Ka Dooshima u Nyi, Ka a Va Or a Msaanyol u Mimi?

 1. Shighe u se lu ker ne kaha kposo sha ci u nyi?

SE MBA ken shighe u a kaha kposo a hanma shighe ugen u uumace ve lu ker cii yô. Bibilo tsengaôron ér, Yehova ngu kohol ‘zegeikpelaior i i dugh ken hanma ikyurior man hanma nongo man hanma nongoior man hanma zwa’ la. Mba i kohol ve ve hingir “ikyurior i ageegh” la, ve hemba iorov miliôn anigheni, mba ‘eren Aôndo tom tugh man tetan’ saan saan. (Mpa. 7:9, 15; Yes. 60:22) Mayange je, ior mba a kohol kpishi mba ve soo Aôndo man uumace mbagenev nahan ga.

 2. Ka inja dooshima u nyi ior mba ve lu paleghaa a Aôndo la ve lu a mini? (Nenge foto u a lu sha mhii u ngeren ne la.)

² Nahan kpa, Bibilo tsengapasen ér sha ayange a ase ne, ior mba ve lu paleghaa a Aôndo la, vea lu a dooshima ugen inja kposo; vea lu mba wan ayol a ve ikyo tseegh. Apostoli Paulu yange nger ér: ‘Ken ayange a masejime yô, ior vea hingir mbawan ayol a ve ikyo tseegh man mba inyaregh ki doo ve ishima, man mba iemberyolough i doo ve ishima, kpa Aôndo yô, a doo ve ishima ga la.’ (2 Tim. 3:1-4, NW) Dooshima u or soon iyol i nan tseegh ne kaha kposo, a dooshima u Mbakristu la. Ior ka vea ver ishima sha u eren akaa a keren mtsera ve tseegh yô, mba zough a msaanyol u ve soo ér vea zua a mi la ga. Sha kpôô yô, dooshima ne na yô, ior mba shin tar ne kpishi soo ayol a ve tseegh, nahan hingir “ican” kpishi u eren kwagh a ve.

 3. Ka nyi se lu timen sha mi ken ngeren ne, man ka sha ci u nyi?

³ Paulu yange fa je ér, ieren i or soon iyol i nan tseegh la ia va samber wuee, nahan kwagh ne una bende a Mbakristu sha gbenda u bo. Sha nahan yô, a ta se icin ér se “nyagh” ior mba ve lu a imba dooshima ne la. (2 Tim. 3:5) Nahan kpa, se fatyô u palegh u eren kwagh vea ambaaior ne vindi vindi ga. Nahan se er nan ve se fatyô u nyaghen ieren i taregh i i kase se ne, shi se nôngo tsung se eren ishima i Yehova, Aôndo u dooshima laa? De se tôô dooshima u Aôndo la se kar nen sha dooshima u i er kwagh na ken 2 Timoteu 3:2-4 la. Aluer se er nahan yô, kwagh la una wase se u gbidyen kwar sha dooshima u i gbe u se lu a mi la shi sôron un, ka imba dooshima u a ve or a mkom man msaanyol u mimi la je la.

 4. Aluer or soo iyol i nan sha gbenda u vough yô, ka kwaghbo ga sha ci u nyi?

⁴ Icighan jijingi yange mgbegha apostoli Paulu nger ér: ‘Ior vea hingir mbawan ayol a ve ikyo tseegh.’ Aluer or soo iyol i nan yô, ka kwaghboo? Ei, ka kwaghbo ga, gba hange hange u se soo ayol a ase sha gbenda u vough. Yehova gba se nahan. Yesu kaa ér: ‘Or u nan we ndor a we yô, nana̱ doo u ishima er we iyol you nahan.’ (Mar. 12:31) Aluer se soo ayol a ase ga yô, se fatyô u soon orwanndor a vese ga. Shi Ruamabera kaa ér: ‘Noov kpaa, kasev vev ve̱ doo ve ishima keng er ayol a ve nahan. Or u kwase u nan a doo nan ishima yô, ka iyol i nan je i doo nan ishima ye. Gadia mayange ma or nana kôr iyol i nan ihyom ga, kpa nan koson i shi nan kor i kpaa.’ (Ef. 5:28, 29) Sha nahan yô, aluer or soo iyol i nan sha gbenda u vough yô, ka kwaghbo ga.

 5. U fatyô u pasen kwagh u mba ve soo ayol a ve i za kar ikyaa inya la nena?

⁵ Dooshima u or soon iyol i nan tseegh u i ter ken 2 Timoteu 3:2 la ka dooshima u vough ga. Ior mba ve soo ayol a ve i za kar ikyaa inya la, ka ve nenge ayol a ve i hemba er ma ve nenge la. (Ôr Mbaromanu 12:3.) Kwagh u a hembe gban ve kwagh ken uma cii yô, ka ayol a ve tseegh. Kwagh u mbagenev ka a gba ve kwagh cuku tseegh tsô. Shighe u akaa a kera ze sha inja ga yô, ka ve yem u nan mbagenev ibo, a u ma ve lumun ibo la. Takerada u pasen akaa a ken Bibilo ugen tôô mba ve we ayol a ve ikyo tseegh la, kar sha ‘adendem u ka a hure iyol na a hingir er bor nahan, sha er ice na i lun hur hur la i na i tsee un iyol, kpa a gema a tim asar na ken won, sha ci u mbagenev la.’ Mba ve soo ayol a ve tseegh nahan la, ka saan ve iyol sha mimi ga.

 6. Aôndo ka una doo se ishima yô, ka nyi ka i due kere?

⁶ Mbatimen sha akaa a ken Bibilo kaa ér, kwagh u or soon iyol i nan tseegh la, ka ieren i bo i apostoli Paulu yange vande teren cii ve mase teren aeren a bo agen a a va dumbur ken ayange a masejime ne yô, sha ci u aeren a bo agen ne cii due ka ken ieren ne. Kpa ior mba Aôndo a doo ve ishima yô, ka ve lu a aeren a dedoo la. Bibilo kaa ér aeren shon yô, ka msaanyol man bem man ishima i wan man sar sar man mlu u dedoo man jighjigh man ishima i legh legh man u kôron iyol tsaha. (Gal. 5:22, 23) Orpasalmi yange nger ér: ‘Saan ior mba Yehova A lu Aôndo ve la, iyol.’ (Ps. 144:15) Yehova ka Aôndo u sar sar, nahan ior nav kpa, mba dondon ieren na ne. Kwagh ugen yô, ior nav mba er ior mba ve soo ayol a ve tseegh, shi ve hembe veren ishima ve sha u ngohol a ngohol kwagh tseegh la ga, ka i saan mbacivir Yehova iyol u nan ayol a ve sha u wasen mbagenev.—Aer. 20:35.

 7. Ka mbampin mba nyi vea wase se u timen sha dooshima u se lu mi sha Aôndo laa?

⁷ Se er nan ve se fa aluer iyol yase kar ngi hemban doon se ishima a Aondo? Nenge ase kwaghwan u a lu ken Mbafilipi 2:3, 4 la. Avur ne kaa ér: “De eren nen kwagh sha u wan ayol a en ikyo tseegh shin sha u keren icivir i gbilinigh kpaa ga, kpa hide nen ayol a en ijime; hanma or nana̱ nengen ér orgen hemba nan yô. Hanma or nana de kera waan akaa a nan iyol i nan ikyo tseegh ga, kpa nana wa akaa a mbagenev ikyo kpaa.” Se fatyô u pinen ayol ase ser: ‘M dondon kwaghwan ne ken uma wam kpa? M keren u eren ishima i Aôndo sha mimi kpa? M nôngon mer me wase mbagenev ken tiônnongo man ken kwaghpasen kpa?’ Ka i lu se zange u nan ayol ase ga. Ka i gba u se nôngo kwagh tsung shi se de akaa agen aa kar se ve se er nahan ye. Kpa ka sea fa ser Tor u Hemban sha won cii la lumun se yô, i saan se iyol tsung, i hemba hanma kwagh ugen cii.

 8. Dooshima u mbagenev ve lu a mi sha Aôndo la mgbegha ve u eren nyi?

⁸ Dooshima u se lu a mi sha Aôndo la mgbegha mbagenev ve de ityom i ma i ne ve inyaregh kpishi la kar ve sha er vea seer civir Yehova a ishima i môm yô. Anmgbian u kwase ugen ken tar u Amerika, u i yer un ér Ericka yô, eren tom u tweregh ken iyouci. Kpa er yange ma a lu keren u eren tom u sôron ior twer ken iyouci, u ua na una lu sha ian i civirigh la yô, er nahan ga, kpa gema tsua u eren tom pania shi a er tom pania ne ken ityar kpishi vea nom na. Hidi henen sha kwagh ne yô, a kaa ér: “Akaa kpishi a a er se shighe u se lu wasen hen haregh u i lamen zwa ugen kua azende a se ker vea mbagenev la na yô, se zua a msaanyol u mimi ken uma. M eren twer ken iyouci her, kpa er m hembe eren tom a shighe wam man agee a am u been ior angev mbu ken jijingi shi veren ishima sha akaa a ken tiônnongo yô, kwagh ne vam a msaanyol u mimi man mkom jim jim.”

 9. Mba inyaregh ki doo ve ishima la mba zough a msaanyol ga sha ci u nyi?

⁹ Paulu yange nger ér, ior vea hingir mba ‘inyaregh ki doo ve ishima’ yô. Ken anyom a karen la, pania ugen ken tar u Ireland, pase orgen kwagh sha kwagh u Aôndo. Been yô, or la za uwegh shin ikpa na, dugh inyaregh shimi kende a mi sha, maa kaa sha ihyagh nahan ér: “Ka aôndo wam je ne!” Er ior kpishi vea fatyô u pasen ishima ve wang sha ikyaa ne ga nahan kpa, tar ne iv a ior mba inyaregh ki doo ve ishima kua akaa a or a fatyô u yamen a mi la. Kpa, Bibilo ta se icin kaa ér: “Or u azurfa a doo nan yô, azurfa una kuma nan ga; u nan keren inyaregh ki ngeen kpaa, mtsera una kuma nan ga.” (Orpa. 5:10) Hanma shighe yô, ambaaior ne nga a soo ér aa seer zuan a inyaregh kpishi, shi er ve lu nôngon ér vea kohol ki yô, ve gema ve va a “atsan atô kposo kposo” sha ayol a ve.​—1 Tim. 6:9, 10.

10. Lu nyi Agur nger sha kwagh u lun a inyaregh kpishi man ibanavee?

¹⁰ Jighilii yô, se cii kwagh gba se a inyaregh. Inyaregh ka ki wa nan or mkor. (Orpa. 7:12) Kpa aluer or ngu a inyaregh akuma akuma ki kuren mbamgbe mba nan mba hange hange a mi tseegh nahan, a saan nan iyolo? Een, a saan nan iyol! (Ôr Orpasenkwagh 5:12.) Agur wan u Yake yange nger ér: “De nem ibanave ga, shin inyaregh kpishi kpaa ga, kosom sha kwaghyan u una kuma sha gbayol wam yô.” Taver se u fan ityôkyaa i na ve Solomon soo u kungun ican ga la ze. Yange za hemen pase ér, un soo ér ican i na una hingir u za iin ga, sha ci u iv ka mbu va Aôndo a ihyeen. Kpa er nan ve er msen ér un soo u lu a inyaregh kpishi ga? Yange nger ér: “Sha er m̱ de idi m̱ nyiman We, m̱ kaan mer: Ka an nan lu TERE? Ga.” (Anz. 30:8, 9) Alaghga tsô, we kpa u fa ior mba ve suur sha inyaregh ki ve lu a mi la, i lu sha Aôndo ga yô.

11. Ka kwagh u nyi Yesu yange wa sha kwagh u inyara?

¹¹ Mba inyaregh ki doo ve ishima la vea fatyô u eren ishima i Aôndo ga. Yesu yange kaa ér: “Or môm môm ngu u nana fatyô u eren uter uhar tom ga; gadia nana kôr ugen ihyom, ugen á doo nan ishima, shin nana var ken ugen, nana laha ugen. Ne fatyô u eren Aôndo tom kua inyaregh kpaa ga.” Yange hii mkaanem man sha u kaan ér: “De koson nen akaa a injaa sha ci wen shin tar ne hen ape ivina kua nduran ve vihin kwagh kera, mbaiv kpaa ka ve time ve iin ne ga; kpa koson nen akaa a injaa sha ci wen Sha, ape ivina shin nduran ve vihin kwagh ga, mbaiv kpaa ve iin ga la.”—Mat. 6:19, 20, 24.

12. Aluer or ngu a akaa ken uma akuma akuma yô, a hemba taver nan ga u civir Yehova nena? Tese ikyav.

¹² Ior kpishi kav nahan ér, kwagh u lun a akaa ken uma akuma akuma la ka a seer nan ve msaanyol tseegh ga, ka a na ve hemba zuan a shighe u civir Yehova kpaa. Anmgbian ugen ken tar u Amerika, u i yer un ér Jack yô, yange tee zegeya na man zege kômpeni na sha ci u fa je ér, aluer un er nahan yô, una zua a ian i eren pania vea kwase na. A umbur nahan ér: “Yange taver se kpishi u teen ya wase u doonashe la, kua kômpeni wase kpaa. Nahan cii kpa, anyom a karen kpishi ken ijime la, mea yar tom mea kur yô, ishima i vihim ker sha ci u mbamzeyol mba sha ijiirtom. Hanma shighe yô, i saan kwase wam u lu eren pania la iyol. Yange a kaa ér: ‘M ngu a orvesen u hemban cii!’ Hegen u mo kpa m lu eren pania ne, se cii se mba eren Orvesen shon môm tom, ka Yehova je la.”

13. Se fatyô u gbidyen kwar sha gbenda u se nengen inyaregh la nena?

¹³ Aluer se soo u gbidyen kwar sha gbenda u se nengen inyaregh la yô, alaghga a gba u se time se nenge er se fatyô u nan mlumun sha mbampin mban yô: ‘M na jighjigh sha mimi shi m eren kwagh sha gbenda u tesen ér m lumun a kwagh u Bibilo i er sha kwagh u inyar la kpa? Inyaregh ki keren ka kwagh u hiihii ken uma wamaa? Uyôughyôughmbaakaav hemba gban mo kwagh a mlu wam a Yehova man ioro? M ngu suur sha Yehova sha mimi mer a nenge sha mbamgbe av kpa?’ Se fatyô u lun a vangertiôr ser, mayange je Yehova una va mba ve veren ashe sha a na la ahenge ga.—Mat. 6:33.

14. Ka mnenge u sha kwagh u iemberyolough u nyi, a lu u akuma akuma?

¹⁴ Ior kpishi nyian ne ‘iemberyolough doo ve ishima’ er yange i tsengaôron nahan. Er kwaghbo a lu sha kwagh u or lun a mnenge u akuma akuma sha kwagh u iyol i nan man inyaregh ga nahan, kape kwaghbo a lu sha kwagh u or lun a mnenge u akuma akuma sha kwagh u iemberyolough ga je la. Yehova soo ér se palegh u eren akaa a doon iyol yase shin se palegh u eren akaainjaa a a va se a msaanyol la ga. Bibilo taver mbajighjigh ishima ér: “Yô, ya kwaghyan wou a iember, ma wain wou a iember ken ishima.”—Orpa. 9:7.

15. Ka iemberyolough i nyi i ter kwagh u i ken 2 Timoteu 3:4?

¹⁵ Timoteu u sha Uhar 3:4 ôr kwagh u mba iemberyolough i doo ve ishima, kpa Aôndo yô, a doo ve ishima ga la. Umbur wer ivur la kaa ér iemberyolough ia hemba doon ior ishima a Aôndo ga, inja er vea wa lun a dooshima sha a na nahan ga. Ivur la kaa ér, ‘kpa Aôndo yô, a doo ve ishima ga la.’ Orfantakerada ugen nger ér: “[Ivur] ne ngi kaan ér, Aôndo kpa vea wa soon un ga. Ivur ne ngi ôron jighilii nahan ér cuku tsô kpa Aôndo una doo ve ishima ga.” Kwagh ne ka icintan i vesen hen mba ve lu a ieren i soon iemberyolough za karen ikyaa inya la! Ishember i mba “iemberyolough i doo ve ishima” la, ngi ôron kwagh u ior mba “ugurgurmbaakaav mba uma ne” ve ngohol ve ishima, nahan ve tesen ieren ne “sha ijende ve la.”—Luka 8:14.

16, 17. Ka ikyav i nyi Yesu ver sha kwagh u iemberyolougho?

¹⁶ Yesu tese wang ér un ngu a mnenge u akuma akuma sha kwagh u iemberyolough. Yange za “iniongo i kwasehe” man “zegeiniongo” igen. (Yoh. 2:1-10; Luka 5:29) Er wain yina hen iniongo i kwasehe i Yesu za la yô, a gema mngerem hingir wain sha ivande. Shi sha shighe ugen la, Yesu venda mnenge u ior mba ve nengen ér ve hemba perapera, mba ve lu puun un ér ngu yan kwagh shi man kwagh la.—Luka 7:33-36.

¹⁷ Nahan kpa, Yesu uve ityough u eren iemberyolough ga. Yange ver Yehova hiihii shi er tom kpoghuloo sha ci u mbagenev. Er soo ér ior kpishi ve war yô, wa ishima a ku u nyoon tsung sha kon. Yesu ngur lamen a ior mba ve soo u dondon un ijime la yô, a kaa ér: “Saan ne iyol zum u ka a heen ne, a tôvon ne a ican, man a teren ne sha hanma inja i ifer sha aie, sha ci Wam yô, ember nen, i̱ saan ne ken ishima tsung, gadia injar yen vese Sha, gadia kape ve tôv uprofeti mba ve vande a ven la a ican je la.”—Mat. 5:11, 12.

18. Ka mbampin mba nyi vea wase se u gbidyen kwar fan aluer iemberyolough doo se ishima kpishi yôô?

¹⁸ Se fatyô u gbidyen kwar fan aluer iemberyolough doo se ishima kpishi nena? Doo u se pine ayol a ase mbampin mban: ‘Iemberyolough hemba gban mo kwagh a mbamkombo man kwaghpasenaa? M kegh iyol u den mer akaa agen a karem sha er me er Aôndo tom kpa? Ka mea tsuan akaa a me er sha u zuan a msaanyol yô, m henen sha gbenda u Yehova una nenge akaa a m tsough u eren la kpa?’ Aluer Aôndo doo se ishima sha mimi yô, gba u se wa ikyo sha er se palegh akaa a se fe ser aa vihi un ishima la tseegh tsô ga, kpa se palegh akaa a se hen ser alaghga aa doo un ga la kpaa.—Ôr Mateu 22:37, 38.

19. Ka unô vea fatyô u zuan a msaanyol u mimi la mayange ga?

¹⁹ Tar u Satan u u ne uumace ve ye ican i kom anyom 6,000 ne, ngu yemen u za timin. Tar ne iv a ior mba ve soo ayol a ve tseegh man inyaregh kua iemberyolough i za kar ikyaa inya yô. Ior mban hemba veren ishima sha kwagh u vea fatyô u zuan a mi la, shi asaren a ve hemba gban ve kwagh ken uma cii. Mayange je, ambaaior ne aa fatyô u zuan a msaanyol u mimi la ga. Kpa orpasalmi gema nger kwagh ugen kposo, ér: “Saan or u Aôndo u Yakob A lu iwasen i nan la, iyol, u ishimaverenkeghen i nan kpaa, i lu sha TER, Aôndo u nan yô.”​—Ps. 146:5.

20. Dooshima u u lu a mi sha Aôndo la va u a msaanyol nena?

²⁰ Dooshima u ior mba Yehova ve lu a mi sha a na la ngu taver seer a seer hen atô wase, shi hanma inyom yô, iyenge yase ka i seer a seer. Kwagh ne ka ikyav i tesen wang ér Tartor u Aôndo ngu hemen shi ica a kera gba ga tsô, ua va a averen a kpilighyol shin tar. Ka se zua a msaanyol u mimi la sha u eren ishima i Aôndo, man sha u fan ér se mba eren ishima i Uhembansha la. Shi mba Yehova a doo ve ishima la, vea lu saan saan gbem sha won! Ken ngeren u a dondo ne, se lu timen sha aeren agen a ka se hingir u lun a mi shighe u se soo ayol ase tseegh la, shi se nenge er aeren ne a kaha kposo a aeren a mbacivir Yehova ve lu a mi la yô.