôron shin atindi shin tom u injinia kua akaa agenegh kpaa. Hanma ijiir i ú nenge a ishember i “makeranta u vesen” ken kwaghngeren ne yô fa wer se mba ôron kwagh u kwaghhenen u ken yunivasiti er se pase sha heen nahan. Dugh yunivasiti kera yô, imakeranta igen ngi i í tesen ior ityomavee man kpengaeren sha anshighe kpuaa, í ior ve henen ve zuan a takerada u tesen ér ve hen kpenga shin tomavee yô.

 7. Mbayevmakeranta mba ken kôleeji mba kera yaven ga sha ci u nyi?

⁷ Kwagh hemba gban ukôleeji mba ainge u wan mbayevmakeranta agoyol a vea nger ikyaren a za imakeranta i vesen tseegh. Nahan, er ukôleeji ma ve tesen mbayevmakeranta ityomavee kua akaa agen a vea bee makeranta ve vea er ityom kposo kposo yô, kwagh hemba gban ve u tesen mbayev akaa a vea ya ikyaren i nyôron yunivasiti tsembelee yô. Mbayevmakeranta mba ken kôleeji de yaven ayange ne; atica man mbawan ve kwagh kua mbakov vev mba ken makeranta ka ve saa taver ve ishima ér ve nôngo ve nyôr uyunivasiti mba hemban doon sha er vea zua a udigirii mba vea wase ve u zuan a ityom i dedoo i a kimbin ve inyaregh kpishi yô.

 8. Ka nyi mbamaren mba ve lu Mbakristu ve tagher a mi sha kwagh u ônov veve?

⁸ Nahan, ka nyi i doo u mbamaren mba ve lu Mbakristu vea eree? Sha mimi yô, ve soo ér mbayev vev ve hen makeranta tsembelee, ve fa akaa a a wase ve shighe u vea gande ior yô. (Anzaakaa 22:29) Kpa doo u vea de ér ieren i tar i keren uyôughyôughmbaakaav sha kume kua itizan la i̱ bende a ônov vev shinii? Ka akaa a nyi nahan mbamaren ve taver ônov vev asema sha iliam ve man sha ikyav ve ér ve ere? Mbamaren mbagen mba eren ityom kpoghuloo sha er vea koso inyaregh ki vea tindi ônov vev ken imakeranta i vesen yô. Mbagenev ka ve za gba anzô je kpaa. Nahan kpa, aluer mbamaren soo u tindin wan ken yunivasiti yô, doo u vea fa er i lu inyaregh tseegh kwagh a gbe sha mi ga yô. Dugh inyaregh kera yô, ka akaa a nyi nahan a lu sha kwagh u zan makeranta u vesen nyiana?—Luka 14:28–33.

Kwagh u Ior Ve Kimbin sha u Zan Makeranta u Vesen Yô

 9. Injar i makeranta hingir nena ayange nee?

⁹ Ashighe kpishi, ka a ôron kwagh u or kimbi sha ma kwagh yô, ishima i yem se sha kwagh u inyar tseegh. Ken ityar igen yô, ka gomoti a tindin ior ken imakeranta i vesen ye. Nahan mbayevmakeranta mba ve ze i cii mba kimbin injar i makeranta ga. Kpa, sha ajiir kpishi, injar i makeranta taver kpen kpen, shi ngi taver seer a seer kpaa. Ngeren ugen ken magazin u i yer ér New York Times la kaa ér: “Ngise la i nengen makeranta u vesen ér ka ijiir i wasen ior ér ve lu kwagh. Kpa ainge yô, ka mbanyarev ve hembe zan i ye, nahan kwagh ne ngu tesen mkposo u vesen u a lu hen atô u mbanyarev man mbaatsanev la.” Inja na yô, mfe-takerada u dedoo u ken imakeranta i vesen la ngu hingir kwagh u mbanyarev man ashagbaior. Ka ve tindi ônov vev ken imakeranta ne sha er ve kpa ken hemen yô vea hingir mbainyarev man ashagbaior a tar ne yô. Ka awashima u i doo u mbamaren mba ve lu Mbakristu vea lu a mi sha ci u ônov vev nee?—Mbafilipi 3:7, 8; Yakobu 4:4.

10. Kwaghhenen u ken imakeranta i vesen ngu suen msertar u orumace nena?

¹⁰ Sha ajiir a i henen makeranta u vesen gbilin je kpa, to hônon ngu sha kwagh ne. U tesen ikyav yô, pipaabaver i í yer ér The Wall Street Journal la kaa ér, gomoti u tar ugen ken Ityoughkitaregh ki Imbusutariyan i Ashia ngu a “imakeranta i ka i tôô mbayevmakeranta mba fan takerada i ver sha hemen yô.” U veren ve “sha hemen” la inja na yô ka u tindin ve ken uyunivasiti mba hemban doon sha tar cii, er yunivasiti u ken tar u Ingila u í yer ér Oxford man u Cambridge la nahan, kua uyunivasiti mba ken tar u Amerika mba i yer ve ér Ivy League la man mbagenev kpaa. Er nan ve gomoti u tar u ken Ashia ne a ye ican kpishi u tsaase mbayevmakeranta imba ne nahana? Pipaabaver la kaa ér, “tar ne ngu nôngon ér ua lu a inyaregh kpishi.” Ka a lu gbilin mbayevmakeranta vea henen kwagh je kpa, ve gema ve kimbi injar sha u uven ityough ken akaa a suen msertar u orumace. Shin er tar yô, kwagh ne a lu kwagh u maan u iyol nahan kpa, ka kwagh u mbamaren mba ve lu Mbakristu vea soo sha ci u ônov vev nee?—Yohane 15:19; 1 Yohane 2:15–17.

11. Abaver tese ér mbayevmakeranta mba ken yunivasiti mba eren nena sha kwagh u msôrom ma hunden man idya i erene?

¹¹ Shi kwagh ugen yô, ka dang u a lu ken imakeranta i vesen la. Aluer ú za ken uyunivasiti yô, ú nenge a dang je a de u ishar. Mcimbim ma bov kua msôrom ma hunden man idya i eren man anyighe kua mbamzough mbaimev man ambaakaa la nahan ngee je gande. Nenge ase kwagh u msôrom ma hunden. Magazin u i yer ér New Scientist la ôr kwagh u gesa u msôr, u ior ka ve maan msôrom ér vea hunde keng keng la, ér: “Ingyegh ki [Mbayevmakeranta mba ken uyunivasiti mba ken tar u Amerika] mba ve me msôrom kpoghuloo, a bunde kpa kwa môm ken atô u ulahadi uhar nôngo u kuman tiôn u ingyegh ki mbayevmakeranta mba tar la jimin cii.” Agumaior a ken tar u Australia man Ingila man Russia kua ajiir agen kpa nga a mzeyol ne. Idya i eren kpa ka kwagh shon môm, mbayevmakeranta mba kera er kwagh ugen ayange ne ga saa kwagh u za “tsan geri.” Magazin u Newsweek la kaa ér ishember ne “pase ieren i nomso shin kasev mba ka vea due geri, vea nenge a or u ve we kaven nan man ve za tsa a nan la, shin er ka ve wa ishima u lun boki a nan keng ga nahan kpaa.” Kwaghtôvon tese ér hanma wanyemakeranta nôngo u nyôron iyol ken ieren ne. Kwase ugen u tôvon sha akaa kaa ér, “aluer ú ngu wanyemakeranta u ken yunivasiti u lun inja kposo ga yô, we kpa ú tsaan geri er mbagenev nahan.”—1 Mbakorinte 5:11; 6:9, 10.

12. Ka mzeyol u nyi nahan mbayevmakeranta mba ken yunivasiti ve tagher a mini?

¹² Dugh aeren a bo a mbayevmakeranta ve eren la kera yô, ityom i ken makeranta man ikyaren kpa ka mzeyol ugen. Wanyemakeranta nana fatyô u pasen ikyaren ga saa nana ôron ityakerada i nan shi nana eren ityom i i ne nan ken makeranta la kpaa. Shi mbagenev yô ka i gba u vea eren ijodo kpaa. Akaa ne cii nga a na yô ve luun a ian ga, shi ve vôr kpishi. Nahan shi vea zua a shighe kua agee a eren akaa a ken jijingi je kpa? Aluer ve ngee a ityom i ken makeranta kpishi i eren nahan, kanyi ishima ia hemba lun ve u erene? Vea vande keren Tartor je kpa, shin vea gema u a gbihi ken ijime? (Mateu 6:33) Bibilo wa Mbakristu kwagh ér: “Nenge nen vighe vighe er ne zenden yô, i̱ de lu er mbalanenkwagh nahan ga, kpa i̱ lu er mbafankwagh nahan. Man waan nen ian yen iko, gadia ayange ne ka a bo je.” (Mbaefese 5:15, 16) Kwagh ka a er i vihi yô, mbagenev undu jighjigh ve sha ci u ve uve ityough ken kwaghhenen, shin ve nyôr iyol ken aeren a Bibilo i vende, a i eren ken imakeranta i vesen la!

13. Ka mbampin mba nyi i gbe u mbamaren mba ve lu Mbakristu vea hen sha mini?

¹³ Kpa ka ken imakeranta i vesen tseegh idya i eren man aeren a bo kua mbamzeyol ve lu ga. Nahan kpa, agumaior a ken tar kpishi tôô ér akaa ne cii ka di makeranta u henen tsô, nahan mba nengen a ér ka kwaghbo ga. Doo u mbamaren mba ve lu Mbakristu vea fa er dang a ngee ken imakeranta i vesen nahan kpa vea tôô ônov vev a tindi ker ér ve za tagher a mbamzeyol mban i̱ kuma anyom anyiin shin i̱ hemba nahana? (Anzaakaa 22:3; 2 Timoteu 2:22) Mbayev ve̱ gba tagher a mbamzeyol mban tsô sha ci u vea zua a iwasen ken makeranta yumu? U hemban cii je yô, ka nyi í tesen agumaior ken yunivasiti ér a lu ve kwagh u hiihii?a (Mbafilipi 1:10; 1 Mbatesalonika 5:21) Doo u mbamaren vea hen sha mbampin mban dedoo shi vea er msen sha kwagh ne kpaa, shi doo vea hen sha mbamzeyol mba ônov vev vea tagher a mi aluer ve tindi ve makeranta ken gar ugen shin ken ma tar ugen yô.

Ka nyi Makeranta Ú Fatyô u Tindin Wan Wouwe?

14, 15. (a) Er ior ve lu a mhen ve nahan kpa, ka kwaghwan u Bibilo u nyi a lu sha ci wase nyiana? (b) Ka mbampin mba nyi gumor nana fatyô u pinen iyol i nana?

¹⁴ Ior na jighjigh ainge ér a lu gumor za yunivasiti ga yô nana lu kwagh ga. Kpa, er Mbakristu ma ve dondo mhen u ior yô, gema ka kwaghwan u Bibilo ve dondon ye, i̱ kaa ér: “De hingir nen inja i môm a tar ne ga, kpa i̱ gema ne sha mgem u he u mhen wen sha er né kar er ishima i Aôndo i lu yô man kwagh u a doo man a kom u rumun un man shi a lu vough la kpaa yô.” (Mbaromanu 12:2) Ka nyi Aôndo a soo ér ior nav cii, agumaior man mbabeenyol kpaa, ve er sha shighe u mkur a mgbôghom yum nee? Paulu yange kaa a Timoteu ér: “Kundu ishima sha akaa cii, taver ishima sha ican you; er tom u ivangeli, kure u doo doo.” Sha mimi yô, kwaghwan na ne ngu sha ci wase nyian kpaa.—2 Timoteu 4:5.

¹⁵ Gba u se nyôr iyol u keren uyôughyôughmbaakaav er tar u eren nahan ga, kpa doo u se cii se “kuran”—inja na yô se ver ishima sha gbenda u se lu zan sha mi ken jijingi la. Wea lu gumor yô pine iyol wer: ‘M ngu nôngon sha afatyô wam mer me “kure tom wam u ivangeli doo doo” shi me kuma u lun orpasen Mkaanem ma Aôndo kpa? M wa ishima mer me er tom wam u pasen ior kwagh la “doo doo” nena? M soo u eren tom u pasen ior kwagh hanma shighe la je kpa?’ Mbampin mban taver tsô, hemban cii je yô, ka wea nenge agumaior agen aa “keren akaa a vesen” aa ve hen ér aa wase ve u lun a kwagh ave ken hemen yô. (Yeremia 45:5) Sha nahan yô, mbamaren mba ve lu Mbakristu ka ve hii u tesen ônov vev akaa a ken jijingi iyev je, shi ve wasen ve u lun imôngo a mba ve we akaa a ken jijingi ikyo yô.—Anzaakaa 22:6; Orpasenkwagh 12:1; 2 Timoteu 3:14, 15.

16. Mbamaren mba ve lu Mbakristu vea wase ônov vev sha kwaghfan sha u ve luun imôngo a mba wan akaa a ken jijingi ikyo nena?

¹⁶ Waniunda u tsombor ugen u ú lu a mbayev mbanomso utar yô kaa ér, “hanma shighe yô mama wase yange a soo u fan mbayev mba se zenden a ve yô.” Ngô ve ne er tom u pasen kwagh hanma shighe ica gba hegen. Waniunda ne shi kaa ér, “yange se zenden vea mbakov wase mba ken makeranta ga. Lu mbayev mba ken tiônnongo mba akaa a ken jijingi gba ve ishima tseegh lu azende ase ye. Mama yange a soo u lôhôn mba eren tom u pasen kwagh hanma shighe la imôngo hen ya wase kpen kpen, er mbamishen man mbakuran mba ningir sha man mba eren tom shin Betel kua upania nahan. Yange vea va yô ve ôr se akaa kposo kposo shi ve lu saan saan kpaa, nahan kwagh ne wase se u lun a isharen i eren tom u pasen kwagh hanma shighe la.” Kwagh er doo yô, mbayev mba utar mban cii mba eren tom u pasen kwagh hanma shighe hegen—u môm ngu shin Betel, ugen za makeranta u Tsaase Mbashiren Tom, ugen la di ngu eren tom pania!

17. Mbamaren vea wase ônov vev u tsuan kwagh u vea hen ken makeranta kua tom u vea er nena? (Nenge akwati u a lu sha peeji 25 la.)

¹⁷ Er i lu u mbamaren vea wase ônov vev u lun imôngo a mba wan akaa a ken jijingi ikyo nahan, shi gba u vea wase ve hii shighe u ve lu iyev la je vea tsua kwagh u vea hen ken makeranta kua ityom i vea er kpaa. Gumor ugen u a lu eren tom shin Betel hegen yô, kaa ér: “Terem man ngôm yange ve hii tom pania cii ve vôso ayol a ve ye, man er ve vôso ayol a ve kpa ve lu eren u her. Shi ve nôngo ve wase se cica cii u lun a ishima i eren tom pania. Yange sea tsuan kwagh u se hen ken makeranta shin ma kwagh ugen u una bende a vese ken hemen yô, ve taver se ishima ér se tsua kwagh u una wase se u zuan a tom u se eren sha ashighe ashighe, sha er se lu a ian i eren tom u pania yô.” Doo u mbamaren vea wase ônov vev u tsuan kwagh u vea hen ken makeranta u una wase ve u eren tom u Aôndo yô, i̱ de lu kwagh u vea hen a yem yunivasiti ga.b

18. Ka ityom i nyi nahan agumaior aa fatyô u erene?

¹⁸ Kwaghtôvon tese ér ken ityar kpishi kwagh hemba gban sha mba ve lu a mfe u eren kpenga man ityom igen yô, ka sha mba been yunivasiti ga. Pipaabaver i i yer ér USA Today la kaa ér: “Ken upuembaanyomov mba ve lu van la, kwagh a kera gba mbatomov kpishi a digirii i ken yunivasiti ga. A lu digirii i imakeranta i kiriki shin imakeranta i henen tomavee kwagh a gba ve a mi ye.” Imakeranta ne ka i tese ior ityom i ken afishi man mato u sôron kua kômputa man tom u sôron ugôngor mbamngerev man ityough ki eren kua ityom igen wue wue sha shighe kpuaa tseegh. Ityom ne nahan doo ga he? I doo yum! Alaghga ia fa doon mbagenev ga, kpa ia fatyô u nan hanma or u mcivir u Yehova a lu tom u nan jim jim la kwaghyan man shighe u civir un kpaa.—2 Mbatesalonika 3:8.

19. Kanyi i hembe lun gbenda u nan or msaanyol man mkomo?

¹⁹ Bibilo zamber a agumaior ér, ne “ikaior kua mbayevkasev, . . . wuese [nen] iti i TER, gadia ka iti Na tseegh i kende i sha ye, iengem Na ngi sha, kar tar kua Sha kpaa.” (Pasalmi 148:12, 13) Aluer se tôô shagba kua akaa a tar ne u ne ior se kar sha tom u eren Yehova hanma shighe la yô, se lumun ser mimi je ka tom ne ú hembe lun gbenda u nan or msaanyol man mkom ken uma ye. Nahan yô, kôr kwagh u Bibilo i er ne saa a mi ken ishima you, i̱ kaa ér: “Iveren i TER ngi ve a inyaregh, tom u nyoonyol seer ma kwagh sha i ga.”—Anzaakaa 10:22.

[Footnotes]

Ú Fatyô u Pasen Kpa?

• Mbakristu mba suur sha an sha kwagh u mlu ve u ken hemene?

• Ka mtaver u nyi mbamaren mba ve lu Mbakristu ve tagher a mi sha kwagh u mlu u ônov vev u ken hemene?

• Ka nyi i gbe u se tôv sha mi zum u se lu gbidyen kwar sha mbamtsera man mbamzeyol mba ve lu sha mze u zan makeranta u vesene?

• Mbamaren vea wase ônov vev u eren tom ken mcivir u Yehova nena?

[Box on page 25]

Yunivasiti i Zan Ngi a Mtsera Nan Je?

Mbayevmakeranta mba ken yunivasiti kpishi ka ve lu a ishimaveren ér vea bee makeranta a zua a digirii i ia wase ve u zuan a tom u injaa u a kimbin ve inyaregh kpishi yô. Nahan kpa, gomoti u tar u Amerika due a ibaver ér ka mbayevmakeranta kpuaa tseegh ka ve kôr cio u zuan a digirii ken anyom ataratar ye—kwagh ne doo kuma ga. Ve mba ka ve zua a mi la, ka i̱ wase ve u zuan a tom u dedoo a iyol nyoon shio shinii? Nenge ase kwagh u upipambaabaver ve sember tôvon sha kwagh ne ve ve ôr yô.

Magazin u Newsweek u Novemba 1, 1999 la kaa ér: “Or ka nana za [yunivasiti] i Harvard shin i Duke tsô maa nan zua a tom u dedoo u a kimbin nan inyaregh kpishi je ga. . . . Ikyômpeni fa kwagh u agumaior a keren tom kuma ve ga. Aluer or bee makeranta ya ikyaren tsembelee (nan zua a digirii ken ma yunivasiti i Ivy League) yô nan nôngo kwagh. Nahan kpa, kwagh hemba gban mbatôôn ior tom sha tom u or nana fatyô u eren yô.”

Magazin u i yer ér American Educator, u Maaci zan zan Mei inyom i 2004 la kaa ér: “Aluer or ngu a mfe tsema tsema ga yô nana fatyô u eren ityom i ior ve eren ayange ne ga . . . , nahan kpa ka mfe u or zough a mi shin nongo utar ken kôleeji—er ayenge man takerada u ôron man kwagh ngeren nahan ka a wase or nan er ityom ne ye. . . , ka u ken imakeranta i vesen ga . . . . Saa mbayev vea za makeranta u vesen ve vea zua a tom u dedoo ga, hemba doon u vea fa akaa a i tesen ve ken kôleeji la a kôr inya.”

Magazin u Time, u Janawari 24, 2005 la kaa ér: “Imakeranta i vesen kpishi ngi eren kwagh er í fa ape tar u ver ishigh ga nahan. Ngi we mbayevmakeranta agoyol sha er vea er tom shighe u ve bee makeranta ga. Imakeranta i henen tomavee . . . ngi ngeen ayange ne kpishi. Hii ken inyom i 1996 zan zan inyom 2000 la, i seer je kuma 48 sha ityough ki deri. . . . Udigirii mba ken yunivasiti, mba ior ve vihin inyaregh kpishi kua shighe sha u vea zua a mi la kera gba kwagh er ngise nahan ga.”

Magazin u The Futurist u uwer u Julai man Agusutu, inyom i 2000 la di kaa ér: “Gbaatom u i yer ér Department of Labor u tar u Amerika due a ibaver i inyom i 2005 i pasen kwagh u ashe a ver ikyôr ér una er yô. Ibaver shon kaa ér a̱ hemba kera kera kpa hanma wanyemakeranta u been yunivasiti môm ken atô u mbayevmakeranta utar nana zua a tom sha kwagh u nan hen ken makeranta la ga.”

Akaa ne cii na yô, atica kpishi kera nga nengen a iwasen i zan makeranta u vesen ayange ne ga. Magazin u Futurist la shi kaa ér, “se mba tesen ior akaa a a wase ve ken hemen ga.” Kpa nenge ase kwagh u Bibilo i er se sha kwagh u Aôndo yô, i̱ kaa ér: “Mo M ngu TER Aôndo wou, M tese u kwagh u una lu u a inja yô, M hemen we sha gbenda u ú zenden sha mi la. Ma u ver ato sha atindi Am, tsô bem wou ma a lu er ifi nahan, man shi perapera wou kpaa ma a lu er agôndo a zegemnger nahan.”—Yesaia 48:17, 18.

[Picture on page 22]

Yange ve de ityom ve i eren ve dondo Yesu

[Picture on page 27]

Mbamaren mba ve lu Mbakristu ka ve hii u tesen ônov vev akaa a ken jijingi iyev je, shi ve wasen ve u lun imôngo a mba ve we akaa a ken jijingi ikyo yô.