‘Za Nen, Za Gema Nen Akuraior Cii A̱ Hingir Mbahenen’

1, 2. Ka mbampin mba nyi ve dugh ken mkaanem ma Yesu ma i nger ken Mateu 24:14 laa?

ALUER ior lumun a vese shin vea hendan a vese taveraa kpa, ka ior kpuaa tseegh vea venda ér i fa nongo u Mbashiada mba Yehova sha kwagh u tom u pasen kwagh la tsembelee ga ye. Alaghga u due kwaghpasen u za zua a ior mba ve kaa a we ér, er ve lumun a akaa a se ne jighjigh a mi la ga nahan kpa, mba ne se icivir sha ci u tom u se eren la. Er se fe nahan, Yesu yange tsengaôron ér, a pase loho u dedoo u Tartor ne a tser tar cii. (Mat. 24:14) Kpa er nan ve se fe ser, loho u se lu pasen ne ngu kuren kwaghôron u profeti u Yesu laa? Aluer se kaa ser ka se se lu eren tom ne nahan, a lu iyolgengesee?

² Iniongo i kwaghaôndo kpishi nenge ér ka i i lu pasen Ivangeli shin loho u dedoo la ye. Nahan kpa, iniôngon ve la sar sha u pasen ior er yange ve fa Yesu la man u pasen kwagh ken adua shin sha redio shin sha televishen gayô sha Intanet tseegh. Mbagenev yô, kaa ér mba eren tom u pasen kwagh la sha u wasen mbagenev, er u sôron ve iangev shin tesen ve gbilin nahan. Kpa ka ityom i Yesu yange kaa a mbahenen nav ér ve eren laa?

 3. Mateu 28:19, 20 tese ér, gba kpee u mbadondon Yesu vea er akaa a inyiin a nyi?

³ Yange gba u mbahenen mba Yesu vea tema ijiir i môm, vea lu keghen ior ve va hen a vee? Mayange ga cii! Yesu yange nderen shin ku kera yô, a kaa a mbahenen nav uderi imôngo ér: ‘Za nen, za gema nen akuraior cii a̱ hingir mbahenen, eren nen ve batisema, tesen nen ve u kuran akaa a M we ne kwagh sha mi cii.’ (Mat. 28:19, 20) Nahan gba u se er akaa a anyiin ne. Gba u se gema ior vea hingir mbahenen shi se eren ve batisema shi se tesen ve. Kpa ka nyi i gbe u se vande erene? Yesu yange kaa ér: “Za”! Ortimen sha akaa a ken Bibilo ugen pase kwagh u tindi ne kaa ér: “Ishemberti i ‘za’ la ngi ôron kwagh u tom u i gbe u hanma or u nan jighjigh, nana er yô, a lu u za eren u sha godobi shin ken ityeku kpaa.”—Mat. 10:7; Luka 10:3.

 4. Tom u hingir “mbakôronior” la wa nyi kere?

⁴ Lu nyi Yesu soo ér mbahenen nav ve ere? Yange soo ér ve pasen kwagh asange asange shin soo ér ve kohol ve pasen kwagh imôngo? Er lu u or môm tseegh nana fatyô u pasen kwagh aren a “akuraior cii” ga yô, lu u ior kpishi vea kohol imôngo ve vea er tom ne ye. Shighe u Yesu lôhô mbahenen nav ér ve va hingir “mbakôronior” la, lu kwagh u ver ishima ér ve er vough je la. (Ôr Mateu 4:18-22.) Yesu lu ôron kwagh u orkôronishu môm tseegh u nan we inyam sha tsuwe, nan kende shin mnger, maa nan tem ving nan lu keghen ér ishu i va tôô i mena, nana tsuwe ga. Kpa lu tom u kôron ishu sha ukper, u yange lu zegetom u ashighe agen i gba u ior kpishi vea kohol imôngo, vea lu eren u ken mzough yô.—Luka 5:1-11.

 5. Ka mbampin unyiin mba nyi i gbe u se na mlumun sha mini, man ka sha ci u nyi?

⁵ Cii man se fa ior mba ve lu eren tom u pasen loho u dedoo la nyian sha u kuren kwaghôron u profeti u Yesu la yô, gba u se na mlumun sha mbampin mba unyiin mban:

• Ka loho u nyi i gbe u se pasene?

• Ka nyi i gbe u ia lu awashima wase u eren tom nee?

• Ka igbenda i nyi i gbe u se dondo sha u eren tom nee?

• Gba u se er tom ne se kighir hana man a kuma shighe nena?

Mbamlumun mba se na sha mbampin mban la vea wase se u fan ior mba ve lu eren tom u waren uma ne tseegh tsô ga, kpa shi vea wase se u seer taver ishima i se kange ser se za hemen u eren tom ne sha mimi la kpaa.—1 Tim. 4:16.

 6. U fatyô u lun a vangertiôr wer Mbashiada mba Yehova mba pasen loho u Yesu yange kaa ér ve pasen la sha ci u nyi?

⁶ Ôr Luka 4:43. Yesu yange pase “Loho u Dedoo u tartor” la, nahan a soo ér mbahenen nav kpaa ve er nahan. Ka unô ior ve lu pasen loho ne hen “akuraior cii”? Mlumun u sha mpin ne ngu ilian ga, ka Mbashiada mba Yehova tseegh ve lu eren tom ne ye. Mbahendan a ve mbagenev je kpa, fa nahan. Ikyav i tesen yô, pristi ugen u lu ormishen yô, yange kaa a Orshiada ugen ér, un zende ityar kpishi shi un pine Mbashiada mba un tagher a ve ken ityar la cii, loho u ve pasen yô. Nahan Mbashiada mbara kaa a na ér nyi? Pristi la kaa ér: “Yange ve tumbur kpishi je yô, ve gba zwa môm ér: ‘Ka Loho u Dedoo u Tartor.’” Jighilii yô, mkaanem ma pristi mara yange ma tese ér se “tumbur” cuku ga, kpa ma gema ma tese wang ér se mba eren kwagh ken mzough er i gbe u Mbakristu mba mimi vea eren nahan. (1 Kor. 1:10) Shi yange ve lu pasen mkaanem ma Iyoukura U Yôôn Tartor u Yehova la. I gema magazin ne ken ijô 254, shi hanma shighe u i nger magazin ne yô, ka i gber ukôpi nav i nôngo u kuman er miliôn 59 nahan. Kwagh ne na yô, magazin ne hemba samber sha tar a hanma magazin ugen cii.

 7. Er nan se fe ser mbahemenev mba Mbakristu mba Aiev mba pasen loho u Yesu yange kaa ér i pase la ga?

⁷ Mbahemenev mba Mbakristu mba Aiev mba pasen kwagh u Tartor u Aôndo ga. Ka vea ôron kwagh u Tartor yô, ve kpishi ve kaa ér ka kwagh u ken ishima i Orkristu. Mba wasen ior u fan ér Tartor u Aôndo la ka gomoti u sha, u Yesu Kristu a lu hemen ga, shi mba ôron ior ér ka Tartor la ua sôr mbamzeyol mba uumace cii ga, shi mba pasen ior ér ica a gba ga tsô ua kar a iferkwagh sha tar cii kera ga. (Mpa. 19:11-21) Kpa ka i hemba doon ve u umbur Yesu sha iyange i Kirimishi man Ista. Ka inja er mba a mkav cuku sha kwagh u Yesu una er shin tar shighe u una hemen la ga nahan. Ve fa loho u i gbe u a pase la ga, shi awashima u tom shon kpa ve fa ga

 8. Ka awashima u nyi or a lu eren tom u pasen kwagh la a mi ve a lu shami ga?

⁸ Ka nyi i gbe u ia lu awashima wase u eren tom u pasen kwagh laa? Doo u awashima wase a lu u ngohol inyaregh hen ior, maan uzegembaayough ga. Yesu yange kaa a mbahenen nav ér: “Ne ngohol gbilin, na nen di gbilin kpaa.” (Mat. 10:8) Gba u se eren kpenga a mkaanem ma Aôndo ga. (2 Kor. 2:17) Doo u mbapasen loho ne la vea lu keren mtsera ve sha tom shon ga. (Ôr Aerenakaa 20:33-35.) Er Yesu ôr kwagh ne wang nahan kpa, ukwaghaôndo kpishi yem ngohol inyaregh hen ior shin ve yem nôngon ér vea lu mbainyarev. Ka ve ngohol inyaregh kin sha u vea kimbi mbahemenev vev kua ior mbagenev kpishi mba ve tee ve tom la. Sha nahan yô, mbahemenev mba Mbakristu mba Aiev mba a inyaregh kpishi.—Mpa. 17:4, 5.

 9. Mbashiada mba Yehova tese ér mba eren tom u pasen kwagh la a awashima u vough nena?

⁹ Mbashiada mba Yehova mba zough a inyaregh nena? Ior ka ve sue tom ve la sha uiyua mba ve eren sha asema a ve la. (2 Kor. 9:7) Mba ngohol inyaregh ken Ayou a Tartor shin sha mbamkohol kpaa ga. Nahan kpa, ken inyom i kar la tseegh, Mbashiada mba Yehova pase kwagh nôngo u kuman ahwa biliôn 2 shi ve hen Bibilo a ior gbilin hemba iorov biliôn utaankarunyiin hanma uwer. Kwagh u kpiligh iyol yô, mba eren tom ne gbilin tseegh ga, kpa shi ka i doo ve u vihin inyaregh vev sha u eren u kpaa. Ortimen sha akaa ugen yange ôr kwagh u tom u Mbashiada mba Yehova ve eren la, ér: “Awashima ve u vesen yô, ka u pasen ior kwagh shi tesen ve. . . . Mba kimbin mbahemenev vev sha uwer ga, nahan kwagh ne pande inyaregh ki vihin kpishi je.” Sha nahan yô, ka nyi i lu awashima wase u eren tom nee? Jighilii yô, se mba eren tom ne sha asema ase sha ci u Yehova man mbawanndor a vese doo se ishima. Tom u se eren sha asema ase ne kure kwaghôron u profeti u ken Pasalmi 110:3 la. (Ôr.)

10. Ka igbenda i nyi Yesu man mbahenen nav dondo sha u pasen kwagha?

¹⁰ Ka igbenda i nyi Yesu man mbahenen nav dondo sha u pasen loho u dedoo? Yange ve za sha hanma ijiir i ior ve lu cii, sha ityembekasua man sha ugodobi kua sha uya vev kpaa. Tom u pasen kwagh ne yange u wa u za keren ior mba injaav sha uya uya kpa ker. (Mat. 10:11; Luka 8:1; Aer. 5:42; 20:20) Gbenda u pasen kwagh sha inja sha inja ne tese ér ve sangen a sange ga.

11, 12. Iniôngon i Mbakristu mba Aiev kaha a i Mbashiada mba Yehova sha gbaa u tom u pasen loho u dedoo la nena?

¹¹ Mbakristu mba Aiev mba pasen loho u Yesu kpa pase laa? Ishamior i ken mbaadua kpishi de ér i lu mbahemenev vev mba i kimbin ve sha uwer la tseegh ve pasen adua ye. Kpa er Mbahemenev mba Mbakristu mba Aiev ma ve ze hemen u ‘kôron ior’ seer a seer la yô, ka inja er hemba gban ve ishima u lun a ‘ior’ mba ve vande kôron la tseegh nahan. Jighilii yô, ashighe agen mbahemenev mbagenev ka ve taver ior vev ishima ér ve er tom u pasen kwagh la. Ikyav i tesen yô, ken mhii u inyom i 2001 la, Pope John Paul II kaa a ior mba ken adua na ken washika na ér ve pasen Ivangeli sha gbashima er apostoli Paulu nahan. Paulu yange kaa wener: “Aluer me ôr Loho u Dedoo ga yô, kwagh á tserem.” Maa Pope la shi kaa ér, i de lu ior kpuaa tseegh mba i tsaase ve la ve eren tom u pasen kwagh ne ga, kpa hanma or u nan ze adua cii nan eren u. Nahan kpa, ka iorov kpuaa tseegh ve dondo kwaghwan la ye

¹² Kpa Mbashiada mba Yehova di ye? Ka ve tseegh ve pasen ér Yesu yange hii u hemen ken inyom i 1914 la ye. Er Yesu yange kaa nahan, tom u pasen kwagh la ngu ve kwagh u vesen. (Mar. 13:10) Takerada ugen u u er kwagh u kwaghaôndo yô, kaa ér: “Mbashiada mba Yehova yô, tom u pasen kwagh la hemba gban ve kwagh a akaa agen cii.” Takerada la shi kaa ér: “Shighe u ve zough a or u ijen shin mtswenem ma ker nan, shin nan gbe angev yô, ka ve nôngo ve wase nan, . . . kpa mayange mba hungur er ve lu a tom u vesen u pasen ior loho u Aôndo u sha kwagh u mkurtar u a lu van la, man kwagh u i gbe hange hange u ior vea er sha u zuan a myom la ga.” Mbashiada mba Yehova za hemen u pasen loho la sha u dondon igbenda i Yesu man mbahenen nav pasen ior kwagh la.

13. Gba u a er tom u pasen kwagh ne a za kighir hana?

¹³ Yesu yange tese er a pase kwagh a za kighir yô. A kaa ér a pase loho u dedoo ne a ‘tser tar cii.’ (Mat. 24:14) Nahan gba u mbahenen nav vea gema ‘akuraior cii’ aa hingir mbahenen. (Mat. 28:19, 20) Kwagh ne tese ér gba u a er tom ne a tser tar cii.

14, 15. Ka nyi i tese ér Mbashiada mba Yehova kure kwaghôron u profeti u Yesu yange ôr, u tesen er a pase kwagh a za kighir laa? (Nenge ufoto mba ve lu sha mhii u ngeren ne la.)

¹⁴ De se time sha akaa a mimi kpuaa, a a wase se u fan er Mbashiada mba Yehova ve kur kwaghôron u profeti u Yesu yange ôr, u tesen er a pase kwagh a za kighir la. Mbahemenev mba kwaghaôndo mba ken ucôôci kposo kposo kuma iyenge 600,000, ken tar u Amerika, ape Mbashiada mba Yehova mbagenev ve hembe ingyegh 1,200,000 la. Adua u Mbafada ngu a upristi hemba iorov 400,000 nahan tseegh sha tar cii. Kpa gema tôô ase ingyegh kin kar sha iyenge i Mbashiada mba ve lu eren tom u yôôn loho u Tartor u u dugh ken Bibilo la. Mbashiada mba Yehova mba hemban miliôn anigheni sha tar cii, mba pasen kwagh ken ityar 240. Kwagh ne tese wang ér, Mbashiada mba Yehova mba pasen loho u dedoo sha tar cii, nahan kwagh ne ngu van Yehova a icivir man iwuese!—Ps. 34:1; 51:15.

¹⁵ Er se lu Mbashiada mba Yehova yô, sar se u pasen loho u dedoo ne aren a ior kpishi er se fetyô la, cii man mkur una va ye. Kwagh ne na yô, ka se gema shi se gber ityakerada i pasen Bibilo kpishi sha er se er tom ne a mi yô. Se kar ior ityakerada man umagazin man utrak kua ikyatakerada i lôhôn ior mkohol u vesen man ku u umbur u Yesu ukôpi umiliôn imôngo gbilin. Se gber ityakerada kposo kposo ken ijô i hemban 700. Shi se gber ukôpi mba Bibilo i New World Translation of the Holy Scriptures la hemba miliôn 200, ken ijô i hemban 130. Inyom i kar la tseegh, se gber ityakerada i pasen Bibilo nôngo u kuman miliôn 4 man tiôn nahan. I gema akaa ken ijô i hemban er 750 nahan, i ver sha ijiir yase i sha Intanet la. Kwagh ne tese wang ér, ka Mbashiada mba Yehova tseegh ve lu eren tom u kpilighyol ne ye

16. Er nan ve se fe ser ka Mbashiada mba Yehova ve lu a jijingi u Aôndo?

¹⁶ Gba u a za hemen u eren tom u Yesu tsengaôron ér i er ne, a kuma shighe nena? Yesu yange kaa ér a pase kwagh sha tar cii, maa “mkur una kuma.” Nongo u kwaghaôndo ugen ngu u u ze hemen u pasen loho u dedoo ken ayange a masejime ne, er se nahan yôô? Ei. Ka sea due kwaghpasen yô, ior mbagenev ve kaa a vese ér: “Ka se se lu a icighan jijingi ye, kpa gema ka ne ne lu eren tom u pasen kwagh la ye.” Kpa er i lu se se lu eren tom u pasen kwagh ne her yô, tese wang je ér ka se se lu a jijingi u Aôndo la ye. (Aer. 1:8; 1 Pet. 4:14) Ashighe agen, ior mba ken iniongo i kwaghaôndo igen ka ve nôngo ér vea pase kwagh er Mbashiada mba Yehova ve eren hanma shighe nahan, kpa kwagh u injaa a due ken iniôngon ve la ga. Mbagenev ka ve er tom u mishen la sha anshighe kpuaa, maa ve de u ve yem eren akaa a ve. Mbagenev yô, alaghga ka ve nôngo ve pasen kwagh sha uya uya, kpa i gema i lu loho u Tartor la ve pasen ga. Sha nahan yô, ka tom u Yesu yange hii u eren la ve lu eren ga.

17, 18. (a) Se na jighjigh ser ka Mbashiada mba Yehova ve lu pasen loho u dedoo u Tartor la nyian sha ci u nyi? (b) Er nan ve se fetyô u zan hemen u eren tom u pasen kwagh nee?

¹⁷ Nahan ka unô jim ve lu eren tom u pasen loho u Tartor la nyiana? Se fatyô u ôron vangertiôr ser ka “Mbashiada mba Yehova!” Se mba a vangertiôr nahan sha ci u nyi? Sha ci u se mba pasen loho u Yesu kpa yange pase la, ka loho u dedoo u Tartor la je la. Shi ka se dondon igbenda i vough sha u za pasen ior kwagh. Se mba eren tom wase u pasen kwagh ne a awashima u vough, inja na yô, se mba eren u sha ci u ior doo se ishima, ka inyaregh se lu keren ga. Tom wase ne hemba kehen a hanma tom ugen cii, sha ci u se mba aren a hanma ikyurior man hanma zwa cii. Shi hanma inyom cii, se za nen hemen u eren tom ne a u gban uwegh shio, zan zan mkur una kar van.

¹⁸ Tom u ior mba Aôndo ve lu eren ken ayange a masejime ne la ka kwagh u kpilighyol kpishi. Kpa er nan se fetyô u eren tom u pasen kwagh ne nahana? Apostoli Paulu na mlumun sha mpin ne ken washika u yange nger hen Mbafilipi la, ér: “Ka Aôndo je A lu eren tom ken a ven ye, sha u kwagh u a doo Un la a̱ sar ne, shi ne̱ eren sha mi kpaa.” (Fil. 2:13) Sha nahan yô, Ter wase u lun a dooshima la a za hemen u eren tom ken a vese, nahan se nôngo sha afatyô wase cii se kure tom u ivangeli la vough.—2 Tim. 4:5.