“Keren Nen Kwagh u Nan Bem”

KA A er gbenda hegh nahan i lu inja er ua tsa a vihi sha won ga nahan. Kpa shighe a̱ karen yô, u hii u paven ikwe shi u hingir u lun a agber kpaa. Nahan i gba u a sôr u sha er mba ve zenden sha u la vea er aikyôr ga shi ua tsa yô.

Kape m lu wase vea ior kpa shighe ka una karen ve a hii u vihin je la, man ashighe agen je yô, a pav ikwe je kpaa. Apostoli Paulu kaa ér yange anzughul gba hen atô u Mbakristu mba ken Roma. A wa Mbakristu kwagh ér: “Se keren nen kwagh u nan bem man shi kwagh u se maan a maa ayol a ase sha mi” yô. (Rom. 14:13, 19) Gba u se ‘keren kwagh u nan bem’ sha ci u nyi? Se ker bem sha ishima i taver man sha kwaghfan nena?

Doo u Se Ker Bem sha ci u Nyi?

Aluer gbenda hii u paven ikwe man i sôr u ga yô, ikwe la ia fatyô u hingir agber a vesen je kpaa. Se kpa, aluer se sôr anzughul a hen atô wase la fese ga yô, kape aa fatyô u vihin ikyar yan yase je la. Apostoli Yohane nger ér: “Aluer orgen nana kaa er: Aôndo doom ishima, man nan gema nan ngu kôron anmgbian u nan ihyom yô, nan ngu or u aiegh je. Gadia or u anmgbian u nan, u nan nenge a nan la, a doo nan ishima ga yô, Aôndo u nan nengen a Na ga la, A fatyô u doon nan ishima ga.” (1 Yoh. 4:20) Aluer Orkristu sôr mzeyol u a lu hen atô u nan vea anmgbian u nan la ga yô, una na nana kôr nan ihyom.

Yesu Kristu yange tese ér aluer se mba ken bem vea anmgbianev asev ga yô, Yehova una lumun mcivir wase ga. A wa mbahenen nav kwagh ér: “Aluer wea va a iwua you u va nan sha atse a nanden nagh sha mi la, man wea umbur her er kwagh a zua anngôu a we yô, undu iwua you her hen kpe atseegh la, za vande himen a anngôu la, man ú hide, ú va na iwua you ye.” (Mat. 5:23, 24) Ityôkyaa i vesen i i ne ve se keren bem yô, ka sha ci u se soo u eren ishima i Yehova Aôndo.a

Kwagh u yange za hemen ken tiônnongo u ken Filipi la kpa tese ityôkyaa igen i i ne ve se keren bem yô. Anzughul yange gba hen atô u kasev Mbakristu uhar, Yuodia man Suntuki, man a shi nan kpa kwagh ne lu nôngon u benden a bem u ken tiônnongo. (Fil. 4:2, 3) Aluer iyongo zua se a anmgbian man se sôr zayol shon fele ga yô, mbagenev kpa vea hingir u ungwan. Isharen i se lu a mi i dooshima man bem a lu ken tiônnongo la ngi i mgbegha se u keren bem hen atô wase.

Yesu kaa ér: “Saan mba ve ker num [keren bem] la iyol.” (Mat. 5:9) Or ka nana keren bem nahan i saan nan iyol kpen kpen. Heela tseegh ga, or u nan keren bem yô, ka nan hemba lun gbong gbong sha ci u “ishima i bem bem ka uma u iyolough je.” (Anz. 14:30) Kpa aluer se mba wan kwagh ishima a or yô, se ngôôr gban angev ga.

Er Mbakristu kpishi ve lumun ér ka hange hange u keren bem nahan kpa, adooga u lu henen er u hii ve u hime iyongo i i zough a ma anmgbian yô. De se time sha akaawan a ken Ruamabera a aa wase se u eren kwagh ne yô.

Kwaghôron u Legh Legh Ve a Bem

Ashighe kpishi ka i sôr gbenda u u lu vihin la sha u cirin ajiir a a pav ikwe la. Se fatyô u cirin shin hungur a mbamyen mba anmgbianev asev kpa? Se nenge ser, gbenda u sôron mbamzeyol u ngun nahan ua wase u sôron mbamzeyol mbagenev, sha ci u apostoli Peteru nger ér: “Dooshima cirin asorabo kpishi.”—1 Pet. 4:8.

Kpa ashighe agen yô, zayol la ka a lu u vesen nahan se fatyô u gban hungur a mi shin cirin un nahan ga. Nenge kwagh u yange za hemen shighe u Mbaiserael ngohol Tar u Ityendezwa ica lu a gba ga la. Cii man “ônov mba Ruben man ônov mba Gadi kua vegherkwe u Manase” mough za tema Ifi Yordan yande la, ve ‘ta atse a nanden nagh sha mi hen kpe u Yordan, zegeatse, gba ikyôr mimi.’ Mbaiserael mbagenev na jighjigh ér yange i lu civir akombo sha atse la, nahan ve gba cirin zayol la tsô ga. Nahan ve kohol imôngo sha u nôngon ityav a ve.—Yos. 22:9-12.

Alaghga Mbaiserael mbagenev yange ve fa er hanma or nan fe kwaghbo u ve er la yô, man aluer ve za ta num sha ave abu yô, ka iorov kpuaa ken mbautyaav mbara tseegh vea kpe ye. Nahan kpa, ve kera torough a torough u sôron zayol ne sha gbenda la ga. Kpa ikwe i Mbaiserael i shin ityôtar i Yordan tindi ior ér ve za lam a anmgbianev vev sha zayol shon. Ve pine ér: “Ka nyi kwaghbo ne, ne er Aôndo u Iserael ne gem nyian ne de u dondon TER, ne ta atse a en kposo hendan a TER nyiane?” Jighilii yô, ikwe i yange i maa atse la lu eren kwagh sha mban u jighjigh u nan keng ga. Kpa vea er nena sha imba aie nee? Vea lam a mba ve lu wan ve aie iyol la dang shinii? Ikwe i i wa i aie iyol la gema lam sha imo i kundu kundu, ve pase er kwagh u ve er la i lu sha ci u isharen i ve lu a mi i civir Yehova yô. Gbenda u yange ve lam la na yô, ve vihi ikyaryan ve vea Yehova ga shi ve war uuma mbagenev kpaa. Iliam i yange ve cii ve lam ken bem la sôr zayol shon nahan bem hide gba hen atô ve.—Yos. 22:13-34.

Cii man ikwe igen i Iserael er kwagh sha zayol la yô, ve yila kwe u Ruben man Gaadi kua vegherkwe u Manase ve lam a ve ken bem. Mkaanem ma Aôndo kaa ér: “De nyoon ishima fefa ga, gadia ishima i nyoon tema ken vanger u abumeaior.” (Orpa. 7:9) Gbenda u Ruamabera a tese u sôron zayol u vesen yô, ka u yilan or u kwagh a zough se a nan la lamen a nan wang man ken bem kpaa. Aluer se hen ser or er se kwagh u vihin man se za kohol nan se lam ga, se wa kwagh ishima a nan nahan se hen ser Yehova una ver se doo doo kpa?

Man aluer ma Orkristu nan va kohol se, nan ôr se ma kwagh u nan hen ér se er nan u vihin shin nan wa se aie iyol nahan se er nena? Bibilo kaa ér, “imo i legh legh ngi bundu ishima i nyoon.” (Anz. 15:1) Ikwe i Iserael i ihiar la man vegherkwe u Manase yange ve lam sha imo i legh legh shi ve pase ityôkyaa i i ne ve ve er kwagh nahan la wang, man ieren ve la sôr zayol u yange lu hen atô ve la. Aluer ka se se vande za kohol anmgbian wase shin aluer ka nan nan va kohol se kpa, doo u se pine ayol a ase ser: ‘Ka asember a nyi man imo i nyi nahan ia va a beme?’

Lamen sha Kwaghfan

Yehova fa er hanma wase nan lu a isharen i pasen kwagh u a lu nan ken ishima la yô. Aluer se sôr anzughul a a gbe hen atô wase la ga yô, alaghga ishima ia mgbegha se u ôron orgen kwagh sha mi. Aluer se wa kwagh ishima a or yô, kwagh la una na se lam a nan dang. Anzaakaa 11:11 kaa ér: “Sha zwa u mbaaferev yô, ka i yôhôr [gar] kera.” Aluer se kôr nombor wase tsaha u lamen sha ma anmgbian u ken Kristu ga yô, kape se kpa se vihi bem u ken tiônnongo u a lu inja er ka gar la je la.

U ngu wer, u keren bem la ka u palegh u lamen sha kwagh u anmgbianev asev mba nomso man mba kasev ga. Apostoli Paulu wa Mbakristu kwagh ér: “Ma kwaghôron u dang a̱ de dugh ken zwa wen ga.” Shi a za hemen ér: “Saa di u doon u una fatyô u maan a maa kwagh ape kwagh a gbe sha mi yô. . . . Kpa lu nen sar sar ayol a en, zungwen nen mhôônom, de nen ayol a en kwaghbo.” (Ef. 4:29-32) Aluer ma anmgbian va pase u ér we u lam a nan doo nan ga shin kwagh u u er a nan la doo nan ga yô, a hemba doon u zamber nan nahan bem a gba ga he? Gadia anmgbian ne ngu a vande lamen dang sha iyol i mbagenev sha ato ou ga. U ôron akaa a doon shighe u se lu ôron kwagh u ma Orkristu la ka a na i hemba lun se heghema u sôron zayol shighe kwagh a zough se a or yô.—Luka 6:31.

Er Aôndo Tom “sha Ishima i Môm”

Er se yen yô, or ka nana er se kwagh u vihin yô, i hemba lun se heghema u paven a nan. Kpa ka ieren i dedoo la ga. (Anz. 18:1) Se kange nen ishima u yilan sha iti i Yehova ken mzough a “ishima i môm.”—Sef. 3:9.

Mayange iliam shin ieren i mbagenev i de mgbeghan se u den u icivir Aôndo sha gbashima ga. Cii man Yesu na uma na u tile sha ityough ki nagh ku i naan ken tempel la shi na mbangeren ibo yô, a nenge kwasecôghol ugen u lu icankwase kpaa yô va “kende hanma kwagh u lu a mi cii, NW” shin akwati u inyar. Yesu yange venda a naa? Yange venda a na ga, kpa gema wuese un er a sue tiônnongo u Yehova u sha shighe la yô. (Luka 21:1-4) Ieren i mimi ga i ior mbagenev la yange i yange kwase ne u suen mcivir u Yehova ga.

Kpa aluer se hen ser, ma anmgbian u nomso shin u kwase u ken Kristu nan er se kwagh u sha mi ga nahan se er nena? Se de ser kwagh la a bende a mcivir u se lu civir Yehova a ishima i môm laa? Shin se nôngo sha afatyô wase cii se sôr zayol u se lu a mi la sha er bem ú a lu ken tiônnongo u Aôndo nyian la a lu here?

Ruamabera wa se kwagh ér: “Aluer a fatyô yô, lu nen bem a ior cii ape kwagh wen a lu sha mi la.” (Rom. 12:18) Se cii se kange nen ishima u eren kwagh ne sha er se za hemen u lun sha gbenda u u ze ken uma ne yô.

[Footnote]

[Picture on page 17]

Yange gba u Yuodia man Suntuki vea ker bem

[Picture on page 18]

Ka asember a nyi man imo i nyi nahan ia va a beme?