Yehova Una Sue U

1, 2. Ka nyi alaghga se pine ashighe agene, man ka unô ken Bibilo i doo u se umbur kwagh ve?

I LU nahan u pine iyol you wer: ‘Me war angev mbun je kpa’ vee? Shin alaghga u ngu henen wer or u hen tsombor wou gayô ma ijende you nana war angev mbu nan gbe la je-o. Mimi yô, kape ishima ka i za se iyol shighe u se shin or wase nan gbe angev je la. Kape yange ishima i za ator ahar agen iyol sha kwagh u kwaghnyoon ve, sha ayange a profeti Eliya man Elisha je la. Tor Ahashia, wan u Ahaba man Yesebel, yange osough gba, nahan a pine ér: “Me war angev mbun kpa”? Shighe kar yô, Tor Benhada u hemen tar u Shiria la gba angev tsung, nahan a pine ér: “Me war angev mbun je kpa?”—2 Utor 1:2; 8:7, 8.

² Se mba a ishimaveren ser, se kua ior asev cii Yehova una wase se. Nahan kpa, mbagenev kpishi ka ve pine ér Aôndo una wase ve nena? Sha ayange a ator la lu uma la, ashighe agen Aôndo a er ivande sha u seer or ayange shin been nan angev. Shi Yehova yange nder mbagenev shin ku je kpaa sha ikyev i uprofeti nav. (1 Utor 17:17-24; 2 Utor 4:17-20, 32-35) Kpa ityôkyaa ngi i se ver ishima ser una er nahan sha ayange ase ne kpaa?

3-5. Ka tahav mbu nyi Aôndo man Yesu ve lu a mini, man ka mbampin mba nyi ve dugh sha kwagh ne?

³ Akperan nga ga, Aôndo ngu a tahav mbu been or angev shin tan nan angev. Bibilo pase kwagh ne wang. Ashighe agen, Aôndo a tsaha ior sha uange. Yange er kwagh ne a Farao sha ayange a Aberaham la, shi va er a Miriam, anngô u Mose u kwase. (Gen. 12:17; Num. 12:9, 10; 2 Sam. 24:15) Aôndo yange ta Mbaiserael icin ér aluer ve hemba un atô yô, una haa ve ‘hanma angev man hanma ican’ cii. (Dut. 28:58-61) Kpa lu cii la ga. Yehova yange kura ior nav sha u ve de gbe angev ga yô. (Eks. 23:25; Dut. 7:15) Shi bee ior angev kpaa. Ikyav i tesen yô, shighe u Yobu gba angev je tôm ér ma un kpe la, Aôndo bee un angev!—Yobu 2:7; 3:11-13; 42:10, 16.

⁴ Mimi yô, Aôndo ngu a tahav mbu been or angev. Wan na kpa kape i lu je la. Bibilo pase ér Yesu yange sôr ior ikyungugh shi bee ve imande shi bugh ior ashe shi sôr mbakpenalegh sha ivande. (Ôr Mateu 4:23, 24; Yoh. 9:1-7) Ka kwagh u taver se ishima kpishi er se fe ser iangev mbi Yesu bee ior la, lu u tesen er una va bee uumace angev sha gbenda u vesen ken tar u he la yô. Hen shighe la, “ma or u nan tem ker kpaa nana kera kaa er: Kwagh nyoon mo, ga.”—Yes. 33:24.

⁵ Kpa doo u se ver ishima ser Aôndo shin Yesu ve bee se angev sha ivande hegenee? Ka mnenge u nyi i doo u se lu a mi shighe u kwagh a nyoon se tsung la, man doo u se er nyi sha mini?

 6. Ka nyi se fe sha kwagh u “uiyua mba been ior angev” mba i na Mbakristu mbagenev sha ayange a mbaapostoli laa?

⁶ Bibilo pase se ér sha ayange a mbaapostoli la, Aôndo na Mbakristu mbagenev mba i shighe ve mkurem la tahav mbu eren uivande. (Aer. 3:2-7; 9:36-42) Icighan jijingi yange na ve ‘uiyua atôghatô’ kua “uiyua mba been ior angev.” (1 Kor. 12:4-11) Kpa uiyua mban, man mbagenev, er u lamen ijô man u ôron akaaôron a profeti nahan cii, lu u ica a gba ga tsô a bee a mi kera. (1 Kor. 13:8) Ka nahan ve uiyua mban ve lu nyian ga ye. Sha nahan yô, ityôkyaa ngi i se ver ishima ser Aôndo a bee se shin ior asev angev sha ivande ga.

 7. Ka ishimataver i nyi se fatyô u zuan a mi ken Pasalmi 41:3?

⁷ Nahan cii kpa, shighe u se gbe angev yô, se fatyô u veren ishima ser Aôndo una sur se ishima shi una na se kwaghfan shi una sue se, er ngise er a mbacivir un nahan. Tor Davidi yange nger wener: “Saan or u nan we mbaatsanev ikyo la, iyol, TER Una yima nan sha iyange i bo. TER Una kura nan, Una koso uma u nan.” (Ps. 41:1, 2) Nahan kpa, u ngu wer, yange or nana wa icanor ikyo sha ayange a Davidi la yô, nan kera kpe ga ze. Sha nahan yô, Davidi lu kaan ér or u wan mbagenev ikyo la nana lu uma sha ivande, zan zan nana tsôr ga. Doo u se kav mkaanem ma Aôndo na i nger man ser, una wase mba ve we mbaatsanev ikyo la. Una er kwagh ne nena? Davidi pase wener: “TER Una sue nan sha gambe u nan u uange; Ú gema myavinya u nan la sha iyange i angev mbu nan.” (Ps. 41:3) Mimi yô, or yange nana wa icanor ikyo yô, nan fa je ér Aôndo kpa nenge a kwagh u dedoo u nan er la, shi una hungur nan ga. Nahan nana gba angev yô, nan ver ishima ér tahav mbu Aôndo a ne iyol i or u hiden sôron ker la, mbua wase nan nana zua a guda.

 8. Lu nyi Davidi lu sônon Yehova, er Pasalmi 41:4 a tese laa?

⁸ Shighe u Davidi gba angev la, a kaa ér: “Mo m kaa mer: TERE, zungwem mhôônom; beem angev, gadia m er U isholibo.” (Ps. 41:4) Alaghga nger mkaanem man shighe u lu uange ve wan na Abesalom lu nôngon ér una ngohol un ikyônough ki torough, kpa Davidi lu a tahav mbu eren kwagh sha mi ga la. Shin er Aôndo de un isholibo na nahan kpa, Davidi hungur isholibo na a Batesheba man akaabo a a due ker la ga. (2 Sam. 12:7-14) Nahan cii kpa, tor Davidi fa wang ér Aôndo una sue un sha gambe na u uange la. Kpa Davidi lu sônon ér i bee un angev sha ivande shi i seer un ayangee?

 9. (a) Gbenda u Yehova sue Davidi la kaha a gbenda u bee Tor Hesekia angev la nena? (b) Lu nyi Davidi lu veren ishima ér Yehova a fatyô u erene?

⁹ Anyom nga kar imôngo yô, Tor Hesekia va “gba angev je, gba nôngon ku,” nahan Aôndo bee un angev mbura. A bee un angev mbun sha ivande. Hesekia war angev mbun shi Aôndo seer un anyom 15. (2 Utor 20:1-6) Kpa Davidi yô, sôn ér Aôndo a bee un angev sha ivande ga. Yange soo ér Aôndo a wase un vough er ka a wase or u wan mbaatsanev ikyo nahan. Kwagh ne kua u Aôndo a sue un ‘sha gambe na u uange’ la. Er Aôndo de un a kwaghbo na yô, Davidi fatyô u sônon ér Aôndo a sur un ishima shi a sue un, nahan tahav mbu iyol na i lu a mi u hiden sôron ker la, mbu wase un, una zua a guda. (Ps. 103:3) Se kpa se fatyô u eren nahan.

10. Se fatyô u kuren ikyaa ser nyi, sha kwagh u er Terofimu man Epafroditu laa?

¹⁰ Er i bee Davidi angev sha ivande shin i seer un ayange kpishi ga nahan, kape Terofimu, u lu ikyartom u apostoli Paulu la kpa lu je la. Bibilo pase se ér sha shighe ugen la, i na Paulu tahav mbu been angev sha ivande. (Ôr Aerenakaa 14:8-10.) Yange bee “Ter u Publiu [u] lu uange” la angev, “lu angev mbu iyolhian, man mbu nyian awambe.” Paulu za “er msen, a penda un ave iyol, a bee un mbu.” (Aer. 28:8) Nahan cii kpa, Paulu kera bee Terofimu, u yem tom mishen vea na imôngo la, angev ga. (Aer. 20:3-5, 22; 21:29) Shighe u Terofimu gba angev ve kera fatyô u zan hemen a tom mishen vea Paulu ga la, apostoli la wanger un ga; kpa a undu un ken Milete ér a zua a guda ker. (2 Tim. 4:20) Shighe u Epafroditu lu “dedoo ga mimi, mgbôghom a ku” la kpa, ikyav tese ér Paulu bee ijende na i ishima ishima ne angev sha ivande ga.—Fil. 2:25-27, 30.

11, 12. Ka nyi se fe sha kwagh u Luka, man alaghga lu sha nyi gbenda nahan wase Paulu?

¹¹ “Luka ortwer u doon ishima,” u nger takerada u Aerenakaa la kpa, zenden vea Paulu. (Kol. 4:14; Aer. 16:10-12; 20:5, 6) Doo u se na jighjigh ser Luka wa Paulu kwagh sha kwagh u tweregh shi sôr un kua mbagenev mba ve lu eren tom mishen vea na la angev. Yange gba u Luka una er nahan sha ci u nyi? Sha ci u Paulu iyol na kpa lu yemen zende sha shighe ugen la, maa za gba angev. (Gal. 4:13) Yange fatyô u nan iwasen i sha kwagh u tweregh ne, vough er Yesu kaa nahan, ér: “Ka mbadedoo kwagh a gbe ve a ortwer ga, saa mba angev mbu ker ve la tseegh.”—Luka 5:31.

¹² Bibilo kera pase shighe man ijiir i Luka hen kwagh u tweregh ga. I hen ér Paulu yange ôr Mbakristu mba ken Kolose ér Luka ka ortwer sha ci u ve fa un. Kwagh er doo yô, makeranta u tweregh ugen gema lu hen gar u Laodishia, ikyua a gar u Kolose. Yange kwagh a lu nahan jighilii ga kpa, Luka gbaa wan ior kwagh sha kwagh u tweregh, a mfe shio ga; un lu ortwer kpôô kpôô. Ikyav tese ér kwagh lu nahan sha ci u asember a sha kwagh u tweregh a a er tom a mi ken Ivangeli i yange nger la man ken takerada u Aerenakaa kua gbenda u a hembe ôron kwagh u iangev mbi Yesu bee ior la.

13. Ka nyi i doo u se umbur zum u se lu duen a mhen shin i lu nan se mhen sha kwagh u twereghe?

¹³ Se mba hen shighe u mba se civir Aôndo a ve imôngo la ve lu a “uiyua mba been ior angev,” u vea bee se angev ga. Kpa anmgbianev mbagenev mba se pin ve iwasen ga yô, vea due se a mbamhen sha kwagh u tweregh. Ka mimi, alaghga mbamhen vev mban vea vihi ga. Paulu kpa er kwagh ne shighe u iyav lu nyoon Timoteu la, man alaghga tsô lu sha ci u ma mngerem ma dedoo ga.a (Ôr 1 Timoteu 5:23.) Kpa ieren ne gema ngi kposo a kwagh u kumbur a Mbashiada mbagenev ér ve ma icigh ki ityôô shin ve sôr ma twer shin ve de u yan akaa agen, u alaghga una wase ve ga shin una gema a va ve a va a zayol la. Ashighe agen mbagenev ka vea waan ior kwagh sha kwagh u tweregh yô, ve ôr kwagh inja nahan, ér: ‘Anngôm kpa yange gba imba uange ne, maa ma icigh kin nahan wase un.’ Mhen u se soo u duen a mi la una doo nan nan kpa, doo u se umbur ser aluer mbagenev ma mcimbim shin ve er twer u i fe kwagh u u wuee la je kpa, kwaghbo una fatyô u duen ker.—Ôr Anzaakaa 27:12.

14, 15. (a) Ior ka vea gba angev yô, mbagenev ve nenge ér ve zua a ian i eren nyi? (b) Anzaakaa 14:15 una wase se shighe u ior ve lu wan se kwagh sha kwagh u tweregh nena?

¹⁴ Se Mbakristu cii sar se u lun gbong gbong sha er se ember uma shi se er tom u Aôndo kpoghuloo yô. Kpa ka u se de gban angev ga, sha ci u se ya dyako u myen. Ka sea gba angev yô, igbenda i sôron mbu i lu kpishi. Hanma or nan ngu a ian i tsuan twer u nan soo yô. Kwagh gema er vihi yô, ken tar u ior ve we hua ne, mbagenev or ngu a gba angev yô, ve nenge ér ian due i vea zua a inyaregh ve. Ka ve kaa a ior ér “igbenda i sôron twer” shin “igbenda i been ior angev” due, man ashighe kpishi ve na ior ityakerada i i gber ér igbenda ne wase ior yô, kpa i lu aie tseegh. Ikyômpeni igen shin ior mbagenev ka ve kaa a mbauangev ér ve yam mcimbim ma taver ishe; awashima ve ka i lu u zuan a mtsera kpishi. Kpa or u nan gbe angev, nan lu keren myôhôryol sha usu shin nan lu keren gbenda u nana lu uma yô, alaghga “igbenda i been ior angev” ne ia doo nan. Nahan kpa, doo u se umbur kwagh u Mkaanem ma Aôndo ma we se ne, ér: “Orlanenkwagh ka nan gba nan jighjigh sha hanma kwaghôron tsô, kpa orfankwagh yô, ka nan ver ishima sha zende u nan.”—Anz. 14:15.

¹⁵ “Orfankwagh” yô, gba u nana hemba wan ikyo cii, aluer “kwaghôron” shin mhen u i dugh a mi sha kwagh u tweregh la va hen or u nan fe kwagh u tweregh ga yô. “Orfankwagh” yô, alaghga nana gbidye kwar nahan ér: ‘Or ne kaa ér orgen yange nan mena ishangeci ne shin nan ma icigh ki ityôô kin gayô nan de u yan akaa ne nahan, wase nan, kpa ior mba kpishi mba ve kaa ér kwagh la ka mimi yôô? M nenge yô, ior kaha. M ngu a ityôkyaa i injaa i nan jighjigh mer kwagh ne una wasemaa? Doo u me seer tôvon sha kwagh ne shin me za pine mbagenev mba i tese ve kwagh shon tsembelee shin ve lu mbatwerev yôô?’—Dut. 17:6.

16. Ka mbampin mba nyi nahan aluer se gbidye kwar sha mi ve a wase se shighe u ior ve we se kwagh sha kwagh u twereghe?

¹⁶ Mkaanem ma Aôndo wa se kwagh nahan ér, se “zenden tsev tsev . . . ken tar u ainge ne.” (Titu 2:12) Aluer se mba “zenden tsev tsev” shin eren kwagh sha kwaghfan yô, a gba u se wa ikyo zum u i we se kwagh sha ma gbenda u sôron twer, u i lu inja er kwagh shi sha mi shin u cimin yô. Ortwer la shin or u nan lu gbidyen konjo u tweregh la nana fatyô u pasen wang er ka i er twer shon la kpa? U zua sha kwagh u ior ve fe wuee, shi mbatwerev kpishi ve lumun a mi yôô? (Anz. 22:29) Shin kwagh la cii ka zwa nyohono? Alaghga i kaa ér twer shon due ma ijiir igen ica, inja er mbatwerev mbagenev mba a fa u ga nahan. Mnenge ngula nahan gba sha gbir je he? Doo u a na jighjigh a mini? Igbenda igen i sôron twer shin karen ior akaa ka i nungwa kwagh u mbaimev sha mi. Aluer kwagh ngu nahan yô, gba u se wa ikyo sha ci u Aôndo ta se icin ér se ‘de eren ahir’ shi lamen a ujijingi ga.—Lev. 19:26; Dut. 18:10-12.

17. Ka isharen i akuma akuma i nyi i doo u se lu a mini?

¹⁷ Mbahemenev mba shin itine mba sha ayange a mbaapostoli la yange ve tindi a washika u hange hange ugen hen atôônanongo agen. Mba ngeren akaa a gba u Mbakristu vea er yô, ve kure washika la sha mkaanem man, ér: “Aluer ne nyaghen akaa ne nahan yô, á kpe ne iyol je. Lu nen doo doo.” (Aer. 15:29) Se fatyô u geman mkaanem ma masetyô, ma kuren washika ne la ser, ma kaan ér “lu gbang gbang.” Sha kpôô yô, se soo ser i kpe se iyol, se ‘lu doo doo’ shi se lu gbang gbang, sha er se civir Aôndo wase u hemban la yô.

18, 19. Se fatyô u veren ashe u va zuan a nyi ken tar u he laa?

¹⁸ Er tar ne u lu a kure ga, shi se yen yô, se za hemen u gban angev. Se fatyô u veren ishima hegen ser i bee se angev sha ivande ga. Nahan kpa, Mpase 22:1, 2 tese ér shighe ngu van u a bee se hanma ityô i uange cii yô. Ken mpase u sha mnenge u apostoli Yohane la, a nenge a “ifi u mngerem ma umam” man “kon u uma” u ikya i u lu “sha u been akuraior angev” yô. Kwagh ne ngu ôron kwagh u ahu a ikyon i i sôron ior twer a mi nyian shin i a va zua a mi ken tar u he la ga. Kpa kwagh ne ngu ôron kwagh u akaa a Yehova a ne uumace mba ungwan imo na cii, sha ikyev i Yesu sha u ve zua a uma u tsôron la. Mimi yô, doo u se veren ashe a kwagh ne.—Yes. 35:5, 6.

¹⁹ Er se lu keghen mlu u ken hemen u doon tsung ne, doo u se fa ser kwagh wase asange asange gba Yehova ishima, kua shighe u se gbe angev la je kpaa. Se fatyô u lun a vangertiôr ser Aôndo wase una sue se hanma shighe u se gbe angev cii, er sue Davidi nahan. Se fatyô u kaan vough er Davidi nahan ser: “Kpa mo yô, U suem ken mimi wam, U veren mo sha ishigh Yough gbem.”—Ps. 41:12.