Ngeren u Pasen Yiase Yase

Se Soo u Koson Akaa A Injaa Ase A Tse La

IOR mba Yehova civir un sha mimi ica i gba hegen. Ka ityakerada yase tseegh i pase se kwagh u mcivir wase u mimi ne ga. Akaa agen a a pase se kwagh ne yô, ka ufoto man uwashika man akaa a mbagenev ve er sha zwa ve la kua ikyav mbi tsev mbi sha kwagh u mcivir wase man yiase yase kua tom wase u pasen kwagh la kpaa. Kpa aluer se koso akaa ne her shi se mba umbur akaa a yange er se la yô, a wase se nena? Yange gba u uter mba ken Iserael vea pase ônov vev atindi man ityom i kpilighyol i Yehova er la sha er vea “ver asema a ve sha Aôndo” yô.—Ps. 78:1-7.

I ndera timen sha akaa a tse shin ngeren mba tsev sha u kuren awashima u Yehova ica gba hegen. U tesen ikyav yô, zum u mbaahendanev nôngo ér vea yange tom u i lu eren ken Yerusalem la, i ker akaa a injaa hen Akemeta, gartamen u tartor u Media la, nahan i zua a ihyurentakerada, i i nger mkaanem ma tor Shirushi na ian ér i maa iyou i Aôndo ken Yerusalem ker la. (Esera 6:1-4, 12) Nahan i hide i maa tempel la er Aôndo soo la. Luka, u lu or u ngeren Ivangeli la kpa yange er tom a ngeren mba tsev sha u ‘timen sha akaa cii doo doo, hii sha mhii u a zan zan’ mkur.—Luka 1:1-4.

Kwagh u yiase i mba civir Aôndo gba Mbahemenev mba Shin Tine ishima tsung je. Anmgbianev ugen ken Mbahemenev mba Shin Tine yange kaa ér: “Saa se fa ape se mough ve se fa ape se lu zan ye.” Sha nahan yô, semberee ne, i ver gbaatom ugen ken ijiir yase i tamen i ken Brooklyn, ken kpentar u New York la, mba yer gbaatom ne ér Writing Archives (Gbaatom u Koson Akaa a sha Kwagh u Yiase Yase); ka Kômatii u Nengen sha Kwaghngeren a nengen sha gbaatom ne ye.

AKAA A PASEN SE KWAGH U YIASE YASE

Shighe ka una karen yô, akaa a tse a hungur se, nahan se kpishi se gba tômon ser yange ma se ver ma kwagh shin ma se nger ma kwagh u umbur se akaa shon. Se mba eren tom hegen kpoghuloo ken Gbaatom u Koson Akaa a sha Kwagh u Yiase Yase la sha er se kura dyako wase yô. Ufoto mba tsev kpa vea fatyô u pasen se kwagh u yiase yase. Ityakerada yase i tsuaa la man akaa a anmgbianev ve er sha ijô ve la kua akaa a injaa agen kpa nga ken akaa a tse a se koso ne. Akaa ne ka a ta se iwanger sha kwagh u yiase yase shi a wase se u lun a ishimaverenkeghen ser mlu u ior mba Yehova una va doo ken hemen.

Se mba lôhôn we ser, ôron ngeren u he u a lu a itinekwagh ér “Ngeren u Pasen Yiase Yase” ne, sha er u fa akaa a se koso her, a pasen se kwagh u yiase yase la yô. Ngeren ne una duen ken mgber u Iyoukura i henen ken tiônnongo la ashighe ashighe. U tesen ikyav yô, se wa ishima u duen a ngeren ken mgber u una va la, u una na mlumun sha mbampin mban yô, ka ve je ne: Ka nyi i lu ikyekye i tôôn ityakerada laa? Ka unô yange ve eren tom a mi? Lu hanma shighe i er tom a mi, man lu sha ci u nyi?

Ikyav mbi tsev mbi se koso her la, mbi er ufoto mba umbur se akaa a tse nahan. Mbi pase se kwagh wase man kwagh u jighjigh u nan man ishimataver i anmgbianev mba ngise la, shi mbi pase se kwagh u iember i mba civir Yehova ve zough a mi la man mbamtaver mba ve tagher a mi la kua iwasen i Yehova a ne ior nav la kpaa. (Dut. 33:27) Se na jighjigh ser Yehova una ver iniôngon i se lu nôngon ser se kura yiase i nongo na la, sha er se hemba lun ken mzough shi se hemba zuan a agee a eren ishima na yô.

[Ngeren u kiriki/​Foto u sha peeji 31]

Seer Fan Kwagh u Gbaatom Ne

Mbatôvonkwagh man mbafaneev man mbangeren asev ka ve er tom a ikyav yasev mbi tsev shighe u ka sea gberen ityakerada i pasen Bibilo shi sea eren icer i DVD shin ma kwagh u a har sha Bibilo yô. Sha nahan yô, Gbaatom u Koson Akaa a sha Kwagh u Yiase Yase la ka a ver ishima tsung sha u kohol ikyav mbi tsev atô wue wue; ka a zua a mbi sha ajiir er afishi a branci shin ma gbaatom u shin Betel shin hen atôônanongo shin hen ior gayô hen mbamzough mba ken tar nahan. Time ase sha kwagh u tom u se pase kwagh u ú shin heen ne:

U Zuan a Akaa a Tse shi Tôvon sha Kwagh u A: Gbaatom u koson akaa a tse ne ngu zuan a akaa a injaa seer sha ikyav mbi tsev mbin. Ikyav mbin kpishi ka ior mba icombor ve i civir Yehova ica i gbe yô, ka ve er iyua shin ve pwar se mbi ye. Aluer se tôv sha kwagh u ikyav mbin vighe vighe yô, kwagh la una wase se se seer fan kwagh u yiase yase man kwagh u anmgbianev mba ve lu uma sha ayange a tsuaa la kpaa.

Gbenda u Veren Akaa Ne sha Alô sha Alô: Gbaatom u Koson Akaa a sha Kwagh u Yiase Yase la ngu a ikyav udubu udubu, mbigen tsa hemba anyom deri môm. Ikyav mbin mbi atô kposo kposo, shi mbi iniembe man igbanger kpa kposo kposo, nahan gba u a ver mbi sha alô sha alô sha er kwagh a gba sha mi ken hemen kpa a kera lu ican u zuan a mi ga yô.

U Sôron Ikyav Mbin man u Koson Mbi Her: Ka i sôr ityakerada i i ye tsegh man akaa a tse a a vihi la tsembelee shi i koso a her. Shi ka i koso ungeren man ufoto man mkaanem ma ken upipambaabaver shin ufiim man akaa a i kor ken tser la cii sha kômputa. Er i koso akaa a tse a injaa ne sha kômputa yô, kwagh ka una gba sha a yô, i za bugh kômputa i zua a kwagh u i soo la, nahan mba kera benden a ave kpur kpur sha er aa vihi ga.

U Koson Akaa Ne Doo Doo, shi Zuan a A Shighe u Kwagh A Gbe sha Mi Yô: Ka i koso akaa a tse ne tsembelee sha er aa saa ga shi iwanger i iyange man mdorom ma a vihi a ga yô. Se mba duen a gbenda u koson akaa ne sha kômputa sha er a keren kwagh u kwagh a gbe sha mi la shi a zuan a akaa a injaa a tse ne yô.

[Ufoto mba sha peeji 32 la]

1. Foto u yôôn angwe u tesen tser u “Photo-Drama of Creation.” 2. Takerada u ngeren ati a ior mba pinen ér i naan ve magazin. 3. Mato u yôôn angwe u Tartor. 4. Igbende i Iyoukura i Aipor 15, 1912. 5. Takerada u pasen ér gba u a wuhe Anmgbian J. F. Rutherford ken purusu. 6. Maikrofon u tashan u redio u WBBR. 7. Anar u kuhwan tser. 8. Anikpa u wan ityakerada shimi. 9. Uwashika mba ior nger yô. 10. Loho u yange i tindi J. F. Rutherford a mi sha ikyekye i i yer telegraph la yô.