Tese I Kôr Orhenen Wou la ken Ishima
1 Cii man Yesu kôndo yem sha yô, a kaa a mbahenen nav ér ve tese mbagenev u “kuran” akaa a un we ve kwagh sha mi cii. (Mat. 28:19, 20) Aluer ka u or nana ‘kura’ akaa a Kristu a tese la yô, saa ityesen shon ia kôr nan ken ishima. (Ps. 119:112) Ú sagher ishima i or u ú lu henen Bibilo a nan la nena?
2 Er Msen Yehova A̱ Tese Ú Gbenda: U geman ior hingir mbahenen la ka tom u Aôndo. Ka iveren na i lu hange hange u zuan a zakera ye, ka fa-gege wase ga. (Aer. 16:14; 1 Kor. 3:7) Sha nahan yô, ka hange hange u sônon ser Yehova a̱ wase se se tese mbagenev mimi.—Yes. 50:4.
3 Kav Kwagh u Orhenen la Nan Ne Jighjigh a Mi Yô: U fan kwagh u ior ve ne jighjigh a mi man ityôkyaa i í ne ve ve ne kwagh shon jighjigh la una fatyô u nan se mkav u fan kwagh u se ôr ve se ar a ishima ve yô. Er nan ve ma ityesen igen i doo orhenen la yumu? Kanyi yange i na ve kuma nan ér a fatyô u nan kwagh shon jighjighi? Imba mfe la ia fatyô u wasen se u ôron kwagh sha mkav.—Aer. 17:22, 23.
4 Nôngor Kwaghôron sha Adondo Adondo, A̱ Har sha Ruamabera: Gba u mimi una gba iliam ken ato a orhenen la. (Aer. 17:24-31) Gba u se na imo wanger wanger sha u pasen ityôkyaa i ishimaverenkeghen i i lu ken a vese la. (1 Pet. 3:15) Nahan kpa, eren kwagh ne sha gbenda u kundu kundu, a ishima i wan kpaa.
5 Nyôôso Ityesen Shon sha Anzaakaa: Anzaakaa nga ne kwagh hembe heghem orhenen la u kaven tseegh ga, kpa shi ka a sagher nan ken ishima kpaa. Ka a kôr nan ken ishima man ken mhen kpaa. Yesu yange yar tom a á acin imôngo. (Mar. 4:33, 34) Sha mimi yô, injakwagh ia lu a inja ga saa ia zua sha kwagh u i lu ôron la vough, shi ia bende a uma u orhenen la kpaa.
6 Tese Mbamtsera Mba Ve Lu ken Mimi u Ngohol La: Ior ka ve soo u ma ve fe mbamtsera mba vea zua a mi aluer ve yar tom sha kwagh u ve lu henen la yô. Wase or u ú lu henen kwagh a nan la nana̱ nenge a kwaghfan u a lu ken mkaanem ma Paulu yange nger ken 2 Timoteu 3:14-17 la.
7 Aluer mbagenev dondo kwagh u ú lu tesen ve la ga kpa, iyol i de kpeen we ga. Ka ior cii asema ve a ngohol ityesen ga. (Mat. 13:15) Nahan cii kpa, mbagenev ka ve hingir mbananjighjigh. (Aer. 17:32-34) Iniôngon i ú nôngon wer loho u dedoo u̱ ar a asema a ior la i seer wasen ior ve “kuran” akaa a Yehova yange wa kwagh sha mi la.