Iti i Aôndo Ér Ana?

Shighe u u lu nôngon wer u fa or yô, mpin u hiihii u alaghga u pine nan yô ka, “Iti you ér ana?” Aluer u pine Aôndo mpin ne nahan una na mlumun nena?

“Ka Mo [Yehova], ka iti yam je ne.”—Yesaia 42:8.

Iti ne ngi hegh ken ato ouwee? Alaghga ngi u hegh, sha ci u mbageman Bibilo kpishi ka vea alagh a nger iti i Aôndo ken Bibilo je kpa, i lu sha ajiir cuku tseegh. Ashighe kpishi ka ve gema ve nger ititom na i “TER” la sha ajiir a yange i nger iti na la. Nahan kpa, ken zwa u hiihii u i nger Bibilo ker la, i nger iti i Aôndo ker sha ajiir kposo kposo kuma er 7,000 nahan. I nger iti shon sha asangaabaacaa anyiin a ken zwa Heberu, a a zough sha asangaabaacaa a ken zwa buter aa YHWH shin JHVH la yô, man ken zwa Buter yô, i gema a ér “Jehovah” ica i gba hegen.

Iti i Aôndo ngi ken Ruamabera u ken zwa Heberu la, ken mhii zan zan mkur shi ngi ken Ubibilo mbagenev kpishi mba ior ve gem la kpaa

Iti ne ngi Aôndo iyolna a inja. Or môm kpa ii Aôndo iti ne ga; a ii iti ne iyolna. Yehova pase wener: “Ingin ka iti Yam gbem sha won je ne, ka sha i je á umbur Mo sha ikyov ikyov ye.” (Ekesodu 3:15) Ken Bibilo cii, iti i Aôndo kpôô kpôô i Yehova la hemba ngeen ker a atiatom a na, er Uhembanagee man TER shin Aôndo kua amba a tii la nahan. Shi i hemba ngeen ker a ati a ior, er Aberaham man Mose man Davidi shin Yesu nahan. Kwagh ugen yô, Yehova soo ér i fa iti na. Bibilo kaa er: “M ande hen Aberaham man Isaka man Yakob, Mo Aôndo Uhembanagee, kpa iti Yam i TER (ka Yehova je la) ne yô, ve fa ga.”—Ekesodu 6:3.

Iti ne ngi Yesu a inja. Ken msen u i yer ér Msen u Ter Wase la Yesu tese mbadondon un ér ve eren msen sha mkaanem man, ér: ‘I̱ tsegha iti You.’ (Mateu 6:9) Yesu iyol na yange er msen hen Aôndo ér: ‘Tere, na iti You icivir.’ (Yohane 12:28) Kwagh u nan iti i Aôndo icivir la, lu kwagh u hiihii ken uma u Yesu, sha ityôkyaa ne yô, a kaa ken msen wener: “M pase ve iti You; Me shi Me pase ve i kpaa.”—Yohane 17:26.

Iti ne ngi mba ve fe Aôndo la a inja. Ior mba Aôndo mba sha ayange a tsuaa la, kav er mkor man myom ve gba zua vea iti i Aôndo, i i dugh kposo a hanma iti cii la yô. “Iti i TER ka gôgôyou u taven u taver, orperapera ka nan yevese nan ta kimi, nan war.” (Anzaakaa 18:10) “Hanma or u nan yer sha iti i TER yô, nana war.” (Yoel 2:32) Bibilo tese ér iti i Aôndo ia na mba ve civir un la vea due kposo. “Gadia ior cii mba zenden hanmô ve ken iti i aôndo u nan, man se yô, sé zende ken iti i TER, Aôndo wase, gbem sha won.”—Mika 4:5; Aerenakaa 15:14.

Iti la na Aôndo due kposo a mbaaôndo mbagenev. Mbafantakerada kpishi kure ikyaa ér inja i iti i Yehova la ér, “Gem Ne Kwagh Lu.” Yehova yange ta iwanger sha kwagh u inja i iti na la shighe u lu ôron kwagh na sha mkaanem man a Mose la, ér: “M NGU ER M LUUN YÔ.” (Ekesodu 3:14) Iti i Aôndo ôr se kwagh na hemba di u pasen tseegh tsô ér ka un a gbe akaa cii la. Iti na tese ér ngu a tahav mbu geman iyolna man akaa agen cii hingir kwagh u a soo la, sha u kuren awashima na. Er atiatom a Aôndo la alaghga a pase iantom na shin tahav nav gayô agee a na nahan kpa, ka iti na i Yehova la tseegh i pase or u a lu man kwagh u una fatyô u hingir la cii ye.

Iti la tese ér kwagh wase gba Aôndo ishima. Inja i iti i Aôndo la tese ér umace kua akaa a a gbe la cii doo un ishima tsung. Kwagh ugen yô, er Aôndo a ne i fe iti na yô, tese ér a soo ér se fa un. Kera ga je kpa, Aôndo vande pasen iti na ica gba cii ve i va mar se shin se va hii u henen sha kwagh u i ye. Kwagh ne tese wang ér, Aôndo soo ér se nenge un er ka aôndo u i fe un ga shin a gbe ica a vese nahan ga, kpa a soo ér se nengen un er un ngu Or kpôô kpôô u se fatyô u kporom ikyua a nan yô.—Pasalmi 73:28.

Aluer se mba yilan Aôndo sha iti na yô, a tese ér kwagh na gba se ishima. Ikyav i tesen yô, alaghga u kaa a or u u soo wer nana va lu ijende you la wer, nana sughun we sha iti you kpôô kpôô. Aluer or la nan ngu vendan u sughun we sha iti you nahan, a lu u ken ishima nena? Shighe a karen yô, alaghga u gba henen wer or la nan soo u kporom ikyua a we sha mimi je kpa-o. Kape Aôndo kpa i lu je la. Yehova ôr se uumace iti na, nahan a taver se ishima ér se yilan un sha i. Ka sea yilan un sha iti na yô, se tese Yehova ser se soo u kporom ikyua a na. Sha ci u a fa “mba ve civir iti Na yô”!—Malaki 3:16.

Kwagh u henen fan iti i Aôndo la, ka kwagh u injaa u hiihii u or a er sha u fan Aôndo je la. Kpa gba u se kighir heela ga. Gba u se fa Or u iti ne i lu i nan la. Shi gba u se hen se fa or u nan lu la.