“M Gba Iwan Hegen, Kpa Ia Lu Gbem Sha Won Ga!”

Kwaghôron u Sara van der Monde

Ior ka ve shi kaan a mo ér, “Sara, ka wea se nahan i doo u nengen kpen kpen. Er nan ve ka i saan we iyol hanma shighe nahana?” Ka m kaa a ve mer m ngu a ishimaverenkeghen, i ior kpishi ve lu a mi ga yô. Me fatyô u pasen ishimaverenkeghen yam ken mkaanem man, mer, “M gba iwan hegen, kpa ia lu gbem sha won ga!”

I MAREM ken inyom i 1974 hen gar u Paris, ken tar u France. Yange i marem sha ican tsung, shi ken masejime yô, i va zuam a angev mbu ken ityough, mbu i yer ér cerebral palsy la. Yange m faantyô u tenger ave am kpishi ga, shi iliam yam taver u kaven kpishi. Shi yange m va hii u gban ikyungugh shi m ngôôr gban angev ga.

Shighe u m lu anyom ahar la, tsombor wam mough hen Paris yem hen gar u Melbourne, ken tar u Australia. Anyom nga kar ahar yô, mo man ngôm cii terem undu se yem kwagh na. Ka kwa u hiihii, u m umbur mer Aôndo lu ikyua a mo je la. Hanma shighe u ngôm, u lu Kwaseshiada u Yehova la, una zaan mbamkombo mba Mbakristu yô, a tôôm a za a mo. Lu ken mbamkombo mban m fa mer m doo Aôndo ishima shi a wam ikyo ye. Mfe la, kua dooshima u ngôm man mkaanem nam ma taver mo ishima la wasem u lun a vangertiôr, shin er terem kende se nahan kpaa.

Shi ngôm yange tesem u eren msen hen Yehova. Jighilii yô, ka i hemba lun mo zange u eren msen, a u lamen. Ka mea eren msen yô, i kera gba u me nôngo mer mkaanem ma due wang keng ga, kpa ka m “ungwa” ma er ma jire ken atô u ishima yam la. Shi, er iliam yam ka i taver u kaven yô, m gema m ngu a vangertiôr, sha ci u m fa mer Yehova fe hanma kwagh, nahan mea er msen shin ishima ving, shin mea lu lamen tsuku ku tsuku kpaa, una fa kwagh u m lu ôron yô.—Ps. 65:2.

M Nôngo a Mbamtaver

Shighe u m lu anyom ataan la, angev av mbu ken ityough mbura taver je hingir u me zenden sha katako. Jighilii yô, yange m hemban kpelan a kpela a u zenden a zende! Shighe u m va hingir anyom 11 la, u zenden je kpa m kera faantyô ga. Ken masejime yô, m va kera faantyô u unden sha gambe wam shi hungwan sha mi iyol yam ga, saa sha iwasen i injin u sha usu u latriki, u ka a kende a mo a wam shin ikyekye yam i mbaawanev, i lun a injin, i ka m nahan sha uwe la.

U ôron kwagh haan mba bov kera yô, ashighe agen mlu wam ne ka a na m ure. Kpa ka m hide m umbur ishenge i tsombor wam ne, i kaa ér: “Ishima i de nyian we sha akaa a u fetyô u eren ga la ga. Eren akaa a u fetyô la.” Kwagh ne wasem u eren ambaakaa er nyinya i hendan man u nahan tso u injin man u sha ave, shi duen zan mape, za lun her anyangem kpuaa shi nahan mato ningir hen ma tiôn gbenda u mato ve fe karen sha mi ga yô nahan! M eren tomaveegh, nahan ka i doom u kpelan ufoto sha penta shi koron kwagh shi m tumen akondo a sha gambe man a zeren shi maan atesa kpaa.

Er m gbe iwan shi m lu uange yô, ka i taver mbagenev er m fetyô u eren mhen je tsuan u civir Aôndo yô. Shighe u m lu anyom 18 la, tica wam ugen ken makeranta kaa a mo ér m undu ya wam sha er me due ken kwaghaôndo u ngôm la kera yô. Yange kaa ér ijiir i tsan kpa una wasem u keren. Nahan kpa, m kaa a na mer me fatyô u undun jighjigh wam u nan ga shi me undu ya shighe u m nenge mer m ngu sha ian i me hemban eren akaa sha tseeneke wam la tseegh.

M venda kwagh ne a tica ne, ica i gba ga maa i erem batisema, m hingir Kwaseshiada u Yehova. Anyom nga kar ahar yô, m za kôr haya hen iyou igen. Heen ne, saan mo iyol sha ci u m zough a iwasen i m soo la shi m ngu sha tseeneke wam er i sarem la kpaa.

Orgen Tsôrom Kpoo

Ken anyom a karen ne, m tagher akaa agen a karen jighjigh wan u nan. Iyange igen la, kwagh er kpiligh mo iyol yô, orgen u se henen makeranta imôngo, u un kpa a gbe iwan yô, kaa a mo ér mo m vôso un. Sha hiihii la doom kpishi. Sarem u ma m lu a nom ken uma wam tsung, er agumaukase kpishi ka i sar a nahan. Nahan kpa, u ngu wer kwase nana gba iwan er nom u nan nahan tsô maa ivaa ve ia doo ga. Heela tseegh ga, gumor la lu ken kwaghaôndo wam ga. Akaa a a na jighjigh a mi la, man ityom na kua mbaawashima nav cii kaha kposo a mba av. Nahan a er nan ve se lu imôngôô? Shi yange m kange ishima mer me dondo kwaghwan u Aôndo, me vôso or u nan jighjigh a mo imôngo tseegh. (1 Kor. 7:39) Sha nahan yô, m kaa a gumor la teghelee mer, me fatyô u eren kwagh u a soo la ga.

Zan zan nyian kpa, m fa mer yange m er kwagh u vough. Shi m ngu a vangertiôr mer a saan mo iyol ken tar u he, u Aôndo a tende zwa a mi la. (Ps. 145:16; 2 Pet. 3:13) Hegen yô, m kange ishima mer me za hemen u civir Yehova sha mimi, shi er m lu alôm yô, me ker u lun nor ga.

Sarem tsung, u nengen a iyange i me tsuwe shin ikyônough yagh ki oriwan, me yevese er ahumbe nahan la. Hen shighe la me yôô mer, “Yange m gba iwan, kpa hegen m ngu kere kere, man me lu nahan gbem sha won!”