Ka Sea Suur Sha Yehova A Ishima Yase Cii Yô, Se Lu A Vangertiôr
“TER Una ungwa zum u me yila Un yô.”—PS. 4:3.
1, 2. (a) Lu ikyaatseren i nyi Davidi tagher a mini? (b) Ka upasalmi mba han se lu timen sha mini?
TOR DAVIDI yange hemen tar u Iserael shighe wa lihen, kpa va tagher a kwaghtseren ugen. Wan na Abesalom, u lu keren gbenda u wuan un ngohol hemen la yôô iyol na ér un hingir tor, nahan kwagh gande Davidi yevese undu Yerusalem. Shi huror na u sôngo sôngo ugen undu un za kohol Abesalom, nahan a mase shin a ior kpuaa mba ve tile a na sha mimi yô, a lu zenden angahar gbilin, vaan kôndon sha gbenda u unden sha Uwo u Olev la. Za aren hen ijiir igen yô, or u ken tsombor ugen hen ya u Tor Saulu, u i yilan iti na ér Shimei yô, due gba tuhwan un, keren un awen shi haan un ihundu.—2 Sam. 15:30, 31; 16:5-14.
2 Lu u ikyaatseren ne ia hungwa a Davidi, una yem shin Sheol a ijungwen man iheenee? Ei, sha ci u yange suur sha Yehova. Ken Pasalmi u sha 3, u Davidi dugh sha kwagh u ayem a yange yevese Abesalom la, ikyav tese ér yange suur sha Yehova. Shi a nger Pasalmi u sha 4 la kpaa. Upasalmi mba uhar mban cii tese wanger wanger ér Aôndo ongo mbamsen shi eren kwagh sha mi kpaa. (Ps. 3:4; 4:3) Upasalmi mban na se ibumun ér Yehova lun a mbacivir un sha mimi hanma shighe cii, te ikyaa a ve shi ne ve bem shi kor ve kpaa. (Ps. 3:5; 4:8) Nahan, de se time nen sha upasalmi mban, se nenge er vea wase se u lun a vangertiôr shi seer suur sha Aôndo kpaa yô.
Shighe u ‘Ior Kpishi Ve Mough Num a Vese’ Yô
3. Er i tese ken Pasalmi 3:1, 2 nahan, lu nyi Davidi tagher a mini?
3 Ortyom ugen va kaa Davidi ér: “Asema a ior mba Iserael hide hen Abesalom.” (2 Sam. 15:13) Taver Davidi er Abesalom er ve fatyô gema ikpelaior hingir u tan ikyaa ken a na yô, tsô a kaa ér: ‘Kpash! TERE, mbaihyomov av seer je, zua ga; ior kpishi mba moughon num a mo; ior kpishi mba lamen sha a mo kaan er: Ngu a mwar her Aôndo je ga.’ (Ps. 3:1, 2) Mbaiserael kpishi lu henen ér Yehova una yima Davidi ken kwaghtseren u Abesalom vea ior nav va a mi sha a na la ga.
4, 5. (a) Lu nyi Davidi lu a vangertiôr ér ia ere? (b) Inja i ishember i “We U kenden mo ityough sha” la ér nyi?
4 Kpa Davidi lu a vangertiôr sha ci u a suur sha Aôndo a ishima na cii. A wa icam ér: ‘Kpa We TERE, U ngum perutya u yisan mo, man icivir yam, man shi ka We U kenden mo ityough sha kpaa ye.’ (Ps. 3:3) Davidi na jighjigh ér Yehova una kura un vough er akuvautya ka a kura orshoja nahan. Ka mimi, tor u lu been iyol ne lu yevese, shi yisa ityough nagh shi wa ityough inya sha ci u kunya u a lu ker la. Kpa lu u Uhembansha una due a Davidi ken mlu na u kunya la kera, una hide a na ken mlu u civirigh. Lu u Yehova una wase un u tilen sha jighjigh, moughon ityough sha shi hiden lun a icivir na her. Davidi yila Aôndo a jighjigh u nan ér una ungwa un. Ú tesen wer u ngu suur sha Aôndo, er Davidi nahan kpa?
5 Mkaanem ma Davidi ôr ér “We U kenden mo ityough sha” la tese ér, yange fa ér ka Yehova una na un iwasen i yange lu keren la ye. I gema ivur ne ken Bibilo i í yer ér Today’s English Version la ér: “Kpa we TERE, u kuran mo sha ikyev i kwaghbo hanma shighe cii; u nem mhembe, shi ishima ka ia yinam kpa u hide u taver mo.” Takerada ugen pase inja i ishember i “We U kenden mo ityough sha” la ér: “Aôndo ka una kende . . . or ityough sha yô, A iv nan a ishimaverenkeghen man vangertiôr.” Er i mgbegha Davidi sha ikyônough ki torough ki tar u Iserael kera yô, lu kwagh u nan un ishimayinan. Nahan kpa, lu u ‘mkende u kenden un ityough sha’ la una iv un a ishimataver man vangertiôr, shi una za hemen u suur sha Yehova a ishima na cii.
‘Yehova Una Ungwa!’
6. Er nan ve Davidi kaa ér Yehova una ungwa msen na sha icighan uwo naa?
6 Er Davidi suur sha Yehova shi iv a vangertiôr yô, shi a kaa ér: “Me yila Yehova sha ikyenge, una ungwa imo yam sha icighanwo na kpaa.” (Ps. 3:4, NW.) Yange i hide a areki u ikyuryan, u lu ikyav i tesen ér Aôndo ngu hen atô ve la, i yem a mi sha Uwo u Shion, sha iniezwa i Davidi. (Ôr 2 Samuel 15:23-25.) Sha nahan yô, lu sha inja je Davidi kaa ér Yehova una ungwa msen na sha icighan uwo na ye.
7. Er nan ve yange Davidi lu a mciem ga?
7 Er Davidi na jighjigh ér Aôndo una ungwa msen na keng yô, ishima ta un kwe ga. A gema a wa icam ér: “Mo me yav inya, me gba mnyam, shi me nder kpaa, gadia TER ta ikyaa a mo.” (Ps. 3:5, NW.) Shin er tugh va ile, hingir shighe u hemban cieryol u mbaihyomov vea fatyô u za tan ityav sha Davidi abur abur nahan kpa, Davidi cia u yaven ga. Yange na jighjigh ér una yav kpa una nder, sha ci u akaa agen vande eren un, a yange wase un u lun a vangertiôr ér Aôndo una kende un mayange ga yô. Se kpa se fatyô u eren nahan, aluer se dondo “igbenda i TER,” se undu un mayange ga yô.—Ôr 2 Samuel 22:21, 22.
8. Pasalmi 27:1-4 tese ér Davidi yange suur sha Aôndo nena?
8 Pasalmi u Davidi ugen kpa tese er Davidi lu a vangertiôr shi suur sha Aôndo a ishima na cii yô, Pasalmi la ôr mkaanem ma jijingi mgbegha un nger ne, ér: “TER ka iwanger yam man myom wam kpaa, ka an je me cia? TER ka agee a uma wam, ka an je nana wam mciem iyolo? . . . Shin ikyumutya ia gbidye afo sha u nôngon a mo, me cia ken ishima ga. . . . M sôn TER kwagh môm tsô, ka un me ker ye, mer: Ma m lu ken iyou i TER sha ayange am cii, sha u me nenge mkomashe u TER, man me time kwagh ken tempel Na kpaa.” (Ps. 27:1-4) Aluer u lumun a mkaanem ma Davidi ôr heen ne, shi mlu wou na u ian yô, ú zaan mbamkombo mba tiônnongo vea mbacivir Yehova a we imôngo hanma shighe cii.—Heb. 10:23-25.
9, 10. Shin er lu Davidi ôr mkaanem ma i nger ken Pasalmi 3:6, 7 mara nahan kpa, u fatyô u kaan wer yange oron iyev ga sha ci u nyi?
9 Shin er Abesalom er kwagh a Davidi dang shi mbagenev kpishi kera ta ikyaa ken a na ga nahan kpa, a wa icam ér: ‘Me cia ior udubu kwa pue mba ve kasem a num ga. Mough sha, TERE, yimam, Aôndo wam! U ta mbaihyomov av azu sha ahenge cii, U or mbaaferev anyi.’—Ps. 3:6, 7.
10 Davidi yange oron iyev ga. Yange a gbe u a ta ‘mbaihyomov nav azu sha ahenge’ kpa, Aôndo ma er nahan. Tor Davidi vande ngeren Tindi u Mose la iyol na lu a mi, shi fa er Yehova kaa ken Tindi la ér: “Iyevoron ka i Yam man mkimbi kpaa” yô (Dut. 17:14, 15, 18; 32:35) Shi ka Aôndo yange lu u una “or mbaaferev anyi” ye. Inja i u oron ve anyi la yô, ka u eren ve kwagh u vea kera lu a tahav mbu eren or kwagh ga yô. Yehova fa mba ve lu mbaaferev la, sha ci u un “nengen ken ishima.” (1 Sam. 16:7) Se wuese Aôndo kpishi er a ne se agee a tilen dông, hendan a Satan, tor u mbaaferev cii, u i sôôn kenden un shin ihyungwa i zan kweng, er begha u tan kume a anyi shio, u i gbe u a tim un kera nahan la!—1 Pet. 5:8, 9; Mpa. 20:1, 2, 7-10.
‘Mwar Ka hen Yehova a Lu Ye’
11. Doo u se eren msen sha ci u mbananjighjigh a vese imôngo sha ci u nyi?
11 Davidi yange nenge ér ka Yehova tswen a kom u nan un myom u gba un ishima yum la ye. Kpa orpasalmi ne lu henen sha kwagh na iyol na tseegh ga. Gema di ior mba yange doo Yehova a ve la cica cii di ye? Davidi kure mkaanem ma jijingi mgbegha un nger ne vough nahan ér: ‘Mwar ka hen TER a lu ye, Iveren You i̱ lu sha ior Ou.’ (Ps. 3:8) Ka mimi, Davidi lu a mbamzeyol mba vesen, kpa lu umbur ior mba Yehova jimin cii, shi lu a vangertiôr ér Aôndo una ver ve doo doo. Se kpa doo u se umbur mbananjighjigh a vese imôngo ga he? Se umbur nen ve ken mbamsen asev, se sônon nen Yehova ser a na ve icighan jijingi na sha er vea fatyô u lun a ishimataver shi yôôn loho u dedoo vangertiôr yô.—Ef. 6:17-20.
12, 13. Lu nyi i er Abesalom, man Davidi gema er nena?
12 Abesalom yange kpe ken iheen kpishi, man kwagh la lu icintan hen mba vea soo u eren kwagh a mbagenev dang, hemban je yô, mba i shigh ve mkurem er Davidi nahan la cii. (Ôr Anzaakaa 3:31-35.) Yange i nôngo ityav, nahan ityav hemba mbautyaav mba Abesalom. Abesalom iyol na henda alfadari na lu yemen, maa ice na i sha ityough i yange i lu yugh yugh yum la za wever sha ayagher a gbaa u zegekon ugen, u lu shin inya teregh teregh yô. Tsô a gba zungur her, lu uma, kpa gema fatyô u osough ga, zan zan Yoabi va tume un ahande atar hen ishima, wua un.—2 Sam. 18:6-17.
13 Er Davidi ungwa kwagh u er wan na la nahan, yange emberee? Ei. A lu vaan zenden kaan ér: “Ahii! wan wam Abesalom, wan wam! Wan wam Abesalom! Guda yô, mo ma m kpe sha ci wou. Ahii! Abesalom, wan wam, wan wama!” (2 Sam. 18:24-33) Ka Yoabi tseegh yange kaa imo ve Davidi kera zungwe tume ityough ga ye. Nenge er Abesalom, u hemen hange un yum ve za nôngo ityav a ter na, u Yehova shighe un mkurem la, yange va a mtim sha iyol na sha wono!—2 Sam. 19:1-8; Anz. 12:21; 24:21, 22.
Davidi Shi Tese Ér Un Suur sha Aôndo
14. A fatyô u ôron kwagh u Pasalmi u sha 4 la ér nyi?
14 Pasalmi u sha 4 la kpa ka msen u Davidi er sha mimi, u a tese ér yange suur sha Yehova a ishima na cii yô. (Ps. 3:4; 4:3) Alaghga Davidi dugh icam ne sha u pasen mpeveryol na shi wuese Aôndo er Abesalom fatyô u wuan un ngohol tahav ga yô. Gayô, alaghga yange nger icam shon sha ci u Mbalevi mba wan atsam. A lu nyi kpa, aluer se mba gbidyen kwar sha icam ne yô, se hemba suur sha Yehova cii.
15. Se fatyô u eren msen hen Yehova vangertiôr ken iti i Wan na sha ci u nyi?
15 Shi Davidi tese ér un suur sha Aôndo a ishima na cii shi un ngu a vangertiôr ér Aôndo ongo mbamsen nav shi eren kwagh u un sen un yô. A wa icam ér: ‘Zum u m yila yô, ungwa imo yam, Aôndo u perapera wam; U verem ken ijiir i gbanger, shighe u m lu ken mzeyol yô; zungwen mhôônom, ungwa msen wam.’ (Ps. 4:1) Se kpa se fatyô u lun a imba vangertiôr la, aluer se mba eren perapera yô. Er se fe ser Yehova, “Aôndo u perapera” veren ior nav mbajighjigh doo doo yô, se fatyô eren msen hen a na vangertiôr ken iti i Wan na a jighjigh u nan ken nagh ku ipaan ku Yesu la. (Yoh. 3:16, 36) Kwagh ne na se bem ken ishima kpen kpen!
16. Alaghga lu nyi i na ve iyol kpe Davidii?
16 Ashighe agen yô, alaghga se tagher a kwagh u nan se iyolkpen, u una na se kera lu a vangertiôr ga yô. Alaghga Davidi kpa, yange wa lun un nahan sha anshighe ugen, sha ci u a wa icam ér: ‘Ne ônov mba iorov, shi nan je man icivir yam ia de u hingir iheene? Shi nan je man gbilinkwagh una de u doon ne ishima, man né de u keren aie ase?’ (Ps. 4:2) Ikyav tese ér ishember i “ne ônov mba iorov” la ngi ôron kwagh u uumace sha gbenda u doon ga. Yange ‘agbilinakaa doo mbaihyomov mba Davidi mbara ishima.’ I gema ivur ne ken Bibilo i í yer ér The New International Version la ér: “Shi nan je man icugh ia de u doon ne ishima shi ne de u keren mbaaôndo mba aiev ase?” Aluer iyol kpe se sha ci u ma kwagh u mbagenev ve er a vese je kpa, se za nen hemen u eren msen sha gbashima shi tesen ser se suur sha Aôndo u mimi la a ishima yase cii.
17. Pase er se fatyô u eren kwagh u Pasalmi u sha 4:3 a kaa la yô.
17 Davidi pase er un suur sha Yehova la tseer tseer ken mkaanem man wener: ‘Fa nen, TER una tsegha or u i doo Un a na la sha ci Na iyol Na. TER Una ungwa zum u me yila Un yô.’ (Ps. 4:3) Gba u se taver ishima shi se suur sha Yehova a ishima yase cii ve se za hemen u suur sha a na ye. U tesen ikyav yô, gba u tsombor u Orkristu ua lu a aeren ne shighe u i dugh ma orsholibo u cighir ishima, u hen tsombor la ken tiônnongo kera yô. Aôndo tesen icivir sha igbenda na shi veren mba ve suur sha a na mbara doo doo. Sha nahan yô, u ungwan imo i Yehova shi suur sha a na a ishima i môm la ve ior nav a iember.—Ps. 84:11, 12.
18. Aluer or lam sha a vese shin nan er kwagh a vese dang yô, kanyi i gbe u se er, er i tese ken Pasalmi 4:4 nahana?
18 Aluer orgen gema ôr kwagh sha a vese shin nan er kwagh a vese u doon se ga di ye? Kwagh la una yange se iember ga, aluer se er kwagh u Davidi a kaa ne yô, a kaa ér: ‘Nyoon nen ishima, kpa de eren nen isholibo ga; hen nen kwagh ken asema a en sha ugambe enev; lu nen ving.’ (Ps. 4:4) Aluer or lam sha a vese shin nan er kwagh a vese dang kpa, se kera er isholibo sha u oron iyev ga. (Rom. 12:17-19) Se fatyô u pasen er ishima i lu se ker sha kwagh shon la ken msen shighe u se yav sha gambe ving la. Aluer se er msen sha ikyaa shon yô, alaghga se nenge kwagh la sha gbenda ugen kpaa, nahan dooshima una mgbegha se u den or u nan er se kwagh u doon ga la kwaghbo. (1 Pet. 4:8) Apostoli Paulu yange wa se kwagh sha gbaa ne u i doo u se umbur yô, man ikyav tese ér kwaghwan la har sha Pasalmi 4:4. A kaa ér: “Nyoon nen ishima, kpa de eren nen isholibo ga, iyange i̱ de been ne a ishima i vihin her ga. De ne nen diabolo ian ga.”—Ef. 4:26, 27.
19. Pasalmi 4:5 una wase se ken mcivir u se civir Aôndo la nena?
19 Davidi wa icam ôr var var er i gbe u se suur sha Aôndo yô, a kaa ér: ‘Na nen nagh ku perapera; suur nen sha TER.’ (Ps. 4:5) Yange i gba u Mbaiserael vea na nagh a ishima i dedoo ve nagh vegh kua lu a inja sha ishigh ki Aôndo ye. (Yes. 1:11-17) Se kpa saa se lu a mbaawashima mba dedoo shi se suur sha Aôndo a ishima yase cii ve una lumun a mcivir u se lu civir un la ye.—Ôr Anzaakaa 3:5, 6; Mbaheberu 13:15, 16.
20. ‘Iwanger i ishigh ki Yehova’ la tile sha ityough ki nyi?
20 Davidi shi kaa ér: ‘Ior kpishi mba kaan er: Ka an nana tese se kwagh u doono? TERE, kende a iwanger i ishigh Yough sha, sha a vese.’ (Ps. 4:6) ‘Iwanger i ishigh ki Yehova’ la ngi ôron kwagh u mlumun u Aôndo una lumun se la. (Ps. 89:15) Sha nahan yô, msen u Davidi lu eren ve kaa ér: “Kende a iwanger i ishigh Yough sha, sha a vese” la, lu kaan ér ‘lumun se.’ Er se lu suur sha Yehova shi eren ishima na a vangertiôr yô, a lumun se shi se mba a iember kpishi.
21. Aluer se mba eren tom u pasen kwagh u i eren nyian ne kpoghuloo yô, se fatyô u lun a vangertiôr ser nyi?
21 Er Davidi lu veren ishima keghen iember i Aôndo una va na un a hemba i sha shighe u sunda la yô, a wa icam i wuese Yehova ér: ‘U nam iember ken ishima [a] hemba i ve shighe u iyiagh vegh man wain ve ngee la.’ (Ps. 4:7) Aluer se mba eren tom u pasen kwagh u i eren nyian ne kpoghuloo yô, se fatyô u lun a vangertiôr ser se zua a iember kpishi. (Luka 10:2) Saan se iyol hegen kpishi er ‘ikyurior i ngeen’ iyenge, i̱ mba i shigh ve mkurem la i lu hemen se shi ‘mbasundav’ kpa ve lu ngeen seer a seer yô. (Yes. 9:3) U ngu eren tom sunda u iember i lu ker ne sha gbashima kpa?
Lu a Vangertiôr, Nahan Za Hemen u Suur sha Aôndo a Ishima You Cii
22. Pasalmi 4:8 tese er Mbaiserael yange vea kura Tindi u Yehova ve i lu ve la nena?
22 Davidi kure Pasalmi ne sha mkaanem man, ér: ‘Me yav inya, me gba mnyam a ishima i gbar gbar kpaa; gadia ka We tseegh, TERE, U ne, m lu uma ken mkpeyol ye.’ (Ps. 4:8) Mbaiserael yange vea kuran Tindi u Yehova yô, bem na a lu sha a ve shi ve kera lu a mciem ga. Ikyav i tesen yô, yange “Yuda man Iserael ve tema doo doo” shighe u Solomon tema tor la. (1 Utor 4:25) Mba ve suur sha Yehova yô, yange ve tema bem bem, shighe u ityar i wan ndor a ve ia lu ken ayôôso je kpaa. Ka se yav se gba mnyam mem mem sha ci u Aôndo na se kera mba a mciem ga, er Davidi nahan.
23. Aluer se mba suur sha Aôndo a ishima yase cii yô, a lu se nena?
23 Yô, se za nen hemen u civir Yehova vangertiôr. Shi se eren nen msen a jighjigh u nan, nahan se zua a “bem u Aôndo u a gande hanma mfe wase cii” la. (Fil. 4:6, 7) Kwagh la una na se zua a iember kpishi! Shi aluer se za hemen u suur sha Yehova a ishima yase cii yô, se fatyô u lun a vangertiôr ser a̱ lu nyi je sea va tagher a ma ken hemen kpa se cia ga.
Ú Kaa Wer Nyi?
• Ka mbamzeyol mba nyi Abesalom yange na Davidi nyôr kere?
• Pasalmi u sha 3 la wase se u lun a vangertiôr ser nyi?
• Ka sha igbenda i nyi nahan Pasalmi u sha 4 la una wase se se hemba suur sha Yehova ciilii?
• Aluer se mba suur sha Yehova yô, a wase se nena?
[Foto u sha peeji 29]
Shin er Davidi yevese Abesalom nahan kpa, a lu a vangertiôr ken Yehova
[Ufoto u sha peeji 32]
Ú suur sha Yehova a ishima you cii kpa?