I Tsengaôron Akaa a A Sôôn Eren Yô

NGISE apostoli Peteru ôr kwagh u mlu u uumace u ken hemen man kwagh u tar ne, wener: “Se mba keghen Usha mba hev je man tar u he u perapera una tema ker yô, sha ityendezwa [i Aôndo] la.” (2 Peteru 3:13) Aôndo yange hii ôron kwagh u “Usha u hev man tar u he” sha ikyev i profeti na Yesaia. (Yesaia 65:17; 66:22) Peteru ôr kwagh ter kwaghôron u profeti ne sha u tesen ér sha ayange a na la je kpa kwaghôron ne lu a kure vighe vighe ga.

Ken masejime yô, Mpase u apostoli Yohane nenge ken inyom i 96 la tese ér Tartor u Aôndo ua va a averen ken “tar u he” la. (Mpase 21:1-4) Mkaanem ma Yesu ôr kua ma apostoli Paulu ôr sha kwagh u akaa a aa er shin tar cii man Tartor u Aôndo ua mase van la nga eren hegen. Nahan yô, se fa ser ica a gba ga tsô Tartor la ua va a tar u he. Tar u he la ua lu nena? Takerada u Yesaia ôr se er ua lu yô.

Akaa a Injaa a ken Tar u He La

Bem Una Lu sha Tar Cii, Ior Cii Vea Civir Aôndo Môm. “Vea gema usanker vev, vea var indyuhar a mi, awange a ve kpaa aa hingir ahô a sôron ikyon a mi; ikyurior igen ia kera tsuwa sanker a ikyurior igen ga, vea kera hen ityav mbi nôngon kpaa ga.”—Yesaia 2:2-4.

Bem Una Lu hen Atô u Uumace man Uzendenya. “Zum la gbaseela una teman vea waniyôngo imôngo, anyam kpaa una yaven a wanivo imôngo; gumbua man gumbegha kua icighanile vea teman imôngo, wanye u kpeghee una hemen ve. Ngôbua ve ngôdwem vea yan kwagh, ônov vev vea yaven ijiir i môm; begha je kpaa una ya toho er bua nahan. . . . Vea vihi kwagh ga, vea tim kwagh sha icighanwo Wam cii kpaa ga, gadia tar ua mgbough a mfe u TER er mngerem ma ngee shin zegemnger nahan.”—Yesaia 11:6-9.

Kwaghyan Una Dumbur sha ci u Hanma Or. “Sha uwo ne Ter u akum a Sha Una yôr akuraior cii iwer sha akaa a wan ahôm, iwer i sha wain u a tse a akase na, sha akaa a ahômough a a mgbough a mshiam, sha wain u tse u i kase un dedoo yô.”—Yesaia 25:6.

Ku Ua Kera Lu Ga. “[Aôndo] Una tim ku sha won kera; Ter AÔNDO Una ese mliam sha ishiv mbi iorov cii, man shi Una hide a ilyahan sha ior Nav kera sha won cii; gadia ka TER je, A er kwagh ne ye.”—Yesaia 25:8.

A Nder Mbakpenev. “Mbakpenev Ou vea lu uma; akom a ve kpaa aa nder. Mbakpenev vea nder, vea wa icam . . . tar kpaa ua due a mbara mba ve kpe ngise la.”—Yesaia 26:19, Mgem u Bibilo i í yer The New English Bible la.

Mesiya Ngu Orjir u Perapera. “Una gba ôron ijir sha kwagh u A nenge sha ashe tsô ga, kwagh kpaa Una gba kuren sha er A ongo sha ato Na tsô ga, kpa ka sha perapera Una ôr ijir i mbaatsanev ye; man shi Una kure kwagh sha mi vough a mbalun asema legh legh shin tar.”—Yesaia 11:3, 4.

A Bugh Mbaapirashe Ashe, Mbakondonato Kpaa Vea Ungwa. “Tsô á bugh mbaapirashe ashe, man á bugh mbakondonato ato.”—Yesaia 35:5.

Ikpoghonya Ia Hingir Inya i Dedoo. “Taaikyôngo man ikpoghonya vea lu sar sar, deserti una ember, una mondo er ishohough nahan, una mondo mgbesee, man una ember, una ember a icam zwa.”—Yesaia 35:1, 2.

Tar u He. “Gadia, nenge, M ngu gban Usha u he [ka gomoti u sha je la] man tar u he kpaa [ka tar u perapera u uumace vea lu shin u je la]; á kera umbur akaa a tsuaa la ga, man shi aa kera va or ken ishima kpaa ga. Kpa lu nen saan saan, ember nen gbem sha kwagh u M lu gban yô . . . Vea [ior mba ken tar u he la] maa uya man vea tema keregh, vea kaha ishule i ikon i wain, man vea ya atam a i. Mayange vea maa ya, orgen á kar á tema ker ga, vea lôô, man orgen á kar á ya, ga; gadia er ayange a ikon a lu nahan kape ayange a ior Av kpaa aa lu la; uicuwan Av kpaa vea ya tom u ave ve zan zan je. Vea kera er tom gbilin ga, vea kera mar ônov sha ci u ve̱ tim kera kpaa ga; gadia ve ka vor u mba TER A ver ve doo doo la, kua tsombor ve a ve imôngo kpaa. Tsô er ve lu a yila ga kpaa, Me rumun, man er ve lu a kure kwaghôron ga je, tsô Me ungwa.” “Er Sha u he man tar u he, mba Me er ve la, vea lu sha ishigh Yagh gbem nahan, kape vor wen man iti yen vea lu gbem je la, kape TER A kaa la.”—Yesaia 65:17-25; 66:22.

I Tsengaôron Mlu u ken Hemen u Dedoo

Ka takerada u Yesaia tseegh u tsenge ôron akaa a dedoo a aa va er ken hemen ga. Bibilo ngi a akaaôron a profeti kpishi a á pase akaa a doon tsung a Aôndo una er sha ikyev i Tartor na u Kristu una hemen u la.a U soo u lun ken paradiso u akaa a dedoo aa lu ker la kpa? U fatyô u lun ker! Yô, tôv ase fa kwagh u Bibilo i tese jim jim sha kwagh u mbaawashima mba dedoo mba Aôndo ne iyol you, shi fa er we kpa u fatyô u ngohol uityendezwa nav mban yô. A saan Mbashiada mba Yehova iyol u wasen we sha gbaa ne.

[Footnote]

[Picture on page 8]

Bem una lu hen atô u uumace ayol a ve shi vea lu ken bem a inyamtoho kpaa

[Picture on page 9]

Mbakpenev vea hide a lu uma

[Picture on page 10]

Tar cii ua hingir paradiso