Ka Se Ayol a Ase Se Tsua u Lun Mba i Mar ve Hegh Yee?

KA AN nan ne i maren or heghe? Mbaaduav mbagenev ka vea waan ior kwagh ér ve hingir Mbakristu mba i mar ve hegh yô, ve ôr mkaanem ma Yesu man, ér: “Ka u á mar ne hegh keng.” (Yohane 3:⁠7) Mbaaduav mban ka ve ôr mkaanem man a ior inja er ka tindi nahan, ka ve kaa ér “Lu or u i mar nan hegh yô!” Sha nahan yô, mba tesen ér hanma or u nan jighjigh yô nana fatyô u ungwan imo i Yesu, nahan eren akaa a nana lu or u i mar nan hegh yô. Mhen ve ne tese ér, m-mar u he la ka kwagh u or a tsua iyol i nan yô. Kpa ka kwagh u yange Yesu ôr a Nikodemu laa?

Aluer se ôr mkaanem ma Yesu mara zulee yô, ma tese ér Yesu yange lu ôron ér or nana fatyô u tsuan iyol i nan ér i mar nan hegh ga. Se ôr nahan sha ci u nyi? Ishember i ken zwa Grika i i gem ér “á mar or hegh” la a fatyô u shi geman i ér “saa á mar or sha.”a Mgem u sha uhar u ishember ne tese ér, m-mar u he la due ka “sha,” shin “hen Ter.” (Yohane 19:11; Yakobu 1:17) Nahan, ka Aôndo a ne i maren or hegh ye.​—⁠1 Yohane 3:⁠9.

Aluer se fa ser inja i ishember i “mar or hegh” la ka u “maren or sha” yô, a kera taver se u kaven er i hii ve or nana fatyô tsuan iyol i nan ér i mar nan hegh ga yô. Hide hen sha kwagh u mar wou. Ka we iyol you yange u tsua wer i mar u yee? Mayange ga! Ka teru yange na ve i mar u ye. Kape kwagh u maren or hegh la kpa a lu vough je la, ka Aôndo, Ter wase u sha la a ne i maren se hegh ye. (Yohane 1:13) Ka sha ityôkyaa ne apostoli Peteru yange kaa nahan vough ér: “I wuese Aôndo, Ter u Ter wase Yesu Kristu u A mar ne hegh sha mhôônom Nam ma zungwen ma vesen” la ye.​—⁠1 Peteru 1:⁠3.

Ka Tindii?

Alaghga a taver mbagenev vea pine ér, ‘Aluer ka u or nana fatyô u tsuan iyol i nan ér i mar nan hegh ga yô, hii nan ve Yesu yange wa tindi ér: “Ka u á mar ne hegh keng-ne”?’ Mpin ne ka u dedoo kpen kpen. Aluer mkaanem ma Yesu man ka tindi yô, kwagh ne tese ér Yesu wa se tindi ér se er kwagh u a hembe se agee yô. U eren kwagh a vese nahan la doo ga. Tsô, se kav inja i ishember i ka u á “mar ne hegh” keng la nena?

Aluer se time sha mkaanem man er i nger ma ken zwa Grika la yô, se nenge ser ka kwaghôron u sha gbenda u kighir a kighir or ga, shi ka tindi kpaa ga. Kpa ka mkaanem ma pasen kwagh u a lu jim di tsô. Inja na yô, zum u Yesu kaa ér, ka u á “mar ne hegh” keng la, lu ôron kwagh u a lu jighilii yô, lu wan a wa tindi ga. Bibilo i í yer ér Modern Young’s Literal Translation la kaa ér: “Gba u á mar ne sha.”​​—⁠Yohane 3:⁠7.

De se nenge er tindi a lu kposo a mkaanem ma ôron kwagh u a lu jighilii yô. Tôô ase wer zege geri ugen ngu a imakeranta ker kpishi. I gema i tsua makeranta ugen ér u lu sha ci u mbayev mba ve lu marnya u ijiir la kpa ve lu ica a geri yô. Nahan iyange igen yô, gumor ugen u a lu marnya ga yô, kaa a buter-makeranta la ér, “M soo u nyôron makeranta wou ne.” Kpa buter-makeranta la kaa a na ér, “Saa ú lu marnya ve a tôô u ye.” Kwagh u buter-makeranta ne a er la ka tindi ga. Ngu nan gumor la wada ér, “Lu marnya” ga. Kpa, ngu kaan ér, “Ka mba ve lu marnya la tseegh a tôô ve ye.” Buter-makeranta ne ôr kwagh u a lu jighilii yô, inja na yô, a pase imba wanye u a fatyô u tôôn nan makeranta ne yô. Nahan Yesu kpaa, zum u a kaa ér: “Ka u á mar ne hegh keng” la, lu ôron kwagh u a lu jighilii yô, inja na yô lu pasen iaven i or nana lu sha mi ve nana fatyô u “nyôron tartor u Aôndo” yô.

Kwagh u Tartor u Aôndo, u̱ se mase ôron heen ne bende a vegher u m-mar u he ugen kpaa. Mpin ugen due sha kwagh ne ér, Er nan ve i gbe u a mar ior heghe? Aluer se fa mlumun u sha mpin ne yô, se kav inja i u maren or hegh la vough.

[Ngeren u shin kpe]

[Foto u sha peeji 6]

Ka sha nyi gbenda nahan, m-mar u he la a zough vea gbenda u ior ve maren ônov laa?